ꪨꪱꪥ ꪄꪴ ꪹꪊꪱ ꪨꪷ ꪫꪀꪸ ꪓꪙꪸ ꪄꪙꪳ ꪁꪱ

          ꪵꪫꪒ ꪻꪎ ꪢꪀꪳ ꪩꪙꪳ 7,5% ꪄꪮꪉ ꪋꪴ ꪎꪮꪣ ꪵꪜꪉ ꪄꪙꪳ ꪁꪱ ꪹꪕ ꪀꪮꪙ ꪹꪣ ꪹꪚꪙ 3 ꪜꪲ 2015, ꪹꪕ ꪙꪲ ꪢꪀꪳ ꪄꪙꪳ ꪙꪮꪥ ꪹꪏ. ꪋꪾ ꪫꪱ, ꪢꪀꪳ ꪩꪙꪳ ꪀꪱꪥ 6%, ꪁꪱ ꪁꪮꪙ ꪄꪱꪥ ꪓꪙꪸ ꫃ꪩꪀ ꪙꪮꪥ ꪜꪽ ꫄ꪝꪉ ꪼꪜ ꪩꪙꪳ ꪄꪙꪳ ꪀꪱꪥ 1.720 ꪢꪽ ꪢꪮꪥ KW ꫄ꪋ ꪓꪸꪙ, ꪝꪮꪣ ꪀꪚꪾ ꪫꪀꪸ ꪜꪙꪸ ꪖꪱꪥ ꪁꪱ ꪁꪮꪙ ꪄꪱꪥ ꪓꪙꪸ ꪻꪬ ꪢꪴ ꪵꪄꪀ ꪭꪱꪉ ꪎꪴ ꪓꪙꪸ ꪀꪚꪾ 6 ꫄ꪛꪀ ꪣꪲ ꪢꪀꪳ ꪩꪙꪳ ꪄꪙꪳ ꪹꪕ ꪙꪮꪥ, ꫃ꪤꪒ ꪨꪱꪥ ꫜ ꪎꪴ ꪓꪙꪸ ꪹꪋꪱ ꪨꪷ. ꪹꪝ ꪝꪉꪳ ꫜ ꪎꪴ ꪓꪙꪸ ꪀꪮꪉ 100kW ꫄ꪋ ꪓꪙꪸ ꪬꪉꪲ ꪎꪴ ꪓꪙꪸ ꪹꪋꪱ ꪨꪷ. ꪹꪝ ꪝꪉꪳ ꫛ ꪎꪴ ꪓꪙꪸ ꪀꪮꪉ 100 kW ꫄ꪋ ꪓꪙꪸ ꪬꪉꪲ ꪼꪒ ꪎꪴ ꪀꪱ ꪓꪙꪸ ꪀꪚꪾ ꪢꪀꪳ ꪀꪱ ꪄꪱꪥ ꪜꪽ ꫄ꪝꪉ. ꪵꪩꪫ ꫄ꪡꪙ ꪨꪱꪥ ꫛ ꪎꪴ ꪓꪙꪸ ꫄ꪉꪙ ꪵꪝꪉ ꪹꪏ ꪁꪱ ꪄꪱꪥ ꪜꪽ ꫄ꪝꪉ ꪼꪜ 110 - 154%.

          ꪶꪒꪥ ꪀꪚꪾ ꪵꪥꪫꪉ ꪉꪚꪸ ꫃ꪥꪒ ꪹꪥꪙ, ꪩꪙꪳ ꪹꪏ ꪨꪷ ꪀꪚꪾ ꪵꪥꪫꪉ ꪉꪚꪸ ꪎꪴ ꪨꪱꪥ ꪓꪙꪸ ꪭꪳ ꪫꪀꪸ ꪄꪙꪳ ꪀꪱ ꪓꪙꪸ ꫃ꪥꪒ ꪹꪋꪱ ꪨꪷ ꪋꪲ ꪣꪲ ꪨꪱꪥ ꪔꪱꪉ ꪄꪙꪳ ꪁꪱ ꪁꪮꪙ ꪹꪝ ꪎꪴ ꪻꪎ ꪫꪀꪸ ꫃ꪥꪒ ꪹꪥꪙ, ꪁꪱ ꪄꪱꪥ ꪓꪙꪸ ꪜꪲ 2016 ꪁꪷ ꪀꪣꪸ ꪔꪫꪱꪙ ꪵꪀꪉ ꪀꪣꪸ ꪊꪱ ꪹꪝ ꪶꪔ ꪶꪀꪉ ꪔꪱꪀ ꪩꪙꪸ ꪶꪛ. ꪁꪱ ꪁꪮꪙ ꪓꪙꪸ ꪄꪙꪳ ꪋꪲ ꪣꪲ ꪀꪱ ꪫꪀꪸ ꪤꪮꪣ ꫄ꪉꪙ ꪻꪎ ꪄꪙꪳ ꪶꪩꪉ ꪵꪀꪉ ꪝꪉꪳ ꪉꪮꪙ ꫄ꪉꪙ ꫃ꪭ ꪔꪉꪲ ꪔꪱ ꪭꪮꪒ ꪻꪎ ꪀꪱ ꪁꪮꪙ ꫃ꪤꪒ ꪹꪥꪙ ꪁꪱ ꪄꪱꪥ ꪓꪙꪸ ꪜꪲ 2016 ꪵꪀꪉ ꫄ꪉꪙ ꪋꪲ ꪤꪮꪣ ꪻꪎ ꫄ꪊꪚ ꪙꪾ ꪜꪲ 2017 ꪕꪮꪥ ꪕꪒꪰ ꪜꪙꪴ ꪘꪉꪰ ꪀꪫꪒꪸ ꪓꪉꪲ 24 ꪣꪱ ꪕꪱꪉ ꪩꪺꪉ ꪜꪙꪳ ꪎꪮꪣ ꪵꪜꪉ ꪀꪱ ꪄꪱꪥ ꪓꪙꪸ ꪜꪽ ꫄ꪝꪉ.  

          ꪬꪱꪀ ꪫꪱ, ꪕꪮꪥ ꪔꪙꪲ ꪎꪲ ꪈꪫꪙꪸ ꪣꪉꪲ ꪡꪮꪉ, ꪋꪫꪙꪸ ꪤꪱ ꪀꪉꪲ ꫃ꪶꪶꪔ ꪵꪈꪉ ꪓꪙꪸ ꫄ꪁꪙ ꪹꪪꪱ ꪔꪣꪳ ꪙꪱꪉ ꪁꪫꪱꪣ ꪼꪫ ꫛ ꫄ꪤꪙ ꪭꪴ ꪵꪊꪉ ꪵꪀꪉ ꫃ꪤꪒ ꪵꪊꪉ ꪹꪏ ꪀꪺꪉ ꪫꪀꪸ ꪄꪙꪳ ꪁꪱ ꪓꪙꪸ ꪹꪕ ꪙꪲ. ꪹꪏꪉ ꪀꪺꪉ ꪝꪉꪳ ꪶꪎ ꪚꪙꪸ ꪢꪱꪥ ꪔꪱꪥ ꪊꪉꪲ ꪹꪮꪱ ꪮꪮꪀ ꫃ꪭ ꫃ꪬꪙ ꪹꪫꪱ ꪵꪊꪉ ꪣꪱ ꪩꪺꪉ ꪜꪙꪴ ꪻꪬ ꪹꪨꪉ ꪹꪖꪉ, ꪵꪩꪫ ꪝꪉꪳ ꪫꪀꪸ ꫃ꪤꪒ ꪤꪮꪣ ꫄ꪉꪙ ꪻꪎ ꪙꪮꪀ ꪵꪈꪉ ꪵꪀꪉ ꪝꪉꪳ ꪄꪴ ꪒꪒꪴ ꪶꪨꪣ ꪮꪙꪳ ꪼꪒ ꪔꪉꪲ ꪔꪱ ꪹꪏꪉ ꪏꪳ ꪀꪺꪉ ꪤꪱꪘ ꪤꪮꪣ ꫄ꪉꪙ ꪻꪎ ꪵꪈꪉ ꪓꪙꪸ. ꪙꪮꪀ ꪙꪽ ꫄ꪁꪙ ꫃ꪥꪒ  ꪵꪊꪉ ꪹꪏ ꪣꪱ ꪫꪀꪸ ꪠꪱꪒ ꪓꪙꪸ, ꪄꪴ ꫜ ꫃ꪥꪒ ꫃ꪜꪙ ꪀꪱ ꪁꪮꪙ ꪓꪙꪸ.

          ꪜꪲ 2016, ꫄ꪕꪚ ꪒꪫꪱꪙ ꪓꪙꪸ ꪩꪀꪳ ꪫꪒꪸ ꪘꪱꪣ  ꪁꪒꪳ ꪼꪒꪒ ꪵꪥꪫꪉ ꪄꪴ ꪄꪱꪥ ꪓꪙꪸ ꪨꪷ 265.510 ꪔꪲ ꪢꪽ, ꪕꪷ ꪤꪱꪫ ꪁꪱ  ꪓꪙꪸ ꪄꪱꪥ ꪜꪽ ꫄ꪝꪉ ꪼꪜ ꪨꪷ ꪀꪱꪥ 1.661ꪢꪽ ꪢꪮꪥ KW ꫄ꪋ ꪓꪸꪙ. ꫄ꪕꪚ ꪒꪫꪱꪙ ꪓꪙꪸ ꪩꪀꪳ ꪫꪒꪸ ꪘꪱꪣ ꪚꪱꪫ ꪢꪱ ꪀꪱꪥ 2.658 ꪔꪲ ꪢꪽ ꪵꪔ ꪝꪉꪳ ꪫꪀꪸ ꫃ꪥꪒ ꪮꪮꪀ ꪓꪙꪸ ꪄꪱꪥ ꪜꪲ 2016, ꪬꪱꪀ ꪫꪱ ꪤꪉꪸ ꫃ꪥꪒ ꪮꪮꪀ, ꪁꪱ ꪄꪱꪥ ꪓꪙꪸ ꪑꪉꪰ ꪶꪨꪣ 594 ꪔꪲ ꪢꪽ. ꪼꪅ ꫄ꪕꪚ ꪒꪫꪱꪙ ꪙꪲ ꪑꪉꪰ ꪣꪲ ꪀꪱꪥ 9.794 ꪔꪲ ꪢꪽ ꫃ꪭ ꪜꪽ ꪤꪱꪥ ꪻꪎ ꪁꪱ ꪓꪸꪙ.

          ꪨꪱꪥ ꫜ ꪀꪺꪉ ꪚꪱꪙ ꪹꪣꪉ ꪁꪮꪉ ꪖꪄ ꪵꪈꪉ ꪓꪙꪸ ꪖꪀꪉ ꪶꪛ ꪶꪀꪉ ꪹꪗꪉ ꪋꪲ ꫃ꪥꪒ ꪵꪊꪉ ꪹꪏ ꪝꪉꪳ ꪙꪱꪉ ꪁꪫꪱꪣ ꪘꪺꪉ ꪝꪱꪙ ꪬꪮꪒ ꪄꪙꪳ ꪁꪱ ꪓꪙꪸ ꪹꪕ ꪙꪲ. ꪙꪮꪀ ꪙꪽ ꪮꪮꪀ, ꪝꪮꪣ ꪀꪚꪾ ꪫꪀꪸ ꪄꪙꪳ ꪁꪱ ꪓꪙꪸ, ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ ꫄ꪁꪙ ꪔꪣꪴ ꪝꪺ ꪀꪣꪸ ꪎꪫꪱꪒ ꪀꪱ ꪝꪉꪳ ꪔꪱꪉ ꪹꪋꪉ ꪭꪱꪉ ꪮꪙꪳ ꪼꪫ ꫃ꪫꪙ ꪘꪀꪲ ꪎꪸ ꪄꪙꪳ ꪀꪱ ꪝꪉꪳ ꪔꪱꪉ ꪹꪋꪉ ꪭꪱꪉ ꪮꪙꪳ ꪵꪀꪉ ꫃ꪥꪒ ꪬꪱꪥ ꪭꪮꪒ ꪜꪺꪉ ꪀꪙꪲ ꪩꪺꪉ ꪤꪴ ꪄꪮꪉ ꫛ ꫄ꪤꪙ.

Lai chau lo vịa khửn ca điện

          Vẹt sáư mức lưn 7,5% khong chu xỏm panh khửn ca tưa cón mưa bươn 3/2015, tưa nị, mức khửn nọi xưa. Chăm va, mức lưn cài 6%, ca con khài điện lệch nọi păn pâng pày lưn khửn cài 1.720 măn mỏi kW chơ điện, pọm cắp vịa piến thái ca con khai điện hảu mú khék hang xủ điện xủ cắp 6 bậc mi mức lưn khửn tưa nọi, dệt lai côn xủ điện chau lo. Pưa pưng côn xủ điện cỏng 100kW chơ điện hính đảy xủ ca điện cắp mức ca khài khài păn pâng. Lẹo phân lài côn xủ điện khừn ngơn panh xưa ca khài păn pâng pày té 110 154%.

          Đối cắp doanh nghiệp dệt dượn, lưn xưa lỏ cắp doanh nghiệp xủ lai điện hư vịa khửn ca ngơn điện dệt chau lo chi mi lài tàng khửn ca con pưa xủ sáư vịa dệt dượn, cạ khài điện pi 2016 cọ đảy kiếm toán cánh kiểm tra pưa Tổ công tác liên Bộ. Ca con điện khửn chi mi cá vịa ngơn dom sáư khửn lống cánh pưng ngon ngơn hê tính tà họt sáư ca con dệt dượn, cạ khài điện pi 2016 cánh ngơn chi dom sáư chấp năm pi 2017 toi tặt pun nẳng Quyết định 24 ma tang luông pun xỏm panh ca khài điện păn pâng.

          Hák va, toi Tiến sĩ Nguyễn Minh Phong, chuyên gia kinh tế, ngành điện cận vạu tứm nang quam vạy côn dân hụ chảnh cánh dệt chảnh xưa luông cuông vịa khửn ca điện tưa nị. Xương, cuông pưng số biên mai tài chính àu ók hê hên vạu chảnh ma luông pun hảu lương thưởng, lẹo pưng vịa dệt dom ngơn nọk ngành cánh pưng khu đút lôm ứn đảy tính tà xương xư cuông vịa dom sáư ngành điện. Nọk nặn cọ cận dệt chảnh xưa ma tang vịa phát điện, khu nưng dệt pên ca con điện.

          Pi 2016, Tập đoàn Điện Lực Việt Nam (EVN) cựt đảy doanh thu khài điện lỏ 265.510tỷ mằn, to dáo ca điện khài păn pâng pày chấp năm lỏ cài 1.661 măn mỏi KW chơ điện. Tập đoàn Điện lực Việt Nam báo mả cài 2.658 tỷ mằn té pưng vịa dệt ók điện khài pi 2016, hák va riêng dệt ók, cạ khài điện nhăng lồm 594 tỷ mằn. Khay tập đoàn nị năng mi cài 9.794 tỷ mằn hê păn dài sáư ca điện.

          Lai côn cuông bản mương cong thả ngành điện cánh Bộ Công thương chi dệt chảnh xưa pưng nâng quam nuống pan họt khửn ca  điện tưa nị. Nọk nặn ók, pọm cắp vịa khửn ca điện, cơ quan mi chức quyên cận tủm pua kiểm soát ca pưng tàng chương hang cận hà vạy vện ník xìa vịa khửn ca pưng tàng chương hang ứn cánh dệt hại họt puông kin luông dú khong côn dân./.

                                                                             TTT - Hạnh dịch