ꪒꪀꪰ ꪨꪀꪰ; ꫄ꪨꪚ ꪵꪮꪚ ꪶꪠꪉ ꪵꪒꪙ ꪹꪣꪉ ꪄꪮꪉ ꪼꪏ ꪤꪱꪫ ꪀꪺꪙ ꪬꪱꪣ ꪵꪄꪫ

        ꪨꪉꪰ ꪣꪳ ꫜ ꪼꪜ ꫃ꪥꪒ ꪫꪀꪸ ꪘꪀꪰ ꪹꪘꪥ ꪣꪱ ꪹꪭꪙ, ꫃ꪕꪙ ꪁꪙꪳ ꪣꪱ ꪜꪱ ꪩꪳ ꪖꪲ ꪎꪱꪉ ꪝꪮꪣ ꪀꪚꪾ ꪶꪔ ꪩꪀꪴ ꪑꪉꪲ ꫄ꪅꪉ ꪹꪣ ꫄ꪨꪚ ꪵꪮꪚ ꪩꪱꪙ ꪼꪩ ꪂꪸ ꪚꪮꪒ ꪎꪳ ꪼꪒ ꪶꪓꪙ ꪵꪒꪙ ꪹꪣꪉ 737 ꪼꪄ ꪮꪮꪀ ꪘꪉꪰ ꪎꪱ I Rvê, ꪭꪫꪙꪸ ꪵꪯ ꪱꪮ ꪎꪚꪴ, ꪔꪉꪲ ꪒꪀꪰ ꪨꪀꪰ ꪼꪫ ꪵꪮꪚ. ꪵꪔ ꪙꪮꪥ ꪭꪮꪒ ꪻꪐ ꪭꪴꪤ ꪕꪷ ꪵꪀꪫꪙ ꫄ꪅꪥ ꪀꪚꪾ ꪫꪀꪸ ꪹꪣ ꪼꪭ ꪼꪜ ꪙꪱ, ꪹꪏꪉ ꪙꪽ ꪜ ꪱꪎꪱꪉ ꪁꪷ ꪹꪏꪉ ꪨꪱꪥ ꫛ ꫄ꪤꪙ ꪘꪉꪰ ꪶꪠꪉ ꪵꪒꪙ ꪹꪣꪉ ꪙꪲ ꪑꪉꪰ ꫃ꪭ ꪭꪴ ꪎꪳ. ꪠꪱꪀ ꪻꪣ ꪝꪮꪉ ꪕꪷ ꪜꪣꪴ ꪜꪱ, ꪝꪉꪳ ꪣꪳ ꪶꪀꪀ ꪵꪅꪫꪀ ꪄꪣꪾ ꪚꪒꪴ ꪁꪷ ꪥꪱꪀ ꪨꪱꪥ ꪬꪱꪀ ꪫꪱ ꪼꪒ ꪏꪣꪴ ꪯꪱꪥ ꪊꪙꪸ ꪎꪲ ꪌꪛ ꪶꪓꪥ ꪵꪒꪙ ꪹꪣꪉ ꪊꪲ ꪚꪮꪀ ꪔꪒꪲ ꫄ꪔꪙ ꪜ ꪱꪎꪱꪉ ꪁꪷ ꪣꪺꪙ ꪻꪊ ꪵꪮꪚ ꪄꪙꪸ ꪎꪳ.    

          ꪵꪩꪫ ꪶꪒꪒꪥ ꪀꪚꪾ ꪩꪉꪴ ꪬꪱ ꪶꪁꪉ ꪖꪀꪳ, ꪤꪴ ꪶꪖꪙ 13 ꪎꪱ Ia R’vê, ꪭꪫꪙꪸ Ea Súp ꪭꪳ ꪼꪜ ꪵꪮꪚ ꪎꪳ ꪁꪷ ꫃ꪜꪙ ꪫꪀꪸ ꫃ꪤꪒ ꫜ ꪅꪀꪰ ꪅꪷ ꪹꪚꪱ ꪒꪒꪴ ꪖꪫꪸꪥ ꪼꪒ. ꪹꪝ ꪭꪴ ꪎꪳ, ꪩꪉꪴ ꪁꪷ ꪭꪴ ꪶꪓꪙ ꪎꪳ ꪘꪉꪷ ꪶꪠꪉ ꪤꪱ ꪼꪜ ꪋꪳ ꪀꪷ ꪜꪀꪴ ꪶꪚꪉ, ꪊꪲ ꪚꪮꪀ ꪩꪺꪉ ꪎꪴ ꪼꪫ ꫄ꪊꪚ ꪙꪣꪾ ꪵꪣꪙ ꪕꪮꪥ ꪀꪲ ꪗꪺꪒ ꪼꪫ ꪎꪴ ꪻꪎ ꪫꪀꪸ ꪜꪀꪴ ꪶꪚꪉ, ꪵꪔꪉ ꪩꪉꪸ ꪢꪱ ꪼꪄ ꪀꪉꪲ ꫃ꪔ ꪹꪭꪙ ꪹꪊꪱ.

ꪓꪱꪥ ꪮꪫꪥꪲ  ꪹꪋꪉ ꪪꪽ ꪵꪬꪫꪉꪶ ꪊꪉꪲ ꪮꪫꪥꪲ ꪶꪓꪙ ꪶꪛ ꪶꪓꪥ ꪵꪒꪙ ꪹꪣꪉ 737 ꪻꪬ ꪭꪴ, ꪵꪔ ꪜꪲ 2012 ꪭꪮꪒ ꪼꪅ , ꫄ꪒꪙ ꪫꪲ ꪬꪲꪉ ꪼꪄ ꪮꪮꪀ ꪼꪒ 2 ꫄ꪨꪚ ꪀꪚꪾ 62 ꪭꪮꪀ ꪪꪙꪸ. ꪬꪱꪀ ꪫꪱ ꪼꪫ ꪣꪲ ꪼꪒ ꪝꪉꪳ ꫄ꪨꪚ ꪵꪮꪚ ꪹꪏꪉ ꪙꪲ ꪨꪷ ꪀ ꪱꪩꪺꪉ ꪊꪮꪉ ꪵꪭꪉ ꪄꪮꪉ ꪀꪱ ꫄ꪒꪙ ꪫꪲ ꪁꪷ ꪹꪏꪉ ꫛ ꫄ꪤꪙ ꪓꪸ ꪹꪠꪉ. ꪹꪝ ꪜꪙꪳ ꪩꪱꪙ ꪄꪮꪉ ꪭꪮꪀ ꪪꪙꪸ ꫄ꪡꪙ ꪨꪱꪥ ꪨꪷ ꪀꪱꪥ 40 ꪜꪲ, ꪨꪷ ꫛ ꫃ꪥꪒ ꪹꪥꪙ ꪊꪉꪲ ꪀꪺꪉ ꪋꪺ ꪹꪭꪙ, ꪼꪒ ꫃ꪥꪒ ꪨꪱꪥ ꪘꪱ ꪫꪀꪸ ꪠꪀꪸ ꪀꪱꪙ ꪕꪣꪾ ꪭꪽ ꪣꪒꪳ ꪊꪉꪰ ꪣꪱ ꪹꪭꪙ ꪚꪮꪀ ꪣꪱ ꫄ꪨꪚ ꪁꪷ ꪥꪱꪀ ꪨꪱꪥ ꪨꪱꪥ ꫛ ꪫꪱꪉ ꪬꪱꪉ ꪀꪱꪉ ꪹꪚꪱ ꪵꪮꪚ.

          ꪀꪚꪾ ꪩꪺꪉ ꪭꪀꪰ ꪵꪝꪉ ꪵꪀꪉ ꪵꪊꪀ ꪑꪣꪸ ꪄꪮꪉ ꪏꪣꪴ ꪯꪱꪥ ꪶꪛ ꪶꪓꪥ ꪵꪒꪙ ꪹꪣꪉ, ꪀꪱꪙ ꪶꪛ ꪊꪙꪸ ꪎꪲ ꪶꪛ ꪶꪓꪥ ꪵꪒꪙ ꪹꪣꪉ 737, ꪶꪛ ꪶꪓꪥ ꪵꪒꪙ ꪹꪣꪉ ꪔꪉꪲ ꪒꪀꪰ ꪨꪀꪰ ꪁꪷ ꪁꪱꪒ ꪁꪙꪸ ꪢꪽ ꪁꪒꪰ ꪀꪚꪾ ꪝꪷ ꪵꪣ ꪝꪲ ꪙꪮꪉ ꪎꪱ Ia R’vê, ꪭꪫꪙꪸ Ea Súp. ꪩꪙꪳ ꪹꪏ ꪀꪚꪾ ꪶꪓꪥ ꪶꪀꪉ ꪔꪱꪀ ꪀꪺꪙ ꪊꪉꪴ, ꪭꪱꪉ ꪣꪳ ꫄ꪩꪉ ꪼꪜ ꪀꪱ ꪚꪱꪙ, ꪝꪮꪣ ꪀꪙꪲ ꪝꪮꪣ ꪤꪴ ꪵꪀꪉ ꪝꪮꪣ ꫃ꪤꪒ ꪹꪥꪙ ꪀꪚꪾ ꪝꪲ ꪙꪮꪉ. ꪎꪮꪉ ꪣꪼꪎꪄ ꪝꪉꪳ ꫄ꪨꪚ ꪩꪱꪙ ꪼꪩ ꪎꪸ ꪚꪮꪒ ꪎꪳ, ꪋꪮꪥ ꪝꪸ ꪙꪮꪉ ꪑꪷ ꪎꪉꪴ ꪵꪖꪫ ꪭꪴ ꪩꪺꪉ ꪏꪉꪸ, ꪢꪱ ꪼꪄ ꪬꪮꪉ ꫃ꪥꪒ ꪩꪺꪉ ꪹꪥꪙ ꪼꪫ ꪝꪮꪣ ꪶꪛ ꪶꪓꪥ ꪵꪒꪙ ꪹꪣꪉ ꪋꪳ ꪢꪽ ꪕꪉꪸ ꪮꪱꪙ ꪶꪠꪉ ꪵꪒꪙ ꪹꪣꪉ, ꪼꪜ ꪋꪳ ꪢꪽ ꪕꪀꪳ ꪄꪮꪚ ꪙꪣꪾ ꪵꪒꪙ ꪒꪙꪲ ꪚꪱꪙ ꪹꪣꪉ.

Đắk Lắk; Lớp ép phổng đen mương khong say giáo

 quân hàm khèo

          Lăng mự nưng pày dệt vịa nắc nưới ma hươn, tênh cưm ma pả Lữ Thị Sáng pọm cắp tô lụk nhinh khâng mưa lớp ép lan lay xia bót xừ đảy Đôn đen mương 737 khày ók nẳng xã I Rvê, huyện Ea Súp, tỉnh Đắk Lắk vạy ép. Té nọi họt nháư, hụ to quén khơi cắp vịa mưa hay pày na, xương nặn pả Sáng cọ xương lai côn dân nẳng phổng đen mương nị nhăng hê hụ xừ. Phák mư pong to pùm pà, pưng mự cốc khọe khắm bút cọ dạk, hák va đảy xum ai chiến sĩ bộ đội đen mương chík bók tít tơn, pả Sáng cọ muôn chàư ép khiên sừ .

          Lẹo đối cắp lung Hà Công Thức, dú nẳng thôn 13 xã Ia R’vê, huyện Ea Súp hư pày ép xừ cọ pên vịa dệt nưng khặc khọ xưa. Pưa hụ xừ, lung cọ mi xương đôn đảy tô sừ nẳng nọk phông dà pảy chự cò púk bồng, chík bók luông xủ vạy chấp năm men toi kỹ thuật sáư vịa púk bồng, tảnh liệng mả khày kinh tế khong hươn chảu.

          Đại uý Trương Văn Hoành, Chính uỷ Đôn bộ đội đen mương 737 hảu hụ, té pi 2012 họt khạy, đơn vị hính khày ók đảy 2 lớp cắp 62 học viên. Hák va vạy mi đảy pưng lớp ép xương nị lỏ cá luông chóng hanh khong cá đơn vị cọ xương côn dân địa phương. Pưa pun lan khong học viên phân lài lỏ cài 40, lỏ côn dệt dượn chính cuông chua hươn, đảy dệt lai nả vịa phíak can tặm hặn mựt chắng hươn bók ma lớp ép cọ dạk lài, lai côn vang háng càng báu ép.

          Cắp luông hặc panh cánh trách nhiệm khong xum ai bộ đội đen mương, cán bộ chiến sĩ bộ đội đen mương 737, bộ đội đen mương tỉnh Đắk Lắc cọ cạt kiên mẳn cặt cắp po me pi nọng xã Ia R’vê, huyện Ea Súp. Lưn xưa cắp Đội công tác quần chúng, hạng mự lâng pày cá bản, pọm kin, pọm dú cánh pọm dệt dượn cắp pi nọng. Xong ma khày pưng lớp lan lay xia bót xừ, choi pi nọng nho xùng theo hu luông xiêng, mả khày hỏng dệt luông dượn vạy pọm bộ đội đen mương chự mẳn tiêng an phổng đen mương, pảy chự mẳn tực khóp nặm đen đin bản mương./.

                                                                   TTTN - Hạnh dịch