Cận văn phạo kẻ khày bón căn đê chuốp cạn chột lằng phồn nong nẳng Yền Bái

          Nẳng bản Cau Thia, xã Phú Nham, huyện Văn Chấn, nặm nong cọ dệt cạn pé cài 500 thứak căn pản nặm cánh xểm tang pù bê tông tó nả lài chua hươn dần. Chua hươn lung Lò Văn Chiền chuốp nặm cọt sòi dệt hụa xày cạn pé, lài chương khòng chuốp lày nong. Kìn dú chằm him nặm, lung Chiền cọ báu hê hền xắc tưa nặm nong chắng nhắư tấc nặn, tồ xằng cọ lạo pày xìa mết. Khạt nị căn pản nặm chuốp cạn pé, chua hươn lung cánh lài chua hươn cuồng bản cọ chau lò lài, kìn dú cọ báu mổm.

          Vạy chự phong báu hẳư nặm cọt sòi him me nặm Thia, pảy chự đìn dú, đìn dệt dượn choi côn dần yền chằư kìn dú, pưng pì cài ma hươn nước cọ dòm ngơn cốc xày căn ke pản nặm mẳn đì. Hák va cuồng dan chằm nị, pưng chu nong luồng cọ xứp tàm thók ma phá hại pưng công trình nị. Toi báo cáo khòng Uỷ bàn dần mương xã Phù Nham, huyện Vằn Chấn, riềng 2 chu chu phồn nong cướt sình ók mưa pì 2016 cánh pì 2017 cọ mi dáo 2 cày số căn pản nặm nẳn xã chuốp cạn pé, pọm cắp hạng họi thứak tang bê tông liệp pày toi him me nặm Thia cọ chuốp cạn chột. Va báu xảng pành lợp tăn hư chí xứp tàm chột khảu mưa chằm phổng dần dú, dệt hiểm hại họt lăm côn tồn phủ khòng hạng họi chua hươn dần.

          Nẳng thị xã Nghĩa Lộ, phồn nong cọ dệt cạn pé cài 3 cày số căn ke pản nặm nẳng me nặm Nung. Lưn xưa dáo cày số nưng căn ke pản nặm Thia cọ chuốp cạn pé pọm cắp tang pày ma, 4 chua hươn dần cánh làng hươn vằn hoá khòng tổ dần phố số 1 phường Cau Thia. Đìn cạn chột khảu mưa cuồng hạng hopị thứak dệt hẳư 5 chua hươn đảy nhại pày dú bón mắư.

          Toi biền mài khòng huyện Văn Chấn, Trạm Táu cánh thị xã Nghĩa Lộ hư phồn nong cọ dệt cạn pé dáo dáo 5 cày số căn ke pản nặm nẳng me nặm Thia, cài 3 cày số căn ke pản nặm nẳng me nặm Nung. Nẳng me nặm Cò Noong lỏ 600 thứak, me nặm Ngòi Nhì 325 thứak, me nặm Ngòi Hát dáo cày số nưng…Tênh mết ngơn phí kẻ cặm khửn họt 550 tỷ mằn.

          Văn phạo xảng pành pưng căn ke chuốp cạn pé lằng chu phồn nong dệt ók nẳng pưng huyện, thị xã tang bưởng Tày tỉnh yền Bái; tẳng tánh tứm ten pưng căn ke pản nặm cốc chính vạy pảy chự đìn dệt dượn nông nghiệp; nhẳn pôa tiêng àn hẳư phổng dần dú cọ xương lăm côn tồ phủ khòng côn dần lỏ vịa dệt cận hà khạy nị. Toi danh đù, lằng chơ pưng căn ke pản nặm chuốp cạn pé, khạy cọ mi dáo 8000 chua hươn dần đàng kìn dú cuồng phổng chí chuốp siệt hại va xứp tàm cướt sình ók phồn nong./.

꫄ꪁꪙ ꪫꪽ ꪡꪱꪫ ꪵꪀ ꪼꪄ ꪚꪮꪙ ꪁꪽ ꫃ꪒ ꪊꪺꪚ ꪁꪱꪙ ꪵꪜ ꪨꪉꪰ ꪶꪠꪘ ꪙꪮꪉ ꪘꪉꪰ ꪮꪙꪸ ꪚꪱꪥ

          ꪘꪉꪰ ꪚꪱꪙ ꪹꪁꪱ ꪖꪸ ,ꪎꪱ ꪠꪴ ꪑꪱꪣ ,ꪭꪫꪙꪸ ꪪꪽ ꫄ꪊꪙ ,ꪙꪾ ꪙꪮꪉ ꪁꪷ ꫃ꪥꪒ ꪁꪱꪙ ꪵꪜ ꪀꪱꪥ 500 ꪹꪖꪀ ꪁꪽ ꪜꪱꪙ ꪙꪾ ꪵꪀꪉ ꫃ꪎꪣ ꪕꪱꪉ ꪜꪴ ꫃ꪚ ꪶꪕꪉ ꪔꪷ ꪘꪱ ꪨꪱꪥ ꪋꪺ ꪹꪭꪙ ꫄ꪤꪙ .ꪋꪺ ꪹꪭꪙ ꪩꪉꪴ ꪩꪷ ꪪꪽ ꪊꪙꪸ ꪊꪺꪚ ꪙꪷ ꪁꪮꪒ ꪎꪮꪥ ꫄ꪥꪒ ꪭꪺꪀ ꪼꪎ ꪁꪱꪙ ꪵꪜ ꪨꪱꪥ ꪹꪋꪉ ꪄꪮꪉ ꪊꪺꪚ ꪼꪨ ꪙꪮꪉ .ꪀꪙꪲ ꪤꪴ ꪊꪾ ꪭꪣꪲ ꪙꪾ ,ꪩꪉꪴ ꪊꪙꪸ ꪀꪷ ꪹꪚꪱ ꫃ꪬꪙ ꪎꪀꪰ ꪹꪕ ꪙꪾ ꪙꪮꪉ ꪻꪐ ꫄ꪔꪀ ꪙꪽ ꪶꪔ ꪎꪉꪰ ꪁꪷ ꪩꪱꪫ ꪼꪜ ꪕꪮꪥ ꪙꪾ ꪎꪸ ꫃ꪢꪒ. ꪼꪅ ꪁꪰ ꪜꪱꪙ ꪙꪾ ꪊꪺꪚ ꪹꪁꪱꪙ ꪵꪜ ꪋꪺ ꪧꪭꪙ ꪩꪉꪴ ꪵꪀꪉ ꪨꪱꪥ ꪶꪋ ꪹꪭꪙ ꪀꪺꪉ ꪚꪱꪙ ꪁꪷ ꪹꪋꪱ ꪨꪷ ꪨꪱꪥ ,ꪀꪙꪲ ꪤꪴ ꪹꪚꪱ ꪶꪢꪣ.

          ꪼꪫ ꪋꪳ ꪡꪮꪉ ꪹꪚꪱ ꪻꪬ ꪙꪾ ꪁꪮꪒ ꪎꪮꪥ ꪭꪣꪲ ꪵꪣ ꪙꪾ ꪖꪸ ,ꪼꪜ ꪋꪳ ꪒꪙꪲ ꪤꪴ ꪒꪙꪲ ꫃ꪤꪒ ꪹꪥꪙ ꪋꪮꪥ ꫛ ꫄ꪤꪙ ꪮꪙꪸ ꪻꪊ ,ꪝꪉꪳ ꪜꪲ ꪀꪱꪥ ꪢꪱ ꪹꪭꪙ ꪹꪘꪀ ꪁꪷ ꪤꪮꪣ ꫄ꪉꪙ ꪶꪀꪀ ꪼꪎ ꪁꪽ ꪜꪱꪙ ꪙꪾ ꪢꪽ ꪒꪲ .ꪬꪱꪀ ꪫꪱ ꪀꪺꪉ ꪥꪱꪙ ꪊꪾ ꪙꪲꪝꪉꪳ ꪋꪴ ꪘꪮꪉ ꪨꪺꪉ ꪁꪷ ꪎꪚꪳ ꪔꪱꪣ ꪖꪮꪀ ꪣꪱ ꪠꪱ ꪬꪱꪥ ꪝꪉꪳ ꪶꪀꪉ ꪊꪉꪲ ꪙꪲ. ꪕꪮꪥ ꪚꪱꪫ ꪀꪱꪫ ꪄꪮꪉ ꪮꪫꪲ ꪚꪱꪙ ꫄ꪤꪙ ꪹꪣꪉ ꪭꪫꪙꪸ ꪠꪴ ꪑꪱꪣ ,ꪤꪉꪸ 2 ꪋꪴ ꪶꪠꪙ ꪙꪮꪉ ꪹꪀꪒ ꪎꪉꪲ ꪮꪮꪀ ꪹꪣ ꪜꪲ 2016 ꪵꪀꪉ ꪜꪲ 2017 ꪁꪷ ꫃ꪥꪒ ꪤꪱꪫ 2 ꪼꪀ ꪶꪎ ꪁꪽ ꪜꪱꪙ ꪙꪾ ꪘꪉꪰ ꪎꪱ ꪊꪺꪚ ꪀꪱꪙ ꪵꪜ ,ꪝꪮꪣ ꪀꪚꪾ ꪭꪱꪉ ꪭꪮꪥ ꪹꪖꪀ ꪔꪱꪉ ꫃ꪚ ꪶꪕꪉ ꪩꪚꪸ ꪼꪜ ꪕꪮꪥ ꪵꪣ ꪙꪾ ꪖꪸ ꪊꪺꪚ ꪁꪱꪙ ꪶꪋꪒ. ꪫꪱ ꪚꪱ ꪎꪱꪉ ꪵꪜꪉ ꫄ꪩꪚ ꪕꪽ ꪭꪴ ꪋꪲ ꪎꪚꪳ ꪔꪱꪣ ꪶꪋꪒ ꪹꪄꪱ ꪹꪣ ꪀꪺꪉ ꪶꪠꪉ ꫄ꪤꪙ ꪤꪴ ,ꪋꪲ ꫃ꪤꪒ ꪬꪣꪸ ꪭꪱꪥ ꪭꪮꪒ ꪨꪱꪥ ꪋꪺ ꪹꪭꪙ ꫄ꪤꪙ.

          ꪘꪉꪰ ꪖꪲ ꪎꪱ ꪈꪸ ꪶꪩ ꪶꪠꪙ ꪙꪮꪉ ꪁꪷ ꫃ꪥꪒ ꪁꪱꪙ ꪵꪜ ꪀꪱꪥ 3 ꪼꪀ ꪶꪎ ꪁꪽ ꪜꪱꪙ ꪙꪾ ꪘꪉꪰ ꪵꪣ ꪙꪾ ꪘꪉꪴꪌ ꪹꪩꪙ ꪹꪏ ꪤꪱꪫ ꪼꪀ ꪶꪎ ꫜ ꪁꪽ ꪜꪱꪙ ꪙꪾ ꪖꪸ ꪁꪷ ꪊꪺꪚ ꪁꪱꪙ ꪵꪜ ꪝꪮꪣ ꪀꪚꪾ ꪕꪱꪉ ꪼꪜ ꪣꪱ ,4 ꪋꪺ ꪹꪭꪙ ꫄ꪤꪙ ꪵꪀꪉ ꪨꪱꪥ ꪹꪭꪙ ꪪꪽ ꪬꪫꪱ ꪄꪮꪉ ꪶꪔ ꫄ꪤꪙ ꪶꪠ ꪶꪎ ꫜ ꪵꪠꪉ ꪹꪁꪱ ꪵꪸ ꪁꪷ ꪊꪺꪚ ꪶꪋꪒ.

          ꪕꪮꪥ ꪚꪙꪸ ꪢꪱꪥ ꪄꪮꪉ ꪭꪫꪙꪸ ꪪꪽ ꫄ꪊꪙ ,ꪋꪱꪣ ꪹꪔꪱ ꪵꪀꪉ ꪖꪲ ꪎꪱ ꪈꪸ ꪶꪩ ꪶꪠꪙ ꪙꪮꪉ ꪁꪷ ꫃ꪥꪒ ꪁꪱꪙ ꪵꪜ ꪤꪱꪫ 5 ꪼꪀ ꪶꪎ ꪁꪽ ꪜꪱꪙ ꪵꪣ ꪙꪾ ꪖꪸ ,ꪀꪱꪥ 3 ꪼꪀ ꪶꪎ ꪁꪽ ꪜꪱꪙ ꪵꪣ ꪙꪾ ꪘꪉꪴ. ꪙꪉꪰ ꪵꪣ ꪙꪾ ꪀꪷ ꪙꪮꪉ ꪨꪷ 600 ꪹꪖꪀ ,ꪵꪣ ꪙꪾ ꪉꪮꪥ ꪐꪲ 325 ꪹꪖꪀ ,ꪹꪣ ꪙꪾ ꪉꪮꪥ ꪬꪱꪒ ꪤꪱꪫ ꪼꪀ ꪶꪎ ꫜ. ꫃ꪕꪉ ꫃ꪢꪒ ꫄ꪉꪙ ꪵꪀ ꪼꪄ ꪨꪷ ꪤꪱꪫ 550 ꪔꪲ ꪢꪽ.

          ꪫꪽ ꪡꪱꪫ ꪎꪱꪉ ꪵꪜꪉ ꪝꪉꪳ ꪁꪽ ꪜꪱꪙ ꪙꪾ ꪊꪺꪚ ꪵꪜ ꪨꪉꪰ ꪶꪠꪙ ꪙꪮꪉ; ꪔꪉꪰ ꪵꪔꪉ ꪔꪣꪳ ꪁꪽ ꪜꪱꪙ ꪙꪾ ꪶꪀꪀ ꪊꪉꪲ ꪼꪜ ꪋꪳ ꪒꪙꪲ ꪶꪘꪉ ꪉꪚꪸ; ꪐꪽ ꪝꪱꪫ ꪕꪉꪸ ꪮꪱꪙ ꪻꪬ ꪶꪠꪉ ꫄ꪤꪙ ꪤꪴ ꪨꪷ ꪫꪀꪸ ꫃ꪤꪒ ꫄ꪁꪙ ꪬꪱ ꪼꪅ ꪙꪲ. ꪕꪮꪥ ꪵꪥꪉ ꪒꪴ ꪨꪉꪰ ꫄ꪋ ꪁꪽ ꪜꪱꪙ ꪙꪾ ꪶꪋꪚ ꪁꪱꪙ ꪵꪜ ,ꪼꪅ ꪁꪷ ꪣꪲ ꪤꪱꪫ 8 ꪝꪽ ꪋꪺ ꪹꪭꪙ ꫄ꪤꪙ ꪒꪱꪉ ꪀꪙꪲ ꪤꪴ ꪀꪺꪉ ꪶꪠꪉ ꪋꪲ ꪊꪺꪚ ꪏꪒꪸ ꪭꪱꪥ ꪫꪱ ꪎꪚꪳ ꪔꪱꪣ ꪹꪀꪒ ꪎꪉꪲ ꪮꪮꪀ ꪶꪠꪙ ꪙꪮꪉ.

ꪒꪉꪲ ꪔꪺꪙ-ꪩꪉ ꪬꪫꪙꪸ ꪥꪀꪲ