Thành niền Sờn Là hák muôn chằư dệt vịa pưa puồng kìn luông dú khòng dần mương

Câu lạc bộ côn nóm cằm hák muôn chằư chôm choi tỉnh Sờn Là mi 70 thành viền, pùn lan pằn pâng té 20 họt 30 pì, lỏ pưng côn văn dọc, hùa xắư chằư phặt cắp vịa dệt. Riềng té hùa pì nị, té lài chường trình hák muôn chằư chôm choi khặc khọ xương: Khài 20 tấn mák tành nặm choi po hay me na Quảng Ngãi; chôm choi tấn 5 khảu xàn pọm cắp 50 thung mỳ tôm hẳư học sình cặt 4 bón trương huyện Phù Yền; khék hịa chôm choi tánh ók sổ phák ngơn phảy dòm cài 100 nưng triệu mằn hẳư làn Hồng Phúc, chua hươn chuốp đán kỉnh xắp hươn gian chọm cài ma; choi cài 30 đơn vị lượt hẳư pưng côn cấp cứu nẳng hươn dà tỉnh Sờn La…pọm cắp lài vịa dệt khặc khọ ứn. Câu lạc bộ cọ hôm phân bánh pằn pưng khù dạk cha cắp pô me dần mương.

GIan chằm nị nhất, pưng bạn cuồng câu lạc bộ côn nóm cằm hák muôn chằư chôm choi tỉnh Sờn Là cọ tọp hòm khék hịa choi dừa côn dần chuốp xiệt hại pộ phồn nong nẳng huyện Mương La. Nọk pày nhôm xỏng cắp mư hẳư pi nọng phổng chuốp nong lạt chuốp xiệt hại cài 200 thung mỳ tôm, 30 tay xuổng xửa lài tàng, pi nọng cuồng câu lạc bộ nhăng khék hịa chôm choi cánh àu chương khòng mưa họt pi nọng xã Nặm Pằm, cuồng nặn hôm mi: pưng tàng khảu nặm căm kìn xương: khảu xàn, mì, cừa, hom phay, dắn pha.

VỊa dệt khòng pưng bạn cuồng câu lạc bộ nóm cằm hák muôn chằư chôm choi Sờn La mi ý nghịa khặc khọ, choi hẳư pưng côn pọ dạk cha mi tứm pặc hanh hựt khửn cuồng puồng kìn luông dú./.

                                                          Hoàng Long-Anh dịch

                  ꪵꪖꪉ ꪘꪙꪸ ꫄ꪎꪙ ꪨꪱ ꪬꪱꪀ ꪣꪺꪙ ꪻꪊ ꫃ꪥꪒ ꪫꪀꪸ ꪹꪝ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꫄ꪤꪙ ꪹꪣꪉ

ꪹꪀꪱ ꪩꪱꪀ ꪶꪚ ꫛ ꪘꪮꪣ ꪀꪣꪾ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪔꪉꪲ ꫄ꪎꪙ ꪨꪱ ꪣꪲ 70 ꪵꪖꪉ ꪪꪙꪸ ꪜꪙꪴ ꪩꪱꪙ ꪜꪽ ꫄ꪝꪉ ꪵꪔ 20 ꪭꪮꪒ 30 ꪜꪲ ꪨꪷ ꪝꪉꪳ ꫛ ꪫꪽ ꪥꪮꪀ ꪬꪺ ꪻꪎ ꪻꪊ ꪡꪒꪰ ꪀꪚꪾ ꪫꪀꪸ ꫃ꪥꪒ. ꪤꪉꪸ ꪵꪔ ꪬꪺ ꪜꪲ ꪙꪲ, ꪵꪔ ꪨꪱꪤ ꪹꪊꪉ ꪊꪉꪲ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪅꪀꪰ ꪅꪷ ꪹꪏꪉ: ꪄꪱꪥ 200 ꫄ꪔꪙ ꪢꪱꪀ ꪵꪔꪉ ꪙꪣꪾ ꪋꪮꪥ ꪝꪷ ꪼꪭ ꪵꪣ ꪙꪱ ꪔꪉꪲ ꪀꪫꪱꪉ ꪘꪱꪣ; ꪶꪋꪣ ꪋꪮꪥ ꫄ꪔꪙ ꪬꪱ ꪹꪄꪱ ꪎꪱꪙ ꪝꪮꪣ ꪀꪚꪾ 50 ꪗꪉꪴ ꪢꪲ ꪶꪕꪣ ꪻꪬ ꪭꪮꪀ ꪎꪉꪲ ꪁꪒꪰ ꪁꪉꪴ ꪚꪮꪙ ꪹꪋꪉ ꪭꪫꪙꪸ ꪠꪴ ꪮꪙꪸ; ꪵꪄꪀ ꪭꪀꪸ ꪶꪋꪣ ꪋꪮꪥ ꪵꪔꪉ ꪮꪮꪀ ꪶꪎ ꪠꪱꪀ ꫄ꪉꪙ ꪼꪠ ꪤꪮꪣ ꪀꪱꪥ 100 ꫜ ꪋꪫꪸ ꪢꪽ ꪻꪬ ꪨꪱꪙ ꪶꪬꪉ ꪠꪀꪴ ꪋꪺ ꪹꪭꪙ ꪊꪺꪚ ꪏꪒꪸ ꪭꪱꪥ ꪘꪀꪰ ꪘꪱ ꪒꪱꪙ ꪀꪉꪲ ꪻꪎ ꪹꪭꪙ ꪥꪱꪙ ꪋꪮꪣ ꪀꪱꪥ ꪣꪱ; ꪋꪮꪥ 30 ꫄ꪒꪙ ꪫꪲ ꪹꪩꪒ ꪻꪬ ꪝꪉꪳ ꫛ ꫄ꪀꪚ ꪀꪫꪲ ꪘꪉꪰ ꪹꪭꪙ ꪤꪱ ꪔꪉꪲ ꫄ꪎꪙ ꪨꪱ ꪝꪮꪣ ꪀꪚꪾ ꪨꪱꪥ ꪫꪀꪸ ꫃ꪤꪒ ꪄꪀꪰ ꪅꪷ ꪮꪙꪳ. ꪹꪀꪱ ꪩꪱꪀ ꪶꪚ ꪁꪷ ꪶꪭꪣ ꫄ꪡꪙ ꪵꪚꪉ ꪜꪽ ꪝꪉꪳ ꪄꪴ ꪤꪱꪀ ꪋꪱ ꪀꪚꪾ ꪝꪷ ꪵꪣ ꫄ꪤꪙ ꪹꪣꪉ.

ꪤꪱꪙ ꪊꪣꪾ ꪙꪲ ꫄ꪐꪒ ꪝꪉꪳ ꪛꪱꪙ ꪀꪺꪉ ꪹꪀꪱ ꪩꪱꪀ ꪶꪚ ꪘꪮꪣ ꪀꪣꪾ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪔꪉꪲ ꫄ꪎꪙ ꪨꪱ ꪁꪷ ꪔꪮꪚ ꪬꪮꪣ ꪵꪄꪀ ꪭꪀꪸ ꪋꪮꪥ ꪹꪤ ꫛ ꫄ꪤꪙ ꪊꪺꪚ ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ ꪘꪉꪰ ꪭꪫꪙꪸ ꪹꪣꪉ ꪩꪱ. ꪙꪮꪀ ꪼꪜ ꪶꪑꪣ ꪎꪮꪉ ꪀꪚꪾ ꪣꪳ ꪻꪬ ꪝꪴ ꪙꪮꪉ ꪘꪉꪰ ꪶꪠꪉ ꪊꪺꪚ ꪙꪮꪉ ꪩꪱꪒ ꪀꪱꪥ 200 ꪗꪉꪴ ꪢꪲ ꪶꪕꪣ 30 ꪼꪕ ꪎꪺꪉ ꪹꪎ ꪨꪱꪥ ꪔꪱꪉ ꪝꪲ ꪙꪮꪉ ꪑꪉꪰ ꪵꪄꪀ ꪭꪀꪸ ꪶꪋꪣ ꪋꪮꪥ ꪵꪀꪉ ꪹꪮꪱ ꪹꪋꪉ ꪄꪮꪉ ꪹꪣ ꪭꪮꪒ ꪝꪲ ꪙꪮꪉ ꪎꪱ ꪙꪣꪾ ꪜꪣꪾ ꪀꪺꪉ ꪙꪽ ꪣꪲ ꪝꪉꪳ ꪔꪱꪉ ꪹꪄꪱ ꪙꪣꪾ ꪁꪣꪾ ꪀꪙꪲ ꪹꪏꪉ ꪹꪄꪱ ꪎꪱꪶꪙ ꪢꪲ ꪹꪀ ꪭꪮꪣ ꪼꪡ ꪤꪽ ꪡꪱ.

ꪫꪀꪸ ꫃ꪥꪒ ꪄꪮꪉ ꪝꪉꪳ ꪛꪱꪙ ꪀꪺꪉ ꪘꪮꪣ ꪀꪣꪾ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪔꪉꪲ ꫄ꪎꪙ ꪨꪱ ꪣꪲ ꪮꪲ ꪉꪸ ꪅꪀꪰ ꪅꪷ ꪋꪮꪥ ꪻꪬ ꪝꪉꪳ ꫛ ꪝꪷ ꪥꪱꪀ ꪋꪱ ꪣꪲ ꪔꪣꪳ ꪝꪀꪰ ꪵꪭꪉ ꪭꪒꪳ ꪄꪙꪳ ꪀꪺꪉ ꪜꪺꪉ ꪀꪙꪲ ꪩꪺꪉ ꪤꪴ.

                                                                  ꪭꪫꪱꪉ ꪩꪮꪉ- ꪕꪮꪉ ꪵꪯꪉ ꪥꪀꪲ