ꪝꪉꪳ ꫄ꪀ ꫄ꪎ ꪮꪲ ꫃ꪔ ꪘꪉꪰ ꪔꪉꪲ ꪙꪉꪲ ꪗꪺꪙ ꪹꪚꪱ ꫃ꪭ ꪼ ꪒꪋꪮꪥ ꪹꪤ ꪝꪮꪣ ꫄ꪝꪉ ꪤꪱ ꫃ꪛꪉ

         ꪭꪴ ꪼꪒ ꪫꪀꪸ ꪩꪣꪾ ꪒꪴ ꪝꪀꪰ ꪵꪭꪉ ꪥꪱꪙ ꪹꪣ ꪵꪅꪀ ꪨꪷ ꫄ꪁꪙ ꪬꪱ ꪋꪺ ꪹꪭꪙ ꪹꪮꪥ ꪹꪊꪱ ꪗꪲ ꪓꪉꪲ ꪘꪉꪰ ꪨꪱꪉ ꪋꪣꪾ ꪹꪩꪉ ꪋꪲ ꪎꪱ ꫄ꪑꪙ ꫄ꪏꪙ ꪭꪫꪙꪸ ꪙꪉꪲ ꫄ꪏꪙ ꪏꪳ ꪚꪱꪫ ꪬꪣꪸ ꪮꪲ ꫃ꪔ ꪵꪔ ꪜꪲ 2000. ꪚꪮꪙ ꪄꪱꪣ ꪤꪱ ꫃ꪛꪉ ꪹꪣ ꪵꪅꪀ ꪄꪮꪉ ꪼꪕ ꪹꪭꪙ ꪹꪮꪥ ꪨꪷ ꪹꪭꪙ ꪤꪱ ꪤꪱꪫ ꪶꪖꪉ ꫄ꪫꪙ ꪔꪱꪥ ꪖꪱꪚ ꪊꪱꪣ . ꪬꪱꪀ ꪫꪱ ꪥꪱꪙ ꪊꪣꪾ ꪙꪲ ꪹꪝ ꪤꪱ ꫃ꪛꪉ ꫃ꪊꪚ ꪘꪫꪸ ꪚꪱꪙ ꪄꪮꪉ ꪹꪮꪥ ꪹꪚꪱ ꪣꪲ ꪨꪱꪥ ꪹꪏꪉ ꪙꪽ ꪫꪀꪸ ꫄ꪀꪚ ꪠꪱꪒ ꪹꪚꪱ ꪼꪒ ꪝꪮꪣ ꫄ꪝꪉ ꪵꪀꪉ ꪳꪕꪀꪴ ꪝꪷ, ꪹꪮꪥ ꪼꪒ ꪏꪳ ꪤꪱ ꪘꪉꪰ ꪙꪮꪀ ꪕꪳ ꪫꪱ ꪼꪒ ꫃ꪢꪒ ꪔꪣꪳ ꫄ꪉꪙ ꪏꪳ ꪤꪱ.

         ꪕꪮꪥ ꪋꪱꪣ ꪮꪲ ꫃ꪔ ꪎꪱ ꫄ꪑꪙ ꫄ꪏꪙ ꪭꪫꪙꪸ ꪙꪉꪲ ꫄ꪏꪙ ꪤꪱ ꫄ꪕꪥ ꪮꪲ ꪵꪀꪉ ꪶꪓꪉ ꪮꪲ ꪄꪮꪉ ꪋꪱꪣ ꪮꪲ ꫃ꪔ ꪊꪉꪴ ꪹꪖꪱ ꪀꪺꪉ ꪜꪲ 2016 ꪨꪷ 161 ꪔꪱꪉ. ꪀꪺꪉ ꪙꪽ ꪤꪱ ꫄ꪕꪥ ꪮꪲ ꪨꪷ 79 ꪔꪱꪉ ꪤꪱ ꪶꪓꪉ ꪮꪲ ꪨꪷ 64 ꪔꪱꪉ. ꪶꪎ ꪤꪱ ꪨꪷ ꪹꪏꪉ ꪙꪽ ꪬꪱꪀ ꪫꪱ ꪹꪚꪙ ꪻꪒ  ꪋꪱꪣ ꪁꪷ ꪹꪚꪱ ꪝꪷ ꪤꪱ. ꪩꪙꪳ ꪹꪏ ꪨꪷ 2 ꪔꪱꪉ ꪤꪱ ꪬꪫꪒꪸ ꪮꪱꪚ ꪎꪉꪴ ꪵꪀꪉ ꫃ꪊꪚ ꪁꪷ ꪒꪀꪴ…ꪶꪀꪀ ꪜꪱꪥ ꪊꪉꪲ ꪨꪷ ꫄ꪀꪚ ꪤꪱ ꪶꪮꪒ ꪙꪱꪙ ꪵꪀꪉ ꪹꪚꪱ ꪕꪀꪴ ꪝꪷ.

        ꪘꪉꪰ ꪋꪱꪣ ꪮꪲ ꫃ꪔ ꪎꪱ ꪹꪠꪀ ꪬꪫꪲ ꪭꪫꪙꪸ ꪙꪉꪲ ꪹꪠꪀ ꪣꪲ ꪕꪷ ꪝꪉꪳ ꪔꪱꪉ ꪤꪱ ꪤꪱ ꪝꪉꪳ ꫃ꪛꪉ ꫄ꪩꪉ ꫃ꪜꪙ ꪀꪱꪥ ꪝꪉꪳ ꪔꪱꪉ ꫃ꪛꪉ ꫃ꪊꪚ ꪘꪫꪸ ꪚꪱꪙ ꪘꪀꪰ ꫃ꪊꪚ ꪢꪱꪀ ꪬꪺ ꪻꪊ ꪭꪳ ꪋꪱꪣ ꪹꪚꪱ ꫃ꪭ ꪣꪲ ꪤꪱ. ꪹꪝ ꪹꪚꪱ ꪼꪒ ꫄ꪀꪚ ꪕꪀꪴ ꪝꪷ ꪹꪏꪉ ꪙꪽ ꪋꪱꪣ ꪹꪚꪱ ꪣꪲ ꪨꪱꪥ ꫛ ꪣꪱ ꪄꪱꪣ ꪤꪱ ꫃ꪛꪉ.

         ꪋꪱꪣ ꪮꪲ ꫃ꪔ ꪎꪱ ꫄ꪑꪙ ꫄ꪏꪙ ꪋꪱꪣ ꪮꪲ ꫃ꪔ  ꪙꪉꪲ ꪬꪫꪲ ꪬꪉꪲ ꪨꪷ ꪎꪮꪉ ꪋꪱꪣ ꪮꪲ ꫃ꪔ ꪀꪺꪉ ꪶꪎ ꪭꪱꪉ ꪝꪽ ꪋꪱꪣ ꪮꪲ ꫃ꪔ ꪎꪱ ꪮꪙꪳ ꪘꪉꪰ ꪔꪉꪲ ꪙꪉꪲ ꪗꪺꪙ ꪒꪱꪉ ꫄ꪀꪚ ꪤꪱ ꪶꪮꪒ ꪙꪱꪙ ꪹꪏꪉ ꪙꪽ. ꪶꪀꪀ ꪜꪱꪥ ꪄꪮꪉ ꪫꪀꪸ ꫄ꪀꪚ ꪤꪱ ꪶꪮꪒ ꪙꪱꪙ ꪹꪏꪉ ꪙꪽ ꪘꪉꪰ ꪝꪉꪳ ꫄ꪀ ꫄ꪎ ꪮꪲ ꫃ꪔ ꪔꪫꪙꪸ ꪎꪱ ꪔꪫꪙꪸ ꪭꪫꪙꪸ ꪨꪷ ꪹꪝ ꪵꪈꪉ ꪮꪲ 6ꪔ ꪔꪉꪲ ꪭꪫꪙꪸ ꪎꪮꪣ ꪵꪜꪉ ꪔꪣꪳ ꪵꪕꪙ ꪤꪱ ꪹꪚꪱ ꫃ꪭ ꪝꪮꪣ ꫄ꪯꪉ ꫃ꪭ ꫄ꪩꪚ ꪕꪽ ꪵꪀꪉ ꫃ꪭ ꪕꪀꪴ ꪝꪷ.

          ꪼꪅ ꪙꪲ ꪔꪉꪲ ꪙꪉꪲ ꪗꪺꪙ ꪼꪒ ꪶꪛ ꪮꪲ ꫃ꪔ ꪶꪜꪉ ꪻꪊ ꪤꪮꪣ ꫄ꪉꪙ ꪶꪀꪀ ꪔꪉꪰ ꪵꪔꪉ ꪨꪱꪥ ꪄꪫꪱ ꫃ꪫ ꪕꪉꪲ ꪋꪮꪥ ꪹꪤ ꪹꪋꪉ ꪄꪮꪉ ꪔꪱꪉ  ꪻꪢ ꪼꪫ ꪩꪣꪾ ꪒꪴ ꪜꪀꪰ ꪵꪭꪉ  ꪻꪬ ꫛ ꫄ꪤꪙ. ꪀꪱꪥ ꪙꪽ ꪶꪭꪣ ꫄ꪡꪙ ꪑꪷ ꪎꪉꪴ ꫄ꪊꪒ ꪹꪩꪉ ꪄꪱꪣ ꪹꪤꪱ ꪤꪱ ꫃ꪛꪉ ꪤꪮꪙ ꪼꪒ ꫄ꪡꪙ ꪻꪒ ꪘꪱ ꪫꪀꪸ ꪖꪱ ꪄꪱꪣ ꪋꪙꪸ ꪹꪭꪙ ꪤꪱ ꪄꪙꪳ ꪹꪣ ꪔꪫꪙꪸ ꫃ꪕꪉ ꪤꪮꪙ ꪼꪒ ꪁꪱ ꪤꪱ…

                                                                   ꪕꪮꪉ ꪵꪯꪉ ꪥꪀꪲ

Pưng cờ sở ỳ tế Ninh Thuận báu hê đảy choi dừa pọm pâng dà bệnh

          Hụ đảy vịa lăm đù pặc hanh gian mưa khoẹ lỏ cận hà, chua hươn ưởi Châu Thị Đỉnh nẳng làng Chăm Lương Tri, xã Nhơn Sơn, huyện Ninh Sơn chôm hặp xự bảo hiểm ỳ tế té pì 2000. Lằng chơ đằng ký, ưởi cánh tay hươn khòng chảu đảy cấp hẳư mỏi côn mỏi thẻ bảo hiểm ỳ tế. Bón đằng ký khám dà bệnh mưa khoẹ khòng ưởi lỏ hươn dà Giào thồng Vận tải Tháp Chàm. Chơ chếp hại xảy nào tay hươn ưởi lâng pày họt hươn dà nị vạy khám cánh đảy bác sĩ chị bók, cấp dà hẳư kìn. Hák va gian chằm nị, pưa dà dà bệnh chếp niểu bàn khòng ưởi báu mi lài, xương nặn vịa cấp phát dà báu đảy pọm pâng cánh tục po, ưởi đảy xự dà nẳng nọk, tư va đảy mết tứm ngơn xự dà.

         Toi Trạm ỳ tế xã Nhơn Sơn, huyện Ninh Sơn, dà Tây y cánh đông y khòng Trạm trúng thầu cuồng pì 2016 lỏ 161 tàng. Cuồng nặn dà Tây y  lỏ 79 tàng cánh 64 tàng lỏ dà đông y. Số dà lỏ xương nặn hák va bườn đằư TRạm cọ báu po dà. Lưn xưa lỏ 2 tàng dà: huyết áp xùng cánh pưng bệnh chếp co đúk…Cốc pài chính lỏ cấp dà ốt nan cánh báu tục po.

         Nhăng Trạm ỳ tế xã Phước Hữu, huyện Ninh Phước, mi to pưng tàng dà dà pưng bệnh lâng pền, cài pưng tàng dà bệnh chếp niểu bàn nắc, chếp mák hùa chằư hư Trạm báu hê mi. Pưa báu đảy cấp tục po dà, xương nặn Trạm báu mi côn ma khám dà bệnh.

        Trạm ỳ tế Nhơn Sơn, Trạm ỳ tế Phước Hữu hính lỏ 2 trạm ỳ tế cuồng số hạng păn trạm ỳ tế xã ứn nẳng tỉnh Ninh Thuận đàng cấp dà ốt nan xương nặn. Cốc pài khòng vịa cấp dà ốt nan nẳng pưng cờ sở ỳ tế tuyến xã, tuyến huyện lỏ pộ ngành ỳ tế tỉnh, huyện xỏm pành, tứm ten tàng dà báu hê pọm pâng, hê lợp tăn cánh hê tục po. Khay nị tỉnh Ninh Thuận đảy Bộ ỳ tế pồng chằư dòm ngơn cốc tẳng tánh lài khoa vệ tinh, choi dừa chương khòng tàng mắư vạy lăm đù pặc hanh mưa khoẹ hẳư côn dần. Cài nặn, hôm phân nho xùng chất lượng khám dàu dà bệnh, dón đảy phân đằư nả vịa thả khám, chiên hươn dà khửn mưa tuyến tênh, dón đảy ca dà…/.

                                                                                 TTT- Tòng Anh dịch