Pộ chuốp lài côn nái chăng số côn táo cưn nghiên lau áo lài

Ai Tống Duy Bào, 43 pì dú nẳng tỉnh Điện Biên tô: 20 pì cón pưa pày toi bạn phương chúp cuôn dàng, xương nặn nghiên chơ đằư cọ báu hụ dệt hẳư vịa cạ khài pọ lài dạk cha, lụk mia pai xìa, tay hươn bạn phường cọ báu é xẳư chằm. 10 pì ngạp nghiên cuôn dàng, ai cọ é vang cuôn, hák pày vang cuôn dáo 20 tưa, hák va vang lẹo đảy dan nưng lỏ táo cưn nghiên lau. Hền lài bạn phương chuốp tài pộ nghiên cuôn dàng, ao Bào cọ chau lò dản cằm quyết vang cuôn dàng. Họt khạy cọ 10 pì lẹo ai vang đảy cuôn dàng, khày ók xưởng cơ khí nọi cánh choi lài côn lằng chơ vang đảy cuôn mi vịa dệt tẹt tiêng.

          Phân lài pưng côn nghiên cọ báu hụ khù hiểm hại khòng cuôn dàng, mi chơ pưa é kìn chim, ảng cắp bạn phương xương nặn chúp thử hẳư măn hụ…cọ dệt hẳư số côn nghiên nhương lài khửn. Khù mi tẹ hẳư hền, mi họt 94% côn lằng chơ vang đảy cuôn cọ táo cưn nghiên lau. Nọk nặn ó, pưa báu mi vịa dệt, thù nhập tẹt tiêng nhương dệt hẳư lài côn nghiên xưa. Khạy nị lài côn dần, tênh cá côn nóm cằm cọ báu é xẳư chằm côn nghiên, côn vang đảy cuôn lẹo cọ báu mi phằư é xẳư chằm.

          Tô ma pưng khù nhăng khắt khỏng dạk cha cuồng nả vịa vang cuôn dàng, lung lê Đức Hiền, PHó cục trưởng Cục chự phong pưng vịa dệt báu đì nẳng bản mương ( Bộ Lao động Thương binh-xã hội) hẳư hụ: phân lài pưng côn nghiên cuôn dàng vang đảy cuôn chơ táo ma kìn dú toi pi nọng bản khuống pọm táo cưn nghiên lau. Nọk số côn táo cưn nghiên lau, số côn nghiên măứ cọ nhương mự nhương lài khửn. Lài tàng cuôn dàng mắư cọ đảy àu khảu xủ xương cuôn dàng tổng hợp, nhả Mỹ… dệt hại họt pặc hanh côn xủ. Lưn xưa pưng tàng cuôn dàng mắư nghiên ngai vang dạk.

          Lằng 3 pì chấp năm : “ Đề án piến mắư nả vịa vang cuôn dàng”, họt khạy lài địa phường cọ báu hê lông cuồng vịa nhại piến luông dệt té luông pắt vang cuôn nhại ma hák muôn chằư pày vang cuôn, hê pồng chằư họt vịa chấp năm khày quảng luông dàu dà hẳư côn nghiên pâng xắư bản mương. Khạy cọ mi san Trung tâm nhại chiên cựt đảy lang đì. Trung tâm hák muôn chằư vang cuôn số 5 Hà Nội cọ nhại chiên té vịa pắt vang cuôn nhại ma hák muôn chằư pày vang cuôn té pì 2014, tục po nhẳn 400 côn nghiên. Côn nghiên ma nẳng nị, nọk vịa vang cuôn, pi nọng nhăng đảy tập tư pặc hanh cánh ép nghê.

Vạy dón xìa đảy số côn nghiên lằng chơ vang cuôn táo cưn nghiên lau, hư cận mi chính sách choi dừa lằng chơ vang đảy cuôn vạy pi nọng mi vịa dệt, tẹt tiêng puồng kìn đơi dú. Xòng ma tủm pua chiên páo ma tang khù hiểm hại khòng cuôn dàng. Vạy vang đảy cuôn dàng, côn nghiên báu chư hịa cận luông choi dừa khòng tay hươn, pi nọng bản khuống lạ hư khù cốc chính nhất lỏ luông cằm quyết khòng chính côn nghiên./.

ꪶꪝ ꪊꪺꪚ ꪨꪱꪥ ꫛ ꪘꪱꪥ ꪋꪉꪰ ꪶꪎ ꫛ ꪔꪱꪫ ꪁꪙꪳ ꪉꪙꪸ ꪹꪩꪱ ꪮꪱꪫ ꪨꪱꪥ

ꪯꪱꪥ ꪶꪔꪉ ꪥꪫꪲ ꪚꪱꪫ 43 ꪜꪲ ꪤꪴ ꪘꪉꪰ ꪔꪉꪲ ꪓꪙꪸ ꪚꪙꪲ ꪶꪕ: 20 ꪜꪲ ꪀꪮꪙ ꪹꪝ ꪼꪜ ꪕꪮꪥ ꪛꪱꪙ ꪹꪡꪉ ꪊꪚꪴ ꪁꪺꪙ ꪤꪱꪉ ꪹꪏꪉ ꪙꪽ ꪉꪙꪸ ꫄ꪋ ꪻꪒ ꪁꪷ ꪹꪚꪱ ꪭꪴ, ꫃ꪥꪒ ꪻꪬ ꪫꪀꪸ ꪁꪱ ꪄꪱꪥ ꪁꪷ ꪝꪷ ꪨꪱꪥ ꪥꪱꪀ ꪋꪱ, ꪩꪀꪴ ꪣꪸ ꪝꪱꪥ ꪎꪸ, ꪼꪕ ꪹꪭꪙ ꪛꪱꪙ ꪹꪡꪉ ꪀꪷ ꪹꪚꪱ ꪵꪮ ꪻꪎ ꪊꪣꪾ. 10 ꪜꪲ ꪉꪱꪚ ꪉꪙꪸ ꪁꪺꪙ ꪤꪱꪉ ꪯꪱꪥ ꪀꪷ ꪬꪱꪀ ꪼꪜ ꪫꪱꪉ ꪁꪺꪙ ꪤꪱꪫ 20 ꪹꪕ ,ꪬꪱꪀ ꪫꪱ ꪫꪱꪉ ꪼꪒ ꪥꪱꪙ ꫜ ꪨꪷ ꪔꪱꪫ ꪉꪙꪸ ꪹꪩꪱ. ꫃ꪬꪙ ꪨꪱꪥ ꪛꪱꪙ ꪹꪡꪉ ꪊꪺꪚ ꪔꪱꪥ ꪶꪝ ꪉꪙꪸ ꪁꪺꪙ ꪤꪱꪉ ꪯꪱꪥ ꪚꪱꪫ ꪁꪷ ꪹꪋꪱ ꪨꪷ ꪤꪱꪙ ꪀꪣꪾ ꪀꪫꪒꪸ ꪫꪱꪉ ꪁꪺꪙ ꪤꪱꪉ. ꪭꪮꪒ ꪼꪅ ꪁꪷ 10 ꪜꪲ ꪵꪩꪫ ꪫꪱꪉ ꪼꪒ ꪁꪺꪙ ,ꪼꪄ ꪮꪮꪀ ꪹꪎꪉ ꫄ꪀ ꪄꪲ ꪙꪮꪥ ꪵꪀꪉ ꪋꪮꪥ ꪨꪱꪥ ꫛ ꪉꪙꪸ ꪫꪱꪉ ꪼꪒ ꪁꪺꪙ ꪣꪲ ꪫꪀꪸ ꫃ꪤꪒ ꪵꪕꪒ ꪕꪉꪸ.

꫄ꪡꪙ ꪨꪱꪥ ꪝꪉꪳ ꫛ ꪉꪙꪸ ꪁꪷ ꪹꪚꪱ ꪬꪴ ꪄꪴ ꪬꪣꪸ ꪭꪱꪥ ꪄꪮꪉ ꪁꪺꪙ ꪤꪱꪉ , ꪣꪲ ꫄ꪋ ꪶꪝ ꪵꪮ ꪀꪙꪲ ꪋꪣꪲ ꪮꪱꪉ ꪀꪚꪾ ꪚꪱꪙ ꪹꪡꪉ ꪹꪏꪉ ꪙꪽ ꪊꪚꪴ ꪖꪳ ꪻꪬ ꪣꪽ ꪭꪴ ꪁꪷ ꫃ꪥꪒ ꪻꪬ ꪶꪎ ꫛ ꪉꪙꪸ ꪹꪑꪉ ꪨꪱꪥ ꪄꪙꪳ. ꪄꪴ ꪣꪲ ꪵꪕ ꪻꪬ ꫃ꪬꪙ ꪣꪲ ꪭꪮꪒ 94% ꫛ ꪨꪉꪰ ꫄ꪋ ꪫꪱꪉ ꪼꪒ ꪁꪺꪙ ꪁꪷ ꪔꪱꪫ ꪁꪙꪳ ꪉꪙꪸ ꪹꪩꪱ. ꪙꪮꪀ ꪙꪽ ꪮꪮꪀ , ꪹꪝ ꪹꪚꪱ ꪣꪲ ꪫꪀꪸ ꫃ꪥꪒ ꪁꪷ ꫃ꪥꪒ ꪻꪬ ꪨꪱꪥ ꫛ ꪉꪙꪸ ꪹꪏ. ꪼꪅ ꪨꪱꪥ ꫛ ꪁꪷ ꪹꪚꪱ ꪵꪮ ꪻꪎ ꪊꪣꪾ ꫛ ꪉꪙꪸ, ꫃ꪕꪉ ꪀꪱ ꫛ ꪫꪱꪉ ꪼꪒ ꪁꪺꪙ ꪵꪩꪫ ꪁꪷ ꪹꪚꪱ ꪣꪲ ꪻꪠ ꪵꪮ ꪤꪴ ꪻꪎ ꪊꪣꪾ.

ꪶꪕ ꪣꪱ ꪕꪱꪉ ꪝꪉꪳ ꪄꪴ ꪄꪒꪰ ꪄꪮꪉ ꪥꪱꪀ ꪋꪱ ꪀꪺꪉ ꪘꪱ ꪫꪀꪸ ꪫꪱꪉ ꪁꪺꪙ ꪤꪱꪉ ꪩꪉꪴ ꫃ꪩ ꪒꪀꪳ ꪬꪙꪸ ꪠꪷ ꪁꪀꪴ ꪹꪊꪉ ꪁꪀꪴ ꪋꪳ ꪡꪮꪉ ꪝꪉꪳ ꪫꪀꪸ ꫃ꪥꪒ ꪹꪚꪱ ꪒꪲ ꪘꪉꪰ ꪚꪱꪙ ꪹꪣꪉ ( ꪶꪝ ꪩꪱꪫ ꪶꪒꪉ ꪹꪖꪉ ꪚꪉꪲ ꪎꪱ ꪶꪭꪥ) ꪻꪬ ꪭꪴ: ꫄ꪡꪙ ꪨꪱꪥ ꪝꪉꪳ ꫛ ꪉꪙꪸ ꪫꪱꪉ ꪼꪒ ꪁꪺꪙ ꫄ꪋ ꪔꪱꪫ ꪣꪱ ꪀꪙꪲ ꪤꪴ ꪕꪮꪥ ꪝꪲ ꪙꪮꪉ ꪚꪱꪙ ꪄꪺꪉ ꪝꪮꪣ ꪔꪱꪫ ꪁꪙꪳ ꪉꪙꪸ ꪹꪩꪱ. ꪙꪮꪀ ꪶꪎ ꫛ ꪔꪱꪫ ꪁꪙꪳ ꪉꪙꪸ ꪹꪩꪱ, ꪶꪎ ꫛ ꪉꪙꪸ ꪻꪢ ꪁꪷ ꪨꪱꪥ ꪄꪙꪳ. ꪨꪱꪥ ꪔꪱꪉ ꪁꪺꪙ ꪤꪱꪉ ꪻꪢ ꪼꪒ ꪹꪮꪱ ꪹꪄꪱ ꪎꪴ ꪹꪏꪉ ꪁꪺꪙ ꪤꪱꪉ ꪶꪔꪉ ꫄ꪭꪚ ,ꪐꪱ ꪢꪲ ꫃ꪥꪒ ꪬꪱꪥ ꪭꪮꪒ ꪝꪀꪰ ꪵꪭꪉ ꫛ ꪎꪴ. ꪹꪩꪙ ꪹꪏ ꪝꪉꪳ ꪔꪱꪉ ꪁꪺꪙ ꪤꪱꪉ ꪻꪢ ꪉꪙꪸ ꪉꪱꪥ ꪫꪱꪉ ꪥꪱꪀ.

ꪨꪉꪰ 3 ꪜꪲ ꫄ꪊꪚ ꪙꪣꪾ “ ꫃ꪒ ꪮꪱꪙ ꪜꪙꪸ ꪻꪢ ꪘꪱ ꪫꪀꪸ ꪫꪱꪉ ꪁꪺꪙ ꪤꪱꪉ” ꪭꪮꪒ ꪼꪅ ꪨꪱꪥ ꪒꪸ ꪹꪠꪉ ꪁꪷ ꪹꪚꪱ ꫃ꪭ ꪶꪩꪉ ꪼꪄ ꪀꪺꪉ ꪫꪀꪸ ꪑꪱꪥ ꪜꪙꪸ ꪩꪺꪉ ꫃ꪥꪒ ꪵꪔ ꪩꪺꪉ ꪜꪒꪰ ꪫꪱꪉ ꪁꪺꪙ ꪑꪱꪥ ꪣꪱ ꪕꪮꪥ ꪩꪺꪉ ꪬꪱꪀ ꪣꪺꪙ ꪻꪊ ꪼꪜ ꪫꪱꪉ ꪁꪺꪙ. ꪭꪮꪒ ꪼꪄ ꪁꪷ ꪣꪲ ꪏꪱꪙ ꪊꪴꪉ ꫄ꪔꪣ ꪑꪱꪥ ꪋꪙꪸ ꪁꪒꪳ ꪼꪒ ꪩꪱꪉ ꪒꪲ. ꪊꪉꪴ ꫄ꪔꪢ ꪬꪱꪀ ꪣꪺꪙ ꪻꪊ ꪫꪱꪉ ꪁꪺꪙ ꪶꪎ 5 ꪭꪱ ꪶꪙꪥ ꪁꪷ ꪑꪱꪥ ꪋꪙꪸ ꪵꪔ ꪜꪲ 2014, ꪕꪴꪀ ꪜꪷ ꪐꪽ 400 ꫛ ꪁꪙꪸ. ꫛ ꪉꪙꪸ ꪘꪉꪰ ꪘꪲ ꪙꪮꪀ ꪫꪀꪸ ꪫꪱꪉ ꪁꪺꪙ ꪝꪲ ꪙꪮꪉ ꪑꪉꪰ ꪼꪒ ꫄ꪕꪚ ꪕꪳ ꪝꪀꪰ ꪵꪭꪉ ꪵꪀꪉ ꪵꪮꪚ ꫃ꪉ.

ꪼꪫ ꪤꪮꪙ ꪎꪸ ꪼꪒ ꪶꪎ 4 ꪉꪙꪸ ꪨꪉꪰ ꫄ꪋ ꪫꪱꪉ ꪼꪒ ꪁꪺꪙ ꪔꪱꪫ ꪁꪙꪳ ꪉꪙꪸ ꪹꪩꪱ ꪭꪳ ꫄ꪁꪙ ꪣꪲ ꪊꪉꪲ ꪵꪎꪀ ꪋꪮꪥ ꪹꪤ ꪨꪉꪰ ꫄ꪋ ꪫꪱꪉ ꪼꪒ ꪁꪺꪙ ꪼꪫ ꪝꪲ ꪙꪮꪉ ꪣꪲ ꪫꪀꪸ ꫃ꪥꪒ ꪵꪕꪒ ꪕꪉꪸ ꪜꪺꪉ ꪀꪙꪲ ꫄ꪓꪥ ꪤꪴ. ꪎꪮꪉ ꪣꪱ ꪔꪣꪳ ꪝꪺ ꪋꪙꪸ ꪜꪱꪫ ꪢꪱ ꪕꪱꪉ ꪄꪴ ꪬꪣꪸ ꪭꪱꪥ ꪄꪮꪉ ꪁꪺꪙ ꪤꪱꪉ. ꪼꪫ ꪫꪱꪉ ꪼꪒ ꪁꪺꪙ ꪤꪱꪉ ꫛ ꪉꪙꪸ ꪹꪚꪱ ꪋꪳ ꪭꪀꪸ ꫄ꪁꪙ ꪩꪺꪉ ꪋꪮꪥ ꪹꪤ ꪄꪮꪉ ꪼꪕ ꪹꪭꪙ ꪝꪲ ꪙꪮꪉ ꪚꪱꪙ ꪄꪺꪉ ꪩꪱ ꪭꪳ ꪄꪴ ꪶꪀꪀ ꪊꪉꪲ ꫄ꪐꪒ ꪨꪷ ꪩꪺꪉ ꪀꪣꪾ ꪀꪫꪒꪸ ꪄꪮꪉ ꪊꪉꪲ ꫛ ꪉꪙꪸ.

ꪹꪩꪉ ꪬꪫꪙꪸ ꪤꪀꪲ