Bài thứ 6 ngày 7/7/2017

Sờn Là bók xòn cán bộ xứp nam tàm ngươn hẳư pưng tỉnh Bắc Lao

          Pì 2016-2017, Trương Đại học Tày Bắc mi cài 460 học sình Lao đàng ép học pưng lớp chuyên ngành cánh ép quam Việt. Chơ pưng nọng hính ma Việt Nàm ép học báu hụ quam Việt, chu ằn pọm lák khan. Hươn trương lâng chơ pồng chằư tạk khù ngai đì hẳư pưng nọng học sình cuồng vịa ép học, ép pák quam Việt. Pọm cắp vịa xiếp lặt chủm mú giảng viền mi luông hụ xiêng, hươn trương nhăng tổ chức pưng vịa dệt ỉn muôn vằn hoá vằn nghệ, khánh thì xáo hụ ma quam Việt hẳư pưng bạn học sình Lao. Pưa xương nặn pưng học sình Lao cọ yền chằư ép học, kìn dú pọm cắp pưng sình viền Việt Nàm.

          Trương cao đẳng Sờn La lỏ đờn vị cốc khoẹ đảy tỉnh giào nả vịa bók xòn pưng học sình Lao. Té pì 2001 họt khạy, hươn trương cọ nhẳn cánh bók xòn quam Việt hẳư cài păn nưng học sình khòng 8 tỉnh Bắc Lao; cuồng nặn dáo 500 nọng ép chuyên ngành nẳng trương. Hươn trương cọ tánh ók chị hội hữu nghị Việt Nàm –Lao pì 2013, té nặn ma họt khạy số học sình Lao ma ép nẳng tỉnh Sờn La nhương mự nhương lài.

          Báu xuốn to đảy choi dừa vạy mi khù ngai đì ép học đì nhất, pưng học sình Lao nhăng lâng chơ đảy pưng xay giáo, bạn phương sình viền Việt Nàm pồng chằư bánh pằn pưng dạk cha cuồng puồng kìn đơi dú cánh ép học. Pưng hươn trương pọm xiếp lặt phổng ký túc xá riềng hẳư pưng học sình Lao, báu đảy cóp hôm chu tàng ngơn ép học kìn dú, pọm cắp lài chế độ ứn. Mỏi tưa pộp mự muôn mự chiềng khòng Việt Nàm cánh Lao, pưng trương pọm tổ chức pọ nả, tạk khù ngai đì hẳư pưng nọng chôm tỏn chiềng muôn hòm. Sình viền 2 mương Việt Nàm- Lao pọm cằn kìn dú ép học xương nọng pi cuồng hươn.

          Khay nị, tỉnh Sờn La mi 4 trương chuyên nghiệp bók xòn hẳư học sình Lao ặn lỏ trương ĐH Tày Bắc, Trương Cao đẳng Sờn Là, Trương Cao đẳng y tế Sờn La, cánh Trương trùng cấp vằn hoá nghệ thuật cánh dù lịch cắp cài păn nưng học sình đàng ép học. Nọk nặn ók tỉnh Sờn la nhăng tổ chức lài lớp bók xòn vịa dệt tổ chức cán bộ, cồng tác đoàn thể, bók quam Việt hẳư cán bộ khòng pưng tỉnh Bắc Lao. Ặn nị chính lỏ chủm mú cán bộ xứp nam tàm ngươn khòng 8 tỉnh Bắc Lao cánh lỏ xểm xài cái diên xứp tàm tủm pua nghịa cạt kiên niều mẳn khòng Việt Nàm-Lao xèn đơi nà mẳn khặn chăn./.

                                                                             Hồng Việt-Anh dịch

꫄ꪎꪙ ꪨꪱ ꪚꪮꪀ ꪎꪮꪙ ꪀꪱꪙ ꪶꪛ ꪎꪚꪳ ꪙꪱꪣ ꪔꪱꪣ ꪹꪉꪙ ꪻꪬ ꪝꪉꪳ ꪔꪉꪲ ꪚꪀꪰ ꪩꪱꪫ

ꪜꪲ 2016-2017 ꪹꪋꪉ ꪒꪱꪥ ꪭꪮꪀ ꪼꪔ ꪚꪀꪰ ꪣꪲ ꪀꪱꪥ 460 ꪭꪮꪀ ꪎꪉꪲ ꪩꪱꪫ ꪒꪱꪉ ꪵꪮꪚ ꪭꪮꪀ ꪝꪉꪳ ꫄ꪨꪚ ꪊꪫꪙꪸ ꪵꪈꪉ ꪵꪀꪉ ꪵꪮꪚ ꪁꪫꪱꪣ ꪫꪒꪸ. ꫄ꪋ ꪝꪉꪳ ꪙꪮꪉ ꪬꪉꪲ ꪣꪱ ꪫꪒꪸ ꪘꪱꪣ ꪵꪮꪚ ꪭꪮꪀ ꪹꪚꪱ ꪭꪴ ꪁꪫꪱꪣ ꪫꪒꪸ. ꪹꪭꪙ ꪹꪋꪉ ꫄ꪩꪉ ꫄ꪋ ꪶꪜꪉ ꪻꪊ ꪕꪱꪀ ꪄꪴ ꪉꪱꪥ ꪒꪲ ꪻꪬ ꪝꪉꪳ ꪙꪮꪉ ꪭꪮꪀ ꪎꪉꪲ ꪀꪺꪉ ꪫꪀꪸ ꪵꪮꪚ ꪭꪮꪀ ꪵꪮꪚ ꪜꪱꪀ ꪁꪫꪱꪣ ꪫꪒꪸ. ꪝꪮꪣ ꪀꪚꪾ ꪫꪀꪸ ꪎꪚꪸ ꪩꪒꪰ ꪊꪣꪴ ꪢꪴ ꪤꪱꪉ ꪪꪙꪸ ꪣꪲ ꪩꪺꪉ ꪭꪴ ꪏꪉꪸ ꪎꪉꪴ ꪹꪭꪙ ꪹꪋꪉ ꪑꪉꪰ ꪶꪔ ꪊꪀꪳ ꪝꪉꪳ ꪫꪀꪸ ꪮꪙꪲ ꪣꪺꪙ ꪪꪽ ꪬꪫꪱ ꪪꪽ ꫃ꪉ ꪻꪬ ꪝꪉꪳ ꪛꪱꪙ ꪭꪮꪀ ꪎꪉꪲ ꪩꪱꪫ. ꪹꪝ ꪹꪏꪉ ꪙꪽ ꪝꪉꪳ ꪙꪮꪉ ꪁꪷ ꪮꪙꪸ ꪻꪊ ꪵꪮꪚ ꪭꪮꪀ ꪀꪙꪲ ꪤꪴ ꪝꪮꪣ ꪀꪚꪾ ꪝꪉꪳ ꪎꪉꪲ ꪪꪙꪸ ꪫꪒꪸ ꪘꪱꪣ.

          ꪹꪋꪉ ꪀꪱꪫ ꪒꪉꪰ ꫄ꪎꪙ ꪨꪱ ꪨꪷ ꫄ꪒꪙ ꪫꪲ ꪶꪀꪀ ꪵꪅꪀ ꪼꪒ ꪔꪉꪲ ꪤꪱꪫ ꪘꪱ ꪫꪀꪸ ꪚꪮꪀ ꪎꪮꪙ ꪝꪉꪳ ꪭꪮꪀ ꪎꪉꪲ ꪩꪱꪫ. ꪵꪔ ꪜꪲ 2001 ꪣꪱ ꪭꪮꪒ ꪼꪅ ꪹꪭꪙ ꪹꪋꪉ ꪁꪷ ꪚꪮꪀ ꪎꪮꪙ ꪁꪫꪱꪣ ꪫꪒꪸ ꪻꪬ ꪀꪱꪥ ꪝꪽ ꫜ ꪭꪮꪀ ꪎꪉꪲ ꪄꪮꪉ 8 ꪔꪉꪲ ꪚꪀꪰ ꪩꪱꪫ ꪀꪺꪉ ꪙꪽ ꪤꪱꪫ 500 ꪙꪮꪉ ꪵꪮꪚ ꪊꪫꪙꪸ ꪵꪈꪉ ꪘꪉꪰ ꪹꪋꪉ.

          ꪝꪉꪳ ꪙꪮꪉ ꪭꪮꪀ ꪎꪉꪲ ꪩꪱꪫ ꪑꪉꪰ ꫄ꪩꪉ ꫄ꪋ ꪼꪒ ꪝꪉꪳ ꪼꪏ ꪤꪱꪫ ꪛꪱꪙ ꪹꪡꪉ ꪎꪉꪲ ꪪꪙꪸ ꪫꪒꪸ ꪘꪱꪣ ꪵꪚꪉ ꪜꪽ ꪝꪉꪳ ꪤꪱꪀ ꪋꪱ ꪀꪺꪉ ꪜꪺꪉ ꪀꪙꪲ ꫄ꪓꪥ ꪤꪴ ꪵꪀꪉ ꪵꪮꪚ ꪭꪮꪀ. ꪣꪲ ꪶꪠꪉ ꪀꪲ ꪔꪀꪴ ꪎꪱ ꪤꪉꪸ ꪻꪬ ꪝꪉꪳ ꪙꪮꪉ ꪹꪚꪱ ꪼꪒ ꪶꪭꪣ ꫄ꪉꪙ ꪵꪮꪀ ꪬꪮꪀ ꪀꪙꪲ ꪤꪴ. ꪢꪮꪥ ꪹꪕ ꪶꪝꪚ ꪣꪳ ꪣꪺꪙ ꪣꪳ ꪊꪉꪸ ꪄꪮꪉ ꪫꪒꪸ ꪘꪱꪣ ꪵꪀꪉ ꪩꪱꪫ ꪝꪉꪳ ꪹꪋꪉ ꪝꪮꪣ ꪶꪔ ꪊꪀꪳ ꪝꪷ ꪘꪱ ꪕꪱꪀ ꪄꪴ ꪉꪱꪥ ꪒꪲ ꪻꪬ ꪝꪉꪳ ꪙꪮꪉ ꪶꪋꪣ ꪔꪮꪙ ꪊꪉꪸ ꪣꪺꪙ ꪬꪮꪣ. ꪎꪉꪲ ꪪꪙꪸ 2 ꪹꪣꪉ ꪝꪮꪣ ꪀꪽ ꪀꪙꪲ ꪤꪴ ꪵꪮꪚ ꪭꪮꪀ ꪹꪏꪉ ꪙꪮꪉ ꪝꪲ ꪀꪺꪉ ꪹꪭꪙ.

          ꪼꪅ ꪙꪲ ꪔꪉꪲ ꫄ꪎꪙ ꪨꪱ ꪣꪲ 4 ꪹꪋꪉ ꪊꪫꪙꪸ ꪉꪚꪸ ꪚꪮꪀ ꪎꪮꪙ ꪻꪬ ꪭꪮꪀ ꪎꪉꪲ ꪩꪱꪫ ꪯꪽ ꪨꪷ ꪹꪋꪉ ꪒꪱꪥ ꪭꪮꪀ ꪼꪔ ꪚꪀꪰ ꪹꪋꪉ ꪀꪱꪫ ꪒꪉꪰ ꫄ꪎꪙ ꪨꪱ ꪹꪋꪉ ꪀꪱꪫ ꪒꪉꪰ ꪮꪲ ꫃ꪔ ꫄ꪎꪙ ꪨꪱ ꪵꪀꪉ ꪹꪋꪉ ꪊꪉꪴ ꫄ꪀꪚ ꪪꪽ ꪬꪫꪱ ꫃ꪉ ꪗꪺꪒ ꪵꪀꪉ ꪤꪴ ꪩꪀꪲ ꪀꪚꪾ ꪀꪱꪤ ꪝꪽ ꫜ ꪭꪮꪀ ꪎꪉꪲ ꪒꪱꪉ ꪵꪮꪚ ꪭꪮꪀ. ꪙꪮꪀ ꪙꪽ ꪮꪮꪀ ꪔꪉꪲ ꫄ꪎꪙ ꪨꪱ ꪑꪉꪰ ꪶꪔ ꪊꪀꪳ ꪨꪱꪥ ꫄ꪨꪚ ꪚꪮꪀ ꪎꪮꪙ ꪫꪒꪸ ꪶꪔ ꪊꪀꪳ ꪀꪱꪙ ꪶꪛ ꪶꪀꪉ ꪔꪱꪀ ꪒꪫꪱꪙ ꫃ꪖ ꪚꪮꪀ ꪁꪫꪱꪣ ꪫꪒꪸ ꪻꪬ ꪀꪱꪙ ꪶꪛ ꪄꪮꪉ ꪝꪉꪳ ꪔꪉꪲ ꪚꪀꪰ ꪩꪱꪫ. ꪯꪽ ꪙꪲ ꪊꪉꪲ ꪨꪷ ꪊꪣꪴ ꪢꪴ ꪀꪱꪙ ꪶꪛ ꪎꪚꪳ ꪙꪱꪣ ꪔꪱꪣ ꪹꪉꪙ ꪄꪮꪉ 8 ꪔꪉꪲ ꪚꪀꪰ ꪩꪱꪫ ꪵꪀꪉ ꪨꪷ ꫃ꪎꪣ ꪎꪱꪥ ꪀꪱꪥ ꪥꪙꪸ ꪎꪚꪳ ꪔꪱꪣ ꪔꪣꪴ ꪝꪺ ꪉꪸ ꪁꪱꪒ ꪁꪙꪸ ꪘꪫꪸ ꪢꪽ ꪄꪮꪉ ꪫꪒꪸ ꪢꪱꪙ - ꪩꪱꪫ ꪵꪎꪙ ꫄ꪓꪥ ꪘꪱ ꪢꪽ ꪅꪽ ꪋꪽ.

                                                ꪶꪬꪉ ꪫꪒꪸ -ꪕꪮꪉ ꪵꪯꪉ ꪥꪀꪲ