Điện Biên: Nghịa hặc panh ín xường

          Lằng mự 7/5/1954, nả trận Điện Biên Phủ chuốp bén bòm  sák xiều. Nẳng tông na Mương Thành luộn to mả ống, bòm đạn khuối khoàng, mỏi tà đìn, mỏi cốc cò mạy, cò nhả pọm nhọm lượt khòng pưng chiến sỹ Điện Biên pưa nen tư tang khòng bản mương. Khảm cài 63 pì, pưng khù nặn cọ nhăng chấp đẳn dú cuồng mốc cuồng chằư pưng cựu chiến binh chiến sỹ Điện Biên pì xưn.

          Khảm pộn pưng khù chếp sảy mảy chằư khòng pàng tó xôn, lung Hoàng Công Đẩy pọm cắp côn dần Điện Biên lâng cạt sàn, khâng chằư dệt dượn, tẳng tánh bản mương.

          Noong Nhai, xã Thanh Xương, huyện Điện Biên, tỉnh Điện Biên, mự 25/4/1954, phèn xấc Tày cọ bén bòm na pan khả báp 444 côn dần, cuồng nặn phân lài lỏ côn thảu, phủ nhinh cánh làn nọi. Hák va khạy nị, Noong Nhai cọ cựt pền hươn quề hăng mi đì mả. Cắp luông hanh pưa dú cuồng phổng càng òng tông na Mương Thành, mi công trình thuỷ nông Nặm Rôm, pi nọng nẳng nị cọ hụ xủ khoa học, kỹ thuật, àu chựa khảu chất lượng xùng khảu púk đằm, háy đỏn chọn khào dệt tứm mua, puồng kìn đơi dú tẹt tiêng, pít xùi xìa cặt cung.

          Đìn cọ báu dệt hẳư hanh côn xìa lạ, tông na Mương Thành chuốp bòm đạn dệt sák xiều khạy cọ cựt pền bón dệt ók lài khảu nhất phổng Tày Bắc. Kinh tế xã hội Điện Biên cọ cựt đảy lài lang đì. Pì 2016, luông mả khày kinh tế khòng tỉnh cựt đảy 6,83%, thù nhập pằn pâng pày mỏi hùa côn cựt đảy cài 22 triệu mằn mỏi côn mỏi pì; số chua hươn cặt tênh cá tỉnh dón lông lài, nhăng cài 54 păn chua hươn, mi ngăn 45% cuồng tênh mết số chua hươn. Tỉnh đàng pếnh khày pưng lang đì cựt đảy ma tang du lịch, chóng hanh púc pua du lịch cựt pền ngành kinh tế cốc chính khòng địa phường.

          Cuồng puồng kìn đơi dú chum yền xương khạy nị, mỏi côn dần nẳng bón đìn Điện Biên ành hung cọ lâng chằm chứ cồng khun khòng pưng thương binh, liệt sỹ, pưng côn lay kinh đúk lượt pưa bón đìn nị. Nẳng tỉnh khạy mi cài 16 păn côn mi cồng cắp cách mạng đảy hưởng chế độ, chính sách, cuồng nặn mi cài 900 chua hươn liệt sỹ. Nọk chấp năm đì pháp lệnh nhọng nho côn mi cồng cắp cách mạng, chu cấp chính quyên té tỉnh họt cơ sở cọ púc pua há phong tóp khun pằng nghịa, púc chuân đảy lướm lài dần mương chôm hặp. Té pì 2011 ma họt khạy, tênh cá tỉnh xảng pành cánh tẳng mắư dáo 240 làng hươn nghịa hặc long xường, nhôm xỏng 760 sổ phák ngơn phảy dòm. Pưng êm Việt Nàm Ành hung đảy pưng tổ chức, tựng côn , đơn vị nhẳn liệng đù cá chua.

Nẳng bón đìn ngươn lang chiên lang Điện Biên Phủ, nghịa cạt sàn nhương tứm niều mẳn. Nẳng nị, mỏi côn dần đàng cóp pặc hôm hanh tẳng tánh hươn quề nhương mự nhương ím po nò pọm./.

 Bích Thuỷ-Huyền dịch

ꪓꪙꪸ ꪚꪙꪸ: ꪉꪸ ꪭꪀꪰ ꪵꪝꪉ ꪮꪙꪲ ꪹꪎꪉ

          ꪨꪉꪰ ꪣꪳ 7 ꪁꪣꪾ ꪹꪚꪙ 5 ꪜꪲ 1954, ꪘꪱ ꫄ꪋꪙ ꪓꪙꪸ ꪚꪙꪸ ꪊꪺꪚ ꪵꪚꪙ ꪚꪮꪣ ꪎꪱꪀ ꪎꪫꪸ. ꪘꪉꪰ ꪶꪕꪉ ꪙꪱ ꪹꪣꪉ ꪵꪖꪉ ꪩꪺꪙ ꪕꪷ ꪢꪱ ꪶꪮꪉ ,ꪚꪮꪣ ꪓꪱꪙ ꪄꪺꪥ ꪄꪫꪱꪉ ,ꪢꪮꪥ ꪔꪱ ꪒꪙꪲ, ꪢꪮꪥ ꪶꪀꪀ ꪀꪷ ꪼꪣ ꪀꪷ ꪐꪱ ꪝꪮꪣ ꪑꪮꪣ ꪹꪩꪒ ꪒꪱꪫ ꪄꪮꪉ ꪝꪉꪳ ꪊꪙꪸ ꪎꪲ ꪓꪙꪸ ꪚꪙꪸ ꪹꪝ ꪹꪙꪙ ꪕꪳ ꪕꪱꪉ ꪄꪮꪉ ꪚꪱꪙ ꪹꪣꪉ .ꪄꪱꪣ ꪀꪱꪥ 63 ꪜꪲ, ꪝꪉꪳ ꪄꪴ ꪙꪽ ꪁꪷ ꪑꪉꪰ ꪊꪚꪾ ꪒꪽ ꪤꪴ ꪀꪺꪉ ꪶꪣꪀ ꪀꪺꪉ ꪼꪊ ꪝꪉꪳ ꪁꪫꪲ ꪊꪙꪸ ꪚꪲꪉ ꪨꪷ ꪊꪙꪸ ꪎꪲ ꪓꪙꪸ ꪚꪙꪲ ꪹꪣ ꪜꪲ ꪏꪙꪳ.

          ꪄꪱꪣ ꪶꪝꪙ ꪝꪉꪳ ꪄꪴ ꫃ꪊꪚ ꪼꪎ ꪼꪢ ꪻꪊ ꪄꪮꪉ ꪜꪱꪉ ꪔꪷ ꪶꪏꪙ ,ꪩꪴꪉ ꪭꪫꪱꪉ ꪶꪁꪉ ꫄ꪒꪥ ꪁꪫꪲ ꪊꪙꪸ ꪚꪲꪉ ꪁꪷ ꪝꪮꪣ ꪀꪚꪾ ꫛ ꫄ꪤꪙ ꪁꪱꪒ ꪎꪱꪙ ,꫄ꪅꪉ ꪻꪊ ꫃ꪥꪒ ꪹꪥꪙ ꪔꪉꪰ ꪵꪔꪉ ꪚꪱꪙ ꪹꪣꪉ.

          ꪘꪮꪉ ꪑꪱꪥ ,ꪎꪱ ꪵꪖꪉ ꪹꪎꪉ ,ꪭꪫꪙꪸ ꪓꪙꪸ ꪚꪙꪸ, ꪔꪉꪸ ꪓꪙꪸ ꪚꪙꪸ ꪣꪳ 25 ꪁꪣꪾ ꪹꪚꪙ 4 ꪜꪲ 1954, ꪵꪠꪙ ꫄ꪎꪀ ꪼꪔ ꪁꪷ ꪵꪚꪙ ꪚꪮꪣ ꪙꪱ ꪝꪱꪙ ꪄꪱ ꪚꪱꪚ 444 ꫛ ꫄ꪤꪘ ,ꪀꪺꪉ ꪙꪽ ꫄ꪡꪙ ꪨꪱꪥ ꪨꪷ ꫛ ꪹꪖꪱ ꪵꪀ ,ꪠꪴ ꪑꪉꪲ ꪵꪀꪉ ꪨꪱꪙ ꪙꪮꪥ. ꪭꪱꪀ ꪫꪱ ꪼꪅ ꪙꪲ ꪘꪮꪉ ꪑꪱꪥ ꪁꪷ ꪁꪒꪳ ꫃ꪜꪙ ꪹꪭꪙ ꫃ꪀꪫꪥ ꪭꪉꪰ ꪣꪲ. ꪀꪚꪾ ꪩꪺꪉ ꪵꪭꪉ ꪤꪴ ꪶꪠꪉ ꪀꪱꪉ ꪮꪮꪉ ꪶꪕꪉ ꪙꪱ ꪹꪣꪉ ꪵꪖꪉ ,ꪣꪲ ꪶꪀꪉ ꪊꪉꪲ ꪖꪫꪲꪥ ꪶꪙꪉ ꪙꪣꪾ ꪶꪥꪣ ,ꪝꪲ ꪙꪮꪉ ꪘꪉꪰ ꪙꪲ ꪁꪷ ꪭꪴ ꪎꪴ ꪄꪫꪱ ꪭꪮꪀ ꪻꪎ ꪫꪀꪸ ꫃ꪥꪒ ꪹꪥꪙ ,ꪼꪬ ꪒꪮꪙ ꪋꪮꪙ ꪄꪱꪫ ꫃ꪥꪒ ꪔꪣꪴ ꪣꪺ, ꪜꪺꪉ ꪀꪙꪲ ꫄ꪓꪥ ꪤꪴ ꪵꪔꪒ ꪕꪉꪸ.

          ꪒꪙꪲ ꪁꪷ ꪹꪚꪱ ꫃ꪥꪒ ꪻꪬ ꪵꪭꪉ ꫛ ꪎꪸ ꪩꪱ, ꪶꪕꪉ ꪙꪱ ꪹꪣꪉ ꪵꪖꪉ ꪊꪺꪚ ꪚꪮꪣ ꪓꪱꪙ ꫃ꪥꪒ ꪎꪱꪀ ꪎꪫꪸ ꪼꪅ ꪁꪷ ꪁꪒꪳ ꫃ꪜꪙ ꪚꪮꪙ ꫃ꪥꪒ ꪮꪮꪀ ꪨꪱꪥ ꪹꪄꪱ ꫄ꪐꪒ ꪶꪠꪉ ꪼꪔ ꪚꪀꪰ. ꪀꪭꪲ ꫃ꪔ ꪎꪱ ꪶꪭꪥ ꪓꪙꪸ ꪚꪙꪸ ꪁꪷ ꪁꪒꪳ ꪼꪒ ꪩꪱꪉ ꪒꪲ. ꪜꪲ 2016 ꪩꪺꪉ ꪢꪱ ꪼꪄ ꪀꪉꪲ ꫃ꪔ ꪄꪮꪉ ꪔꪉꪲ ꪁꪒꪳ ꪼꪒ ꪀꪱꪥ 6,83% ꪖꪴ ꫄ꪑꪚ ꪜꪽ ꫄ꪝꪉ ꪼꪜ ꪁꪒꪳ ꪼꪒ ꪀꪱꪥ 22 ꪋꪫꪸ ꪢꪽ ꪢꪮꪥ ꫛ ꪢꪮꪥ ꪜꪲ; ꪌꪎ ꪋꪺ ꪹꪭꪙ ꪁꪒꪰ ꫃ꪕꪉ ꪀꪱ ꪔꪉꪲ ꪤꪮꪙ ꪶꪩꪉ ꪨꪱꪥ. ꪔꪉꪲ ꪒꪱꪉ ꫃ꪜꪉ ꪼꪄ ꪁꪒꪳ ꪼꪒ ꪩꪱꪉ ꪒꪲ ꪢꪱ ꪕꪱꪉ ꪤꪴ ꪩꪀꪲ, ꪊꪮꪉ ꪵꪭꪉ ꪜꪴꪀ ꪝꪺ ꪤꪴ ꪩꪀꪲ ꪁꪒꪳ ꫃ꪜꪙ ꪵꪈꪉ ꪀꪲꪉ 6ꪔ ꪶꪀꪀ ꪊꪉꪲ ꪄꪮꪉ ꪒꪸ ꪹꪠꪉ.

          ꪀꪺꪉ ꪜꪺꪉ ꪀꪙꪲ ꫄ꪓꪥ ꪤꪴ ꪋꪴꪣ ꪮꪙꪸ ꪼꪅ ꪙꪲ ꪢꪮꪥ ꫛ ꫄ꪤꪙ ꪘꪉꪰ ꪚꪮꪙ ꪒꪙꪲ ꪓꪙꪸ ꪚꪙꪸ ꪵꪯꪉ ꪭꪴꪉ ꪁꪷ ꫄ꪩꪉ ꪊꪣꪾ ꪊꪳ ꪶꪀꪉ ꪅꪴꪙ ꪄꪮꪉ ꪝꪉꪳ ꪹꪖꪉ ꪚꪲꪉ ꪩꪒꪸ ꪎꪲ, ꪝꪉꪳ ꫛ ꪼꪩ ꪁꪉꪲ ꪒꪴꪀ ꪹꪩꪒ ꪹꪝ ꪚꪮꪙ ꪒꪙꪲ ꪙꪲ. ꪘꪉꪰ ꪔꪉꪲ ꪼꪅ ꪣꪲ ꪀꪱꪥ 16 ꪝꪽ ꫛ ꪣꪲ ꪶꪀꪉ ꪀꪚꪾ ꪵꪀꪀ ꪣꪱꪉ ꪼꪒ ꪹꪬꪉ ꫃ꪊ ꪶꪒ ꪊꪉꪲ ꪵꪎꪀ ,ꪀꪺꪉ ꪙꪽ ꪣꪲ ꪀꪱꪥ 900 ꪋꪺ ꪹꪭꪙ ꪩꪒꪸ ꪎꪲ. ꪙꪮꪀ ꫄ꪊꪚ ꪙꪣꪾ ꪒꪲ ꪊꪉꪲ ꪠꪱꪚ ꫃ꪩꪉ ꪑꪮꪉ ꪑꪷ ꫛ ꪣꪲ ꪶꪀꪉ ꪀꪚꪾ ꪵꪀꪀ ꪣꪱꪉ ,ꪋꪴ ꫄ꪀꪚ ꪊꪉꪲ ꪁꪙꪸ ꪵꪔ ꪔꪉꪲ ꪭꪮꪒ ꫄ꪀ ꫄ꪎ ꪁꪷ ꪜꪴꪀ ꪝꪺ ꪬꪱ ꪡꪮꪉ ꪕꪮꪚ ꪅꪴꪙ ꪜꪉꪰ ꪉꪸ, ꪜꪴꪀ ꪋꪺꪙ ꪼꪒ ꪨꪱꪤ ꫛ ꫄ꪥꪙ ꪶꪋꪣ ꪭꪚꪾ. ꪵꪔ ꪜꪲ 2011 ꪣꪱ ꪭꪮꪒ ꪼꪅ ꫃ꪕꪉ ꪀꪱ ꪔꪉꪲ ꪎꪱꪉ ꪵꪜꪉ ꪵꪀꪉ ꪔꪉꪰ ꪻꪢ 240 ꪨꪱꪉ ꪹꪭꪙ ꪉꪸ ꪭꪀꪰ ꪩꪮꪉ ꪹꪎꪉ ,ꪶꪑꪣ ꪎꪮꪉ 760 ꪶꪎ ꪠꪱꪀ ꫄ꪉꪙ ꪼꪠ ꪤꪮꪣ. ꪝꪉꪳ ꫃ꪯꪣ ꪫꪒꪸ ꪘꪱꪣ ꪵꪮꪉ ꪭꪴꪉ ꪼꪒ ꪝꪉꪳ ꪶꪔ ꪊꪀꪳ, ꪕꪉꪳ ꫛ, ꫄ꪒꪙ ꪫꪲ ꪐꪽ ꪩꪉꪸ ꪒꪴ ꪀꪱ ꪋꪺ.

          ꪘꪉꪰ ꪚꪮꪙ ꪒꪙꪲ ꪹꪉꪙ ꪩꪱꪉ ꪋꪙꪸ ꪩꪱꪉ ꪓꪙꪸ ꪚꪙꪸ ꪠꪴ, ꪉꪸ ꪁꪱꪒ ꪎꪱꪙ ꪋꪴ ꪹꪋ ꫄ꪤꪙ ꪹꪣꪉ ꪹꪑꪉ ꪔꪣꪳ ꪘꪫꪸ ꪢꪽ. ꪘꪉꪰ ꪙꪲ ꪢꪮꪥ ꫛ ꫄ꪤꪙ ꪒꪱꪉ ꪀꪮꪚ ꪝꪀꪰ ꪶꪭꪣ ꪵꪭꪉ ꪔꪉꪰ ꪵꪔꪉ ꪹꪭꪙ ꫃ꪀꪫꪥ ꪹꪑꪉ ꪣꪳ ꪹꪑꪉ ꪮꪣꪲ ꪝꪷ ꪘꪷ ꪝꪮꪣ.

ꪚꪲꪀ ꪖꪫꪲꪥ-ꪬꪫꪙꪸ ꪥꪀꪲ