ꪨꪱꪥ ꪹꪊꪱ: ꪚꪱꪙ ꪀꪒꪰ ꪁꪉꪴ ꪔꪱ ꪊꪱꪥ ꪨꪉꪰ ꪋꪴ ꪹꪚ ꪹꪣꪱ

---------------------

          ꪎꪣꪴ ꪄꪮꪥ ꪹꪣ ꪭꪮꪒ ꪚꪱꪙ ꪔꪱ ꪊꪱꪶꪥ, ꪎꪱ ꪵꪒꪙ ꪹꪣꪉ ꪣꪱ ꪩꪲ ꪊꪱꪥ , ꪭꪫꪸꪙ ꪡꪮꪉ ꪶꪖ, ꪔꪉꪲ ꪨꪱꪥ ꪹꪊꪱ, ꪚꪮꪙ ꪀꪲꪙ ꪒꪴ ꪄꪮꪉ ꪤꪱꪫ 700 ꪋꪺ ꪹꪭꪙ ꪹꪋ ꫛ ꪬꪱ ꪐꪲ ꪋꪮꪣ ꪼꪒ ꪄꪱꪣ ꪀꪱꪥ ꪋꪴ ꪫꪀꪸ ꪹꪊꪷꪚ ꪼꪎ ꪼꪢ ꪻꪊ. ꪋꪣꪾ ꪫꪱ ꪚꪱꪙ ꪒꪱꪉ ꪣꪲ 8 ꪜꪱꪉ ꪬꪫꪸ, ꪬꪱꪀ ꪫꪱ ꪀꪺꪉ ꪚꪱꪙ ꪁꪷ ꪹꪚꪱ ꪹꪬꪸꪙ ꪣꪲ ꪨꪱꪥ ꫛ. ꪔꪱꪉ ꪘꪱ ꪊꪉꪲ ꪁꪫꪸꪙ ꪒꪀꪸ ꪹꪠꪉ ꪻꪬ ꪭꪴ: ꪨꪉꪰ ꪋꪴ ꪹꪚ ꪹꪣꪱ ꪹꪀꪒ ꪎꪲꪉ ꪮꪀꪀ , ꫛ ꪔꪱꪥ ꪭꪳ ꪫꪱꪉ ꪼꪫ ꪬꪽ, ꪏꪱꪙ ꪵꪖꪉ ꪘꪙꪸ ꪬꪱꪫ ꪵꪭꪉ ꪭꪳ ꪶꪩꪉ ꪼꪜ ꪁꪳ ꪹꪭꪙ ꪤꪱ ꪼꪫ ꪩꪣꪾ ꪒꪴ ꫛ ꪒꪱꪉ ꪊꪺꪚ ꪹꪚ ꪹꪣꪱ, ꪵꪩꪫ ꫛ ꪤꪴ ꪹꪭꪙ ꪭꪳ ꪹꪬꪸꪙ ꪹꪋꪱ ꪨꪷ ꪤꪱꪙ , ꪹꪏꪉ ꪙꪽ ꪨꪱꪥ ꪋꪺ ꪹꪭꪙ ꪁꪷ ꪬꪚꪰ ꪔꪴ ꪎꪸ, ꪏꪱꪙ ꪋꪺ ꪹꪭꪙ ꪭꪳ ꪹꪮꪱ ꪩꪀꪴ ꪨꪱꪙ ꪹꪣ ꪤꪴ ꪀꪱ ꪔꪉꪸ ꪼꪭ. ꪬꪱꪀ ꪫꪱ, ꪹꪝ ꪼꪒ ꪊꪉꪲ ꪁꪫꪸꪙ ꪋꪙꪸ ꪜꪱꪫ ꪹꪏꪉ ꪙꪽ ꪏꪱꪙ ꪋꪺ ꪹꪭꪙ ꪁꪷ ꪔꪱꪫ ꪢꪱ ꪚꪱꪙ.

          ꪭꪮꪒ ꪼꪅ  , ꪶꪎ ꫛ ꪊꪺꪚ ꪏꪒꪸ ꪭꪱꪥ ꪀꪺꪉ ꪋꪴ ꪹꪚ ꪹꪣꪱ ꪹꪨꪱ ꪨꪷ 40 ꫛ, ꪀꪺꪉ ꪙꪽ 32 ꫛ ꪒꪱꪉ ꪼꪒ ꪹꪤꪱ ꪤꪱ ꪘꪉꪰ ꪹꪭꪙ ꪤꪱ ꪵꪀꪉ ꪩꪣꪾ ꪒꪴ ꪘꪈꪰ ꪹꪭꪙ. ꪀꪺꪉ ꪝꪉꪳ ꪣꪳ ꪀꪱꪥ ꪣꪱ, ꪋꪺ ꪹꪭꪙ ꪣꪲ ꫛ ꪊꪺꪚ ꪏꪒꪸ ꪣꪷ ꪵꪀꪉ ꪣꪲ ꫛ ꪒꪱꪉ ꪼꪒ ꪹꪤꪱ ꪤꪱ ꪘꪉꪰ ꪹꪭꪙ ꪤꪱ ꪁꪷ ꪐꪽ ꪼꪒ ꪩꪺꪉ ꪶꪜꪉ ꪻꪊ ꪋꪮꪥ ꪹꪤ ꪄꪮꪉ ꪋꪴ ꪹꪀꪷꪚ ꪊꪉꪲ ꪁꪫꪸꪙ ꪵꪔ ꪫꪀꪸ ꪹꪁꪸꪒ ꪜꪱꪉ ꪬꪫꪸ ꪭꪮꪒ ꪫꪸꪀ ꪹꪤꪱ ꪤꪱ ꪻꪬ ꪝꪉꪳ ꫛ ꪒꪱꪉ ꪤꪴ ꪹꪭꪘ ꪤꪱ.

          ꪩꪉꪴ Dương Đình Đức, ꪠꪷ ꪊꪴ ꪕꪲꪀ ꪮꪫꪲ ꪚꪱꪙ ꪹꪤꪷꪙ ꪹꪣꪉ ꪭꪫꪸꪙ ꪠꪮꪉ ꪶꪖ ꪻꪬ ꪭꪴ: ꪹꪀꪷ ꪀꪫꪱꪙ ꪣꪲ ꪊꪀꪳ ꪁꪫꪸꪙ ꪁꪷ ꪶꪔꪉ ꪜꪱꪫ ꪻꪬ ꪭꪴ ꪶꪀꪀ ꪜꪱꪥ ꪄꪮꪉ ꪋꪴ ꪹꪚ ꪹꪣꪱ ꪙꪲ ꪨꪷ ꪶꪝ ꪹꪨꪱ, ꪶꪝ ꪀꪺꪉ ꪹꪨꪱ ꪣꪲ ꪨꪱꪥ ꪹꪊꪷꪒ ꪹꪣꪸ ꪗꪱ ꪶꪙꪙ ꪀꪱꪥ ꪢꪀꪳ ꪕꪒꪰ ꪜꪴꪙ. ꪙꪮꪀ ꪙꪽ ꪮꪀꪀ ꪹꪀꪷ ꪀꪫꪱꪙ ꪣꪲ ꪊꪀꪳ ꪁꪫꪸꪙ ꪁꪷ ꪒꪱꪉ ꪐꪽ ꪵꪥꪉ ꪝꪉꪳ ꪹꪢꪷꪫ ꪁꪣꪾ ꪀꪲꪙ ꪀꪺꪉ ꪹꪝ ꪹꪄꪱ ꪙꪽ ꪼꪫ ꪝꪲ ꪙꪮꪉ ꪮꪙꪸ ꪻꪊ. ꪀꪚꪰ ꪩꪺꪉ ꪶꪜꪉ ꪻꪊ ꪋꪮꪥ ꪹꪥ ꪄꪮꪉ ꪋꪴ ꪹꪀꪷꪚ ꪊꪉꪲ ꪁꪫꪸꪙ , ꪁꪷ ꪹꪏꪉ ꪩꪺꪉ ꪋꪮꪥ ꪹꪤ ꪹꪢꪸꪒ ꪻꪊ ꪹꪢꪸꪒ ꪵꪭꪉ ꪄꪮꪉ ꪊꪣꪴ ꪢꪴ ꪼꪏ ꪤꪱ ꪀꪺꪉ ꪫꪀꪸ ꪹꪤꪱ ꪤꪱ ꪻꪬ ꪝꪳꪉ ꫛ ꪊꪺꪚ ꪹꪚ ꪹꪣꪱ ꪁꪷ ꪹꪡꪷꪙ ꪻꪒ ꪹꪥꪸꪒ  ꪮꪙꪴ ꪻꪊ ꪝꪲ ꪙꪮꪉ ꪶꪠꪉ ꪎꪴꪉ ꪔꪱ ꪊꪱꪥ.

                                                                                                                                        ꪄꪀꪰ ꪁꪙꪸ - ꪵꪖꪉ ꪥꪀꪲ