ꪶꪠꪉ ꪎꪉꪴ ꪮꪙꪸ ꪚꪱꪥ ꫄ꪅꪉ ꪁꪣꪾ ꪔꪷ ꪀꪚꪾ ꪶꪠꪙ ꪙꪮꪉ

        ꪋꪱꪣ ꪹꪔꪱ ꪨꪷ ꪭꪫꪙꪸ ꪶꪠꪉ ꪎꪉꪴ ꪄꪮꪭ ꪔꪉꪲ ꪮꪙꪸ ꪚꪱꪥꪶ ꪣꪺ ꪶꪠꪙ ꪲꪜ ꪀꪱꪥ ꪁꪷ ꪣꪲ ꪭꪮꪒ 5 ꫛ ꪊꪺꪚ ꪔꪱꪥ , ꫛ ꫜ ꪊꪺꪚ ꫃ꪊꪚ ꪚꪱꪒ ꪶꪝ ꪼꪨ ꪙꪮꪉ, ꪒꪙꪲ ꪒꪱꪙ ꪶꪋꪒ ꪵꪀꪉ ꪡꪱ ꪄꪱ; ꪭꪱꪉ ꪭꪮꪥ ꪨꪱꪉ ꪹꪭꪙ ꫄ꪤꪙ, ꪚꪮꪙ ꪹꪋꪉ ꪵꪀꪉ ꪝꪉꪳ ꪶꪀꪉ ꪊꪉꪲ ꪖꪫꪲꪥ ꫄ꪩꪥ ꪊꪺꪚ ꪁꪱꪙ ꪵꪜ...ꪵꪥꪉ ꫄ꪚꪉ ꪏꪒꪸ ꪭꪱꪤ ꪵꪥꪉ ꪔꪉꪲ ꪋꪲ ꪮꪱꪫ ꪭꪮꪒ 40 ꪔꪲ ꪢꪽ. ꪀꪲ ꪣꪳ ꪀꪮꪙ ꫄ꪋ ꪵꪥꪉ ꫄ꪚꪉ ꪋꪲ ꪶꪠꪙ ꪘꪉꪷ ꪨꪱꪥ ꪚꪮꪙ, ꪭꪫꪙꪸ ꪋꪱꪣ ꪹꪔꪱ ꪁꪷ ꪩꪣꪾ ꪵꪩ ꪹꪩꪱ ꫃ꪕꪉ ꫃ꪢꪒ ꪝꪉꪳ ꪋꪺ ꪹꪭꪙ ꫄ꪤꪙ ꪒꪱꪉ ꪤꪴ ꪀꪺꪉ ꪶꪠꪉ ꪣꪲ ꪹꪏꪉ ꪋꪲ ꪊꪺꪚ ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ ꪼꪫ ꪣꪲ ꪩꪺꪉ ꪑꪱꪥ ꪼꪜ ꪤꪴ ꪚꪮꪙ ꪕꪉꪸ ꪮꪱꪙ. ꪝꪉꪳ ꪎꪱ ꪤꪴ ꪔꪷ ꪀꪽ ꪐꪉꪷ ꪵꪔꪉ ꪕꪱꪉ ꪓꪙꪸ ꪖꪫꪱꪥ ꪭꪮꪙ ꪎꪽ ꪼꪫ ꪋꪮꪥ ꪹꪤ ꪀꪽ ꫄ꪋ ꫄ꪁꪙ ꪬꪱ.

          ꪋꪱꪣ ꪹꪔꪱ ꪣꪲ ꪭꪮꪒ 90% ꪨꪷ ꪝꪲ ꪙꪮꪉ ꪹꪋ ꪙꪮꪥ ꫛ, ꪀꪺꪉ ꪙꪽ ꫄ꪡꪙ ꪨꪱꪥ ꪨꪷ ꫛ ꪶꪣꪉ. ꪝꪸ ꪙꪮꪉ ꪶꪣꪉ ꫄ꪩꪉ ꫃ꪥꪒ ꪹꪭꪙ ꪘꪉꪷ ꪎꪽ ꪝꪴ, ꪹꪝ ꪹꪏꪉ ꪙꪽ ꪭꪫꪙꪸ ꪁꪷ ꪶꪜꪉ ꪻꪊ ꪋꪙꪸ ꪜꪱꪫ ꪕꪮꪥ 2 ꪖꪳ ꪁꪫꪱꪣ ꪨꪷ ꪁꪫꪱꪣ ꪶꪣꪉ ꪵꪀꪉ ꪁꪫꪱꪣ ꪵꪀꪫ ꪘꪉꪷ ꪩꪫꪱ ꪊꪫꪙꪸ ꪵꪖꪉ ꪵꪀꪉ ꪝꪉꪳ ꪋꪴ ꪭꪮꪚ ꪚꪱꪙ ꪼꪫ ꪝꪲ ꪙꪮꪉ ꪭꪴꪤ ꪵꪀꪉ ꫄ꪅꪉ ꪁꪣꪾ ꪔꪷꪀꪚꪾ ꪶꪠꪙ ꪙꪮꪉ.

          ꫄ꪅꪉ ꪻꪊ ꪁꪣꪾ ꪔꪷ ꪀꪚꪾ ꪶꪠꪙ ꪙꪮꪉ , ꪼꪈ ꪀꪺꪉ ꪹꪚꪙ 6 ꪙꪲ, ꪭꪫꪙꪸ ꪪꪽ ꫄ꪊꪙꪁꪷ ꪫꪽ ꪡꪱꪫ ꪐꪱꪥ 33 ꪋ ꪹꪭꪙ ꪮꪮꪀ ꪄꪮꪥ ꪶꪠꪉ ꪋꪲ ꪊꪍꪚ ꪏꪒꪸ ꪭꪱꪥ ꪶꪝ ꪶꪠꪙ ꪙꪮꪉ ꪵꪀꪉ ꪒꪙꪲ ꪒꪱꪙ ꪁꪱꪙ ꪶꪋꪒ. ꪚꪱꪙ ꪮꪺꪙ ꪝꪱ ꪁꪣꪾ ꪝꪱ ꪀꪚꪾ ꪝꪉꪳ ꪄꪴ ꪶꪡ ꪒꪙꪲ - ꪎꪱꪫ ꪬꪱ ꪀꪫꪲ ꪋꪮꪥ ꫛ ꪊꪺꪚ ꪋꪷ ꪙꪱꪙ ꪭꪫꪸꪙ ꪁꪷ ꪔꪒꪲ ꫄ꪔꪙ ꪝꪉꪳ ꪹꪊ ꪱꪐꪽ ꪵꪔꪉ ꪵꪔꪉ ꪝꪉꪳ ꪶꪤꪉ ꪊꪉꪲ ꪀꪺꪉ ꪶꪠꪉ ꪙꪮꪀ ꪐꪽ ꪝꪱꪫ ꪕꪉꪸ ꪮꪱꪙ ꪻꪬ ꪠꪴ ꫛ ꪵꪀꪉ ꪼꪢ ꪢꪮꪀ ꪔꪉ ꪷ ꪵꪔꪉ, ꪹꪋꪉ ꪄꪮꪉ ꪴꪼꪫ ꪁꪣꪷ ꪔꪷ ꪼꪫ ꪁꪣꪾ ꪔꪷ ꪀꪚꪾ ꪝꪉꪳ ꪄꪴ ꪶꪝ ꪠꪱ ꪒꪙꪲ ꫃ꪤꪒ ꪮꪮꪀ ꫄ꪋ ꫄ꪩꪁꪙ ꪬꪱ.

          ꪼꪅ ꪝꪉꪳ ꪚꪮꪙ ꪋꪲ ꪀꪱꪘ ꪵꪜ ꫃ꪎꪣ ꪔꪱꪉ ꪹꪏꪉ ꪈꪸ ꪶꪩ - ꪢꪴ ꪁꪱꪉ ꪊꪱꪥ; ꪈꪸ ꪶꪩ - ꪋꪱꪣ ꪹꪔꪱ...ꪝꪮꪣ ꪣꪲ ꪼꪢ ꪢꪮꪀ, ꪹꪋꪉ ꪄꪮꪉ ꪣꪲ ꪋꪀꪳ ꪼꪫ ꫄ꪋ ꪣꪲ ꪄꪴ ꪹꪚꪱ ꪹꪉꪱ ꪹꪀꪒ ꪎꪉꪲ ꪮꪮꪀ ,ꪶ ꪝꪉꪳ ꪚꪙꪸ ꪶꪔꪉ ꪜꪱꪫ ꪁꪷ ꪼꪒ ꪜꪀꪷ ꪔꪣꪳ ꪘꪉꪷ ꪝꪉꪳ ꪚꪮꪙ ꪣꪲ ꪹꪏꪉ ꪋꪲ ꪁꪱꪙ ꪶꪋꪒ ꪵꪀꪉ ꪙꪣꪾ ꪙꪮꪉ ꪩꪱꪒ ꪖꪺꪣ ꪼꪫ ꫛ ꫄ꪤꪙ ꪹꪚꪱ ꪼꪜ ꪢꪱ ꪨꪱꪥ...ꪀꪚꪾ ꪩꪺꪉ ꫄ꪅꪉ ꪻꪊ ꪁꪣꪾ ꪔꪷ, ꪮꪙꪸ ꪚꪱꪥ ꪊꪮꪉ ꪵꪭꪉ ꪤꪮꪙ ꪭꪮꪒ ꪢꪀꪳ ꪔꪣꪾ ꫄ꪐꪒ ꪝꪉꪳ ꪄꪴ ꪏꪒꪸ ꪬꪱꪥ ꪣꪸ ꪹꪏꪉ ꪋꪲ ꪹꪊꪎ ꪎꪉꪲ ꪮꪮꪀ ꪀꪺꪉ ꪣꪺ ꪶꪠꪙ ꪙꪮꪉ.

                                                          ꪔꪺꪙ ꪏꪺꪙ - ꪵꪭꪉ ꪥꪀꪲ

Phổng xùng Yên Bái khâng cặm tó cắp phôn nong

          Trạm Tấu lỏ huyện phổng xùng khong tỉnh Yên Bái, mua phôn pi cài cọ mi 5 côn chuốp tài, côn nưng chuốp chếp bát pộ lày toi nặm nong, đin đán cạn chột cánh phạ khả; hạng họi lang hươn dân, bón trương cánh công trình thuỷ lợi chuốp cạn pé...danh bấng xiệt hại danh tính chi áo họt 40 tỷ mằn. Kỷ mự cón chơ danh bấng chi phôn nẳng lai bón, huyện Trạm Tấu cọ lăm le lau tênh mết pưng chua hươn dân đang dú cuông phổng mi xương chi chuốp xiệt hại pộ phôn nong vạy mi luông nhại pày dú bón tiêng an. Pưng xã dú tó căn nhăng tánh ók tang điện thoại họn sẳn vạy choi dừa căn cặm tó chơ cận hà.

          Trạm Tấu mi họt 90% lỏ pi nọng chựa nọi côn, cuông nặn phân lai lỏ chựa côn Mông. Pi nọng Mông lâng dệt hươn nẳng pưng sằn pu, pưa xương nặn, huyện cọ pông chàư chiên páo toi 2 thứ quam lỏ Mông cánh quam Keo nẳng loa truyền thanh cánh pưng chu họp bản vạy pi nọng hụ cánh cặm tó cắp phôn nong.

          Khâng chàư cặm tó cắp phôn nong, ngay cuông bươn 6 nị, huyện Văn Chấn cọ văn phạo nhại 33 chua hươn dân cuông phổng mi xương chi chuốp xiệt hại pộ phôn nong, cánh đin đán cạn chột. Ban uôn pa cặm phong cắp pưng khu pộ phạ đin - sáo ha cứu choi côn chuốp chọ nạn huyện con tít tơn pưng chảu nhẳn tẳng tánh pưng công trình cuông phông nọk nhẳn pao tiêng an hảu phủ côn cánh máy móc tẳng tánh, chương khong vạy cặm tó cắp pưng khu pộ phạ đin dệt ók chơ cận hà.

          Khay pưng bón chi cạn pé, xểm tang xương Nghĩa Lộ - Mù Cang Chải; Nghĩa Lộ - Trạm Tấu ...pọm mi máy móc, chương khong mi chực vạy chơ mi khu báu ngau cướt sinh ók, pưng biển tống páo cọ đảy pắc tứm nẳng pưng bón mi xương chi cạn chột, phôn nong lạt vạy côn dân báu pày ma lài...Cắp luông khâng chàư cặm tó, Yên Bái chóng hanh dón họt mức tắm nhất pưng khu xiệt hại mi xương chi cướt sinh ók cuông mua phôn nong./.

                                                          Tuấn Xuân - Hạnh dịch