ꪮꪙꪸ ꪚꪱꪥ ꫄ꪀꪙ ꪢꪴ ꪄꪱꪥ ꪕꪷ ꫄ꪀꪙ ꪣꪽ ꪶꪈ , ꫛ ꪵꪔꪉ ꪩꪉꪸ ꪹꪚꪱ ꪊꪀꪷ ꫃ꪥꪒ ꪹꪏꪉ ꪏꪳ

ꪨꪷ ꪋꪺ ꪹꪭꪙ ꫜ ꪼꪄ ꪀꪫꪱꪉ ꪫꪀꪸ ꪵꪔꪉ ꪩꪉꪸ ꪶꪀꪀ ꪵꪅꪫꪀ ꪘꪉꪷ ꪎꪱ ꪬꪱꪙ ꪒꪱ, ꪭꪫꪙꪸ ꪮꪙꪸ ꪚꪉꪲ ꪔꪉꪲ ꪮꪙꪸ ꪚꪱꪥ , ꪣꪲ ꪥꪱꪙ ꪋꪺ ꪹꪭꪙ ꪩꪉꪳ ꪩꪉꪸ ꪋꪲ ꪱꪫꪮ ꪭꪮꪒ 500 ꪶꪔ ꪢꪴ. ꪣꪲ ꪥꪱꪙ ꪶꪔ ꪢꪴ ꪄꪱꪥ ꪼꪒ ꪕꪷ ꪢꪮꪥ ꫄ꪀꪙ 15 ꪝꪽ ꪢꪽ, ꪝꪉꪳ ꪢꪴ ꪄꪮꪉ ꪋꪺ ꪹꪭꪙ ꪩꪉꪴ ꪣꪲ ꪤꪱꪫ 150 ꪶꪔ. ꪀꪺꪉ ꪙꪽ ꪣꪲ ꪤꪱꪫ 50 ꪶꪔ ꪻꪐ ꪘꪀꪷ ꪵꪔ ꪕꪱ ꫜ ꪭꪮꪒ ꪕꪱ ꪎꪮꪉ.

ꪼꪭ ꪹꪚꪱ ꪨꪱꪥ , ꪙꪱ ꪭꪳ ꪙꪮꪥ , ꪋꪺ ꪹꪭꪙ ꪜꪱ ꪈꪙꪸ ꪖꪲ ꪖꪫꪲꪥ ꪤꪴ ꪶꪖꪙ ꪱꪮꪙ ꪩꪱꪀ 3, ꪎꪱ ꪬꪱꪙ ꪒꪱ, ꪭꪫꪸꪙ ꪮꪙꪸ ꪚꪉꪲ ꪋꪙꪸ ꪼꪜ ꪀꪴ ꫄ꪉꪙ ꪶꪀꪀ ꪼꪫ ꪵꪔꪉ ꪩꪉꪸ ꪢꪴ. ꪬꪱꪀ ꪫꪱ ꪵꪔꪉ ꪩꪉꪸ ꪢꪴ ꪼꪒ 3 ꪋꪴ ꪭꪳ ꪭꪮꪒ ꪋꪴ ꪙꪲ, ꪋꪺ ꪹꪭꪙ ꪜꪱ ꪝꪷ ꪼꪈ ꪤꪱꪀ ꪋꪱ. ꪀꪱꪥ 60 ꪶꪔ ꪢꪴ , ꪢꪮꪥ ꪶꪔ ꪻꪐ ꪀꪱꪥ ꪕꪱ ꪬꪱꪀ ꪫꪱ ꪹꪚꪱ ꪣꪲ ꪻꪠ ꪣꪱ ꪖꪱꪣ ꪏꪳ, ꪹꪏꪉ ꪙꪽ ꪹꪚꪱ ꪊꪀꪷ ꪹꪮꪱ ꪎꪉꪷ ꪣꪱ ꪻꪬ ꪢꪴ ꪀꪙꪲ. ꫄ꪉꪙ ꪏꪳ ꪭꪣꪾ ꪻꪬ ꪢꪴ ꪀꪙꪲ ꪹꪚꪱ ꪣꪲ, ꪋꪴ ꪹꪕ ꫄ꪩꪉ ꪻꪬ ꪶꪔ ꪢꪴ ꪀꪙꪲ 3 ꪹꪝ ꪀꪺꪉ ꪣꪳ, ꪼꪅ ꪻꪬ ꪀꪙꪲ ꪕꪷ 2 ꪹꪝ, ꫃ꪕꪉ ꪻꪬ ꪀꪙꪲ ꫃ꪕꪉ ꪼꪠ ꪤꪮꪣ. ꪔꪉꪲ ꪮꪀꪀ ꪢꪮꪥ ꪶꪔ ꪢꪴ ꪩꪉꪸ ꪭꪮꪒ 4 ꪹꪚꪙ, ꫄ꪉꪙ ꪤꪮꪣ ꪻꪎ ꪏꪳ ꪭꪣꪾ, ꪏꪳ ꪹꪋ ꪢꪮꪥ ꪶꪔ ꪋꪲ ꪮꪱꪫ ꪭꪮꪒ 4 ꪋꪫꪥꪸ, ꪹꪚ ꫃ꪭ ꪙꪚꪾ ꪭꪮꪒ ꪶꪀꪉ ꪵꪭꪉ ꪹꪊꪱ ꪩꪉꪸ ꪹꪏꪉ ꪜꪲ ꪀꪱꪥ ꪢꪮꪥ ꪶꪔ ꪄꪱꪥ ꪼꪒ 4 ꪋꪫꪸꪥ 5 ꪭꪳ ꪼꪅ ꪙꪲ ꪼꪒ ꪕꪷ ꪤꪱꪫ ꪋꪫꪥꪸ ꪬꪱ.

ꪘꪉꪷ ꪶꪠꪉ ꪎꪉꪴ ꪵꪖꪉ ꪶꪠ ꪔꪉꪲ ꪮꪙꪸ ꪚꪱꪥ , ꫛ ꪵꪔꪉ ꪩꪉꪸ ꪑꪉꪷ ꪝꪷ ꪨꪱꪥ ꪥꪱꪀ ꪋꪱ ꪶꪝ ꫄ꪉꪙ ꪶꪀꪀ ꪹꪚꪱ ꪣꪲ ꪨꪱꪥ. ꪼꪫ ꪢꪱ ꪼꪄꪫꪀꪸ ꫃ꪥꪒ ꪹꪥꪙ , ꫛ ꫄ꪤꪙ ꪼꪒ ꪀꪴ ꫄ꪉꪙ ꪶꪀꪀ ꫄ꪈꪙ ꪭꪱꪉ. ꪣꪱ ꪼꪅ ꪙꪲ ꫄ꪙ ꪔꪣꪳ ꫄ꪙ , ꫃ꪕꪉ ꪄꪙꪳ ꫄ꪉꪙ ꫄ꪙ ꫄ꪈꪙ ꪭꪱꪉ ꫃ꪕꪉ ꪼꪒ ꪏꪳ ꪭꪣꪾ ꪣꪱ ꪹꪀ ꪢꪴ ꪭꪱꪉ ꪣꪳ. ꪄꪱꪥ ꪹꪚꪱ ꪄꪱꪥ ꪼꪒ , ꪹꪚꪱ ꪩꪉꪸ ꪁꪷ ꪹꪚꪱ ꪊꪀꪷ ꫃ꪥꪒ ꪹꪏꪉ ꪏꪳ. ꫄ꪡꪙ ꪨꪱꪥ ꪝꪉꪳ ꪋꪺ ꪹꪭ ꫄ꪤꪙ ꪭꪱꪫ ꪩꪉꪸ ꪼꪫ ꪬꪱꪀ ꪫꪱ ꪨꪱꪥ ꪋꪺ ꪹꪭꪙ ꪁꪷ ꪹꪚꪱ ꪊꪮꪉ ꪼꪒ ꪵꪘꪉ ꪄꪱꪥ ꪁꪱ ꪖꪀꪴ ꪎꪸ, ꪹꪝ ꪹꪮꪱ ꪼꪫ ꪹꪑꪉ ꪔꪣꪳ ꫄ꪙ. ꪩꪉꪳ ꫄ꪊꪙ ꪹꪔꪉ - ꪊꪴ ꪕꪀꪲ ꪶꪭꪥ ꪺꪓꪉ ꪀꪫꪱꪙ ꪋꪲ ꫄ꪭꪚ ꪔꪱꪀ ꪎꪱ ꪵꪔꪉ ꪩꪉꪸ ꪬꪱꪙ ꪒꪱ ꪻꪬ ꪭꪴ, ꪎꪱ 14 ꪵꪖꪉ ꪪꪙꪸ ꪄꪮꪉ ꫄ꪭꪚ ꪔꪱꪀ ꪎꪱ ꪝꪮꪣ ꪵꪜꪀ ꪹꪏꪉ ꪀꪽ, ꪹꪭꪙ ꪻꪒ ꪁꪷ ꪝꪷ ꪥꪱꪀ ꪋꪱ ꪹꪏꪉ ꪙꪲ.

ꪭꪮꪒ ꪼꪅ , ꪁꪱ ꪄꪱꪥ ꫄ꪀꪙ ꪢꪴ ꪵꪭꪉ ꫜ ꪕꪷ ꫄ꪤꪙ ꪚꪽ ꪣꪽ ꪶꪈ ꫜ, ꫛ ꫄ꪤꪙ ꪭꪱꪫ ꪁꪮꪉ ꪖꪱ ꪀꪱ ꪁꪮꪙ ꪄꪙꪳ ꫃ꪩꪀ ꪙꪮꪥ. ꪀꪺꪉ ꫄ꪋ ꪙꪽ, ꪵꪈꪉ ꪣꪲ ꪊꪀꪳ ꪁꪫꪙꪸ ꪵꪀꪉ ꪝꪉꪳ ꪓꪸ ꪹꪠꪉ ꪁꪷ ꫃ꪭ ꪣꪲ ꪩꪺꪉ ꪵꪀ ꪼꪄ ꪼꪫ ꪋꪮꪥ ꪝꪲ ꪙꪮꪉ. ꪼꪅ ꪙꪲ ꪔꪉꪲ ꪮꪙꪸ ꪚꪱꪥ ꪝꪉꪳ ꪢꪴ ꪣꪲ ꫃ꪕꪉ ꫃ꪢꪒ ꪤꪱꪫ 550 ꪝꪽ ꪶꪔ. ꪀꪚꪾ ꪁꪱ ꪁꪮꪙ ꪖꪀꪴ ꪹꪏꪉ ꪼꪅ ꪙꪲ, ꪝꪉꪳ ꪢꪴ ꪋꪲ ꪤꪮꪙ ꪶꪩꪉ ꪀꪺꪉ ꪥꪱꪘ ꪼꪜ ꪘꪱ.

                                          ꪓꪉꪲ ꪔꪺꪙ - ꪵꪭꪉ ꪥꪀꪲ

Yên Bái: cân mù khài to cân bẳn măn ngồ côn tảnh liệng

báu chắc dệt xương xư

          Lỏ chua hươn nưng khày quảng vịa tảnh liệng cốc khoẹ nẳng xã Hán Đà, huyện Yên Bình, tỉnh Yên Bái, mi dan chua hươn lung Đăng Văn Hãnh dú thôn Hồng Quân 1 tảnh liệng chi áo họt 500 tô mù. Mi dan tô mù khài đảy to mỏi cân 15 păn mằn, pưng mù khong chua hươn lung mi dáo 150 tô, cuông nặn mi dáo 50 tô nháư nắc dáo tạ nưng họt tạ xòng. Chệt hứa lày cay dọi nẳng bía nả.

          Hay báu lai, na hư nọi, chua hươn pả Nguyễn Thị Thuỷ dú nẳng thôn An Lạc 3, xã Hán Đà, huyện Yên Bình chiên pày củ ngơn cốc vạy tảnh liệng mù. Hák va tảnh liệng mù đảy 3 chu hư họt chu nị, chua hươn pả pọ ngay dạ cha. Cài 60 tồ mù, mỏi tô nháư cài tạ hák va báu mi phaư ma thàm sự, xương nặn pả cọ chắc àu săng ma hảu kin. Ngơn sự hăm hảu mù kin báu mi, chu tưa lâng hảu tô mù kin 3 pựa cuông mự, khay ma hảu kin 2 pựa, tênh hảu kin tênh phảy dòm. Tính ók mỏi tô mù liệng họt 4 bườn, ngơn dom sáư sự hăm, sự chựa mỏi tô chi áo họt 4 triệu, báu hê nặp họt công hanh chảu liệng xương pi cài mỏi tồ khài đảy 4 triệu hả hư khay đảy to dáo triệu hả.

          Nẳng phổng xùng đin pu tỉnh Yên Bái, côn tảnh liệng nhăng pọ lai dạk cha pộ ngơn cốc báu mi lai. Vạy mả khày vịa dệt dượn, côn dân đảy củ ngơn cốc ngân hang. Hák va ma khay nị nợ tứm nợ, tênh khừn ngơn tà mả ngân hang tênh đảy sự hăm ma cưa mù hạng mự. Khài báu khài đảy, báu liệng cọ báu chắc dệt xương xư, phân lai pưng chua hươn dân nhăng chóng hanh tảnh liệng, hák va lai chua hươn cọ báu cặm pa đảy, khài tô mù ca thú xìa, pưa va àu vạy nhương tứm nợ. Lung Trần Tường - Chủ tịch hội đông quản trị Hợp tác xã tảnh liệng Hán Đà hảu hụ, cá 14 thành viên khong hợp tác xã pọm pék xương căn, hươn đàư cọ pọ dạk cha xương nị.

          Họt khạy, ca khài cân mi hanh nưng to cân bẳn măn ngồ, côn dân hao cong thả ca con khửn lệch nọi. Cuông chơ nặn, ngành mi chức quyên cánh pưng địa phương cọ hê mi luông  kẻ khày vạy choi po me pi nọng. Khay nị tỉnh Yên Bái pưng mù mi tênh mết dáo 550 păn tô. Cắp ca con thúk xương khay nị, pưng mù mi xương chi dón lông cuông dan pảy nả.

                                                                   Đinh Tuấn - Hạnh dịch