Khù khặn luông chăn chiềng thanh minh khòng côn Dạo Yền Bái

          Chiềng thanh minh khòng côn Dạo đành lâng đảy tổ chức cuồng dan hùa bườn 2, bườn 3 âm lịch. Chăm va báu chư hịa chiềng chính cuồng pì, hák va ăn nị lỏ ngươn lang vằn hoá báu xương đằư đút thiếu đảy cuồng puồng kìn đơi dú khòng pi nọng chựa côn dạo đành. Vịa xỏm pành tọn tăm nen heo khòng côn Dạo đành đảy chấp năm 3 pì tưa nưng báu cọ diên cuồng 3 pì, tàm toi khù ngai đì khòng tựng chua hươn.

          Vạy khặn khang dệt hịt tọn tăm cống sơ men mự men chơ, chảu hươn cọ đảy khặng khang pưng tàng chương hôm mi: Khảu nửng, nhứa mù, mák nuối, ngơn chỉa, lưn xưa lỏ cáy tổm báu xương đằư đút thiếu đảy cuồng pan khảu cống sơ. Tênh mết pưng chương khòng, căm kìn nị chảu hươn đảy hák khặn khang dệt àu. Pi nọng côn Dạo đành lâng ngắm xương nặn chắng vạu khửn đảy hùa chằư chứ ờn khòng lụk làn đối cắp pưng côn bằng biến piến nả xìa. Lằng chơ khặn khang đảy tục po chu tàng chương hư ải mò pọm cắp chu côn cuồng hươn àu pày pồng xảng nen heo, cánh tặp mọk 3 tưa vạy báo cáo cắp pảu pú lan căm pưng côn bằng biến piến nả xìa xò hẳư lụk làn xảng pành hươn dảo, phát thàng cò nhả cò chưa lô chằm cánh khút pọk đìn xắư tênh nen heo.

          Lằng chơ dệt hịt cánh vịa tọn tăm nen heo đảy dệt mộm lẹo lỏ dệt hịt báo cáo pảu pú mưa lang nẳng hươn, cắp pan khảu cống sơ đảy tay hươn khặn khang vạy cón. Ải mò tàng nả hẳư tay hươn cánh cáo mơi pảu pú ma nhẳn chương khòng lụk làn cuồng hươn. Khấn tam cuồng dan 30 phút, hôm mi báo cáo vịa tay hươn dệt hịt chôm chiềng thanh minh, dệt lẹo vịa tọn tăm xảng pành nen heo cánh cáo mơi pảu pú lạn căm ma kìn chiềng thanh minh pọm cắp lụk làn.

Chiềng Thanh minh khòng chựa côn Dạo đành lỏ ngươn lang báu xương đằư đút thiếu đảy khòng pi nọng. Pưa xương nặn pi nọng cọ lâng pồng chằư đù đì, chự mẳn vạy hẳư chua lụk đơi làn./.

Thiều Nghiệp

ꪄꪴ ꪅꪽ ꪩꪺꪉ ꪋꪽ ꪊꪉꪸ ꪹꪖꪉ ꪢꪉꪲ ꪄꪮꪉ ꫛ ꪥꪱꪫ ꪮꪙꪸ ꪚꪱꪥ

          ꪊꪉꪸ ꪵꪖꪉ ꪢꪉꪲ ꪄꪮꪉ ꫛ ꪥꪱꪫ ꪵꪒꪉ ꫄ꪩꪉ ꪼꪒ ꪶꪔ ꪊꪀꪳ ꪀꪺꪉ ꪥꪱꪙ ꪬꪺ ꪹꪚꪙ 2, ꪹꪚꪙ 3 ꫄ꪮꪣ ꪩꪲꪀ. ꪋꪣꪾ ꪫꪱ ꪹꪚꪱ ꪋꪳ ꪊꪉꪸ ꪊꪉꪲ ꪀꪺꪉ ꪜꪲ, ꪭꪱꪀ ꪫꪱ ꪯꪽ ꪙꪲ ꪨꪷ ꪹꪉꪙ ꪩꪱꪉ ꪪꪽ ꪬꪫꪱ ꪹꪚꪱ ꪹꪏꪉ ꪻꪒ ꪒꪴꪒ ꪖꪫꪸ ꪼꪒ ꪀꪺꪉ ꪜꪺꪉ ꪀꪙꪲ ꫄ꪓꪥ ꪤꪴ ꪄꪮꪉ ꫛ ꪥꪱꪫ ꪵꪒꪉ. ꪫꪀꪸ ꪎꪮꪣ ꪵꪜꪉ ꪕꪮꪙ ꪕꪣꪾ ꪵꪙꪙ ꪵꪭꪫ ꪄꪮꪉ ꫛ ꪥꪱꪫ ꪵꪒꪉ ꪼꪒ ꫃ꪥꪒ 3 ꪜꪲ ꪹꪕ ꫜ ꪹꪚꪱ ꪁꪷ ꪥꪙꪸ ꪀꪺꪉ 3 ꪜꪲ, ꪔꪱꪣ ꪕꪮꪥ ꪄꪴ ꪉꪱꪥ ꪒꪲ ꪄꪮꪉ ꪕꪉꪳ ꪋꪺ ꪹꪭꪙ.

          ꪼꪫ ꪅꪽ ꪅꪱꪉ ꫃ꪥꪒ ꪭꪒꪲ ꪕꪮꪙ ꪕꪣꪾ ꪶꪀꪉ ꫄ꪏ ꪵꪣꪙ ꪣꪳ ꪵꪣꪙ ꫄ꪋ ꪹꪊꪱ ꪹꪭꪙ ꪼꪒ ꪅꪽ ꪅꪱꪉ ꪝꪉꪳ ꪔꪱꪉ ꪹꪋꪉ ꪣꪲ: ꪹꪄꪱ ꪘꪉꪳ ,ꪹꪐ ꪢꪴ, ꪢꪱꪀ ꪘꪺꪥ ,꫄ꪉꪙ ꪊꪸ, ꪩꪙꪳ ꪹꪏ ꪨꪷ ꪼꪀ ꪶꪔꪣ ꪹꪚꪱ ꪹꪏꪉ ꪼꪒ ꪒꪴꪒ ꪖꪫꪸ ꪼꪒ ꪀꪺꪉ ꪝꪱꪙ ꪹꪄꪱ ꪶꪀꪉ ꫄ꪏ. ꫃ꪕꪉ ꫃ꪢꪒ ꪝꪉꪳ ꪹꪋꪉ ꪄꪮꪉ ꪁꪣꪾ ꪀꪙꪲ ꪙꪲ ꪹꪊꪱ ꪹꪭꪙ ꪬꪱꪀ ꪅꪽ ꪅꪱꪉ ꫃ꪥꪒ ꪹꪮꪱ. ꪝꪲ ꪙꪮꪉ ꫛ ꪥꪱꪫ ꪵꪒꪉ ꫄ꪩꪉ ꪈꪣꪾ ꪹꪏꪉ ꪙꪽ ꪊꪉꪰ ꪹꪫꪱ ꪄꪙꪳ ꪼꪒ ꪬꪺ ꪻꪊ ꪊꪳ ꫄ꪮꪙ ꪄꪮꪉ ꪩꪴꪀ ꪨꪱꪙ ꪶꪒꪥ ꪀꪚꪾ ꪹꪜꪱ ꪜꪴ ꪹꪣ ꪩꪱꪉ .ꪨꪉꪰ ꫄ꪋ ꪅꪽ ꪅꪱꪉ ꪼꪒ ꪋꪴ ꪔꪱꪉ ꪹꪋꪉ ꪭꪳ ꪮꪱꪥ ꪢꪷ ꪝꪮꪣ ꪀꪚꪾ ꪋꪴ ꫛ ꪀꪺꪉ ꪹꪭꪙ ꪎꪱꪉ ꪵꪙꪙ ꪵꪭꪫ ,ꪵꪀꪉ ꪕꪚꪾ ꪣꪷ 3 ꪹꪕ ꪼꪫ ꪚꪱꪫ ꪀꪱꪫ ꪀꪚꪾ ꪹꪜꪱ ꪜꪴ ꪹꪣ ꪩꪱꪉ ꪎꪷ ꪻꪬ ꪩꪴꪀ ꪨꪱꪙ ꪕꪮꪙ ꪕꪣꪾ ꪎꪱꪉ ꪵꪜꪉ ꪧꪭꪙ ꪤꪱꪫ ,ꪄꪴꪒ ꪝꪷ ꪒꪙꪲ ꪼꪎ ꫃ꪕꪉ ꪵꪙꪙ ꪵꪭꪫ. ꪩꪴꪀ ꪨꪱꪙ ꪼꪔ ꪹꪬꪉ ꪜꪀꪰ ꪮꪮꪣ ꪵꪙꪙ ꪵꪭꪫ ꪼꪫ ꪠꪉꪲ ꪮꪴꪙ ꪻꪬ ꪹꪜꪱ ꪜꪴ ꪹꪣ ꪩꪱꪉ.

          ꪨꪉꪰ ꫄ꪋ ꫃ꪥꪒ ꪭꪲꪒ ꪵꪀꪉ ꪕꪮꪙ ꪕꪣꪾ ꪵꪙꪙ ꪵꪭꪫ ꪼꪒ ꫃ꪥꪒ ꪶꪣꪣ ꪵꪩꪫ ꪨꪷ ꫃ꪥꪒ ꪬꪲꪒ ꪚꪱꪫ ꪀꪱꪫ ꪹꪜꪱ ꪜꪴ ꪹꪣ ꪩꪱꪉ ꪘꪉꪰ ꪹꪭꪙ ꪀꪚꪾ ꪝꪱꪙ ꪹꪄꪱ ꪶꪀꪉ ꫄ꪎ ꪼꪒ ꪅꪽ ꪅꪱꪉ ꪵꪔ ꪀꪮꪙ .ꪮꪱꪥ ꪢꪷ ꪔꪱꪉ ꪘꪱ ꪻꪬ ꪼꪕ ꪹꪭꪙ ꪵꪀꪉ ꪀꪱꪫ ꫄ꪣꪥ ꪹꪜꪱ ꪜꪴ ꪣꪱ ꪐꪽ ꪹꪋꪉ ꪄꪮꪉ ꪩꪴꪀ ꪨꪱꪙ ꪀꪺꪉ ꪹꪭꪙ. ꫄ꪄꪙ ꪕꪱꪣ ꪀꪺꪉ ꪥꪱꪙ 30 ꪠꪴꪒ ꪶꪭꪣ ꪣꪲ ꪚꪱꪫ ꪀꪱꪫ ꪫꪀꪸ ꪼꪕ ꪹꪭꪙ ꫃ꪥꪒ ꪭꪒꪲ ꪶꪋꪣ ꪊꪉꪸ ꪵꪖꪉ ꪢꪲꪉ ,꫃ꪥꪒ ꪵꪩꪫ ꪫꪀꪸ ꪕꪮꪙ ꪕꪣꪾ ꪵꪙꪙ ꪵꪭꪫ ꪵꪀꪉ ꪀꪱꪫ ꫄ꪣꪥ ꪹꪜꪱ ꪜꪴ ꪹꪣ ꪩꪱꪉ ꪣꪱ ꪀꪙꪲ ꪊꪉꪸ ꪵꪖꪉ ꪢꪉꪲ ꪝꪮꪣ ꪀꪚꪾ ꪩꪴꪀ ꪨꪱꪙ.

          ꪊꪉꪸ ꪵꪖꪉ ꪢꪉꪲ ꪄꪮꪉ ꪹꪊ ꫛ ꪥꪱꪫ ꪵꪒꪉ ꪨꪷ ꪹꪉꪙ ꪩꪱꪉ ꪹꪚꪱ ꪹꪏꪉ ꪻꪒ ꪒꪴꪒ ꪖꪫꪸ ꪼꪒ ꪀꪺꪉ ꪜꪺꪉ ꪀꪙꪲ ꫃ꪓꪥ ꪤꪴ ꪄꪮꪉ ꪝꪲ ꪙꪮꪉ. ꪹꪝ ꪹꪏꪉ ꪙꪽ ꪝꪲ ꪙꪮꪉ ꪁꪷ ꫄ꪩꪉ ꪶꪜꪉ ꪻꪊ ꪒꪴ ꪒꪲ, ꪋꪳ ꪢꪽ ꪼꪫ ꪻꪬ ꪋꪺ ꪩꪴꪀ ꫄ꪓꪥ ꪨꪱꪙ.

ꪹꪩꪉ ꪬꪫꪙꪸ ꪤꪲꪀ