Điện Biên: Côn dần bản Pom Sinh pày pe nẳng nặm cuồng

mua phồn nong, hiểm haị họt lăm côn tồ phủ

          Lằng pưng chu phồn nhắư, xẻm tang pík khảu mưa bản Pom Sinh té xểm tang luồng số 6 dú lắc Uỷ bàn dần mương xã Chiêng Đông, huyện Tuần Giáo dáo cày số nưng luận to đìn pông cánh đán nọi. Vạy pày họt bản Pom Sinh, lằng chơ khảm cài đảy cày số nưng tang pông, côn dần đảy khảm cài me nặm nặm đành clạt chơ phồn nong ma. Vạy khảm cài đảy me nặm nị, côn dần cọ dệt pe té kỉ xíp lăm mạy póng pộp xắư cằn lẹo àu xài lếch to nịu cỏi dằng cài me nặm vạy phúk pe báu hẳư lày nong. Sài lếch cọ đảy phúk xắư cốc mạy lók nưng. Phượng nưng đảy phúk xắư lăm mạy póng nưng phằng lông đì. Ăn nị lỏ luông dệt khòng côn dần bản Pom Sinh vạy pày cài me nặm nị cuồng mua phồn nong.

          Toi côn dần cuồng bản, cón nị mi xểm cau tèo nưng mi luông hy cài 80 thứak tẳng tánh té pì 1992 vạy pày ma cài me nặm nị. Hák va lằng cài 20 pì xủ, cau cọ hắc pé lài. Vạy kẻ khày vịa pày ma khòng côn dần cuồng bản, hạng pì chính quyên xã Chiêng Đồng lâng uồn pa côn dần hák khâng xảng pành pưng bón chuốp hắc pé. Lưn xưa lỏ pưng piến pẻn dệt nả cau cọ lók mết lẹo hư đảy àu mạy póng ma piến. Hák va lằng kỉ bườn báu cọ lằng mua phồn lỏ cau chuốp hắc pé báu long cài đảy.

          Lằng chu cau tèo Chu Va 6 nẳng tỉnh lai Châu chuốp khát, chính quyên huyện Tuần Giáo cọ lăm le lau tênh mết pưng khẳng cau tèo nẳng cuồng huyện cánh tặ pùn pék xìa khẳng cau tèo Pom Sinh, vạy thả dự án tẳng tánh cau mắư mẳn đì xưa vạy côn dần pày ma cài. Hák va lằng cài 3 pì té chơ xểm cau tèo Pom Sinh chuốp pé, côn dần cọ hê mi cau mắư vạy pày ma, dệt hẳư puồng kìn đơi dú khòng côn dần nẳng nị pọ dạk cha xưa. Khù chau lò nhất lỏ vịa pưng nọng học sình nẳng bản pày trương ép cọ hiểm hại lài.

          Té chơ khẳng cau tèo chuốp pé, hùa pì 2015, Uỷ bàn dần mương xã Chiêng Đông cọ niếu chưa côn dần pưng bản dú xẳư chằm cóp hôm mạy tók cánh mự cồng vạy dệt cau tạm hẳư côn dần pày ma, hák va khẳng cau nặn họt mua phồn lỏ chuốp lày nong. Côn dần pày dệt hay cọ hao khảm nặm pày, lẹo pưng làn nọi va nặm nong cọ nàhh danh xừ. ăn nị lỏ xẻm tang pày ma khòng bản Cộng, Bản vang cánh bản Pọm Sinh xương nặn mỏi mự mi hạng họi vặt côn dần cuồng phổng pày ma cài pe, pày ma dạk lài.

          Pưng pì cài ma phạ phồn nong cọ cướt sình ók lài khù báu ngau. Cánh va số ngơn cốc vạy dệt khẳng cau tèo nưng khạy nị hư cận té 3 họt 5 tỷ mằn toi luông hươn nước cánh dần mương pọm dệt hư lang mon mi khẳng cau mắư đối cắp côn dần Pom Sinh báu chắc chơ đằư chí mi. Pưa khạy nị bản mi 80 chua hươn, cài 400 hùa côn hư thóng ven lài dú cuòng danh sách chua hươn cặt. Họt chơ đằư  côn dần chắng chí mi cau mắư pày ma cài, vạy mả khày kinh tế, học sình báu đảy chau lò dản mỏi tưa pày cài me nặm. Ặn lỏ khù chau lò khòng côn dần nẳng nị mỏi chơ mua phồn nong ma cánh va vịa dòm ngơn cốc tẳng tánh cau Pom Sinh đàng lỏ khù cận hà nhất./.

Vũ Lợi-Huyền dịch

ꪓꪙꪸ ꪚꪙꪸ: ꫛ ꫄ꪤꪙ ꪚꪱꪙ ꪜꪮꪣ ꪎꪉꪲ ꪼꪜ ꪵꪝ ꪀꪱꪥ ꪵꪣ ꪙꪣꪾ ꪀꪺꪉ ꪣꪺ ꪶꪠꪙ

ꪙꪮꪉ ꪬꪸꪣ ꪭꪱꪥ ꪭꪮꪒ ꪩꪣꪾ ꫛ ꪶꪔꪙ ꪠꪴ

          ꪨꪉꪰ ꪝꪉꪳ ꪋꪴ ꪶꪠꪙ ꪻꪐ ꫃ꪎꪣ ꪕꪱꪉ ꪜꪀꪲ ꪹꪄꪱ ꪹꪢ ꪚꪱꪙ ꪜꪮꪣ ꪎꪉꪲ ꪵꪔ ꫃ꪎꪣ ꪕꪱꪉ ꪨꪺꪉ ꪶꪎ 6 ꪤꪴ ꪨꪀꪰ ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪋꪙꪸ ꪶꪒꪉ ,ꪭꪫꪙꪸ ꪕꪺꪙ ꪤꪱꪫ ꪤꪱꪫ ꪼꪀ ꪶꪎ ꫜ ꪩꪺꪙ ꪕꪷ ꪕꪱꪉ ꪶꪜꪉ. ꪼꪫ ꪼꪜ ꪭꪮꪒ ꪚꪱꪙ ꪜꪮꪣ ꪎꪉꪲ ꪨꪉꪰ ꫄ꪋ ꪄꪱꪣ ꪀꪱꪥ ꪼꪒ ꪼꪀ ꪶꪎ ꫜ ꪕꪱꪉ ꪶꪝꪉ , ꫛ ꫄ꪤꪙ ꪼꪒ ꪄꪱꪣ ꪀꪱꪥ ꪵꪢ ꪙꪣꪾ ꫜ. ꪼꪫ ꪄꪱꪣ ꪀꪱꪥ ꪼꪒ ꪵꪣ ꪙꪣꪾ ꪙꪲ ꫛ ꫄ꪤꪙ ꪁꪷ ꪹꪮꪱ ꪼꪣ ꪜꪮꪉ ꪢꪱ ꫃ꪥꪒ ꪵꪜ , ꪵꪩꪫ ꪹꪮꪱ ꪎꪱꪤ ꫃ꪨꪀ ꪕꪷ ꪙꪫꪲ ꪀꪮꪥ ꪤꪉꪰ ꪀꪱꪥ ꪵꪣ ꪙꪣꪾ ꪹꪚꪱ ꪻꪬ ꪵꪝ ꪼꪨ ꪙꪮꪉ. ꪎꪱꪥ ꫃ꪨꪀ ꪁꪷ ꪼꪒ ꪠꪀꪴ ꪻꪎ ꪶꪀꪀ ꪼꪣ ꪨꪮꪀ ꫜ. ꪹꪡꪉ ꫜ ꪼꪒ ꪠꪀꪴ ꪻꪎ ꪩꪣꪾ ꪻꪢ ꪜꪮꪉ ꫜ ꪠꪉꪰ ꪶꪩꪉ ꪒꪙꪲ. ꪯꪽ ꪙꪲ ꪨꪷ ꪩꪺꪉ ꫃ꪥꪒ ꪄꪮꪈ ꫛ ꫄ꪤꪙ ꪚꪱꪙ ꪜꪮꪣ ꪎꪉꪲ ꪼꪫ ꪼꪜ ꪀꪱꪥ ꪵꪣ ꪙꪣꪾ ꪙꪲ ꪀꪺꪉ ꪣꪺ ꪶꪠꪙ ꪙꪮꪉ.

          ꪕꪮꪥ ꫛ ꫄ꪤꪙ ꪀꪺꪉ ꪚꪱꪙ , ꪀꪮꪙ ꪙꪲ ꪣꪲ ꫃ꪂꪢ ꪹꪁꪱ ꪵꪔꪫ ꫛ ꪣꪲ ꪩꪺꪉ ꪭꪲ ꪀꪱꪥ 80 ꪹꪖꪀ ꪔꪉꪰ ꪵꪔꪉ ꪵꪔ ꪜꪲ 1992. ꪭꪱꪀ ꪪꪱ ꪨꪉꪰ 20 ꪜꪲ ꪹꪮꪱ ꪹꪄꪱ ꪎꪴ ꪹꪁꪱ ꪁꪷ ꪬꪀꪰ ꪵꪜ ꪨꪱꪥ. ꪭꪱꪉ ꪜꪲ ꪊꪉꪲ ꪁꪫꪙꪸ ꪎꪱ ꪋꪉꪸ ꪶꪒꪉ ꫄ꪨꪉ ꪮꪺꪙ ꪝꪱ ꫛ ꫄ꪤꪙ ꪬꪱꪀ ꫄ꪅꪉ ꪎꪱꪉ ꪵꪜꪉ ꪝꪉꪳ ꪚꪮꪙ ꪬꪀꪰ ꪵꪜ. ꪹꪩꪙ ꪹꪏ ꪨꪷ ꪝꪉꪳ ꪜꪉꪸ ꪵꪜꪙ ꫃ꪤꪒ ꪘꪱ ꪹꪁꪱ ꪁꪷ ꪨꪮꪀ ꫃ꪢꪒ ꪵꪩꪫ ꪭꪳ ꪼꪒ ꪹꪮꪱ ꪼꪣ ꪜꪮꪉ ꪣꪱ ꪜꪙ ꪸꪻꪎ ꪬꪱꪀ ꪫꪱ ꪨꪉꪰ ꪣꪺ ꪶꪠꪙ ꫜ ꪨꪷ ꪹꪁꪱ ꪊꪺꪚ ꪬꪀꪰ ꪵꪜ.

          ꪨꪉꪰ ꪋꪴ ꪹꪁꪱ ꪵꪔꪫ ꪋꪴ ꪫꪱ 6 ꪘꪉꪰ ꪔꪉꪲ ꪨꪱꪥ ꪹꪊꪱ ꪊꪺꪚ ꪄꪱꪒ ,ꪊꪉꪲ ꪁꪫꪙꪸ ꪭꪫꪙꪸ ꪕꪺꪙ ꪤꪱꪫ ꪁꪷ ꪩꪣꪾ ꪵꪩ ꫃ꪢꪒ ꪋꪴ ꪄꪉꪰ ꪹꪁꪱ ꪵꪔꪫ ꪘꪉꪰ ꪀꪺꪉ ꪭꪫꪙꪸ ꪵꪀꪉ ꪕꪒꪰ ꪜꪴꪙ ꪵꪜ ꪎꪲ ꪄꪉꪰ ꪹꪁꪱ ꪵꪔꪫ ꪜꪮꪣ ꪎꪉꪲ , ꪼꪫ ꪖꪱ ꪤꪳ ꪮꪱꪙ ꪔꪉꪰ ꪵꪔꪉ ꪹꪁꪱ ꪻꪢ ꪢꪽ ꪒꪲ ꪹꪏ. ꪬꪱꪀ ꪫꪱ ꪨꪉꪰ 3 ꪜꪲ ꪵꪔ ꫄ꪋ ꪄꪉꪰ ꪹꪁꪱ ꪵꪔꪫ ꪜꪮꪣ ꪎꪉꪲ ꪊꪺꪚ ꪵꪜ ꫛ ꫄ꪤꪙ ꪁꪷ 6ꪭ ꪣꪲ ꪹꪁꪱ ꪻꪢ ꪼꪫ ꪼꪜ ꪣꪱ. ꪄꪴ ꪹꪋꪱ ꪨꪷ ꫄ꪐꪒ ꪨꪷ ꪫꪀꪸ ꪭꪮꪒ ꪎꪉꪲ ꪼꪜ ꪹꪋꪉ ꪵꪮꪚ ꪁꪷ ꪬꪣꪸ ꪭꪱꪥ ꪨꪱꪥ.

          ꪵꪔ ꫄ꪋ ꪄꪉꪰ ꪹꪁꪱ ꪵꪔꪫ ꪊꪺꪚ ꪵꪜ ꪬꪺ ꪜꪲ 2015 ꪮꪫꪲ ꪚꪱꪙ ꫄ꪤꪙ ꪹꪣꪉ ꪎꪱ ꪋꪉꪸ ꪶꪒꪉ ꪁꪷ ꪘꪫꪸ ꪹꪊ ꫛ ꫄ꪤꪙ ꪝꪉꪴ ꪚꪱꪙ ꪤꪴ ꪻꪎ ꪊꪣꪾ ꪀꪮꪚ ꪶꪭꪣ ꪼꪣ ꪔꪮꪀ ꪵꪀꪉ ꪣꪳ ꪶꪀꪉ ꪼꪫ ꫃ꪥꪒ ꪹꪁꪱ ꪕꪱꪣ ꪻꪬ ꫛ ꫄ꪤꪙ ꪼꪜ ꪣꪱ ꪭꪱꪀ ꪫꪱ

 ꪭꪮꪒ ꪣꪺ ꪶꪠꪙ ꪨꪷ ꪊꪺꪚ ꪼꪨ ꪙꪮꪉ. ꫛ ꫄ꪤꪙ ꪼꪜ ꫃ꪤꪒ ꪼꪭ ꪁꪷ ꪭꪱꪫ ꪄꪱꪣ ꪙꪣꪾ ꪼꪜ ꪫꪱ ꪨꪱꪙ ꪙꪮꪥ ꫄ꪋ ꪙꪣꪾ ꪙꪮꪉ ꪁꪷ ꪼꪒ ꪥꪉꪰ ꪎꪳ.

          ꪝꪉꪳ ꪜꪲ ꪀꪱꪥ ꪣꪱ ꪡꪱ ꪶꪠꪙ ꪙꪮꪉ ꪀꪷ ꪹꪀꪒ ꪎꪉꪲ ꪮꪮꪀ ꪨꪱꪥ ꪄꪴ ꪹꪚꪱ ꪹꪉꪱ. ꪵꪀꪉ ꪫꪱ ꪶꪎ ꫄ꪉꪙ ꪶꪀꪀ ꪼꪫ ꫃ꪥꪒ ꪄꪉꪰ ꪹꪁꪱ ꪵꪔꪫ ꫜ ꪨꪷ ꪵꪔ 3 ꪔꪲ ꪭꪮꪒ 5 ꪔꪲ ꪢꪽ ꪕꪮꪥ ꪩꪺꪉ ꪹꪭꪙ ꪹꪘꪀ ꪵꪀꪉ ꫄ꪤꪙ ꪹꪣꪉ ꪝꪮꪣ ꫃ꪥꪒ ꪭꪳ ꪩꪱꪉ ꪣꪮꪙ ꪣꪲ ꪄꪉꪰ ꪹꪁꪱ ꪻꪢ ꪶꪒꪥ ꪀꪚꪾ ꫛ ꫄ꪤꪙ ꪜꪮꪣ ꪎꪉꪲ ꪹꪚꪱ ꪊꪀꪰ ꫄ꪋ ꪻꪒ ꪋꪲ ꪣꪲ. ꪹꪝ ꪼꪅ ꪙꪲ ꪚꪱꪙ ꪣꪲ 80 ꪋꪺ ꪹꪭꪙ ,ꪀꪱꪥ 400 ꪬꪺ ꫛ ꪭꪳ ꪖꪮꪉ ꪵꪫꪙ ꪨꪱꪥ ꪤꪴ ꪀꪺꪉ ꪵꪤꪉ ꪵꪎꪀ ꪋꪺ ꪹꪭꪙ ꪁꪒꪰ. ꪭꪮꪒ ꫄ꪊ ꪼꪒ ꫛ ꫄ꪤꪙ ꪊꪉꪰ ꪋꪲ ꪣꪲ ꪹꪁꪱ ꪻꪢ ꪼꪜ ꪣꪱ ꪼꪫ ꪢꪱ ꪼꪄ ꪀꪉꪲ ꫃ꪔ ,ꪭꪮꪀ ꪎꪉꪲ ꪚꪹꪚꪱ ꪹꪋꪱ ꪨꪷ ꪤꪱꪙ ꪢꪮꪥ ꪹꪕ ꪼꪜ ꪀꪱꪥ ꪵꪣ ꪙꪣꪾ ꪼꪜ ꪹꪋꪉ ꪵꪮꪚ ꪎꪳ. ꪮꪽ ꪨꪷ ꪄꪴ ꪹꪋꪱ ꪨꪷ ꪄꪮꪉ ꫛ ꫄ꪤꪙ ꪘꪉꪰ ꪘꪲ ꪢꪮꪥ ꪹꪕ ꪣꪺ ꪶꪠꪙ ꪙꪮꪉ ꪣꪱ ꪭꪮꪒ ꪵꪀꪉ ꪪꪱ ꪫꪀꪸ ꪤꪮꪣ ꫃ꪉꪙ ꪶꪀꪀ ꪔꪉꪰ ꪵꪔꪉ ꪹꪁꪱ ꪜꪮꪣ ꪎꪉꪲ ꪒꪱꪉ ꪨꪷ ꪄꪴ ꫄ꪁꪙ ꪬꪱ.