Bai thứ 5 mự 14/9/2017

Phổng xùng Nặm Cha, Nặm Nhun, Lai Chầu pì ép máư lài khù chau lò

          Té trùng tầm huyện Nặm Nhun, vạy khảu đảy xã Nặm Cha pưng mự nị, cốc khoẹ lỏ đảy khảm cài lừng nòng thuỷ điện Lài Chầu cánh 2 me nặm nhắư. Lằng nặn lỏ pày tứm gian tang bốc chi áo họt 20 cày số. Nẳng xểm tang nị, pưng xay giáo đảy kiểu xích xè xắư cuông xè cánh mết thóng mự tang chắng pày họt bón. Pưng xểm tang pày ma đòm bản pày họt trùng tầm xã cọ pọm chuốp cạn chột, lài gian tang chuốp nong lạt xìa mết, pưng xay giáo đảy hàm xè máy cánh khảm nặm luồng pày niếu chưa học sình ma lớp ép.

          Àu đảy học sình ma lớp ép dạk lẹo, lài mự phạ phồn luồng, nặm luồng nhưng khửn xùng, pưng hươn trương nẳng phổng xã Nặm Cha đảy hẳư mú xay giáo trai nưng hảo hanh, hụ loi nặm vạy khảm nặm pày tang nọk xự chương kìn, chuông hong nả vịa bán trú. Pưa pì nị cá 3 hươn trương: mầm non, tiểu học, cánh trùng học cờ sở tổ chức khài giảng pọm mự điều, xương nặn pưng nọng học sình trùng học cờ sở đảy xủ hưa pe cánh xài chựa àu cằn khảm nặm nong.

          Xay giáo Lê Đình Chuyền, hiệu trưởng trương Tiểu học bán trú Nặm Cha hẳư hụ: Mi đảy số học sình ma trương tục po lỏ luông chóng hanh khòng chu xay giáo hạng bườn cài ma. Khù muôn luông hòm mự khài giảng báu hê lợp mết hư khù chau lò ma họt. Chăm va cọ phong khảu nặm căm kìn vạy, hák va cắp tang pày ma dạk cha xương khay nị hư vịa nhẳn pao chuông hong dinh dưỡng hẳư pựa kìn học sình lỏ pọ dạk cha:

          Pộ phồn nong tênh mết pưng xểm tang khửn mưa trùng tầm xã pọm báu long cài đảy, xương nặn khay nị luông văn nhất vạy pày họt xã Nặm Cha, huyện Nặm Nhun lỏ khảm cài lừng nòng thuỷ điện Lai Chầu cánh nhang tìn pày toi tang bốc. Khù phắư mon khòng xay cánh tro nẳng chu trương ép nẳng Nặm Cha lỏ gian dệt tang khửn mưa xã văn phạo đảy dệt mộm lẹo, cánh xểm cau khảm cài nặm luồng văn pường đảy chấp năm. Mi xương nặn hư tồ xừ chắng chi mưa họt đảy lài bản cánh puồng kìn luông dú khòng côn dần nẳng Nặm Cha chắng văn phạo đảy piến thái./.

                                                          Khắc Kiên-Tòng Anh dịch

ꪛꪱꪥ ꪖꪳ 5 ꪣꪳ 14.9.2017

ꪶꪠꪉ ꪎꪉꪴ ꪙꪣꪾ ꪋꪱ ꪙꪣꪾ ꪑꪙꪴ ꪨꪱꪥ ꪹꪊꪱ ꪜꪲ ꪵꪮꪚ ꪻꪢ ꪨꪱꪥ ꪹꪋꪱ ꪨꪷ

ꪵꪔ ꪊꪉꪴ ꫄ꪔꪣ ꪭꪫꪙꪸ ꪙꪣꪾ ꪑꪙꪴ ꪼꪫ ꪹꪄꪱ ꪹꪣ ꪼꪒ ꪎꪱ ꪙꪣꪾ ꪋꪱ ꪝꪉꪳ ꪣꪳ ꪙꪲ ꪶꪀꪀ ꪵꪅꪫ ꪨꪷ ꪼꪒ ꪄꪱꪣ ꪀꪱꪥ ꪨꪉꪳ ꪘꪮꪉ ꪖꪫꪥꪲ ꪓꪙꪸ ꪨꪱꪥ ꪹꪊꪱ ꪵꪀꪉ 2 ꪵꪣ ꪙꪣꪾ ꪻꪐ. ꪨꪉꪰ ꪙꪽ ꪨꪷ ꪼꪜ ꪎꪚꪳ ꫃ꪎꪣ ꪕꪱꪉ ꪶꪚꪀ ꪤꪱꪫ 20 ꪼꪀ ꪶꪎ. ꪘꪉꪰ ꫃ꪎꪣ ꪕꪱꪉ ꪙꪲ ꪝꪉꪳ ꪼꪏ ꪤꪱꪫ ꪼꪒ ꪀꪫꪸ ꪎꪀꪲ ꪵꪎ ꪻꪎ ꪁꪺꪉ ꪵꪎ ꪵꪀꪉ ꫃ꪢꪒ ꪖꪮꪉ ꪣꪳ ꪕꪱꪉ ꪊꪉꪰ ꪼꪜ ꪭꪮꪒ ꪚꪮꪙ. ꪝꪉꪳ ꫃ꪎꪣ ꪕꪱꪉ ꪼꪜ ꪣꪱ ꪒꪮꪣ ꪚꪱꪙ ꪼꪜ ꪭꪮꪒ ꪊꪉꪴ ꫄ꪔꪣ ꪎꪱ ꪁꪷ ꪊꪺꪚ ꪁꪱꪙ ꪶꪋꪒ ꪨꪱꪥ ꪥꪱꪙ ꪕꪱꪉ ꪙꪮꪉ ꪩꪱꪒ ꪎꪸ ꫃ꪢꪒ ꪝꪉꪳ ꪼꪏ ꪤꪱꪫ ꪼꪒ ꪬꪱꪣ ꪵꪎ ꪼꪢ ꪵꪀꪉ ꪄꪱꪣ ꪙꪣꪾ ꪨꪺꪉ ꪼꪜ ꪘꪫꪸ ꪹꪋ ꪭꪮꪀ ꪎꪉꪲ ꪣꪱ ꪵꪮꪚ.

          ꪹꪮꪱ ꪼꪒ ꪭꪮꪀ ꪎꪉꪲ ꪣꪱ ꫄ꪨꪚ ꪵꪮꪚ ꪤꪱꪀ ꪵꪩꪫ ꪨꪱꪥ ꪣꪳ ꪡꪱ ꪶꪠꪙ ꪨꪺꪉ ꪙꪣꪾ ꪨꪺꪉ ꪑꪉꪳ ꪄꪙꪳ ꪎꪉꪴ ꪝꪉꪳ ꪹꪭꪙ ꪹꪋꪉ ꪘꪉꪰ ꪶꪠꪉ ꪎꪱ ꪙꪣꪾ ꪋꪱ ꪼꪒ ꪻꪬ ꪢꪴ ꪼꪏ ꪤꪱꪫ ꪋꪱꪥ ꪬꪱꪫ ꪵꪭꪉ ꪭꪴ ꪨꪮꪥ ꪙꪣꪾ ꪼꪫ ꪄꪱꪣ ꪙꪣꪾ ꪼꪜ ꪕꪱꪉ ꪙꪮꪀ ꪏꪳ ꪹꪋꪉ ꪀꪙꪲ ꪋꪺꪉ ꪭꪮꪉ ꪘꪱ ꪫꪀꪸ ꪚꪱꪙ ꪊꪴ. ꪹꪝ ꪜꪲ ꪙꪲ ꪀꪱ 3 ꪹꪋꪉ: ꫃ꪢꪣ ꪙꪮꪙ ꪔꪫꪸ ꪭꪮꪀ ꪵꪁꪉ ꪊꪉꪴ ꪭꪮꪀ ꫃ꪀ ꫃ꪎ ꪄꪱꪥ ꪤꪱꪉ ꪝꪮꪣ ꪣꪳ ꪒꪫꪸ, ꪹꪏꪉ ꪙꪽ ꪝꪉꪳ ꪭꪮꪀ ꪎꪉꪲ ꪊꪉꪴ ꪭꪮꪀ ꫃ꪀ ꫃ꪎ ꪼꪒ ꪎꪴ ꪹꪭ ꪵꪝ ꪵꪀꪉ ꪎꪱꪤ ꪹꪋꪀ ꪹꪮꪱ ꪀꪽ ꪄꪱꪣ ꪙꪣꪾ ꪙꪮꪉ.

          ꪼꪏ ꪤꪱꪫ ꫃ꪩ ꪒꪉꪲ ꪊꪫꪙꪸ ꪭꪫꪸ ꪹꪊꪉ ꪹꪋꪉ ꪔꪫꪸ ꪭꪮꪀ ꪚꪱꪙ ꪊꪴ ꪙꪣꪾ ꪋꪱ ꪻꪬ ꪭꪴ: ꪣꪲ ꪼꪒ ꪶꪎ ꪭꪮꪀ ꪎꪉꪲ ꪣꪱ ꪹꪋꪉ ꪕꪀꪴ ꪝꪷ ꪨꪷ ꪩꪺꪉ ꪊꪮꪉ ꪵꪭꪉ ꪄꪮꪉ ꪋꪴ ꪼꪏ ꪤꪱꪫ ꪭꪱꪉ ꪹꪚꪙ ꪀꪱꪥ ꪢꪱ. ꪄꪴ ꪣꪺꪙ ꪩꪺꪉ ꪬꪮꪣ ꪣꪳ ꪄꪱꪥ ꪤꪱꪉ ꪹꪚꪱ ꫃ꪭ ꫄ꪩꪚ ꫃ꪢꪒ ꪭꪳ ꪄꪴ ꪹꪋꪱ ꪨꪷ ꪣꪱ ꪭꪮꪒ. ꪋꪣꪾ ꪫꪱ ꪁꪷ ꪡꪮꪉ ꪹꪄꪱ ꪙꪣꪾ   ꪁꪣꪾ ꪀꪙꪲ ꪼꪫ ꪬꪱꪀ ꪫꪱ ꪀꪚꪾ ꪕꪱꪉ ꪼꪜ ꪣꪱ ꪤꪱꪀ ꪋꪱ ꪹꪏꪉ ꪼꪅ ꪙꪲ ꪭꪳ ꪫꪀꪸ ꪐꪽ ꪝꪱꪫ ꪋꪺꪉ ꪭꪮꪉ ꪥꪉꪲ ꪹꪥꪉ ꪻꪬ ꪹꪝ ꪀꪙꪲ ꪭꪮꪀ ꪎꪉꪲ ꪨꪷ ꪝꪷ ꪨꪱꪥ ꪥꪱꪀ ꪋꪱ.

          ꪶꪝ ꪶꪠꪙ ꪙꪮꪉ ꫃ꪕꪉ ꫃ꪢꪒ ꪝꪉꪳ ꫃ꪎꪣ ꪕꪱꪉ ꪄꪙꪳ ꪹꪣ ꪊꪉꪴ ꫄ꪔꪣ ꪎꪱ ꪝꪮꪣ ꪹꪚꪱ ꪩꪮꪉ ꪀꪱꪥ ꪼꪒ ꪹꪏꪉ ꪙꪽ ꪼꪅ ꪙꪲ ꪩꪺꪉ ꪋꪽ ꫄ꪐꪒ ꪼꪫ ꪼꪜ ꪭꪮꪒ ꪎꪱ ꪙꪣꪾ ꪋꪱ ꪭꪫꪙꪸ ꪙꪣꪾ ꪑꪙꪴ ꪨꪷ ꪄꪱꪣ ꪀꪱꪥ ꪨꪉꪳ ꪘꪮꪉ ꪖꪫꪥꪲ ꪓꪙꪸ ꪨꪱꪥ ꪹꪊꪱ ꪵꪀꪉ ꪑꪱꪉ ꪔꪙꪲ ꪼꪜ ꪕꪮꪥ ꪕꪱꪉ ꪶꪚꪀ. ꪄꪴ ꪻꪠ ꪣꪮꪙ ꪄꪮꪉ ꪼꪏ ꪵꪀꪉ ꪋꪷ ꪘꪉꪰ ꪋꪴ ꪹꪋꪉ ꪵꪮꪚ ꪘꪉꪰ ꪙꪣꪾ ꪋꪱ ꪨꪷ ꪥꪱꪙ ꫃ꪥꪒ ꪕꪱꪉ ꪄꪙꪳ ꪹꪣ ꪎꪱ ꪫꪽ ꪡꪱꪫ ꪼꪒ ꫃ꪥꪒ ꪶꪣꪣ ꪵꪩꪫ ꪵꪀꪉ ꫃ꪎꪣ ꪹꪁꪱ ꪄꪱꪣ ꪀꪱꪥ ꪙꪣꪾ ꪨꪺꪉ ꪫꪽ ꪹꪜꪉ ꪼꪒ ꫄ꪊꪚ ꪙꪣꪾ. ꪣꪲ ꪹꪏꪉ ꪙꪽ ꪭꪳ ꪶꪔ ꪎꪳ ꪊꪉꪰ ꪋꪲ ꪹꪣ ꪭꪮꪒ ꪼꪒ ꪨꪱꪥ ꪚꪱꪙ ꪵꪀꪉ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꫛ ꫄ꪤꪙ ꪘꪉꪰ ꪙꪣꪾ ꪋꪱ ꪊꪉꪰ ꪋꪽ ꪡꪱꪫ ꪼꪒ ꪜꪙꪸ ꪖꪱꪥ.

ꪄꪀꪰ ꪁꪙꪸ-ꪵꪯꪉ ꪥꪀꪲ