Điện Biên: dạk cha cuồng vịa quản lý vịa khút chục sai

          Noong Hẹt lỏ xã nưng cuồng pưng xã cướt sình ók vịa khút chục àu sai phít phép họn hưn nhất nẳng huyện Điện Biên, tỉnh Điện Biên. Pưng pì cài ma, chăm va chính quyên địa phường cọ chấp năm lài luông pùn xương thù xìa máy khút chục sai, phạt mằư ngơn tiên…hák va cọ báu cẳn tân đảy nạn khút chục àu sai. Pưa tang pày ma ngai đì, pọm cắp vịa àu sai mi mả lài xương nặn lài côn cọ àu ngơn ók xự máy mắư, nhẳn nộp phạt lài tưa vạy xứp tàm đảy khút chục àu sai.

          Toi tồ số biền mài khòng Sở Tài nguyên Môi trường tỉnh Điện Biên, danh đù mỏi pì tỉnh báu thù ngần sách hươn nước đảy dáo 50 tỷ mằn té vịa xọk xáo bó khòng. Cuòng nặn vịa báu thù đảy ngơn ngần sách đảy nhẳn danh lỏ té vịa xọk xáo sai . Khạy nị, pưa lang áo tẳng tánh, cánh sủ sai nẳng cuồng tỉnh nhương mự nhương lài, xương nặn vịa khút chục sai phít phép cọ lâng hền ók cánh kiểm soát dạk. Khù nị cọ cướt sình ók lài khù hiểm hại chơ hong nặm chuốp khút chục lông lậc, đìn chuốp cạn chột.

          Khạy nị tỉnh Điện Biên hính cấp phép đảy xọk sáo sai hẳư 2 đơn vị, đảy khút chục sai nẳng bó sai đội 6, xã Pòm Lót cánh đội 19, xã Noòng Luông, huyện Điện Biên. Hák va vẹt xắư lang áo cận hà sai tẳng tánh pưng công trình, hính mi 2 cơ sở đảy cấp phép cọ chí báu nhẳn pao đảy.

          Dệt xương xư vạy nhẳn pao mi po đán sai chuông hong hẳư pưng công trình tẳng tánh, lẹo chự phong vịa báu thù đảy ngần sách hươn nước pộ lặc khút chục àu sai phít phép dệt ók nẳng tỉnh Điện Biên, họt khạy cọ hê mi luông kẻ khày khát nang./.

Vũ Lợi-Huyền dịch

ꪓꪙꪸ ꪚꪙꪸ: ꪤꪱꪀ ꪊꪱ ꪀꪺꪉ ꪫꪀꪸ ꪀꪫꪱꪙ ꪨꪲ ꪫꪀꪸ ꪄꪴꪒ ꪋꪴꪀ ꪏꪱꪥ ꪠꪒꪲ ꪵꪠꪚ

          ꪘꪮꪉ ꪵꪭꪒ ꪨꪷ ꪎꪱ ꫜ ꪀꪺꪉ ꪝꪉꪳ ꪎꪱ ꫃ꪬꪙ ꪮꪮꪀ ꪫꪀꪸ ꪄꪴꪒ ꪋꪴꪀ ꪏꪱꪥ ꪠꪒꪲ ꪵꪠꪚ ꪭꪮꪙ ꪭꪙꪳ ꫄ꪐꪒ ꪘꪉꪰ ꪭꪫꪙꪸ ꪓꪙꪸ ꪚꪙꪸ, ꪔꪉꪲ ꪓꪙꪸ ꪚꪙꪸ. ꪝꪉꪳ ꪜꪲ ꪀꪱꪥ ꪣꪱ, ꪋꪣꪾ ꪫꪱ ꪊꪉꪲ ꪁꪫꪙꪸ ꪒꪸ ꪹꪠꪉ ꪁꪷ ꫄ꪊꪚ ꪙꪣꪾ ꪨꪱꪥ ꪩꪺꪉ ꪜꪴꪙ ꪹꪏꪉ ꪖꪴ ꪎꪸ ꪼꪢ ꪄꪴꪒ ꪋꪴꪀ ꪏꪱꪥ , ꪡꪱꪒ ꪻꪢ ꫃ꪉꪙ ꪕꪙꪸ. ꪬꪱꪀ ꪫꪱ ꪁꪷ ꪹꪚꪱ ꪀꪽ ꫄ꪕꪙ ꪼꪒ ꪙꪱꪘ ꪄꪴꪒ ꪋꪴꪀ ꪏꪱꪥ. ꪹꪝ ꪕꪱꪉ ꪼꪜ ꪣꪱ ꪉꪱꪥ ꪒꪲ, ꪝꪮꪣ ꪀꪚꪾ ꪹꪮꪱ ꪏꪱꪥ ꪣꪲ ꪢꪱ ꪨꪱꪥ ꪹꪏꪉ ꪙꪽ ꪨꪱꪥ ꫛ ꪁꪷ ꪹꪮꪱ ꫄ꪉꪙ ꪮꪮꪀ ꪏꪳ ꪼꪢ ꪻꪢ ,ꪐꪽ ꪶꪙꪚ ꪡꪱꪒ ꪨꪱꪥ ꪹꪕ ꪼꪫ ꪎꪚꪳ ꪔꪱꪣ ꪼꪒ ꪄꪴꪒ ꪋꪴꪀ ꪏꪱꪥ.

          ꪕꪮꪥ ꪶꪔ ꪶꪎ ꪚꪙꪸ ꪢꪱꪥ ꪄꪮꪉ ꫄ꪎ ꪔꪱꪥ ꪉꪫꪙꪸ ꪶꪣꪥ ꪹꪊꪉ ꪔꪉꪲ ꪓꪙꪸ ꪚꪙꪸ ꪵꪥꪉ ꪒꪴ ꪢꪮꪥ ꪜꪲ ꪔꪉꪲ ꪎꪸ ꪩꪱ ꪹꪚꪱ ꪖꪴ ꪼꪒ ꫄ꪈꪙ ꪵꪎꪀ ꪤꪱꪫ 50 ꪔꪲ ꪢꪽ ꪵꪔ ꪫꪀꪸ ꪎꪮꪀ ꪎꪱꪪ ꪚꪷ ꪄꪮꪉ. ꪀꪺꪉ ꪙꪽ ꪹꪚꪱ ꪖꪴ ꪼꪒ ꫄ꪈꪙ ꪵꪎꪀ ꪼꪒ ꪐꪽ ꪹꪥꪉ ꪨꪷ ꪵꪔ ꪫꪀꪸ ꪄꪴꪒ ꪋꪴꪀ ꪏꪱꪥ. ꪼꪅ ꪙꪲ ꪹꪝ ꪩꪱꪉ ꪮꪱꪫ ꪔꪉꪰ ꪵꪔꪉ ꪵꪀꪉ ꪎꪴ ꪏꪱꪥ ꪘꪉꪰ ꪀꪺꪉ ꪔꪉꪲ ꪹꪑꪉ ꪣꪳ ꪹꪑꪉ ꪨꪱꪥ ,ꪹꪏꪉ ꪙꪽ ꪫꪀꪸ ꪄꪴꪒ ꪋꪴꪀ ꪏꪱꪥ ꪠꪒꪲ ꪵꪠꪚ ꪁꪷ ꫄ꪩꪉ ꫃ꪬꪙ ꪮꪮꪀ ꪵꪀꪉ ꪀꪣꪸ ꪎꪫꪱꪒ ꪤꪱꪀ. ꪄꪴ ꪙꪲ ꪁꪷ ꪹꪀꪒ ꪎꪉꪲ ꪮꪮꪀ ꪨꪱꪥ ꪄꪴ ꪬꪣꪸ ꪭꪱꪥ ꫄ꪋ ꪭꪮꪉ ꪙꪣꪾ ꪊꪺꪚ ꪄꪴꪒ ꪋꪴꪀ ꪶꪩꪉ ꫄ꪩꪀ , ꪒꪙꪲ ꪊꪺꪚ ꪁꪱꪙ ꪶꪋꪒ.

          ꪼꪅ ꪙꪲ , ꪔꪉꪲ ꪓꪙꪸ ꪚꪙꪸ ꪬꪉꪲ ꫄ꪀꪚ ꪊꪸ ꪵꪠꪚ ꪄꪴꪒ ꪋꪴꪀ ꪏꪱꪥ ꪻꪬ 2 ꫄ꪒꪙ ꪫꪲ, ꪼꪒ ꪄꪴꪒ ꪋꪴꪀ ꪏꪱꪥ ꪘꪉꪰ ꪚꪷ ꪏꪱꪥ ꪶꪒꪥ 6, ꪎꪱ ꪜꪮꪣ ꪨꪮꪒ ꪵꪀꪉ ꪶꪒꪥ 19 , ꪎꪱ ꪘꪮꪉ ꪩꪺꪉ ,ꪭꪫꪙꪸ ꪓꪙꪸ ꪚꪙꪸ. ꪬꪱꪀ ꪫꪱ ꪵꪫꪒ ꪻꪎ ꪩꪱꪉ ꪮꪱꪫ ꪎꪴ ꪏꪱꪥ ꪔꪉꪰ ꪵꪔꪉ ꪝꪉꪳ ꪶꪀꪉ ꪊꪉꪲ, ꪬꪉꪲ ꪣꪲ 2 ꫄ꪀ ꫄ꪎ ꪼꪒ ꫄ꪀꪚ ꪵꪠꪚ ꪁꪷ ꪋꪲ ꪹꪚꪱ ꪁꪒꪳ ꪕꪮꪚ ꪼꪒ ꪩꪱꪉ ꪮꪱꪫ.

          ꫃ꪥꪒ ꪹꪏꪉ ꪏꪳ ꪼꪫ ꪐꪽ ꪜꪱꪫ ꪣꪲ ꪝꪷ ꪒꪱꪙ ꪏꪱꪤ ꪋꪺꪉ ꪭꪮꪉ ꪻꪬ ꪝꪉꪳ ꪶꪀꪉ ꪊꪉꪲ ꪔꪉꪰ ꪵꪔꪉ ,ꪵꪩꪫ ꪋꪳ ꪝꪮꪉ ꪫꪀꪸ ꪹꪚꪱ ꪖꪴ ꪼꪒ ꫄ꪈꪙ ꪵꪎꪀ ꪹꪭꪙ ꪹꪘꪀ ꪶꪝ ꪙꪱꪙ ꪄꪴꪒ ꪋꪴꪀ ꪏꪱꪥ ꪠꪒꪲ ꪵꪠꪚ ꫃ꪥꪒ ꪮꪮꪀ ꪘꪉꪰ ꪔꪉꪲ ꪓꪙꪸ ꪚꪙꪸ, ꪭꪮꪒ ꪼꪅ ꪁꪷ ꫃ꪭ ꪣꪲ ꪩꪺꪉ ꪵꪀ ꪼꪄ.

ꪹꪩꪉ ꪬꪫꪙꪸ ꪤꪲꪀ