ꪢ ꪴꪀꪱꪉ ꪊꪱꪥ ꪄꪱꪣ ꪶꪝꪙ ꪤꪱꪀ ꪋꪱ ꪑꪱꪥ ꪹꪄꪱ ꪜꪲ ꪵꪮꪚ ꪻꪢ

ꪀꪺꪉ ꪶꪎ 6 ꪶꪀꪉ ꪊꪉꪲ ꪼꪒ ꪵꪈꪉ ꪤꪱꪫ ꪥꪀꪴ ꪀꪫꪱꪙ ꪨꪲ ꪊꪺꪚ ꪏꪒꪸ ꪭꪱꪥ ꪶꪝ ꪙꪣꪾ ꪘꪮꪉ ꪩꪱꪒ ꪵꪀꪉ ꪒꪙꪲ ꪒꪱꪙ ꪀꪱꪒ ꪶꪋꪒ , ꪙꪮꪀ ꪚꪮꪙ ꪹꪋꪉ ꪔꪱ ꫃ꪉꪉ ꪄꪮꪉ ꪹꪋꪉ ꫄ꪢꪣ ꪙꪮꪙ ꪎꪱ ꪩꪱꪫ ꪊꪱꪥ ꪊꪍꪚ ꪼꪨ ꪙꪮꪉ ꪎꪸ ꫃ꪢꪒ ꪭꪳ ꪹꪋꪉ ꫄ꪢꪣ ꪙꪮꪙ ꪭꪫꪱ ꪩꪱꪙ ꪵꪀꪉ ꫄ꪀ ꫄ꪎ 2 ꪹꪋꪉ ꪔꪫꪥꪸ ꪭꪮꪀ ꪵꪀꪉ ꪊꪉꪴ ꪭꪮꪀ ꫄ꪀ ꫄ꪎ ꪖꪲ ꫄ꪊꪙ ꪢꪴ ꪁꪱꪉ ꪊꪱꪥ ꪨꪷ ꪝꪉꪳ ꫄ꪒꪙ ꪫꪲ ꪊꪺꪚ ꪏꪒꪸ ꪭꪱꪥ ꫄ꪐꪒ ꪀꪚꪾ ꪨꪱꪥ ꪬꪮꪉ ꪵꪮꪚ ꪊꪺꪚ ꪬꪀꪷ ꪵꪜ , ꪨꪱꪥ ꪶꪀꪉ ꪊꪉꪲ ꪵꪀꪉ ꪹꪋꪉ ꪄꪮꪉ ꪹꪚꪱ ꪎꪴ ꪼꪒ. ꪀꪚꪾ ꪩꪺꪉ ꪶꪜꪉ ꪻꪊ ꪄꪮꪉ ꪊꪮꪥ ꪹꪤ ꪄꪮꪉ ꪊꪣꪴ ꪢꪴ ꪣꪲ ꪊꪀꪳ ꪁꪫꪙꪸ ꪵꪀꪉ ꪩꪺꪉ ꪀꪮꪚ ꪶꪭꪣ ꪵꪚꪉ ꪜꪽ ꪄꪮꪉ ꪝꪉꪳ ꪶꪔ ꪊꪀꪳ ꪕꪉꪳ ꫛ ꪹꪏꪉ ꪙꪽ ꪀꪺꪉ ꪥꪱꪙ ꫜ ꪝꪉꪳ ꪹꪭꪙ ꪹꪋꪉ ꪁꪷ ꪅꪽ ꪅꪱꪉ ꪋꪴ ꪄꪴ ꪈꪱꪥ ꪒꪲ ꫄ꪂꪒ ꪼꪫ ꪑꪱꪥ ꪹꪄꪱ ꪜꪲ ꪵꪮꪚ ꪻꪢ.

ꪝꪮꪣ ꪀꪚꪾ ꪫꪀꪸ ꪵꪀ ꪁꪣꪾ ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ ꫃ꪥꪒ ꪮꪮꪀ, ꪎꪱꪈ ꪵꪜꪉ ꪹꪨꪱ ꪹꪋꪉ ꫄ꪨꪚ , ꪝꪉꪳ ꪹꪋꪉ ꪵꪮꪚ ꪁꪷ ꫄ꪩꪉ ꪼꪜ ꪤꪳ ꪤꪱꪣ ꪝꪉꪳ ꪋꪺ ꪹꪭꪙ ꪮꪱꪥ ꫃ꪯꪣ ꪭꪮꪀ ꪎꪉꪲ ꪊꪺꪚ ꪏꪒꪸ ꪭꪱꪥ ꪘꪀꪾ ꪀꪺꪉ ꪋꪴ ꪶꪠꪙ ꪙꪮꪉ ꪩꪱꪒ ꪵꪀꪉ ꪔꪒꪲ ꫄ꪔꪙ ꪝꪲ ꪙꪮꪉ ꪊꪮꪉ ꪵꪭꪉ ꪵꪀ ꪁꪣꪾ ꪥꪱꪀ ꪋꪱ, ꪻꪬ ꪩꪀꪴ ꪙꪮꪉ ꪣꪱ ꫄ꪨꪚ ꪵꪮꪚ ꪵꪣꪙ ꪥꪱꪙ ꪕꪒꪷ ꪜꪙꪴ. ꪝꪉꪳ ꪣꪳ ꪀꪱꪥ ꪣꪱ, ꪝꪉꪳ ꪙꪮꪉ ꪭꪮꪀ ꪎꪉꪲ ꪢꪱ ꫄ꪨꪚ ꪵꪮꪚ ꪮꪱꪫ ꪕꪀꪴ ꪝꪷ.

ꪭꪮꪒ ꪼꪅ ꪔꪉꪲ ꪮꪙꪸ ꪚꪱꪥ ꪁꪷ ꪐꪽ ꪵꪥꪉ ꫄ꪊꪒ ꪹꪩꪉ, ꪩꪺꪉ ꪕꪉꪸ ꪮꪱꪙ ꪄꪮꪭ ꪝꪉꪳ ꪶꪀꪉ ꪊꪉꪲ ꪹꪋꪉ ꫄ꪨꪚ ꪊꪮꪙ ꫄ꪋ ꪹꪮꪱ ꪹꪄꪱ ꪎꪴ ꪹꪩꪱ, ꪎꪮꪉ ꪣꪱ ꪻꪬ ꪭꪮꪀ ꪎꪉꪲ ꪵꪮꪚ ꪘꪉꪷ ꪝꪉꪳ ꪬꪮꪉ ꪵꪮꪚ ꪶꪁꪚ ꪀꪽ. ꪶꪒꪥ ꪀꪚꪾ ꪚꪮꪙ ꪹꪋꪉ ꪊꪺꪚ ꪙꪣꪾ ꪙꪮꪉ ꪩꪱꪒ ꪯꪙ ꪚꪱꪥ ꪁꪷ ꪣꪲ ꪩꪺꪉ ꪻꪬ ꪵꪮꪚ ꪘꪉꪷ ꪝꪉꪳ ꪬꪮꪉ ꪵꪮꪚ ꪕꪱꪣ , ꪜꪀꪴ ꪝꪺ ꪫꪀꪸ ꪔꪉꪷ ꪵꪔꪉ ꪝꪉꪳ ꪬꪮꪉ ꪵꪮꪚ ꪻꪢ...

                                                ꪒꪉꪲ ꪔꪺꪙ - ꪵꪭꪉ ꪥꪀꪲ

Mù Cang Chải khảm pộn dạk cha nhại khảu pi ép máư

Cuông số 6 công trình đảy ngành giáo dục quản lý chuốp xiệt hại pộ nặm nong lạt cánh đin đán cạn chột, nọk bón trương Tà Nghênh khong Trương mầm non xã Lao Chải chuốp lày xìa mết, hư trương mầm non Hoa Lan cánh cơ sở 2 trương Tiểu học cánh Trung học cơ sở thị trân Mù Cang Chải lỏ pưng đơn vị chuốp xiệt hại nắc nhất, cắp lai hỏng ép chuốp hắc pé, lai công trình cánh chương khong báu xủ đảy. Cắp luông pông chàư choi dừa khong chủm mú mi chức quyên cánh luông cóp hôm bánh păn khong pưng tổ chức, tựng côn xương nặn cuông dan nưng, pưng hươn trương cọ khăn khang chu khu ngai đi nhất vạy nhại khảu pi ép máư.

Pọm cắp vịa kẻ cặm xiệt hại pộ phôn nong dệt ók, sảng panh lau trương lớp, pưng trương ép cọ lâng pày dử dam pưng chua hươn ải êm học sinh chuốp xiệt hại nắc cuông chu phôn nong lạt cánh tít tơn pi nọng chóng hanh kẻ cặm dạk cha, hảu lụk nọng ma lớp ép men dan tặt pun. Pưng mự cài ma, pưng trương ép cuông kỷ mự cài ma pưng  noọng học sinh ma lớp ép áo tục po.

Họt khạy tỉnh Yên Bái cọ nhẳn danh lau chất lượng, luông tiêng an khong pưng công trình trương lớp cón chơ au khảu xủ lau, xong ma hảu học sinh ép nẳng pưng hỏng ép cộp căn. Đối cắp bón trương chuốp nặm nong lạt, Yên Bái cọ mi luông hảu ép nẳng pưng hỏng ép tạm, púc chuân vịa tẳng tánh pưng hỏng ép máư...

Cắp luông pông chàư khong chu cấp, chu ngành cánh cá lai côn cuông bản mương, say cánh tro phổng xùng Mù Cang Chải khảm pộn dạk cha lăng chu phôn nong, hăn hư nhại khảu pi ép máư.

                                                Đinh Tuấn - Hạnh dịch