ꪋꪉꪸ ꪵꪒꪙ ꪜꪙꪸ ꪻꪢ ꪵꪔ ꪹꪊꪉ ꪊꪉꪸ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ

ꪎꪱ ꪋꪉꪸ ꪵꪒꪙ ꪵꪗꪉ ꪶꪠ ꫄ꪎꪙ ꪨꪱ ꪣꪲ 14 ꪚꪱꪙ ꪀꪚꪾ ꪀꪱꪥ 5ꪌ700 ꪬꪺ ꫛ 6 ꪹꪋ ꫛ ꪝꪮꪣ ꪀꪙꪲ ꪤꪴ. ꪀꪮꪙ ꪙꪲ ꪋꪉꪸ ꪵꪒꪙ ꪨꪷ ꪎꪱ ꫜ ꪑꪉꪰ ꪝꪷ ꪨꪱꪤ ꪥꪱꪀ ꪋꪱ, ꪶꪀꪀ ꪹꪉꪙ ꪎꪉꪲ ꪄꪮꪉ ꪑꪉꪰ ꪒꪒꪴ ꪖꪫꪸ ꪨꪱꪤ ꪮꪽ, ꪕꪱꪉ ꪹꪄꪱ ꪚꪱꪙ ꪝꪷ ꪥꪱꪀ ꪋꪱ ꫄ꪋ ꪣꪺ ꪶꪠꪙ ꪙꪮꪉ. ꫃ꪥꪒ ꪀꪉꪲ ꫃ꪔ ꪶꪘꪉ ꪉꪚꪸ ꪁꪷ ꪝꪷ ꪥꪱꪀ ꪋꪱ.

ꪝꪉꪳ ꪜꪲ ꪊꪣꪾ ꪙꪲ, ꪹꪝ ꪣꪲ ꪩꪺꪉ ꪶꪋꪣ ꪭꪚꪾ ꪄꪮꪉ ꫄ꪀꪚ ꪮꪫꪲ ꪊꪉꪲ ꪁꪫꪙꪸ ꪒꪸ ꪹꪠꪉ ꪝꪮꪣ ꪀꪚꪾ ꫄ꪤꪙ ꪹꪣꪉ ꪒꪸ ꪵꪠꪉ ꪎꪱ ꪋꪉꪸ ꪵꪒꪙ ꪁꪷ ꪣꪲ ꪝꪉꪳ ꪩꪺꪉ ꪢꪱ ꪼꪄ ꪵꪊꪉ ꪵꪊꪀ ꪪꪽ ꪬꪫꪱ ꪎꪱ ꪶꪭꪥ ꪼꪒ ꪢꪜꪉ ꪻꪊ ꪜꪺꪉ ꪀꪙꪲ ꪩꪺꪉ ꪤꪴ ꫄ꪤꪙ ꪹꪣꪉ ꪼꪒ ꪑꪷ ꪎꪉꪴ, ꪩꪱꪙ ꪼꪩ ꪎꪸ ꪮꪒꪳ ꪤꪱꪀ ꪁꪒꪰ ꪁꪉꪴ.

        ꪣꪱ ꪭꪮꪒ ꪋꪉꪸ ꪵꪒꪙ ꪣꪳ ꪙꪲ ꪵꪩ ꫃ꪬꪙ ꪝꪉꪳ ꪨꪱꪉ ꪹꪭꪙ ꪅꪽ ꪋꪽ. ꪕꪱꪉ ꪩꪮꪉ ꪼꪒ ꪜꪴ ꫃ꪛ ꪶꪕꪉ ꪝꪉꪸ ꪝꪚꪷ, ꪎꪮꪉ ꪡꪱꪀ ꪕꪱꪉ ꪨꪷ ꪝꪉꪳ ꪼꪭ ꪀꪱ ꫃ꪠ ꪢꪱꪀ ꪣꪽ ꪹꪬꪱ ꪵꪄꪫ ꪋꪽ ꪁꪱꪒ ꪁꪙꪸ ꪀꪚꪾ ꪫꪀꪸ ꪵꪔꪉ ꪩꪉꪸ ꪎꪒꪰ ꪎꪉꪲ. ꪀꪱꪥ ꪙꪽ ꪁꪷ ꪣꪲ ꪨꪱꪥ ꪋꪺ ꪹꪭꪙ ꫃ꪥꪒ ꪀꪉꪲ ꫃ꪔ ꪥꪮꪥ, ꪖꪴ ꫄ꪑꪚ ꪜꪽ ꫄ꪝꪉ ꪁꪒꪳ ꪼꪒ 19 ꪋꪫꪸ ꪢꪽ ꪢꪮꪥ ꫛ ꪢꪮꪥ ꪜꪲ, ꪶꪎ ꪋꪺ ꪹꪭꪙ ꪁꪒꪰ ꪤꪮꪙ ꪶꪩꪉ ꪑꪉꪰ ꪀꪱꪥ 100 ꫜ ꪹꪭꪙ.

          ꪝꪮꪣ ꪀꪚꪾ ꪢꪱ ꪼꪄ ꪀꪉꪲ ꫃ꪔ ꪋꪉꪸ ꪵꪒꪙ ꫄ꪩꪉ ꫄ꪋ ꪊꪮꪉ ꪵꪭꪉ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ ꪁꪷ ꪣꪲ ꪀꪱꪥ 50 ꪋꪺ ꪹꪭꪙ ꫄ꪤꪙ ꪵꪚꪉ ꪜꪽ ꪒꪙꪲ ꫃ꪥꪒ ꪕꪱꪉ. ꪭꪮꪒ ꪼꪅ ꪎꪱ ꪁꪷ ꪜꪴ ꫃ꪛ ꪶꪕꪉ ꪼꪒ ꪀꪱꪥ 10 ꪼꪀ ꪶꪎ ꪕꪱꪉ ꪼꪜ ꪣꪱ ꪒꪮꪣ ꪚꪱꪙ. ꪀꪺꪉ ꪶꪎ 19 ꪩꪺꪉ ꪜꪙꪴ ꪭꪳ ꪋꪉꪸ ꪵꪒꪙ ꪁꪒꪳ ꪼꪒ 14 ꪩꪺꪉ ꪜꪙꪴ ꪚꪱꪙ ꪙꪱ ꪻꪢ.

          ꪢꪱ ꪔꪱ ꪚꪱꪙ ꪄꪺꪉ ꪄꪮꪉ ꪎꪱ ꪋꪉꪸ ꪵꪒꪙ ꪒꪱꪉ ꪕꪉꪳ ꪥꪱꪙ ꪜꪙꪸ ꪖꪱꪥ. ꪩꪺꪉ ꪜꪙꪸ ꪻꪢ ꪙꪲ ꪨꪷ ꪄꪴ ꪭꪉꪴ ꪘꪱ ꪣꪱ ꪔꪱ ꪼꪫ ꪝꪷ ꪵꪣ ꪝꪲ ꪙꪮꪉ ꪝꪮꪣ ꪁꪱꪒ ꪎꪱꪙ ꪀꪽ ꪶꪭꪣ ꪵꪭꪉ ꪔꪉꪰ ꪵꪔꪉ ꪁꪒꪳ ꪼꪒ ꪩꪱꪉ ꪒꪲ ꪹꪊꪉ ꪊꪉꪲ ꪚꪱꪙ ꪙꪱ  ꪻꪢ ꪄꪮꪉ ꪵꪗꪉ ꪶꪠ ꫄ꪎꪙ ꪨꪱ.

                                                ꪬꪫꪱꪉ ꪩꪮꪉ- ꪕꪮꪉ ꪵꪯꪉ ꪥꪀꪲ

Chiêng Đèn piến mắư té chường trình tẳng tánh bản na mắư

Xã Chiêng Đèn  thanh phố Sơn La mi 14 bản, cắp cài 5.700 hùa côn, 6 chựa côn pọm kìn dú. Pék xương lài xã phổng xùng ứn, pưng pì cón nị, Chiêng Đèn lỏ xã nưng cuồng pưng xã nhăng pọ lài dạk cha, cốc ngươn sính khòng nhăng cặt cung, tang kahủ bản mưn pông, phạ phồn báu long cài đảy, dệt kình tế nồng nghiệp cọ pọ dạk cha.

Pưng pì chằm nị, pưa mi luông chôm hặp khòng cấp uỷ, chính quyên pọm cắp dần mương địa phường, xã Chiềng Đèn cọ mi pưng luông mả khày chảnh chék, vằn hoá xã hội lâng đảy pồng chằư mả khày, puồng kìn luông dú dần mương đảy nho xùng, tựng gian lan lay xìa đảy ứt dák cặt cung.

Ma họt Chiêng Đèn mự nị le hền pưng làng hươn hạn, hươn xày mung ngỏi mẳn đì khặn chăn. Tang long đảy pù bê tông piêng pặp, 2 phạk tang lỏ pưng hay cả phề, mák mặn hạu khèo chăn. Cài luông dệt kình tế máư xương púk cà phề, mák mặn hạu, tảnh liệng xắt sính, pết cáy…Cài nặn cọ hụ hền ók lài chua hươn dệt kình tế giỏi, puồng kìn luông dú khòng dần mương đảy nho xùng, thù nhập pằn pâng mỏi hùa côn cựt đảy dáo 19 triệu mằn mỏi côn mỏi pì, số chua hươn cặt dón lông nhăng cài 100 nưng chua hươn.

Pọm cắp mả khày kình tế, xã Chiêng Đèn lâng chơ chóng hanh tẳng tánh bản na mắư, cọ mi cài 50 chua hươn dần bánh pằn đìn dệt tang cánh cuồng gian pày nả nhăng chi tứm ten khửn. Họt khạy xã cọ pù bê tông đảy cài 10 cày số tang pày ma đòm bản. Cuồng số 19 luông pùn hư xã Chiêng Đèn cựt đảy 14 luông pùn bản na mắư. Vạy xứp tàm chóng hanh cựt đảy pưng luông pùn mắư, xã cọ nhẳn danh pếnh khày luông hăng hanh ma tang nồng nghiệp vạy mả khày kình tế xã hội khòng địa phường.

Nả tà bản khuống khòng xã Chiêng Đèn đàng tựng gian thái kinh pành nựa. Luông piến mắư nị lỏ khù hung nả ma tà vạy po me pi nọng pọm cạt xàn cằn, hôm hanh tẳng tánh cựt đảy lang đì chường trình bản na mắư khòng thanh phố Sơn La./.

                                                Hoàng Long-Anh dịch