Cẳn tân bứa mau chương kìn lài côn nẳng Tày Bắc

Luông pùn cận đảy chấp năm đì.

Đối cắp chu địa phường nẳng tỉnh Yền Bái, luông pùn cốc chính ặn lỏ nả vịa chiên páo. Lung Mùa A páo, Phó chủ tịch uỷ bàn dần mương xã Trạm Táu, huyện Trạm Táu hẳư hụ: Thót ók kinh nghiệm té chu bứa mau lài côn dệt 13 côn đảy khảu hươn dà cấp cứu cuồng pựa kìn liên hoan hùa pì cài, xã đàng púc pua nả vịa chiên páo, chík bók hẳư côn dần ma tang pẹk xằư tiêng àn căm kìn, phạng phong cắp pưng chu bứa mau chương kìn.

          3 pì lài cài ma, nặp té chơ tặt pùn àu tênh mết pan cộ khảu quản lý, nẳng xã Lung Vai, huyện Mương Khường, tỉnh Lao Cài báu cướt sình ók chu bứa mau chương kìn đằư cuòng pưạ kìn lài côn. Vịa tặt pùn ký chỉa chào hẹn cón chơ tổ chức kìn cộ báu chư hịa chấp năm riềng nẳng Lung Vai lạ, hư nhăng đảy chấp năm quảng tua nẳng tênh mết chu xã cuồng tỉnh Lao Cài. Cài nặn, lang đì nhẳn pao tiêng àn căm kìn đảy nho xùng, té pì 2013 ma họt khạy, nẳng tỉnh Lao Cài báu cướt sình ók chu bứa mau chương kìn lài côn.

          Nọk nặn ók, pưng ngành mi chức quyên địa phường cọ púc pua vịa kiểm tra, lăm le, phạt mằư phít thứk, xòng ma chiên páo quảng tua họt chu thản lẫn dần mương, hôm phân dệt dón xìa pưng chu bứa mau chương kìn lông.

          Toi lung Lường Văn Kiên, Phó giám đốc sở y tế tỉnh Điện Biên hư nả vịa nhẳn pao tiêng àn căm kìn lâng đảy ngành nhẳn danh nhọng nho cốc chính. Cài nặn púc pua chiên páo họt chu côn dần nẳng đài, ti vi té lài thứ quam pi nọng chựa nọi côn; cài pưng thèo xừ, bằng hún ảnh, chỉa chiên páo.. Hák va, khạy nị luông pùn đì nhất hư ngành đàng púc pua ặn lỏ hẳư cán bộ y tế lông pày cơ sở chực chau tiện tô cắp côn dần.

          Pưng luông pùn khòng chu địa phường, pưng ngành mi chức quyên nẳng pưng tỉnh Tày Bắc pùn ók cọ xương đàng đảy chấp năm xương: Tủm pua chiên páo, chík bók hẳư côn dần, uồn pa chủm mú lông pày cơ sở kiểm tra, kí chỉa chào hẹn… Dan cài ma cọ hê cựt đảy toi lang áo xương nặn cọ hê cảm dón đảy pưng chu bứa mau chương kìn lài côn. Vạy cựt đảy lang đì pưng luông pùn nặn, hư đảy tủm pua chủm mú kiểm tra, cẳn tân ngày té chơ dệt dượn, đảy mi luông pùn phạt mằư xư mình pưng côn dệt phít thứk. Lưn xưa lỏ đảy cẳn tân pưng vịa dệt báu đì khòng chủm mú mi chức quyên cuồng vịa kiểm tra, phạt mằư pưng côn dệt phít hư côn dần chắng chí đảy sủ pưng căm kìn pẹk xằư, tiêng àn, chơ nặn chắng chí cảm dón xìa đảy pưng chu bứa mau chương kìn lài côn nẳng phổng xùng Tày Bắc, quam tô chếp sảy mảy chằư lâng cướt sình ók cón nị./.

ꪀꪽ ꫄ꪕꪙ ꪹꪚ ꪹꪣꪱ ꪹꪋꪉ ꪀꪙꪲ ꪨꪱꪥ ꫛ ꪘꪉꪰ ꪼꪔ ꪚꪀꪰ: ꪩꪺꪉ ꪜꪴꪙ ꫄ꪁꪙ ꪼꪒ ꫄ꪊꪚ ꪙꪣꪾ ꪒꪲ

ꪶꪒꪥ ꪀꪚꪾ ꪋꪴ ꪒꪸ ꪹꪠꪉ ꪘꪉꪰ ꪔꪉꪲ ꪮꪙꪸ ꪚꪱꪥ ,ꪩꪺꪉ ꪜꪴꪙ ꪶꪀꪀ ꪊꪉꪲ ꪨꪷ ꪘꪱ ꪫꪀꪸ ꪋꪙꪸ ꪜꪱꪫ. ꪩꪴꪉ ꪢꪺ ꪯꪱ ꪜꪱꪫ ꪠꪷ ꪊꪴ ꪕꪀꪲ ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪋꪱꪣ ꪹꪔꪱ, ꪭꪫꪙꪸ ꪋꪱꪣ ꪹꪔꪱ ꪻꪬ ꪭꪴ: ꪖꪮꪒ ꪮꪮꪀ ꪀꪉꪲ ꪈꪣꪸ ꪵꪔ ꪋꪴ ꪹꪚ ꪹꪣꪱ ꪨꪱꪥ ꫛ ꫃ꪥꪒ 13 ꫛ ꪼꪒ ꪹꪄꪱ ꪹꪭꪙ ꪤꪱ ꫄ꪀꪚ ꪀꪫꪲ ꪀꪺꪉ ꪹꪝ ꪀꪙꪲ ꪩꪙꪸ ꪭꪫꪱꪙ ꪬꪺ ꪜꪲ ꪀꪱꪥ ,ꪎꪱ ꪒꪱꪉ ꪜꪴꪀ ꪝꪺ ꪘꪱ ꪫꪀꪸ ꪋꪙꪸ ꪜꪱꪫ ꪋꪀꪲ ꪚꪷ ꪻꪬ ꫛ ꫄ꪤꪙ ꪣꪱ ꪕꪱꪉ ꪕꪉꪸ ꪮꪱꪙ ꪁꪣꪾ ꪀꪙꪲ, ꪋꪳ ꪡꪮꪉ ꪀꪚꪾ ꪝꪉꪳ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ.

3 ꪜꪲ ꪨꪱꪥ ꪀꪱꪥ ꪣꪱ, ꪙꪚꪾ ꪵꪔ ꫄ꪋ ꪕꪒꪰ ꪜꪴꪙ ꪹꪭꪙ ꪻꪒ ꪋꪲ ꪶꪔ ꪊꪀꪳ ꪜꪱꪉ ꪹꪀꪥ ,꫃ꪥꪒ ꪫꪀꪸ ꪬꪫꪸ ꪭꪳ ꪼꪒ ꪀꪲ ꪊꪸ ꪊꪱꪫ ꪵꪭꪙ ,ꪹꪏꪉ ꪙꪽ ꪘꪉꪰ ꪎꪱ ꪨꪴꪉ ꪫꪱꪥ ,ꪭꪫꪙꪸ ꪹꪣꪉ ꪹꪄꪉ ,ꪔꪉꪸ ꪩꪱꪮ ꪀꪱꪥ ꪹꪚꪱ ꪹꪀꪒ ꪎꪉꪲ ꪮꪮꪀ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ ꪻꪒ ꪀꪺꪉ ꪹꪝ ꪀꪙꪲ ꪨꪱꪥ ꫛ. ꪫꪀꪸ ꪕꪒꪰ ꪜꪴꪙ ꪀꪲ ꪊꪸ ꪊꪱꪫ ꪵꪭꪙ ꪀꪮꪙ ꫄ꪋ ꪶꪔ ꪊꪀꪳ ꪜꪱꪉ ꪹꪀꪤ ,꫃ꪥꪒ ꪫꪀꪸ ꪬꪫꪸ ꪹꪚꪱ ꪋꪳ ꪭꪀꪸ ꫄ꪊꪚ ꪙꪣꪾ ꪘꪉꪰ ꪨꪴꪉ ꪫꪱꪥ ꪩꪱ ꪭꪳ ꪑꪉꪰ ꪼꪒ ꫄ꪊꪚ ꪙꪣꪾ ꪘꪉꪰ ꪋꪴ ꪎꪱ ꪀꪺꪉ ꪔꪉꪲ ꪩꪱꪫ ꪀꪱꪥ. ꪀꪱꪥ ꪙꪽ, ꪩꪱꪉ ꪒꪲ ꪐꪽ ꪝꪱꪫ ꪕꪉꪸ ꪮꪱꪙ ꪁꪣꪾ ꪀꪙꪲ ꪼꪒ ꪑꪷ ꪎꪴꪉ ,ꪵꪔ ꪜꪲ 2013 ꪣꪱ ꪭꪮꪒ ꪼꪅ ,ꪘꪉꪰ ꪔꪉꪲ ꪩꪱꪫ ꪀꪱꪥ ꪹꪚꪱ ꪼꪫ ꪹꪀꪒ ꪎꪉꪲ ꪮꪮꪀ ꪋꪴ ꪵꪚ ꪹꪣꪱ ꪹꪋꪉ ꪀꪙꪲ ꪨꪱꪥ ꫛ.

ꪙꪮꪀ ꪙꪽ ꪮꪮꪀ ꪝꪉꪳ ꪵꪈꪉ ꪣꪲ ꪊꪀꪳ ꪁꪫꪙꪸ ꪒꪸ ꪹꪠꪉ ꪜꪴꪀ ꪝꪺ ꪫꪀꪸ ꪀꪣꪸ ꪋꪱ, ꪩꪣꪾ ꪵꪩ ꪡꪱꪒ ꪻꪢ ꪠꪒꪲ ꪖꪀꪳ, ꪎꪮꪉ ꪢꪱ ꪋꪙꪸ ꪜꪱꪫ ꪀꪫꪱꪉ ꪕꪺ ꪭꪮꪒ ꪋꪴ ꪖꪱꪙ ꫄ꪨꪙ ꫄ꪤꪙ ꪹꪣꪉ ,ꪶꪭꪣ ꫄ꪡꪙ ꫃ꪥꪒ ꪤꪮꪙ ꪎꪸ ꪝꪉꪳ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ ꪶꪩꪉ.

ꪕꪮꪥ ꪩꪴꪉ ꪹꪩꪉ ꪪꪽ ꪀꪙꪸ ꪠꪷ ꪤꪱꪣ ꪶꪒꪀ ꫄ꪎ ꪮꪲ ꫃ꪔ ꪔꪉꪲ ꪓꪙꪸ ꪚꪙꪸ ꪭꪳ ꪘꪱ ꪫꪀꪸ ꪐꪽ ꪝꪱꪫ ꪕꪉꪸ ꪮꪱꪙ ꪁꪣꪾ ꪀꪙꪲ ꫄ꪩꪉ ꪼꪒ ꪵꪈꪉ ꪐꪽ ꪵꪥꪉ ꪨꪷ ꪶꪀꪀ ꪊꪉꪲ. ꪀꪱꪥ ꪙꪽ ꪜꪴꪀ ꪝꪺ ꪋꪙꪸ ꪜꪱꪫ ꪭꪮꪒ ꪋꪴ ꫛ ꫄ꪤꪙ ꪀꪱꪥ ꪚꪱꪫ ,ꪒꪱꪥ ꪕꪲ ꪫꪲ ꪕꪮꪥ ꪨꪱꪥ ꪖꪳ ꪁꪫꪱꪣ ꪝꪲ ꪙꪮꪉ ꪹꪋ ꪙꪮꪲ ꫛ, ꪀꪱꪥ ꪝꪉꪳ ꪵꪖꪫ ꪎꪳ, ꪚꪉꪰ ꪬꪴꪙ ꪵꪮꪉ. ꪭꪱꪀ ꪫꪱ ꪩꪺꪉ ꫃ꪥꪒ ꪒꪲ ꫄ꪐꪒ ꪨꪷ ꪻꪬ ꪀꪱꪙ ꪶꪛ ꪮꪲ ꫃ꪔ ꪶꪩꪉ ꪼꪜ ꫄ꪀ ꫄ꪎ ꪋꪀꪳ ꪹꪋꪱ ꪋꪙꪸ ꪜꪱꪫ ꪻꪬ ꫛ ꫄ꪤꪙ.

ꪝꪉꪳ ꪩꪺꪉ ꪜꪴꪙ ꪄꪮꪉ ꪋꪴ ꪒꪸ ꪹꪠꪉ ,ꪝꪉꪳ ꪵꪈꪉ ꪣꪲ ꪊꪀꪳ ꪁꪫꪙꪸ ꪘꪉꪰ ꪝꪉꪳ ꪔꪉꪲ ꪼꪔ ꪚꪀꪰ ꪜꪴꪙ ꪮꪮꪀ ꪁꪷ ꪹꪏꪉ ꪒꪱꪉ ꪼꪒ ꫄ꪊꪚ ꪙꪣꪾ ꪹꪏꪉ: ꪔꪴꪣ ꪝꪺ ꪋꪙꪸ ꪜꪱꪫ, ꪋꪀꪲ ꪚꪮꪀ ꪻꪬ ꫛ ꫄ꪤꪙ ,ꪮꪺꪙ ꪝꪱ ꪊꪴꪣ ꪢꪴ ꪶꪩꪉ ꪼꪜ ꫄ꪀ ꫄ꪎ ꪀꪣꪸ ꪋꪱ, ꪀꪲ ꪊꪸ ꪊꪱꪫ ꪵꪭꪙ. ꪼꪫ ꪁꪒꪳ ꪼꪒ ꪝꪉꪳ ꪩꪺꪉ ꪜꪴꪙ ꪙꪽ, ꪭꪴ ꪼꪒ ꪔꪴꪣ ꪝꪺ ꪊꪴꪣ ꪢꪴ ꪀꪣꪸ ꪋꪱ, ꪀꪽ ꫄ꪕꪙ ꪼꪈ ꪵꪔ ꫃ꪥꪒ ꪹꪥꪙ ,ꪼꪒ ꪣꪲ ꪩꪺꪉ ꪡꪱꪒ ꪻꪢ ꪏꪳ ꪢꪉꪲ ꪝꪉꪳ ꫛ ꫃ꪥꪒ ꪡꪒꪲ ꪖꪀꪳ.

ꪩꪙꪳ ꪹꪏ ꪨꪷ ꪼꪒ ꪀꪽ ꫄ꪕꪙ ꪝꪉꪳ ꪫꪀꪸ ꫃ꪥꪒ ꪹꪚꪱ ꪒꪲ ꪄꪮꪉ ꪊꪴꪣ ꪢꪴ ꪣꪲ ꪊꪀꪳ ꪁꪫꪙꪸ ꪀꪺꪉ ꪫꪀꪸ ꪀꪣꪸ ꪋꪱ, ꪠꪱꪒ ꪻꪢ ꪝꪉꪳ ꫛ ꫃ꪥꪒ ꪠꪒꪲ ꪖꪳꪀ ꪭꪳ ꫛ ꫄ꪤꪙ ꪊꪉꪰ ꪋꪲ ꪼꪒ ꪎꪴ ꪁꪣꪾ ꪀꪙꪲ ꪵꪝꪀ ꪻꪎ, ꪕꪉꪸ ꪮꪱꪙ ,꫄ꪋ ꪙꪽ ꪊꪉꪰ ꪋꪲ ꪀꪱꪣ ꪤꪮꪙ ꪎꪲ ꪼꪒ ꪝꪉꪳ ꪋꪴ ꪹꪚ ꪹꪣꪱ ꪹꪋꪉ ꪀꪙꪲ ꪨꪱꪥ ꫛ ꪘꪉꪰ ꪶꪠꪉ ꪼꪔ ꪚꪀꪰ.

ꪹꪩꪉ ꪭꪫꪙꪸ ꪥꪲꪀ