Khù dạk cha cuồng dan tang mả khày cà phê Sơn La

          Cò cà phê đảy hụ họt nẳng tỉnh Sơn La té pưng pì 1980, đảy púk chựa cà phê A ra bi ca. Họt khạy, tênh mết tà đìn cà phê khòng tỉnh lỏ 12.300 héc ta. Bườn 7/2015, Sơn La cọ chứng chảnh mi chư xiềng cà phê cốc khoẹ nẳng huyện Mài Sơn, đảy công ty trách nhiệm hữu hạn cà phê Minh Châu, Sơn La dệt dượn, cắp tục po pưng tàng cà phê xương; Cà phê tan, cà phê bột, kén cà phê khủa ài hòm hường đảy lài côn cuồng phổng hụ họt cánh xủ.

          Cà phê Minh Châu, Sơn La đảy chế biến tàng máy móc khòng Ca-na-đa, mi cồng xuất 200 tấn pưng tàng cà phề chế biến lẹo, to dáo 2 păn tấn mák đíp mỏi pì, đảy Hội đông nồng dần Việt nàm xừng nhọng lỏ tàng chương hang nông nghiệp pộn dỏn pì 2015. Vịa Sơn La mi chư siềng riềng khòng cà phê, cọ hôm phân choi ca con cà phê tẹt tiêng xưa, cài nặn choi po hay me na yền chằư dệt dượn.

          Hák va, vạy chư xiềng cà phê mả khày hằn hanh, mi xương chành chinh đảy cắp pưng chư xiềng cà phê nhắư nẳng chợ lạt, hư nhăng lỏ dan tang pọ lài dạk cha. Lung Đặng Văn Thịnh, giám đốc công ty trách nhiệm hữu hạn cà phê Minh Châu, Sơn La hẳư hụ: Chơ chế biến dệt ók lài tàng cà phê, hư vịa lựa chọn mák đíp cọ đảy dệt đì, mi chơ thù xự ma, xủ đảy dáo 70% thồi. Chơ đảy giới thiệu ma cà phê Sơn La, lài khék hang cọ báu hê hụ họt cánh báu hê ék xự, pưa xương nặn công ty cọ mòng cong mi tứm pưng chính sách choi dừa vạy chư siềng cà phê Sơn La nhương mự nhương đảy lài côn hụ họt.

          Cà phê Sơn La đảy púk phân lài nẳng huyện Mài Sơn, Thuận Châu cánh thành phố Sơn La; năng xuất cà phê pằn pâng pày cài tấn nưng mỏi héc ta. Khạy nị, 70% chua hươn púk cà phê mi máy xày mák đíp. Hák va sản lượng chế biến nhăng tắm, phân lài lỏ pưa pưng hươn máy dệt lệch nọi, báu cựt tóp đảy lang áo cuồng mua thù hoạch lạ hy dáo 3 bườn. Nọk nặn ók phân lài pưng chua hươn púk cà phê hê mi luông pùn kẻ khày nặm uối lày ók, dệt uối hại họt bón nặm kìn đìn dú. Dan chọm cài ma, san cơ sở chế biến cà phê nhắư nẳng huyện Thuận Châu cánh thành phố Sơn La cọ dệt uối mìn bó nặm khòng thành phố, dệt puồng kìn đơi dú khòng cài 5 vạn dần chuốp xiệt hại.

          Cò cà phê đàng choi hạng păn chua hươn dần Sơn La khảm khói xìa cặt cung, hựt khửn dệt hăng. Hák va, cận mi luông cằm quyết xưa khòng ngành mi chức quyên vạy chư siềng cà phê Sơn La nhương mự nhương đảy lài côn hụ họt./.

Hoàng Long-Huyền dịch

ꪄꪴ ꪥꪱꪀ ꪊꪱ ꪀꪺꪉ ꪥꪱꪙ ꪔꪱꪉ ꪢꪱ ꪼꪄ ꪀꪱ ꫃ꪠ ꫄ꪎꪙ ꪨꪱ

          ꪀꪱ ꫃ꪠ ꫄ꪎꪙ ꪨꪱ ꪼꪒ ꪭꪴ ꪭꪮꪒ ꪵꪔ ꪝꪉꪴ ꪜꪲ 1980 ꪼꪒ ꪜꪴꪀ ꪹꪋ ꪀꪱ ꫃ꪠ A ra bi ca .ꪭꪮꪒ ꪼꪅ ꫃ꪕꪉ ꫃ꪢꪒ ꪔꪱ ꪒꪙꪲ ꪜꪴꪀ ꪀꪱ ꫃ꪠ ꪄꪮꪉ ꪔꪉꪲ ꪨꪷ 12 300 ꪵꪬꪀ ꪕꪱ. ꪹꪚꪙ 7.2015 ꫄ꪎꪙ ꪨꪱ ꪀꪷ ꪊꪉꪳ ꪵꪊꪉ ꪣꪲ ꪋꪳ ꪎꪉꪸ ꪀꪱ ꫃ꪠ ꪶꪀꪀ ꪵꪅꪫ ꪘꪉꪰ ꪭꪫꪙꪸ ꪢꪱꪥ ꫄ꪎꪙ ,ꪼꪒ ꪶꪁꪉ ꪕꪲ ꪵꪊꪀ ꪑꪣꪸ ꪬꪫꪲ ꪭꪱꪙ ꪀꪱ ꫃ꪠ ꪣꪉꪲ ꪹꪊꪱ ,꫄ꪎꪙ ꪨꪱ ꫃ꪤꪒ ꪮꪮꪀ ꪀꪚꪾ ꪕꪀꪴ ꪝꪷ ꪨꪱꪥ ꪔꪱꪉ ꪀꪱ ꫃ꪠ ꪼꪒ ꪨꪱꪥ ꫛ ꪀꪺꪉ ꪶꪠꪉ ꪭꪳ ꪭꪮꪒ.

          ꪀꪱ ꫃ꪠ ꪣꪉꪲ ꪹꪊꪱ ꫄ꪎꪙ ꪨꪱ ꪼꪒ ꫃ꪊ ꪚꪙꪸ ꪵꪔ ꪔꪱꪉ ꪼꪢ ꪢꪮꪀ ꪹꪣꪉ ꪁꪱ ꪙꪱ ꪒꪱ ,ꪣꪲ ꪶꪀꪉ ꪎꪺꪒ 200 ꫄ꪔꪙ ꪀꪱ ꫃ꪠ ꫃ꪊ ꪚꪙꪸ ꪵꪩꪫ ,ꪼꪒ ꪶꪭꪥ ꪶꪘꪉ ꫄ꪤꪙ ꪫꪒꪸ ꪘꪱꪣ ꪎꪉꪳ ꪑꪮꪉ ꪨꪷ ꪔꪱꪉ ꪹꪋꪉ ꪭꪱꪉ ꪶꪘꪉ ꪉꪚꪸ ꪶꪝꪙ ꪤꪮꪙ ꪜꪲ 2015. ꪫꪀꪸ ꫄ꪎꪙ ꪨꪱ ꪣꪲ ꪋꪳ ꪎꪉꪸ ꪤꪉꪸ ꪄꪮꪉ ꪀꪱ ꫃ꪠ ꪁꪷ ꪶꪭꪣ ꫄ꪡꪙ ꪋꪮꪥ ꪁꪱ ꪁꪮꪙ ꪀꪱ ꫃ꪠ ꪵꪕꪒ ꪕꪉꪸ ꪹꪏ.

          ꪬꪱꪀ ꪫꪱ ,ꪼꪫ ꪋꪳ ꪎꪉꪸ ꪀꪱ ꫃ꪠ ꪢꪱ ꪼꪄ ꪬꪽ ꪵꪭꪉ ꪣꪲ ꪹꪏꪉ ꪵꪊꪉ ꪋꪉꪲ ꪼꪒ ꪀꪚꪾ ꪋꪳ ꪎꪉꪸ ꪀꪱ ꫃ꪠ ꪻꪐ ꪘꪉꪰ ꫄ꪋ ꪩꪱꪒ ꪭꪳ ꪑꪉꪰ ꪨꪷ ꪥꪱꪙ ꪕꪱꪉ ꪜꪷ ꪨꪱꪥ ꪥꪱꪀ ꪋꪱ. ꪩꪉꪴ ꪒꪉꪰ ꪪꪽ ꪖꪉꪲ ꪤꪱꪣ ꪶꪒꪀ ꪶꪁꪉ ꪕꪲ ꪵꪊꪀ ꪑꪣꪸ ꪬꪫꪲ ꪭꪱꪙ ꪀꪱ ꫃ꪠ ꪣꪉꪲ ꪹꪊꪱ,꫄ꪎꪙ ꪨꪱ ꪻꪬ ꪭꪴ: ꫄ꪋ ꫃ꪊ ꪚꪙꪸ ꫃ꪥꪒ ꪮꪮꪀ ꪨꪱꪥ ꪔꪱꪉ ꪀꪱ ꫃ꪠ ꪭꪳ ꪫꪀꪸ ꪹꪩꪀ ꪋꪮꪙ ꪢꪱꪀ ꪒꪚꪲ ꪁꪷ ꪼꪒ ꫃ꪥꪒ ꪒꪲ. ꫄ꪋ ꪼꪒ ꫄ꪤꪥ ꪖꪫꪸ ꪣꪱ ꪀꪱ ꫃ꪠ ꫄ꪎꪙ ꪨꪱ ꪨꪱꪥ ꪵꪄꪀ ꪬꪱꪉ ꪁꪷ  ꫃ꪭ ꪭꪴ ꪭꪮꪒ ,ꪹꪏꪉ ꪙꪽ ꪶꪁꪉ ꪕꪲ ꪁꪷ ꪢꪮꪉ ꪀꪮꪉ ꪣꪲ ꪝꪉꪳ ꪊꪉꪲ ꪵꪎꪀ ꪋꪮꪥ ꪹꪤ ꪼꪫ ꪋꪳ ꪎꪉꪸ ꪀꪱ ꫃ꪠ ꫄ꪎꪙ ꪨꪱ ꪢꪱ ꪼꪄ ꪬꪽ ꪵꪭꪉ ꪼꪒ ꪨꪱꪥ ꫛ ꪬꪴ ꪭꪮꪒ.

          ꪀꪱ ꫃ꪠ ꫄ꪎꪙ  ꪼꪒ ꪜꪀꪴ ꫄ꪡꪙ ꪨꪱꪥ ꪘꪉꪰ ꪭꪫꪙꪸ ꪢꪱꪥ ꫄ꪎꪙ ,ꪖꪺꪙ ꪹꪊꪱ ꪵꪀꪉ ꪵꪗꪉ ꪶꪠ ꫄ꪎꪙ ꪨꪱ; ꪙꪉꪰ ꪎꪺꪒ ꪜꪽ ꫄ꪝꪉ ꪼꪜ ꪀꪱꪥ ꫄ꪔꪙ ꫛ ꪢꪮꪥ ꪵꪬꪀ ꪕꪱ. ꪼꪅ 70 % ꪋꪺ ꪹꪭꪙ ꪜꪀꪴ ꪀꪱ ꫃ꪠ ꪣꪲ ꪼꪢ ꪼꪎ ꪢꪱꪀ ꪒꪚꪲ .ꪬꪱꪀ ꪪꪱ ꪎꪱꪙ ꪹꪩꪉ ꪐꪉꪰ ꪔꪾ .ꪙꪮꪀ ꪙꪽ ꪮꪮꪀ ꫄ꪡꪙ ꪨꪱꪥ ꪝꪉꪳ ꪋꪺ ꪹꪭꪙ ꪜꪴꪀ ꪀꪱ ꫃ꪠ ꪹꪚꪱ ꫃ꪭ ꪣꪲ ꪩꪺꪉ ꪜꪙꪴ ꪵꪀ ꪼꪄ ꪙꪾ ꪮꪺꪥ ꪼꪨ ꪮꪮꪀ ,꫃ꪤꪒ ꪮꪺꪥ ꪭꪱꪥ ꪭꪮꪒ ꪚꪮꪙ ꪙꪾ ꪀꪙꪲ ꪒꪙꪲ ꪤꪴ. ꪥꪱꪙ ꪋꪮꪣ ꪀꪱꪥ ꪣꪱ ꪏꪱꪙ ꫄ꪀ ꫄ꪎ ꫃ꪊ ꪚꪙꪸ ꪀꪱ ꫃ꪠ ꪤꪴ ꪘꪉꪰ ꪭꪫꪙꪸ ꪖꪺꪙ ꪹꪊꪱ ꪵꪀꪉ ꪵꪗꪉ ꪶꪠ ꫄ꪎꪙ ꪨꪱ ꪀꪷ ꫃ꪤꪒ ꪮꪺꪥ ꪢꪙꪲ ꪚꪷ ꪙꪾ ꪵꪗꪉ ꪶꪠ ,꫃ꪥꪒ ꪜꪺꪈ ꪀꪙꪲ ꫄ꪓꪥ ꪤꪴ ꪄꪮꪉ ꪀꪱꪥ 5 ꪫꪱꪙ ꫄ꪤꪙ ꪊꪺꪚ ꪏꪒꪸ ꪭꪱꪥ.

          ꪀꪷ ꪀꪱ ꫃ꪠ ꪒꪱꪉ ꪋꪮꪥ ꪭꪱꪉ ꪜꪽ ꫛ ꫄ꪤꪙ ꫄ꪎꪙ ꪨꪱ ꪄꪱꪣ ꪄꪮꪥ ꪎꪲ ꪁꪒꪰ ꪁꪉꪴ ꪭꪒꪳ ꪄꪙꪳ ꫄ꪤꪒ ꪭꪉꪰ. ꪬꪱꪀ ꪫꪱ ,꫄ꪁꪙ ꪣꪸ ꪩꪺꪉ ꪀꪾ ꪀꪫꪒꪸ ꪹꪏ ꪄꪮꪉ ꪵꪈꪉ ꪣꪲ ꪊꪀꪳ ꪁꪫꪙꪸ ꪼꪫ ꪋꪳ ꪎꪉꪸ ꪀꪱ ꫃ꪠ ꫄ꪎꪙ ꪨꪱ ꪹꪑꪉ ꪣꪳ ꪹꪑꪉ ꪼꪒ ꪨꪱꪥ ꫛ ꪭꪴ ꪭꪮꪒ.

                                                                                          ꪹꪩꪉ ꪬꪫꪙꪸ ꪥꪀꪲ