ꪓꪙꪸ ꪚꪙꪸ: ꪡꪱꪒ ꪻꪢ ꪝꪉꪳ ꪄꪴ ꪠꪒꪲ ꪖꪀꪳ ꪀꪺꪉ ꪫꪀꪸ ꪵꪚꪙ ꪒꪱꪙ ꪘꪉꪷ ꪚꪷ ꪒꪱꪙ ꪹꪣꪉ ꪱꪉ

ꪚꪷ ꪒꪱꪙ ꪹꪣꪉ ꪱꪉ 4, ꪂꪱꪂ ꪱꪉ ꪹꪘ ꪭꪫꪙꪸ ꪹꪣꪉ ꪱꪉ ꪔꪉꪲ ꪓꪙꪸ ꪚꪙꪸ ꪤꪴ ꪘꪉꪾ ꪝꪴ ꪔꪉꪷ ꪁꪫꪱꪥ ꪘꪉꪾ ꪔꪱꪉ ꪨꪺꪉ 279 ꫃ꪎꪣ ꪔꪱꪉ ꪊꪉꪲ ꪼꪜ ꪣꪱ ꪄꪮꪉ ꪔꪉꪲ ꪓꪙꪸ ꪚꪙꪸ. ꪜꪲ 2014 ꪚꪷ ꪒꪱꪙ ꪙꪲ ꪼꪒ ꫄ꪀꪚ ꪵꪠꪚ, ꪜꪲ 2015 ꪼꪒ ꫄ꪀꪚ ꪵꪠꪚ ꪹꪩꪱ ꪹꪕꪱ ꪭꪮꪒ ꪼꪅ, ꪨꪉꪷ ꪥꪱꪙ ꫛ ꪕꪚꪾ ꪵꪚꪙ ꪹꪮꪱ ꪒꪱꪙ ꪄꪱꪥ. ꪬꪱꪀ ꪫꪱ ꪕꪮꪥ ꪐꪽ ꪵꪥꪉ ꪄꪮꪉ ꪝꪉꪳ ꫄ꪀ ꪀꪫꪱꪙ ꪣꪲ ꪊꪀꪳ ꪁꪫꪙꪸ, ꪋꪣꪾ ꪫꪱ ꫃ꪥꪒ ꪫꪀꪸ ꪹꪚ ꪱꪨꪱꪥ ꪬꪱꪀ ꪫꪱ ꪚꪷ ꪒꪱꪙ ꪙꪲ ꪁꪷ ꫃ꪬꪙ ꪨꪱꪥ ꪄꪴ ꪠꪒꪲ ꪖꪀꪳ ꪶꪁꪚ ꪀꪽ, ꪹꪚꪱ ꪊꪀꪷ ꪋꪲ ꪹꪀꪒ ꪎꪉꪲ ꪮꪮꪀ ꪩꪣꪸ ꪹꪚ ꪱꪒꪲ ꫄ꪋ ꪻꪒ ꪭꪮꪒ ꪕꪉꪸ ꪮꪱꪙ ꪎꪮꪀ ꪕꪱꪉ. ꪝꪉꪳ ꪄꪴ ꪠꪒꪲ ꪖꪀꪳ ꪭꪱꪥ ꪬꪀꪳ ꪹꪏꪉ: ꪬꪱꪀ ꪜꪙꪸ ꪖꪱꪥ ꪚꪮꪘ ꪵꪚꪙ ꪒꪱꪙ ꪵꪫꪒ ꪻꪎ ꪊꪸ ꪩꪱꪥ ꫃ꪡ ꪥꪫꪒꪸ, ꪼꪄ ꪀꪫꪱꪉ ꪔꪱ ꪒꪙꪲ ꪹꪭꪙ ꪄꪷ.ꪹꪫꪭꪙ ꫃ꪤꪒ ꪫꪀꪸ ꪵꪀꪉ ꪖꪉꪸ ꪔꪚꪴ ꪵꪫꪒ ꪻꪎ ꪀꪫꪒꪸ ꪓꪉꪲ ꪻꪬ ꪊꪱꪉ ꪒꪙꪲ, ꪹꪚꪱ ꪣꪲ ꪁꪽ ꪹꪠꪀ ꪀꪽ ꪒꪱꪙ ꪀꪉꪲ ꪻꪎ ꪕꪱꪉ ꪨꪺꪉ 279ꪶ ꪹꪚꪱ ꪣꪲ ꪚꪙꪸ ꪜꪱꪫ ꪭꪺ ꪼꪜ ꪶꪠꪉ ꪵꪚꪙ ꪒꪱꪙ, ꪕꪚꪾ ꪒꪱꪙ ꪔꪮꪥ ꪕꪒꪷ ꪜꪙꪴ, ꫄ꪀꪣ ꪵꪎ ꪩꪮꪉ ꪀꪱꪥ ꪔꪱꪉ ꪨꪺꪉ 279 ꪼꪫ ꪵꪚꪙ ꪣꪙꪲ ꫃ꪭ ꪢꪸ ꪊꪱ ꪫꪱꪙ ꪻꪬ ꪵꪠꪚ ꪄꪮꪉ ꪶꪔꪉ ꪁꪀꪴ ꪕꪱꪉ ꪶꪚꪀ ꪫꪒꪸ ꪘꪱꪣ...

ꪔꪷ ꪀꪚꪾ ꪝꪉꪳ ꪄꪴ ꪠꪒꪲ ꪖꪀꪳ ꪭꪱꪥ ꪬꪀꪳ ꪄꪮꪭ ꪶꪁꪉ ꪕꪲ ꪶꪀ ꫄ꪠꪙ ꪁꪫꪱ ꪉꪫꪙꪸ ꪬꪱ ꪥꪱꪉ, ꪡꪮꪉ ꪁꪉꪲ ꫃ꪔ - ꪶꪀꪀ ꪹꪉꪙ ꪎꪉꪲ ꪄꪮꪉ ꪭꪫꪙꪸ ꪹꪣꪉ ꪱꪉ ꪀꪱꪠ ꪁꪙꪸ ꪀꪚꪾ ꪋꪲ ꪁꪴꪀ ꪀꪫꪱꪙ ꪨꪲ ꪔꪱꪉ ꪶꪚꪀ ꪶꪎ ꫜ, ꪶꪛ ꪤꪱꪫ ꪶꪖꪉ ꫄ꪫꪙ ꪔꪱꪥ ꪵꪀꪉ ꪶꪀꪉ ꪕꪲ ꪶꪀ ꫄ꪠꪙ ꪕꪱꪉ ꪶꪚꪀ 226 ꪁꪷ ꪨꪱꪥ ꪹꪕ ꪔꪒꪲ ꫄ꪔꪙ ꪌꪁꪉ ꪕꪲ ꪁꪱꪒ ꪁꪙꪸ ꫃ꪤꪒ ꪫꪀꪸ. ꪬꪱꪀ ꪫꪱ ꪹꪔꪱ ꪭꪮꪒ ꪣꪳ 3ꪞ10 ꪋꪮꪣ ꪀꪱꪥ ꪣꪱ, ꪒꪫꪱꪙ ꪶꪀꪉ ꪔꪱꪀ ꪨꪱꪥ ꪵꪈꪉ ꪣꪸ ꪹꪏꪉ ꪀꪣꪸ ꪊꪱ ꫃ꪕꪉ ꫃ꪢꪒ ꪕꪒꪷ ꪜꪙꪴ ꪫꪀꪸ ꪵꪚꪙ ꪒꪱꪙ ꪘꪉꪾ ꪘꪲ ꪵꪀꪉ ꪣꪲ ꪋꪳ ꫃ꪤꪒ ꪫꪀꪸ ꪀꪚꪾ ꪠꪴ ꪮꪺꪙ ꪝꪱ ꪶꪀꪉ ꪕꪲ ꪙꪲ. ꪀꪱꪥ ꪙꪽ ꫄ꪀꪣ ꪶꪀꪉ ꪕꪲ ꪶꪀ ꫄ꪠꪙ ꪁꪱꪫ ꪉꪫꪙꪸ ꪬꪱ ꪤꪱꪉ ꪹꪚꪱ ꪼꪒ ꫄ꪀꪣ ꪔꪱꪉ ꪘꪉꪷ ꪤꪱꪙ ꪔꪱꪉ ꪵꪔ ꪼꪀ ꪶꪎ 41+ 100 ꪼꪀ ꪶꪎ 41 + 300 ꪘꪉꪷ ꪔꪱꪉ ꪨꪺꪉ 279.

ꪕꪒꪷ ꪜꪙꪴ ꪻꪬ ꪶꪀꪉ ꪕꪲ ꫄ꪊꪚ ꪙꪣꪾ ꪏꪳ ꪢꪉꪲ ꪝꪉꪳ ꪀꪫꪒꪸ ꪓꪉꪲ ꪠꪱꪒ ꪻꪢ ꪵꪬꪉ ꪊꪉꪲ, ꪎꪱꪉ ꪶꪎꪣ ꪹꪩꪱ ꪚꪮꪙ ꪒꪙꪲ ꪙꪲ ꪹꪏꪉ ꪹꪀꪱ, ꫃ꪥꪒ ꪶꪣꪣ ꪵꪩꪫ ꪀꪮꪙ ꪣꪳ 15/10/2017. ꪝꪮꪣ ꪀꪚꪾ ꪘꪱ ꪫꪀꪸ ꪙꪽ ꪼꪒ ꪵꪔꪉ ꪮꪮꪀ ꪶꪬ ꫄ꪏ ꪕꪉꪲ ꪁꪀꪴ ꪀꪫꪱꪙ ꪨꪲ ꪕꪱꪉ ꪶꪚꪀ ꫜ ꪎꪷ ꪵꪠꪚ ꪣꪱ ꪕꪱꪉ ꪫꪀꪸ ꪎꪱꪉ ꪵꪜꪉ ꪕꪱꪈ 279 ꪀꪱꪙ ꪵꪜꪀ ꪕꪮꪥ ꪶꪖꪉ ꪕꪳ 50 ꪄꪮꪉ ꪶꪛ ꪥꪱꪫ ꪶꪖꪉ - ꫄ꪫꪙ ꪔꪱꪥ ꪁꪷ ꪹꪏꪉ ꪝꪉꪳ ꪩꪺꪉ ꪐꪽ ꪝꪱꪫ ꪕꪉꪸ ꪮꪱꪙ ꪻꪬ ꫜ ꪵꪀꪉ ꪝꪳꪉ ꪔꪱꪉ ꪵꪎ ꪼꪜ ꪢꪱ ꪘꪉꪷ ꪥꪱꪙ ꪕꪱꪉ ꪙꪲ.

ꪩꪉꪴ ꪠꪱꪣ ꪪꪽ ꪋꪫꪸꪥ, ꪹꪊꪉ ꪡꪮꪉ ꪔꪱꪥ ꪉꪫꪙꪸ ꪵꪀꪉ ꪶꪣꪥ ꪹꪊꪉ ꪭꪫꪙꪸ ꪹꪣꪉ ꪱꪉ ꪻꪬ ꪭꪴ, ꪭꪫꪙꪸ ꪋꪲ ꪎꪚꪳ ꪔꪱꪣ ꪔꪒꪲ ꫄ꪔꪙ ꪶꪀꪉ ꪕꪲ ꪁꪪꪱ ꪉꪫꪙꪸ ꪬꪱ ꪥꪱꪉ ꫃ꪤꪒ ꪫꪀꪸ ꪹꪚ ꪱꪐꪽ ꪝꪱꪫ ꪕꪮꪥ ꪕꪒꪷ ꪜꪙꪴ ꪭꪳ ꪎꪷ ꪼꪫ ꪮꪫꪥꪲ ꪚꪱꪙ ꫄ꪤꪙ ꪹꪣꪉ ꪔꪉꪲ ꪓꪙꪲ ꪚꪙꪸ, ꫄ꪎ ꪔꪱꪥ ꪉꪫꪙꪸ ꪵꪀꪉ ꪶꪣꪥ ꪹꪊꪉ ꪔꪉꪲ ꪓꪙꪸ ꪚꪙꪲ ꪖꪴ ꪹꪮꪱ ꪊꪸ ꪵꪠꪚ ꪵꪚꪙ ꪒꪱꪙ ꪵꪀꪉ ꪡꪱꪒ ꪻꪢ ꪕꪮꪥ ꪕꪒꪷ ꪜꪙꪴ ꪄꪮꪉ ꪠꪱꪚ ꪩꪺꪒ.

                                                                   ꪪꪴ ꫄ꪩꪥ - ꪵꪭꪉ ꪥꪀꪲ

Điện Biên: Chi phạt màư lai khu phít thứk cuông vịa bén đán nẳng bó đán Mương Ảng

          Bó đán Mương Ảng 4, xã Ảng Nừa, huyện Mương Ảng, tỉnh Điện Biên dú nẳng pu Tẳng Quai nẳng tang luông 279 xểm tang chính pày ma khong tỉnh Điện Biên. Pi 2014 bó đán nị đảy cấp phép, pi 2015 đảy cấp phép lau cánh tạu họt khay pi 2017, lăng dan nưng tặp bén àu đán, bó đán nị chưng àu đán khài. Hák va toi nhẳn danh khong pưng cơ quan mi chức quyên, chăm va dệt vịa báu lài hák va bó đán nị cọ hên lai khu phít thứk cộp căn, báu chắc chi cướt sinh ók liêm báu đì chơ đàư họt tang an xók tang. Pưng khu phít thứk hại hức xương: hák piến thái bón bén đán vẹt sáư chỉa lai phê duyệt, nanh khày quảng hươn kho, hươn dệt vịa cánh thiêng túp vẹt sáư quyết định hảu chảng đin, báu dệt căn cẳn đán kỉnh sáư tang luông 279, báu mi biển páo, báu mi hụa pảy phổng bén đán, tặp đán toi tặt pun, cấm xe long tang luông 279 vạy bén mịn hê mi cha van hảu phép khong Tổng cục tang bốc Việt Nam...

          Tó cắp pưng khu phít thứk hịa hức khong Công ty Cổ phần Cao nguyên Hà Giang, Phòng Kinh tế - cốc ngươn sính khòng huyện Mương Ảng cạt kiên cắp Chi cục Quản lý tang bốc I.2, Cục quản lý tang bốc I, Bộ Giao thông vận tải cánh Công ty cổ phần Tang bốc 226 cọ lai tưa tít tơn công ty nị cạt kiên dệt vịa. Hák va tạu họt mự 3/10 chọm cài ma, đoàn công tác lài ngành hính mi xương kiểm tra tênh mết tặt pun vịa bén đán nẳng nỉ cánh mi chu dệt vịa cắp phủ uôn pa công ty nị. Cài nặn cấm Công ty cổ phần Cao Nguyên Hà Giang cấm tang vạy bén mịn nẳng dan táng té cày số 41+ 100 họt cày số 41 + 300 nẳng tang luông 279. Tặt pun hảu công ty chấp năm xư minh pưng quyết định phàư màư hành chính, sảng xôm lau bón đin nị xương cáu, dệt mộm lẹo cón mự 15/10/2017. Pọm cắp nả vịa nặn đảy tánh ók hồ sơ tinh Cục Quản lý tang bốc I xo phép ma tang vịa sảng panh tang 279 cạn pé toi Thông tư 50 khong Bộ Giao thông - Vận tải cọ xương pưng luông nhẳn pao tiêng àn hảu côn cánh pưng tàng xe pày ma nẳng dan tang nị.

          Lung Phạm Văn Triệu, Trưởng phòng Tài Nguyên cánh Môi Trường huyện Mương Ảng hảu hụ, huyện chi xứp tam tít tơn Công ty Cổ phần Cao nguyên Hà Giang chấp năm phạt màư hành chính. Va cuông dan nị, Công ty Cổ phần Cao nguyên Hà Giang dệt vịa báu nhẳn pao toi tặt pun hư chi xo vạy Uỷ ban dân mương tỉnh Điện Biên, Sở Tài Nguyên cánh Môi trường tỉnh Điện thù au chỉa phép bén đán cánh phạt màư toi tặt pun khong pháp luật./.

                                                                                                                         Vũ Lợi - Hạnh dịch