Pùn pàn lan nóm Sơn La cóp pặc hôm hanh tẳng tánh bản na mắư

Cắp luông chôm hặp cóp pặc hôm hanh khòng cài 250 thành niền hák muôn chằư chôm choi vịa bản càn mương, cuồng dan mự nưng xểm tang khảu mưa cuồng bản Pảng, xã Chiềng Đèn, thành phố Sơn La hy cài păn nưng 300 thứak cọ đảy pù bê tông piêng pặp. Côn dần cuồng bản phằư cọ muôn hòm.

          Ăn lỏ vịa dệt nưng cuồng pưng vịa dệt cuồng chương trình hák muôn chằư chôm choi vịa bản càn mương đảy tỉnh đoàn Sơn La chấp năm nẳng xã Chiêng Đèn, thành phố Sơn La vạy pếnh khày luông pa tuôn uồn cón khòng đoàn viền, thành niền chôm hặp tẳng tánh bản na mắư. Nọk nặn ók câu lạc bộ say dà nóm cằm Sơn La cánh câu lạc bộ phồm Sơn La cọ khám cánh xén phồm báu àu ngơn hẳư cài 450 vặt côn dần cánh pưng nọng học sình; choi dừa 10 chua hươn tẳng thiềng xìa… Chương trình cọ púc chuân đảy lướm lài thành niền chôm hặp.

Cắp luông pùn pa tuôn uồn cón, hák muôn chằư chôm choi, luông xắc chọng văn dọc khòng pùn pàn lan nóm, chu cấp Bộ đoàn tỉnh Sơn La cọ mi lài vịa dệt xương chôm hặp tẳng tánh bản na mắư, tẳng tánh nết kìn liêm dú phổng đô thị, pảy chự bón nặm kìn đìn dú, cặm tó cắp pưng khù báu ngau khòng phạ đìn cướt sình ók , khâng lò choi dừa pùn pàn lan nọi. Lưn xưa cuồng bườn thành niền, mỏi huyện, thành đoàn, đoàn trực thuộc  mi nọi nhất công trình thành niền nưng mỏi cơ sở đoàn chấp năm 2 ngon vịa thành niền chôm hặp tẳng tánh bản na mắư, pù bê tông tang pày ma đòm bản…

          Khù pộn dỏn cuồng pưng vịa dệt khòng đoàn viền thành niền chu cấp ặn lỏ tẳng tánh pưng công trình “ Hung hương phổng bản na” Té luông dệt cốc khoẹ nẳng thành phố Sơn La, họt khạy cọ đảy khày quảng họt pưng huyện: Mai Sơn, Sông Mã, Phù Yền… Khạy, tênh cá tỉnh mi dáo 14 cày số tang mi điện tảy hung đảy pưng tổ chức đoàn nhẳn dệt cánh àu khảu xủ, tạ khù ngai đì hẳư côn dần pày ma. Riềng pì cài, đoàn viền thành niền Sơn La cọ nhôm xỏng 3 păn ngon chương, tẳng mắư cánh sảng pành 14 làng hươn ín xường, tênh mết số ngơn dòm xắư dệt lỏ dáo tỷ nưng mằn; tổ chức khám dà bệnh cánh cấp dà báu mết ngơn hẳư 3.600 côn; dệt mắư 50 cày số tang pày ma đòm bản na.

          Báu chư hịa cuồng bườn thành niền, pưng vịa dệt hák muôn chằư chôm choi vịa bản càn mương, cóp pặc hôm hanh tẳng tánh bản na mắư nhăng đảy mỏi đoàn viền, thành niền tỉnh Sơn La muôn chằư chôm hặp, cắp mòng cong cóp pặc hôm hanh khòng pùn pàn lan nóm tẳng tánh Sơn La nhương mự nhương mả khày./.

Hồng Việt-Huyền dịch

ꪜꪴꪙ ꪜꪱꪙ ꪩꪱꪙ ꪘꪮꪣ ꫄ꪎꪙ ꪨꪱ ꪀꪮꪚ ꪝꪀꪰ ꪶꪭꪣ ꪵꪭꪉ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ

          ꪀꪚꪾ ꪩꪺꪉ ꪀꪮꪚ ꪝꪀꪰ ꪶꪭꪣ ꪵꪭꪉ ꪄꪮꪉ ꪀꪱꪥ 250 ꪵꪖꪉ ꪘꪙꪸ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪫꪀꪸ ꪚꪱꪙ ꪀꪱꪙ ꪹꪣꪉ ,ꪀꪺꪉ ꪥꪱꪙ ꪣꪳ ꪙꪉꪳ ꫃ꪎꪣ ꪕꪱꪉ ꪹꪄꪱ ꪹꪣ ꪀꪺꪉ ꪚꪱꪙ ꪜꪱꪉ ,ꪎꪱ ꪋꪉꪸ ꪵꪒꪙ ,ꪵꪗꪉ ꪶꪠ ꫄ꪎꪘ ꪨꪱ ꪭꪲ ꪀꪱꪥ ꪝꪽ ꫜ 300 ꪖꪀꪳ ꪀꪷ ꪼꪒ ꪜꪴ ꫃ꪛ ꪶꪕꪉ ꪝꪉꪸ ꪝꪚꪾ. ꫛ ꫄ꪤꪙ ꪀꪺꪉ ꪚꪱꪙ ꪼꪠ ꪁꪷ ꪣꪺꪙ ꪬꪮꪣ.

          ꪯꪽ ꪨꪷ ꪫꪀꪸ ꫃ꪥꪒ ꫜ ꪀꪺꪉ ꪝꪉꪳ ꪹꪊꪉ ꪊꪉꪲ ꪫꪀꪸ ꫃ꪥꪒ ꪀꪺꪉ ꪹꪊꪉ ꪊꪉꪲ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪫꪀꪸ ꪚꪱꪙ ꪀꪱꪙ ꪹꪣꪉ ꪼꪒ ꪔꪉꪲ ꪒꪫꪱꪙ ꫄ꪎꪙ ꪨꪱ ꫄ꪊꪚ ꪙꪣꪾ ꪘꪉꪰ ꪎꪱ ꪋꪉꪸ ꪵꪒꪙ ꪼꪫ ꫃ꪜꪉ ꪼꪄ ꪩꪺꪉ ꪝꪱ ꪕꪺꪙ ꪮꪺꪙ ꪀꪮꪙ ꪄꪮꪉ ꪒꪫꪱꪙ ꪪꪙꪸ ꪵꪖꪉ ꪘꪙꪸ ꪶꪋꪣ ꪭꪚꪾ ꪔꪉꪰ ꪵꪔꪉ ꪚꪱꪙ ꪘꪱ ꪻꪢ. ꪙꪮꪀ ꪙꪽ ꪮꪮꪀ ꪹꪀꪱ ꪩꪱꪀ ꪶꪛ ꪼꪏ ꪤꪱ ꪘꪮꪣ ꪀꪣꪾ ꪵꪀꪉ ꪹꪀꪱ ꪩꪱꪀ ꪶꪛ ꪶꪠꪣ ꫄ꪎꪙ ꪨꪱ ꪁꪷ ꪄꪱꪣ ꪵꪀꪉ ꪵꪎꪙ ꪶꪠꪣ ꪹꪚꪱ ꪹꪮꪱ ꫄ꪉꪙ ꪼꪬ ꪀꪱꪥ 450 ꪫꪒꪰ ꫛ ꫄ꪤꪙ ꪵꪀꪉ ꪝꪉꪳ ꪙꪮꪉ ꪭꪮꪀ ꪎꪉꪲ; ꪋꪮꪥ ꪹꪤ 10 ꪋꪺ ꪹꪭꪙ ꪔꪉꪰ ꪖꪉꪸ ꪎꪸꪲ. ꪹꪊꪉ ꪊꪉꪲ ꪜꪴꪀ ꪋꪺꪙ ꪼꪒ ꪨꪱꪥ ꪵꪖꪉ ꪘꪙꪸ ꪶꪋꪣ ꪭꪚꪾ.

          ꪀꪚꪾ ꪩꪺꪉ ꪜꪴꪙ ꪝꪱ ꪕꪺꪙ ꪮꪺꪙ ꪀꪮꪙ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ,ꪋꪴ ꫄ꪀꪚ ꪶꪛ ꪒꪫꪱꪙ ꪔꪉꪲ ꫄ꪎꪙ ꪨꪱ ꪀꪷ ꪣꪲ ꪨꪱꪥ ꪫꪀꪸ ꫃ꪥꪒ ꪹꪏꪉ ꪶꪋꪣ ꪭꪚꪾ ꪔꪉꪽ ꪵꪔꪉ ꪚꪱꪙ ꪙꪱ ꪻꪢ ,ꪔꪉꪰ ꪵꪔꪉ ꫃ꪘꪒ ꪀꪲꪙ ꪩꪣꪸ ꪤꪴ ꪶꪠꪉ ꪶꪒ ꪗꪲ, ꪼꪜ ꪋꪳ ꪚꪮꪙ ꪙꪣꪾ ꪀꪙꪲ ꪒꪙꪲ ꪤꪴ, ꫄ꪅꪉ ꪨꪷ ꪋꪮꪥ ꪹꪤ ꪜꪴꪙ ꪜꪱꪙ ꪩꪱꪙ ꪙꪮꪥ. ꪩꪙꪳ ꪹꪏ ꪀꪺꪉ ꪹꪚꪙ ꪵꪖꪉ ꪘꪙꪸ ,ꪢꪮꪥ ꪭꪫꪙꪸ ꪵꪗꪉ ꪒꪫꪱꪙ ,ꪒꪫꪱꪙ ꪋꪀꪳ ꪗꪺꪀ ꪣꪲ ꪙꪮꪥ ꫄ꪐꪒ ꪶꪀꪉ ꪊꪉꪲ ꪵꪖꪉ ꪘꪙꪸ ꫜ, ꪢꪮꪥ ꫄ꪀ ꫄ꪎ ꪒꪫꪱꪙ ꫄ꪊꪚ ꪙꪣꪾ 2 ꪉꪮꪙ ꪫꪀꪸ ꪵꪖꪉ ꪘꪙꪸ ꪶꪋꪣ ꪭꪚꪾ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ.

          ꪄꪴ ꪶꪝꪙ ꪤꪮꪙ ꪀꪺꪉ ꪫꪀꪸ ꫃ꪥꪒ ꪄꪮꪉ ꪒꪫꪱꪙ ꪪꪙꪸ ꪵꪖꪉ ꪘꪙꪸ ꪋꪴ ꫄ꪀꪚ ꪯꪽ ꪨꪷ ꪔꪉꪰ ꪵꪔꪉ ꪝꪉꪳ ꪶꪀꪉ ꪊꪉꪲ “ ꪭꪴꪉ ꪹꪭꪉ ꪶꪠꪉ ꪚꪱꪙ ꪙꪱ” ꪵꪔ ꪩꪺꪉ ꫃ꪥꪒ ꪶꪀꪀ ꪵꪅꪫ ꪘꪉꪰ ꪵꪗꪉ ꪶꪠ ꫄ꪎꪙ ꪨꪱ ꪭꪮꪒ ꪼꪅ ꪀꪷ ꪼꪒ ꪼꪄ ꪀꪫꪱꪉ ꪼꪜ ꪭꪮꪒ ꪝꪉꪳ ꪭꪫꪙꪸ: ꪢꪱꪥ ꫄ꪎꪙ ,ꪶꪎꪉ ꪢꪱ, ꪠꪴ ꪮꪙꪸ. ꪭꪮꪒ ꪼꪄ ꫃ꪕꪉ ꪀꪱ ꪔꪉꪲ ꪣꪲ ꪤꪱꪫ 14 ꪼꪀ ꪶꪎ ꪕꪱꪉ ꪣꪲ ꪒꪙꪲ ꪼꪔ ꪭꪴꪉ ꪼꪒ ꪝꪉꪳ ꪶꪔ ꪊꪀꪳ ꪒꪪꪱꪘ ꪐꪽ ꫃ꪥꪒ. ꪤꪉꪸ ꪜꪲ ꪀꪱꪥ ꪒꪫꪱꪙ ꪵꪖꪈ ꪘꪙꪸ ꫄ꪎꪙ ꪨꪱ ꪁꪷ ꪶꪑꪣ ꪎꪮꪉ 3 ꪝꪽ ꪉꪮꪙ ꪹꪋꪉ ,ꪔꪉꪰ ꪻꪢ ꪵꪀꪉ ꪎꪱꪉ ꪵꪜꪉ 14 ꪨꪱꪉ ꪹꪭꪙ ꪮꪙꪲ ꪹꪎꪉ; ꫃ꪕꪉ ꫃ꪢꪒ ꪶꪎ ꫄ꪉꪙ ꪤꪮꪣ ꪻꪎ ꫃ꪥꪒ ꪨꪷ ꪤꪱꪫ ꪔꪲ ꫜ ꪢꪽ. ꪶꪔ ꪊꪀꪳ ꪄꪱꪣ ꪤꪱ ꫃ꪛꪉ ꪵꪀꪉ ꫄ꪀꪚ ꪤꪱ ꪹꪚꪱ ꪹꪮꪱ ꫄ꪉꪙ ꪻꪬ ꪀꪱꪥ 3600 ꫛ; ꫃ꪥꪒ ꪻꪢ ꪀꪱꪥ 50 ꪼꪀ ꪶꪎ ꪕꪱꪉ ꪼꪜ ꪣꪱ ꪒꪮꪣ ꪚꪱꪙ ꪙꪱ.

          ꪹꪚꪱ ꪋꪳ ꪭꪀꪲ ꪀꪺꪉ ꪹꪚꪙ ꪵꪗꪉ ꪘꪙꪸ ꪩꪱ, ꪝꪉꪳ ꪫꪀꪸ ꫃ꪥꪒ ꪬꪱꪀ ꪣꪺꪙ ꪻꪊ ꪶꪋꪣ ꪋꪮꪥ ꪫꪀꪸ ꪚꪱꪙ ꪀꪱꪙ ꪹꪣꪉ ,ꪀꪮꪚ ꪝꪀꪰ ꪶꪭꪣ ꪵꪭꪉ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ ꪑꪉꪰ ꪼꪒ ꪢꪮꪥ ꪒꪫꪱꪙ ꪪꪙꪸ ꪵꪖꪉ ꪘꪙꪸ ꫄ꪎꪙ ꪨꪱ ꪣꪺꪙ ꪻꪊ ꪶꪋꪣ ꪭꪚꪾ, ꪢꪮꪉ ꪁꪮꪉ ꪔꪉꪰ ꪵꪔꪉ ꪔꪉꪲ ꫄ꪎꪙ ꪨꪱ ꪹꪑꪉ ꪣꪳ ꪹꪑꪉ ꪢꪱ ꪼꪄ.