Ninh Thuận:Tủm pua nả vịa chự phong tốc nặm hẳư làn nọi phổng pi nọng chựa nọi côn

------------

Bườn 11/2016, nẳng xã Phước Thái, huyện Ninh Phước, tỉnh Ninh Thuận cướt xình ók chu làn nọi tài tốc nặm chếp xảy mảy chằư, làn nọi chuốp tốc nặm lỏ Mã Vỹ Khang, chựa côn Chăm, 12 pì, học sình lớp 6, Trương THCS Đổng Dậu. Chu vịa nẳng xã Phước Thái dệt hẳư tay hươn cánh bản mương cánh báu hê lưm đảy hư họt bườn 3/2017, nẳng xã Xuân Hải, huyện Ninh Hải cọ cướt xình ók chu làn nọi nưng tài tốc nặm mắư, làn nọi lỏ học sình lớp 2, Trương tiểu học Phước Nhơn, chư lỏ Nguyễn Quốc Cường, chựa côn Chăm. Lằng chơ nhá xừ ma hươn, Cường cọ chướng pưng bạn lông pày nòng luồng dú lắc hươn trương dáo cày số nưng vạy áp. Chơ pày họt nòng luồng, Cường cọ teo lông nòng, pộ nòng lậc lẹo báu hụ loi, xương nặn nhăng báu hê lợp khék hà côn choi Cường cọ chuốp tài chồm nặm lẹo.

Toi biền mài khòng Sở Lào động thường bình xã hội tỉnh Ninh Thuận, té hùa pì 2016 ma họt khay, mi cài 90 chu chọ nạn, chếp bát dệt 29 làn nọi chuốp xiệt mo, cuồng nặn mi 24 làn nọi chuốp xiệt mo pộ tốc nặm. Vạy tủm pua luông cạt kiên, chự phong pưng chu chọ nạn chếp bát, tốc nặm hẳư làn nọi, tỉnh Ninh Thuận cọ mi chỉa lai chịk bók chu cấp, chu ngành, địa phường pồng chằư luông pùn pùn chiên páo, bók xòn ma tang chự phong tài tốc nặm hẳư làn nọi họt chu thản lấn dần mương, lưn xưa lỏ nẳng phổng nhăng pọ lài dạk cha, phổng pi nọng chựa nọi côn, mi số làn nọi chuốp xiệt mo pộ tốc nặm lài. Pưng xã, huyện, lăm le, tứm ten pưng biển tống páo, biển páo chịk bók pưng phổng hiểm hại hẳư làn nọi. Tẳng tánh chương trình bó loi nẳng cuồng hươn trương cánh cuồng bản mương hẳư pưng làn nọi hê hụ loi cánh chịk bók luông nung xửa phao chơ pày áp.

Cắp luông chôm hặp khòng lài ngành mi chức quyên, chính quyên địa phường pọm cắp pưng luông pùn pọm pâng chi tựng dan dón xìa đảy nả vịa tài chồm nặm nẳng lài nọi. Pọm cắp pưng luông pùn khòng cờ quàn mi chức quyên hư pưg phủ pền ải, pền êm, xay giáo,… cận lâng chơ tít tờn, chịk bók pưng làn luông chự phong, luông hụ hền bón hiểm hại vạy vện ník. Dệt đảy xương nặn, chắng chi dón xìa đảy pưng chu chọ nạn chếp xảy mảy chằư mi xương cướt xình ók, vạy pưng làn đảy ỉn muôn dặng he muôn hòm cánh tiêng àn./.

ꪘꪉꪲ ꪗꪺꪙ: ꪔꪣꪴ ꪝꪺ ꪘꪱ ꪫꪀꪸ ꪔꪱꪥ ꪶꪔꪀ ꪙꪣꪾ ꪻꪬ ꪨꪱꪙ ꪙꪮꪥ

-------------------------

ꪹꪚꪙ 11-2016, ꪘꪉꪰ ꪎꪱ ꪹꪠꪀ ꪖꪱꪥ , ꪭꪫꪙꪸ ꪙꪉꪲ ꪹꪠꪀ , ꪔꪉꪲ ꪙꪉꪲ ꪗꪺꪙ ꪹꪀꪒ ꪎꪲꪉ ꪮꪮꪀ ꪋꪴ ꪨꪱꪙ ꪙꪮꪥ ꪔꪱꪥ ꪶꪔꪀ ꪙꪣꪾ ꪹꪊꪸꪚ ꪼꪎ ꪼꪢ ꪻꪊ , ꪨꪱꪙ ꪙꪮꪥ ꪊꪺꪚ ꪔꪱꪥ ꪶꪔꪀ ꪙꪣꪾ ꪨꪷ ꪢꪱ ꪪꪲ ꪅꪱꪉ , ꪹꪋ ꫛ ꪋꪣꪾ , 12 ꪜꪲ ꪒꪱꪉ ꪵꪮꪚ ꪹꪨꪷꪚ 6 ꪹꪋꪉ ꪊꪉꪴ ꪭꪮꪀ ꪹꪀꪷ ꪹꪎꪷ ꪶꪒꪉ ꪹꪥꪱ. ꪋꪴ ꪫꪀꪸ ꪘꪉꪰ ꪎꪱ ꪹꪠꪀ ꪖꪱꪥ ꪹꪥꪸꪒ ꪻꪬ ꪼꪕ ꪹꪭꪙ ꪵꪀꪈ ꪚꪱꪙ ꪄꪺꪉ ꪹꪚꪱ ꪹꪭꪸ ꪩꪣꪳ ꪼꪒ ꪭꪳ ꪭꪮꪒ ꪹꪚꪙ 3-2017, ꪘꪉꪰ ꪎꪱ ꪏꪺꪙ ꪬꪱꪥ , ꪭꪫꪙꪸ ꪙꪉꪲ ꪬꪱꪥ ꪁꪷ ꪹꪀꪒ ꪎꪲꪉ ꪮꪮꪀ ꪋꪴ ꪨꪱꪙ ꪙꪮꪥ ꪔꪱꪥ ꪶꪔꪀ ꪙꪣꪾ ꫜ ꪻꪢ , ꪨꪱꪙ ꪙꪮꪥ ꪨꪷ ꪭꪮꪀ ꪎꪉꪲ ꪹꪨꪷꪚ 2, ꪹꪋꪉ ꪔꪫꪸ ꪭꪮꪀ ꪹꪠꪀ ꪹꪑꪷꪙ , ꪋꪳ ꪨꪷ ꪈꪫꪸꪙ ꪀꪺꪀ ꪹꪀꪉ , ꪹꪋ ꫛ ꪋꪣꪾ. ꪨꪉꪰ ꪹꪋꪷ ꪐꪱ ꪎꪳ ꪣꪱ ꪹꪭꪙ , ꪹꪀꪉ ꪁꪷ ꪹꪊꪉ ꪝꪉꪳ ꪛꪱꪙ ꪶꪩꪉ ꪼꪜ ꪮꪱꪚ ꪁꪳ ꪘꪮꪉ . ꪹꪋꪷ ꪼꪜ ꪭꪮꪒ ꪘꪮꪉ ꪹꪀꪉ ꪁꪷ ꪵꪕꪫ ꪶꪩꪉ ꪘꪮꪉ , ꪶꪝ ꪘꪮꪉ ꪹꪩꪷꪀ ꪵꪩꪫ ꪹꪚꪱ ꪭꪴ ꪩꪮꪥ , ꪹꪏꪉ ꪙꪽ ꪑꪉꪰ ꪹꪚꪱ ꪹꪩꪷꪚ ꪵꪄꪀ ꪬꪱ ꫛ ꪀꪲꪫ ꪋꪮꪥ ꪹꪀꪉ ꪁꪷ ꪊꪺꪚ ꪔꪱꪥ ꪶꪔꪀ ꪙꪣꪾ ꪵꪩꪫ.

ꪕꪮꪥ ꪚꪙꪸ ꪢꪱꪥ ꪄꪮꪉ ꪹꪎꪷ ꪨꪱꪫ ꪶꪒꪉ ꪹꪖꪉ ꪚꪉꪲ ꪎꪱ  ꪶꪭꪥ ꪔꪉꪲ ꪙꪉꪲ ꪗꪺꪙ , ꪵꪔ ꪬꪺ ꪜꪲ 2016 ꪣꪱ ꪭꪮꪒ ꪼꪅ , ꪣꪲ ꪀꪱꪥ 90 ꪋꪴ ꪋꪷ ꪙꪱꪙ , ꪹꪊꪸꪚ ꪚꪱꪒ ꪹꪥꪸꪒ ꪻꪬ 29 ꪨꪱꪙ ꪙꪮꪥ ꪊꪺꪚ ꪏꪒꪸ ꪣꪷ , ꪀꪺꪉ ꪙꪽ ꪣꪲ 24 ꪨꪱꪙ ꪊꪺꪚ ꪔꪱꪥ ꪶꪊꪣ ꪙꪣꪾ . ꪼꪫ ꪔꪣꪴ ꪝꪺ ꪩꪺꪉ ꪁꪱꪒ ꪁꪙꪸ ꪋꪳ ꪡꪮꪉ ꪝꪉꪳ ꪋꪴ ꪋꪷ ꪙꪱꪙ , ꪹꪊꪸꪚ ꪚꪱꪒ ꪻꪬ ꪨꪱꪙ ꪙꪮꪥ ꪔꪉꪲ ꪙꪉꪲ ꪗꪺꪙ ꪁꪷ ꪣꪲ ꪊꪸ ꪩꪱꪥ ꪋꪲꪀ ꪚꪮꪀ ꪋꪴ ꪹꪀꪷꪚ ꪋꪴ ꪵꪈꪉ ꪒꪸ ꪹꪠꪉ ꪶꪜꪉ ꪻꪊ ꪩꪺꪉ ꪜꪙꪴ ꪋꪙꪸ ꪜꪱꪫ , ꪚꪮꪀ ꪎꪮꪙ ꪣꪱ ꪕꪱꪉ ꪋꪳ ꪡꪮꪉ ꪔꪱꪥ ꪶꪔꪀ ꪙꪣꪾ ꪻꪬ ꪨꪱꪙ ꪙꪮꪥ ꪭꪮꪒ ꪋꪴ ꪖꪱꪙ ꪹꪨꪷꪙ ꪹꪤꪷꪙ ꪹꪣꪉ. ꪝꪉꪳ ꪎꪱ , ꪭꪫꪙꪸ ꪔꪣꪳ ꪵꪕꪙ ꪝꪉꪳ ꪚꪙꪸ ꪶꪔꪉ ꪜꪱꪫ ꪬꪣꪸ ꪭꪱꪥ . ꪔꪉꪰ ꪵꪔꪉ ꪹꪊꪉ ꪊꪉꪲ ꪚꪮꪀ ꪩꪮꪥ ꪘꪉꪰ ꪀꪺꪉ ꪹꪭꪙ ꪹꪋꪉ ꪵꪀꪈ ꪀꪺꪉ ꪚꪱꪙ ꪹꪣꪉ ꪻꪬ ꪝꪉꪳ ꪨꪱꪙ ꪵꪀꪉ ꪋꪀꪲ ꪚꪮꪀ ꪩꪺꪉ ꪙꪴꪉ ꪎꪺꪉ ꪹꪎ ꪡꪱꪫ ꪹꪊꪷ ꪼꪜ ꪵꪮꪚ ꪩꪮꪥ.

ꪀꪚꪰ ꪩꪺꪉ ꪶꪊꪣ ꪭꪚꪰ ꪄꪮꪉ ꪨꪱꪥ ꪵꪈꪉ ꪣꪲ ꪊꪀꪳ ꪁꪫꪙꪸ , ꪊꪉꪲ ꪁꪫꪙꪸ ꪒꪸ ꪹꪠꪉ ꪝꪮꪣ ꪀꪚꪰ ꪝꪉꪳ ꪩꪺꪉ ꪜꪙꪴ ꪝꪮꪣ ꪹꪝꪷꪉ ꪊꪲ ꪕꪉꪳ ꪥꪱꪙ ꪤꪮꪙ ꪎꪸ ꪼꪒ ꪝꪉꪳ ꪊꪴ ꪔꪱꪥ ꪶꪂꪣ ꪙꪣꪾ ꪘꪉꪰ ꪨꪱꪙ ꪙꪮꪥ. ꪝꪮꪣ ꪀꪚꪰ ꪝꪉꪳ ꪩꪺꪉ ꪜꪙꪴ ꪄꪮꪉ ꪹꪀꪷ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꪭꪳ ꪝꪉꪳ ꪠꪴ ꪹꪜꪸꪙ ꪮꪱꪥ ꪹꪜꪸꪙ ꪹꪯꪸꪣ ꪵꪀꪉ ꪼꪏ ꪤꪱꪫ ꪹꪁꪷꪙ ꪔꪲꪒ ꪹꪔꪷꪙ ꪋꪀꪲ ꪚꪮꪀ ꪝꪉꪳ ꪨꪱꪘ ꪩꪺꪉ ꪋꪳ ꪡꪮꪉ , ꪩꪺꪉ ꪭꪴ ꪹꪬꪸꪙ ꪚꪮꪙ ꪬꪣꪸ ꪭꪱꪥ ꪼꪫ ꪹꪫꪸꪙ ꪘꪀꪲ . ꪹꪥꪸꪒ ꪼꪒ ꪹꪏꪉ ꪙꪽ ꪊꪉꪰ ꪋꪲ ꪤꪮꪙ ꪎꪸ ꪼꪒ ꪝꪉꪳ ꪋꪴ ꪋꪷ ꪙꪱꪙ ꪹꪊꪸꪚ ꪼꪎ ꪼꪢ ꪻꪊ ꪣꪲ ꪹꪏꪉ ꪹꪀꪒ ꪎꪉꪲ ꪮꪮꪀ , ꪼꪫ ꪝꪉꪳ ꪨꪱꪙ ꪼꪒ ꪮꪲꪣ ꪣꪺꪙ ꪥꪉꪰ ꪵꪭ ꪣꪺꪙ ꪬꪮꪣ ꪵꪀꪉ ꪕꪉꪸ ꪮꪱꪙ.

TTHCM – Thành dịch