Điện Biên: Pưng khù họn hưn nạn lặc xọk xáo tao căm nẳng bó căm Phì Nhừ

          Dú lắc Trung tâm xã Phì Nhừ dáo 9 cày số, bó căm Phì Nhừ nẳng pu Háng Trợ cọ nhăng hền pưng thiềng túp dú dài dát đòm xằn pu. Pưng khùm khút căm quảng, lậc hạng 10 thứak cón nị đảy pưng côn tao căm cuột xáo hà căm, pưng thẳm đảy khút cuột khảu mưa cuồng pu cọ đảy hạng họi côn khảu ók vạy cuột đìn ma tao căm.

          Pưng côn lặc khút tao căm nẳng nị phân lài lỏ côn Mông. Té thảu ké nóm nọi cọ báu chau xằng hiểm hại pìn khửn pòm pu, xủ cốc pẹn khút chục đìn đán pể xắư cú lũng lông ma cắp mòng cong cuồng số đìn đán nặn chí tao đảy căm.

          Pưng pì chằm nị nạn côn dần báu chau xằng hiểm hại ma khút chục đìn đán tao căm nhương mự nhương hền ók lài. Lưn xưa lỏ chơ mi phồn số côn nẳng pưng bản khửn ma nẳng nị lài xưa pưa đìn khút ngai. Pưng chất độc hại xương thuỷ ngân, Asen sủ vạy tao căm cọ dệt uối hại họt bó năm dệt hẳư côn dần cuồng phổng báu mi nặm xủ, dệt dượn tảnh liệng chuốp siệt hại.

          Bó căm Phì Nhừ đảy hụ hền ók té cón pì 2006, cánh chơ nặn đảy nhẳn danh lỏ bó mi lài căm nhất nẳng tỉnh Điện Biên. Lằng chơ hụ hền ók, lài côn dần cọ đủm ma nẳng nị vạy khút tao căm. Lằng dan nưng cọ pắt dặng xìa nạn khút tao căm, họt mự 23/1/2008, Uỷ bàn dần mương tỉnh Điện Biên pùn ók quyết định số 98/QĐ-UBND hẳư phép công ty cổ phần Molybden Điện Biên xọk xáo tao căm nẳng bó căm nị. Hák va pộ báu nhẳn pao toi luông chào hẹn, té lả pì 2016 ma họt khạy công ty nị cọ dặng xìa, dệt hẳư nạn lặc xọk xáo tao căm táo cưn lau nẳng bó căm Háng Trợ nị. ăn nị cọ men khù chính quyên địa phường đàng chau lò  pưa nạn tao căm pháp hạp họt lài khù mi xương dệt hại họt pặc hanh, lăm côn tồn phủ khòng côn dần.

          Họt chơ đằư puồng kìn đơi dú khòng côn dần nẳng nị chắng chí đảy chum yền, pưa phổng đìn Phì Nhừ đàng xứp tàm hộn hạo pộ mi laì côn ma xáo khút chục đìn đán, tao căm./.

                                                                            V Lợi-Huyền dịch

ꪓꪙꪸ ꪚꪙꪸ: ꪝꪉꪳ ꪄꪴ ꪭꪮꪙ ꪭꪳꪙ ꪙꪱꪙ ꪩꪀꪰ ꪄꪒꪴ ꪕꪱꪫ ꪁꪣꪾ ꪘꪉꪰ ꪚꪷ ꪁꪣꪾ ꪠꪲ ꪐꪳ

          ꪤꪴ ꪨꪀꪰ ꪊꪉꪴ ꫄ꪔꪣ ꪎꪱ ꪠꪲ ꪐꪳ ꪤꪱꪫ 9 ꪼꪀ ꪶꪎ ,ꪚꪷ ꪁꪣꪾ ꪠꪲ ꪐꪳ ꪤꪴ ꪘꪉꪰ ꪝꪴ ꪬꪱꪉ ꫄ꪋ ꪁꪷ ꪑꪉꪰ ꫃ꪬꪙ ꪝꪉꪳ ꪖꪉꪸ ꪔꪚꪴ ꪤꪴ ꪤꪱꪥ ꪤꪱꪒ ꪒꪮꪣ ꪎꪽ ꪝꪴ. ꪝꪉꪳ ꪄꪣꪴ ꪄꪒꪴ ꪕꪱꪫ ꪁꪣꪾ ꪀꪫꪱꪉ ꫄ꪩꪀ ꪭꪱꪉ 10 ꪹꪖꪀ ꪀꪮꪙ ꪙꪲ ꪼꪒ ꪝꪉꪳ ꫛ ꪩꪀꪰ ꪄꪒꪴ ꪕꪱꪫ ꪁꪣꪾ ꪁꪺꪒ ꪎꪱꪫ ꪬꪱ ꪁꪣꪾ, ꪝꪉꪳ ꪖꪣꪾ ꪼꪒ ꪄꪒꪴ ꪁꪺꪒ ꪹꪄꪱ ꪹꪣ ꪀꪺꪉ ꪝꪴ ꪁꪷ ꪼꪒ ꪭꪱꪉ ꪭꪮꪥ ꫛ ꪹꪄꪱ ꪮꪮꪀ ꪁꪺꪒ ꪒꪙꪲ ꪒꪱꪙ ꪣꪱ ꪕꪱꪫ ꪁꪣꪾ.

          ꪝꪉꪳ ꫛ ꪩꪀꪰ ꪄꪒꪴ ꪕꪱꪫ ꪁꪣꪾ ꪘꪉꪰ ꪙꪲ ꫄ꪡꪙ ꪨꪱꪥ ꪨꪷ ꪹꪋ ꫛ ꪶꪣꪉ. ꪵꪔ ꪹꪖꪱ ꪵꪀ ꪘꪮꪣ ꪙꪮꪥ ꪹꪚꪱ ꪹꪋꪱ ꪎꪉꪰ ꪬꪣꪸ ꪭꪱꪥ ꪜꪙꪲ ꪄꪱꪥ ꪝꪮꪣ ꪝꪴ ꪎꪴ ꪀꪺꪀ ꪵꪝꪙ ꪄꪒꪴ ꪋꪀꪴ ꪒꪙꪲ ꪒꪱꪙ ꫃ꪜ ꪻꪎ ꪀꪴ ꪨꪉꪴ ꪶꪩꪉ ꪣꪱ ꪀꪚꪾ ꪢꪮꪉ ꪁꪮꪉ ꪀꪺꪉ ꪶꪎ ꪒꪙꪲ ꪒꪱꪙ ꪙꪽ ꪋꪲ ꪕꪱꪫ ꪼꪒ ꪁꪣꪾ.

          ꪝꪉꪳ ꪜꪲ ꪊꪣꪾ ꪙꪲ ꪘꪱꪙ ꫛ ꫄ꪤꪙ ꪹꪚꪱ ꪹꪋꪱ ꪎꪉꪰ ꪬꪣꪸ ꪬꪱꪥ ꪣꪱ ꪄꪒꪴ ꪊꪀꪴ ꪒꪙꪲ ꪒꪱꪙ ꪕꪱꪫ ꪁꪣꪾ ꪹꪑꪉ ꪣꪳ ꪹꪑꪉ ꫃ꪬꪙ ꪮꪮꪀ ꪨꪱꪥꪌ ꪹꪩꪙ ꪹꪏ ꪨꪷ ꫄ꪋ ꪣꪲ ꪶꪠꪙ ꪶꪎ ꫛ ꪘꪉꪰ ꪝꪉꪳ ꪚꪱꪙ ꪄꪙꪳ ꪣꪱ ꪘꪉꪰ ꪙꪲ ꪄꪒꪴ ꪕꪱꪫ ꪁꪣꪾ ꪹꪑꪉ ꪨꪱꪥ ꪹꪝ ꪒꪙꪲ ꪄꪒꪴ ꪉꪱꪥ. ꪝꪉꪳ ꫄ꪊꪒ ꪶꪒꪀ ꪭꪱꪥ ꪹꪏꪈ ꪖꪫꪲ ꫄ꪉꪙ ,ꪯꪱ ꪵꪏꪙ ꪎꪴ ꪼꪫ ꪕꪱꪫ ꪁꪣꪾ ꪁꪷ ꫃ꪥꪒ ꪮꪺꪥ ꪭꪱꪥ ꪭꪮꪒ ꪚꪷ ꪙꪣꪾ ꫛ ꫄ꪤꪙ ꪀꪺꪉ ꪶꪠꪈ ꪹꪚꪱ ꪣꪲ ꪙꪣꪾ ꪎꪴ, ꪫꪀꪸ ꫃ꪥꪒ ꪹꪥꪙ ꪵꪔꪉ ꪩꪉꪸ ꪁꪾ ꪊꪺꪚ ꪏꪒꪸ ꪭꪱꪥ.

          ꪚꪷ ꪁꪣꪾ ꪠꪲ ꪐꪳ ꪼꪒ ꪭꪴ ꫃ꪬꪙ ꪮꪮꪀ ꪵꪔ ꪀꪮꪙ ꪜꪲ 2006, ꪵꪀꪉ ꫄ꪋ ꪙꪽ ꪼꪒ ꪐꪽ ꪵꪥꪉ ꪨꪷ ꪚꪷ ꪣꪲ ꪨꪱꪥ ꪁꪣꪾ ꫄ꪐꪒ ꪘꪉꪰ ꪓꪙꪸ ꪚꪙꪸ. ꪨꪉꪰ ꫄ꪋ ꪭꪴ ꫃ꪬꪙ ꪮꪮꪀ ꪨꪱꪥ ꫛ ꫄ꪤꪙ ꪁꪷ ꪒꪣꪴ ꪣꪱ ꪘꪉꪰ ꪘꪲ ꪼꪪ ꪄꪒꪴ ꪕꪱꪫ ꪁꪣꪾ. ꪨꪉꪰ ꪥꪱꪙ ꫜ ꪙꪱꪙ ꪄꪒꪴ ꪕꪱꪫ ꪁꪣꪾ ꪁꪷ ꪼꪒ ꪀꪽ ꫄ꪕꪙ ,ꪭꪮꪒ ꪣꪴ 23.1.2008 ꪮꪫꪲ ꪚꪱꪙ ꫄ꪤꪙ ꪹꪣꪉ ꪔꪉꪲ ꪓꪙꪸ ꪚꪙꪸ ꪜꪙꪴ ꪮꪮꪀ ꪀꪫꪒꪸ ꪓꪉꪲ ꪶꪎ 98/QĐ-UBND ꪼꪬ ꪵꪠꪚ ꪶꪁꪉ ꪕꪲ ꪶꪀ ꫄ꪠꪙ Molybden ꪓꪙꪸ ꪚꪙꪸ ꪏꪮꪀ ꪎꪱꪫ ꪕꪱꪫ ꪁꪣꪾ ꪘꪉꪰ ꪚꪷ ꪁꪣꪾ ꪙꪲ. ꪬꪱꪀ ꪫꪱ ꪹꪝ ꪹꪚꪱ ꫄ꪊꪚ ꪙꪣꪾ ꪕꪮꪥ ꪩꪺꪉ ꪊꪱꪫ ꪵꪭꪙ ꪵꪔ ꪨꪱ ꪜꪲ 2016 ꪣꪱ ꪭꪮꪒ ꪼꪅ ꪶꪁꪉ ꪕꪲ ꪙꪲ ꪁꪷ ꪥꪉꪰ ꪎꪸ, ꫃ꪥꪒ ꪼꪬ ꪙꪱꪙ ꪩꪀꪰ ꪕꪱꪫ ꪁꪣꪾ ꪔꪱꪫ ꪁꪙꪳ ꪹꪩꪱ ꪘꪉꪰ ꪚꪷ ꪁꪣꪾ ꪬꪱꪉ ꫃ꪋ ꪙꪲ. ꪯꪽ ꪙꪲ ꪁꪷ ꪵꪣꪙ ꪄꪴ ꪊꪉꪲ ꪁꪫꪙꪸ ꪒꪸ ꪹꪡꪉ ꪹꪋꪱ ꪨꪷ, ꪹꪝ ꪙꪱꪙ ꪩꪀꪰ ꪕꪱꪫ ꪁꪣꪾ ꪠꪒꪲ ꪵꪠꪚ ꪠꪱꪚ ꪭꪱꪚ ꪬꪮꪒ ꪨꪱꪥ ꪄꪴ.

          ꪭꪮꪒ ꫄ꪋ ꪻꪒ ꪜꪺꪉ ꪀꪙꪲ ꫄ꪓꪥ ꪤꪴ ꪄꪮꪉ ꫛ ꫄ꪤꪙ ꪘꪉꪰ ꪘꪲ ꪊꪉꪰ ꪋꪲ ꪼꪒ ꪋꪣꪴ ꪮꪙꪸ ꪹꪝ ꪶꪠꪉ ꪒꪙꪲ ꪠꪲ ꪐꪳ ꪒꪱꪉ ꪎꪚꪳ ꪔꪱꪣ ꪶꪭꪙ ꪭꪱꪫ ꪶꪝ ꪣꪲ ꪨꪱꪥ ꫛ ꪣꪱ ꪎꪱꪫ ꪄꪒꪴ ꪕꪱꪫ ꪁꪣꪾ.

ꪹꪩꪉ ꪬꪫꪙꪸ ꪥꪀꪲ