ꪮꪙꪸ ꪚꪱꪤ ꪠꪴ ꪑꪉꪰ ꪣꪲ ꪨꪱꪥ ꪠꪴ ꪑꪉꪲ ꪊꪺꪚ ꪄꪱꪥ ꪼꪜ ꪹꪣꪉ ꪙꪮꪀ

          ꪼꪅ ꪙꪲ ꪜꪙꪸ ꪎꪸ ꪹꪄꪱ ꪹꪣ ꪭꪮꪒ ꪝꪉꪳ ꪚꪱꪙ ꪶꪠꪉ ꪎꪉꪴ ꪨꪀꪰ ꪼꪀ ꪼꪫ ꪵꪚꪫ ꪹꪩ ꪹꪮꪥ ꪙꪮꪉ ꪠꪴ ꪑꪉꪲ ꪄꪱꪥ ꪼꪜ ꪹꪣꪉ ꪙꪮꪀ, ꪶꪣꪒ ꫛ ꪻꪠ ꪭꪱꪥ ꪁꪷ ꪎꪴ ꪒꪙꪸ ꪗꪫꪱꪥ ꪄꪣꪾ ꪣꪳ ꪵꪀꪉ ꪹꪄꪱ ꪋꪱꪉ ꪣꪱꪉ ꪎꪱ ꪶꪭꪥ ꫃ꪥꪒ ꪵꪀꪫꪙ ꪵꪀꪉ ꪹꪊꪉ ꪹꪋ ꪵꪚꪫ ꪹꪩ ꪹꪮꪥ ꪙꪮꪉ ꪠꪴ ꪑꪉꪲ ꪄꪱꪥ ꪼꪜ ꪹꪣꪉ ꪙꪮꪀ.

          ꫄ꪡꪙ ꪨꪱꪥ ꪜꪉꪳ ꫛ ꪏꪳ ꪄꪱꪥ ꫛ ꪁꪷ ꪜꪮꪣ ꪜꪱꪀ ꪙꪺ ꪬꪺ ꪣꪺꪙ ꪼꪫ ꪵꪚꪫ ꪹꪩ ꪠꪴ ꪑꪉꪲ ꪵꪀꪉ ꪨꪱꪙ ꪙꪮꪥ ꪑꪉꪲ ꪹꪋ ꪙꪮꪥ ꫛ ꪼꪜ ꪕꪮꪥ ꪹꪊꪱ. ꪹꪝ ꪜꪺꪉ ꪀꪙꪲ ꪩꪺꪉ ꪤꪴ ꪑꪉꪰ ꪝꪷ ꪨꪱꪥ ꪥꪱꪀ ꪋꪱ ꪹꪏꪉ ꪙꪽ ꪝꪉꪳ ꫛ ꪙꪲ ꫃ꪬꪙ ꫛ ꪮꪙꪳ ꪹꪊꪉ ꪹꪋ ꪥꪙꪸ ꪶꪎꪣ ꪻꪊ ꪼꪜ ꪕꪮꪥ ꪼꪈ ꪀꪚꪾ ꪢꪮꪉ ꪁꪮꪉ ꪄꪱꪣ ꪄꪮꪥ ꪎꪸ ꪁꪒꪰ ꪁꪉꪴ.

          ꪕꪮꪥ ꪚꪙꪸ ꪢꪱꪥ ꪕꪮꪚ ꪬꪮꪣ ꪄꪮꪉ ꪝꪉꪳ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪜꪲ 2016 ꪶꪎ ꫛ ꪊꪺꪚ ꪵꪚꪫ ꪹꪩ ꪄꪱꪥ ꪼꪜ ꪹꪣꪉ ꪙꪮꪀ ꪘꪉꪰ ꪔꪉꪲ ꪮꪙꪸ ꪚꪱꪥ ꪁꪷ ꪩꪙꪳ ꪄꪙꪳ 60 ꫛ, ꪨꪱꪥ ꪶꪁꪚ ꪕꪷ ꪵꪫꪒ ꪻꪎ ꪜꪲ 2015. ꪊꪣꪴ ꪢꪴ ꪶꪀꪉ ꪮꪱꪙ ꪔꪉꪲ ꪮꪙꪸ ꪚꪱꪥ ꪁꪷ ꪒꪱꪉ ꫄ꪊꪚ ꪙꪾ ꪬꪽ ꪵꪭꪉ ꪝꪉꪳ ꪫꪀꪸ ꫃ꪥꪒ ꪉꪚꪸ ꪫꪴ ꪼꪫ ꪶꪏꪙ ꪋꪉꪲ.

          ꪼꪫ ꪶꪏꪙ ꪋꪉꪲ ꪀꪚꪾ ꪵꪠꪙ ꫛ ꪠꪒꪸ ꪶꪕꪥ ꪏꪳ ꪄꪱꪥ ꫛ ꪙꪮꪀ ꪘꪱ ꪫꪀꪸ ꪉꪚꪸ ꪫꪴ ꪄꪮꪉ ꪊꪣꪴ ꪢꪴ ꪶꪀꪉ ꪮꪱꪙ ꪭꪳ ꫄ꪀꪚ ꪮꪫꪲꪥ ꪊꪉꪲ ꪁꪫꪙꪸ ꪩꪙꪳ ꪹꪏ ꪨꪷ ꪶꪭꪥ ꪠꪴ ꪑꪉꪲ ꪋꪴ ꪒꪸ ꪹꪠꪉ ꫄ꪁꪙ ꪋꪙꪸ ꪜꪱꪫ ꫄ꪩꪉ ꫄ꪋ ꪵꪀꪉ ꪁꪒꪳ ꪼꪒ ꪩꪱꪉ ꪒꪲ ꪹꪏ  ꪻꪢ ꪭꪮꪒ ꫛ ꫄ꪤꪙ ꪶꪠꪉ ꪎꪉꪴ ꪣꪱ ꪕꪱꪉ ꪫꪀꪸ ꪵꪚꪫ ꪹꪩ ꪄꪮꪉ ꪵꪠꪙ ꫛ ꪻꪊ ꪭꪱꪥ ꪁꪱ ꪄꪱꪥ ꫛ. ꪙꪮꪀ ꪙꪽ ꪮꪮꪀ ꫄ꪁꪙ ꪶꪜꪉ ꪻꪊ ꪋꪮꪥ ꪹꪤ ꪜꪉꪳ ꪋꪺ ꪹꪭꪙ ꪝꪷ ꪤꪱꪀ ꪋꪱ ꪀꪺꪉ ꪫꪀꪸ ꪢꪱ ꪼꪄ ꪀꪉꪲ ꫃ꪔ ꪔꪉꪰ ꪵꪔꪉ ꪜꪺꪉ ꪀꪙꪲ ꪩꪺꪉ ꪤꪴ ꪮꪣꪲ ꪝꪷ ꪘꪷ ꪝꪮꪣ ꪹꪚꪱ ꪼꪫ ꪻꪬ ꪶꪢꪒ ꫛ ꪻꪊ ꪭꪱꪥ ꪵꪚꪫ ꪹꪩ ꪼꪒ.

                                        ꪓꪉꪲ ꪔꪺꪙ- ꪕꪮꪉ ꪵꪯꪉ ꪥꪀꪲ

Yền Bái phủ nhinh phổng xùng nhăng lâng chuốp lưa khài pày mương nọk

        Khay nị piến xìa khảu mưa họt pưng bản phổng cuồng lắc cày vạy chướng chưa ưởi nọng phủ nhinh pày khài, mốt côn chằư hại cọ xủ điện thoại khắm mư cánh khảu pưng trang mạng xã hội dệt quén cánh chướng chưa bẻo lưa ưởi nọng khài pày mương nọk.

Phân lài pưng côn xự khài côn cọ pòm pák nua hùa muôn vạy bẻo lưa phủ nhinh cánh làn nọi nhinh chựa nọi côn pày toi chảu. Pưa puồng kìn luông dú nhăng pọ lài dạk cha, xương nặn pưng côn nị hền côn ứn chướng chưa lỏ xồm chằư pày toi ngày, cắp mòng cong kiếm đảy lài ngơn vạy khảm khói xìa cặt cung.

        Toi tồ số biền mài tọp hòm khòng pưng cờ quàn mi chức quyên, pì 2016 số côn chuốp bẻo lưa nẳng tỉnh Yền Bái khài pày mương nọk phít phép cọ lưn khửn 60 côn, lài cộp to vẹt xắư pì 2015. TÓ luông đắc lèm khòng mốt côn khài côn, chủm mú cồng àn tỉnh Yền Bái cọ đàng chấp năm hằn hanh pưng luông dệt nghiệp vụ.

      Vạy xôn chinh khát nang cắp phèn côn phít tội xự khài côn, nọk nả vịa nghiệp vụ khòng chủm mú cồng àn, hư cấp uỷ, chính quyên, lưn xưa lỏ Hội phủ nhinh chu địa phường cận chiên páo lâng chơ, cánh cựt đảy lang đì xưa mắư họt côn dần phổng xùng ma tang vịa bẻo lưa khòng côn phít tội xự khài côn, lưn xưa lỏ cắp pưng ưởi nọng chựa nọi côn. Nọk nặn ók cận pồng chằư choi dừa pưng chua hươn pọ dạk cha cuồng vịa mả khày kình tế, tẳng tánh puồng kìn luông dú ím po nò pọm, báu vạy hẳư mốt côn chằư hại bẻo lưa đảy./.

                                        Đinh Tuấn-Anh dịch