Phú Thọ nhẳn pao tiêng an xók tang cuông dan

khày ók pang hội Đền Hùng

          Cuông pưng mự khày ók pàng sơ pua Hùng Vương – pang hội Đền Hùng pi Mâng Hậu pi 2017, pưng chủm mú hôm mi cánh sát giao thông, cảnh sát cơ động - 113, cảnh sát pảy chự tiêng an tỉnh Phú Thọ khâng chík bók cánh uôn chík tang nẳng pưng bón phảu đù xe nẳng chu xểm tang khong thanh phố Việt Trì cánh phổng biên mai ngươn lang chiên lang Đền Hùng. Cuông số chủm mú Cảnh sát giao thông  hảu chủm mú tuận tra pày đom bón nẳng pưng xểm tang khảu mưa bón biên mai, lợp tăn tít tơn pưng tàng xe pày ma khừn, tỏn khék cánh dặng men bón tặt pun.

          Cuông 2 mự lả tuận cài ma, số khék cánh pưng tàng xe pày ma họt đền Hùng lai khửn, hák va tiêng an xók tang đảy nhẳn pao, báu dệt năn nương hộn hạo, hính cướt sinh ók tang chốn cong íp cặp căn chơ tứn chạu.

          Vạy dón xia lai tang xe pày ma nẳng phổng Đền Hùng cuông dan khày pang hội, Công an tỉnh Phú Thọ cọ cạt kiên cắp Công an pưng tỉnh Yên Bái, Tuyên Quang, Vĩnh Phúc cánh thanh phố Ha Nội tánh păn tàng té cá lắc. Pi nị, ban tổ chức sơ pua HÙng Vương – pang hội Đền Hùng báu cấp phép hảu pưng bón pahủ đù xe máy liệp him tang luông 32 C men cuông phổng khày ók pàng hội. Ngành giao thông tải chiên lắp tó pưng biển cấm xe tô, xe tăc xi khảu mưa san xểm tang cuông phổng biên mai ngươn lang. Công an tỉnh Phú Thọ cọ tánh ók Trung tâm chiên quam uôn pa tẳng nẳng phổng biên mai ngươn lang chiên lang Đền Hùng  lăm le cánh lợp tăn kẻ khày chơ tang chốn còng cánh mi vịa dệt năn nương hộn hạo nẳng cuông phổng. Đại tá Ha Minh Tân – Phó Giám đốc Công an tỉnh Phú Thọ hảu hụ, té khạy họt mết mự 6/4 tư va 10/3 âm lịch, khék ma cá Đền Hùng xứp tam lai, xương nặn pưng chủm mú mi chức quyên chi tọp hom lai côn cánh xe vạy nhẳn pao tiêng an xók tang, tiêng an cuông phổng khày pang hội cọ xương nẳng thanh phố Việt Trì.

          Cắp luông khâng chàư, chóng hanh khong chủm mú mi chức quyên khong Công an tỉnh Phú Thọ, nả vịa tiêng an xók tang, tiêng an cuông phổng Đền Hùng cánh thanh phố Việt Trì đảy nhẳn pao, lỏ khu ngai đi hảu khék ma dam Đền Hùng pộp dan sơ pua Hùng Vương pi nị.

                                                          TTT - Hạnh dịch

ꪠꪴ ꪗꪷ ꪐꪽ ꪜꪱꪪ ꪕꪉꪸ ꪮꪱꪙ ꪎꪮꪀ ꪕꪱꪉ ꪀꪺꪉ ꪤꪱꪙ ꪼꪄ ꪮꪮꪀ ꪜꪱꪉ ꪶꪭꪥ ꫃ꪒꪙ ꪬꪉꪴ

          ꪀꪺꪉ ꪝꪉꪳ ꪣꪳ ꪼꪄ ꪮꪮꪀ ꪜꪱꪉ ꫄ꪏ ꪜꪺ ꪬꪉꪴ ꪹꪫꪉ - ꪜꪱꪉ ꪶꪭꪥ ꫃ꪒꪙ ꪬꪉꪴ ꪲꪜ 2017, ꪝꪉꪳ ꪊꪣꪴ ꪢꪴ ꪶꪭꪣ ꪣꪲ ꪵꪀꪉ ꪎꪱꪒ ꪤꪱꪫ ꪶꪖꪶꪉ ꪵꪀꪉ ꪎꪱꪒ ꫄ꪁ ꪶꪓꪉ - 113 ꪵꪀꪉ ꪎꪱꪒ ꪼꪜ ꪋꪳ ꪕꪉꪸ ꪮꪱꪙ ꪔꪉꪲ ꪠꪴ ꪗꪷ ꫄ꪅꪉ ꪋꪲ ꪚꪮꪀ ꪵꪀꪉ ꫄ꪁꪉ ꪻꪊ ꪮꪺꪙ ꪋꪲ ꪕꪱꪉ ꪘꪉꪷ ꪝꪉꪳ ꪚꪮꪙ ꪹꪠꪱ ꪒꪴ ꪕꪱꪉ ꪵꪎ ꪘꪉꪷ ꪋꪴ ꫃ꪎꪣ ꪕꪱꪉ ꪄꪮꪉ ꪵꪗꪉ ꪶꪠ ꪫꪒꪸ ꪊꪲ ꪵꪀꪉ ꪝꪉꪳ ꪶꪠꪉ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꫃ꪒꪙ ꪬꪉꪴ. ꪀꪺꪉ ꪶꪎ ꪊꪣꪴ ꪢꪴ ꪵꪀꪉ ꪎꪱꪒ ꪤꪱꪫ ꪶꪖꪉ ꪻꪬ ꪊꪣꪴ ꪢꪴ ꪕꪺꪙ ꪊꪱ ꪼꪜ ꪒꪮꪣ ꪚꪮꪙ ꪘꪉꪷ ꪝꪉꪳ ꫃ꪎꪣ ꪕꪱꪉ ꪹꪄꪱ ꪹꪣ  ꪚꪮꪙ ꪚꪙꪸ ꪢꪱꪥ , ꫄ꪩꪚ ꪕꪽ ꪔꪒꪲ ꫄ꪔꪙ ꪔꪒꪲ ꫄ꪔꪙ ꪝꪉꪳ ꪔꪱꪉ ꪵꪎ ꪼꪜ ꪣꪱ ꪄꪙꪳ, ꪔꪮꪙ ꪵꪄꪀ ꪵꪀꪉ ꪥꪉꪷ ꪵꪣꪙ ꪚꪮꪙ ꪕꪒꪾ ꪜꪙꪴ. ꪒꪱꪥ ꪮꪫꪥꪲ ꪈꪫꪙꪸ ꪪꪽ ꪵꪖꪉ , ꪶꪓꪥ ꪹꪊꪉ ꪶꪓꪥ ꪕꪺꪙ ꪊꪱ ꪶꪎ ꫜ ꪡꪮꪉ ꪵꪀꪉ ꪎꪱꪒ ꪤꪱꪫ ꪶꪖꪉ, ꪶꪀꪉ ꪮꪱꪙ ꪔꪉꪲ ꪠꪴ ꪗꪷ ꪻꪬ ꪭꪴ:

          ꪀꪺꪉ 2 ꪣꪳ ꪨꪱ ꪕꪺꪙ ꪀꪱꪥ ꪣꪱꪶ ꪶꪎ ꪵꪄꪀ ꪵꪀꪉ ꪝꪉꪳ ꪔꪱꪉ ꪵꪎ ꪼꪜ ꪣꪱ ꪭꪮꪒ ꫃ꪒꪙ ꪬꪉꪴ ꪨꪱꪥ ꪄꪙꪳ, ꪬꪱꪀ ꪫꪱ ꪕꪉꪸ ꪮꪱꪙ ꪎꪮꪀ ꪕꪱꪉ ꪼꪒ ꪐꪽ ꪝꪱꪫ , ꪹꪚꪱ ꫃ꪥꪒ ꪙꪽ ꪹꪙꪉ ꪶꪭꪙ ꪭꪱꪫ, ꪬꪉꪲ ꪹꪀꪒ ꪎꪉꪲ ꪮꪮꪀ ꪕꪱꪉ ꪶꪊꪙ ꪀꪮꪉ ꪮꪲꪚ ꪁꪚꪾ ꪀꪽ ꫄ꪋ ꪔꪙꪳ ꪹꪋꪱ.

          ꪼꪫ ꪤꪮꪙ ꪎꪸꪨꪱꪥ ꪔꪱꪉ ꪵꪎ ꪼꪜ ꪢꪱ ꪘꪉꪷ ꪌꪠꪭ ꫃ꪒꪙ ꪬꪉꪴ ꪀꪺꪉ ꪥꪱꪙ ꪼꪄ ꪜꪱꪉ ꪶꪭꪥ , ꪶꪀꪉ ꪮꪱꪙ ꪔꪉꪲ ꪠꪴ ꪗꪷ ꪁꪷ ꪁꪱꪒ ꪁꪙꪸ ꪀꪚꪾ ꪶꪀꪉ ꪮꪱꪙ ꪝꪉꪳ ꪔꪉꪲ ꪮꪙꪸ ꪚꪱꪥ, ꪔꪫꪸꪙ ꪁꪫꪱꪉ , ꪪꪉꪲ ꪠꪀꪴ ꪵꪀꪉ ꪵꪗꪉ ꪶꪠ ꪭꪱ ꪶꪙꪥ ꪵꪔꪉ ꪜꪽ ꪕꪱꪉ ꪵꪔ ꪀꪱ ꪨꪀ. ꪷꪜꪲ ꪙꪲ ꪚꪱꪘ ꪶꪔ ꪊꪀꪳ ꫄ꪏ ꪜꪺ ꪬꪉꪴ ꪹꪫꪉ - ꪜꪱꪉ ꪶꪭꪥ ꫃ꪒꪙ ꪬꪉꪴ ꪹꪚꪱ ꫄ꪀꪚ ꪵꪠꪚ ꪻꪬ ꪝꪉꪳ ꪚꪮꪙ ꪹꪠꪱ ꪒꪴ ꪵꪎ ꪼꪢ ꪩꪚꪸ ꪭꪣꪲ ꪕꪱꪉ ꪨꪺꪉ 32 ꪋ ꪵꪣꪙ ꪀꪺꪉ ꪶꪠꪉ ꪼꪄ ꪮꪮꪀ ꪜꪱꪉ ꪶꪭꪥ. ꪵꪈꪉ ꪤꪫꪱ ꪶꪖꪉ ꪔꪱꪥ ꪋꪙꪸ ꪨꪚꪾ ꪔꪷ ꪝꪉꪳ ꪚꪙꪸ ꫄ꪀꪣ ꪵꪎ ꪶꪕ , ꪵꪎ ꪔꪀꪷ ꪏꪲ ꪹꪄꪱ ꪹꪣ ꪏꪱꪙ ꫃ꪎꪣ ꪕꪱꪉ ꪹꪄꪱ ꪹꪣ ꪀꪺꪉ ꪶꪠꪉ ꪚꪙꪸ ꪢꪱꪥ ꪹꪉꪙ ꪩꪱꪉ. ꪌꪀꪉ ꪮꪱꪙ ꪔꪉꪲ ꪠꪴ ꪗꪷ ꪀꪷ ꪵꪔꪉ ꪮꪮꪀ ꪊꪉꪴ ꫄ꪔꪣ ꪋꪙꪸ ꪁꪫꪱꪣ ꪮꪺꪙ ꪝꪱ ꪔꪉꪷ ꪘꪉ ꪶꪠꪭ ꪚꪙꪲ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꫃ꪒꪙ ꪬꪉꪴ ꪩꪣꪾ ꪵꪩ ꪵꪀꪉ ꫄ꪩꪚ ꪕꪽ ꪵꪀ ꪼꪄ ꫄ꪋ ꪕꪱꪉ ꪶꪊꪙ ꪀꪮꪉ ꪵꪀꪉ ꪣꪲ ꪫꪀꪸ ꫃ꪥꪒ ꪙꪽ ꪹꪙꪉ ꪶꪭꪙ ꪭꪱꪫ ꪘꪉ ꪀꪺꪉ ꪶꪠꪉ. ꪓꪱꪥ ꪔꪱ ꪬꪱ ꪣꪉꪲ ꫄ꪕꪙ - ꪠꪷ ꪤꪱꪣ ꪶꪒꪀ ꪶꪀꪉ ꪮꪙ ꪔꪉꪲ ꪠꪴ ꪗꪷ ꪻꪬ ꪭꪴ, ꪵꪔ ꪼꪅ ꪭꪮꪒ ꫃ꪢꪒ ꪣꪳ 6ꪞ4 ꪕꪳ ꪫꪱ ꪣꪳ 10 ꪁꪾ ꪹꪚꪙ 3 ꫄ꪮꪣ ꪩꪀꪲ, ꪵꪄ ꪢꪱ ꪀꪱ ꫃ꪒꪙ ꪬꪉꪴ ꪋꪲ ꪨꪱꪥ ꪄꪙꪳ, ꪹꪏꪉ ꪙꪽ ꪝꪉꪳ ꪊꪣꪴ ꪢꪴ ꪣꪲ ꪊꪀꪳ ꪁꪫꪱꪸꪙ ꪋꪲ ꪔꪮꪚ ꪬꪮꪣ ꪨꪱꪥ ꫛ ꪵꪀꪉ ꪵꪎ ꪼꪫ ꪐꪽ ꪜꪱꪫ ꪕꪉꪸ ꪮꪱꪙ ꪎꪮꪀ ꪕꪱꪉ , ꪕꪉꪸ ꪮꪱꪙ ꪀꪺꪉ ꪶꪠꪉ ꪼꪄ ꪜꪱꪉ ꪶꪭꪥ ꪁꪷ ꪹꪏꪉ ꪘꪉꪷ ꪵꪗꪉ ꪶꪠ ꪫꪒꪸ ꪊꪲ.

          ꪀꪚꪾ ꪩꪺꪉ ꫄ꪅꪉ ꪻꪊ, ꪊꪮꪉ ꪵꪭꪉ ꪄꪮꪉ ꪊꪣꪴ ꪢꪴ ꪣꪲ ꪊꪀꪳ ꪁꪫꪙꪸ ꪄꪮꪉ ꪶꪀꪉ ꪮꪱꪙ ꪔꪉꪲ ꪠꪴ ꪖꪷ, ꪘꪱ ꪫꪀꪸ ꪕꪉꪸ ꪮꪱꪙ ꪎꪮꪀ ꪕꪱꪉ , ꪕꪉꪸ ꪮꪱꪙ ꪀꪺꪉ ꪶꪠꪉ ꫃ꪒꪙ ꪬꪉꪴ  ꪵꪀꪉ ꪵꪗꪉ ꪶꪠ ꪫꪒꪸ ꪊꪲ ꪼꪒ ꪐꪽ ꪜꪱꪫ, ꪨꪷ ꪄꪴ ꪉꪱꪥ ꪒꪲ ꪻꪬ ꪵꪄꪀ ꪢꪱ ꪤꪱꪙ ꫃ꪒꪙ ꪬꪉꪴ ꪶꪝꪚ ꪥꪱꪙ ꫄ꪏ ꪜꪺ ꪬꪉꪴ ꪜꪲ ꪙꪲ.

                                                          ꪊꪉꪴ ꫄ꪔꪣ ꪕꪙꪲ - ꪵꪭꪉ ꪥꪀꪲ