ꪣꪺꪙ ꪬꪮꪣ ꪣꪳ ꪶꪭꪥ ꪢꪱꪀ ꪣꪺꪉ ꪮꪙꪸ ꪹꪊꪱ

                  ꪶꪋꪣ ꪭꪚꪾ ꪣꪳ ꪶꪭꪥ ꪢꪱꪀ ꪣꪺꪉ ꪮꪙꪸ ꪹꪊꪱ ꪣꪲ 15 ꪶꪓꪥ ꪖꪲ ꪣꪱ ꪵꪔ ꪝꪉꪳ ꪎꪱ ꪗꪲ ꫄ꪊꪙ ꪘꪉꪰ ꪭꪫꪙꪸ ꪵꪄꪉ ꪖꪲ ꫃ꪖ ꪖꪱꪫ ꪵꪀꪉ ꪝꪉꪳ ꪛꪱꪥ ꪮꪙꪲ ꪣꪺꪙ ꪹꪉꪙ ꪩꪱꪉ  ꪹꪏꪉ: ꪔꪷ ꫃ꪔꪀ ꪩꪱ ꪚꪱꪥ ꪄꪲ ꪼꪣ ꪋꪷ ꪵꪋ ꪜꪒꪲ ꪢꪱꪀ ꪣꪺꪉ. ꪶꪝꪙ ꪤꪮꪙ ꫄ꪐꪒ ꪨꪷ ꪉꪮꪙ ꪖꪲ ꪜꪒꪲ ꪢꪱꪀ ꪣꪺꪉ ꪘꪉꪰ ꪎꪱ ꪋꪉꪸ ꪝꪽ ꪣꪲ 6 ꪶꪓꪥ ꪶꪋꪣ ꪭꪚꪾ. ꪣꪳ ꪶꪭꪥ ꪼꪒ ꪶꪔ ꪊꪀꪳ ꪘꪉꪰ ꪊꪉꪴ ꫄ꪔꪣ ꪗꪲ ꫄ꪊꪙ ꪮꪙꪸ ꪹꪊꪱ ꪑꪉꪰ ꪣꪲ ꪝꪉꪳ ꪬꪮꪉ ꪜꪱꪥ ꪹꪋꪉ ꪭꪱꪉ ꪄꪮꪉ ꪭꪫꪙꪸ ꪹꪏꪉ: ꪝꪉꪳ ꪔꪱꪉ ꪹꪋꪉ ꪭꪱꪉ ꪢꪱꪀ ꪀꪺꪥ ꪢꪱꪀ ꪣꪺꪉ; ꪠꪱꪥ ꪄꪒꪲ ꪑꪷ ꪩꪱꪥ ꪵꪀꪉ ꪁꪣꪾ ꪀꪙꪲ ꪵꪋꪚ ꪄꪮꪉ ꪝꪷ ꪙꪮꪉ ꪹꪋ ꪙꪮꪥ ꫛ. ꪘꪫꪸ ꪹꪋ ꪼꪒ ꪹꪨꪣ ꪨꪱꪥ ꪵꪄꪀ ꪤꪴ ꪩꪀꪲ ꪵꪀꪉ ꫄ꪤꪙ ꪹꪣꪉ ꪣꪱ ꫄ꪚꪉ ꪵꪩ.

            ꪹꪝ ꪠꪱꪀ ꪒꪙꪲ ꪋꪮꪚ ꪶꪎꪣ ꪀꪚꪾ ꪜꪀꪴ ꪢꪱꪀ ꪹꪏꪉ ꪙꪽ ꪢꪱꪀ ꪣꪺꪉ ꪁꪷ ꪁꪱꪒ ꪁꪙꪸ ꪀꪚꪾ ꫛ ꫄ꪤꪙ ꪮꪙꪸ ꪹꪊꪱ ꪵꪔ ꪹꪋꪱ ꪵꪔ ꪨꪱꪥ ꪣꪱ ꪵꪩꪫ ꪨꪷ ꪔꪱꪉ ꪀꪷ ꪜꪀꪴ ꪶꪚꪉ ꫜ ꪶꪀꪀ ꪊꪉꪲ ꪄꪮꪉ ꫛ ꫄ꪤꪙ ꪘꪉꪰ ꪘꪲ. ꪼꪅ ꪙꪲ ꪘꪉꪰ ꪀꪱ ꪭꪫꪙꪸ ꪣꪲ ꪀꪱꪥ 700 ꪵꪬꪀ ꪕꪱ ꪜꪀꪴ ꪢꪱꪀ ꪣꪺꪉ ꪀꪺꪉ ꪙꪽ ꪣꪲ 200 ꪵꪬꪀ ꪕꪱ ꪨꪷ ꪹꪋ ꪢꪱꪀ ꪣꪺꪉ ꪒꪸ ꪹꪠꪉ ꫃ꪕꪉ ꫃ꪢꪒ ꪎꪱꪙ ꪹꪩꪉ ꪭꪱꪉ ꪜꪲ ꪁꪒꪳ ꪼꪒ 2 ꪝꪽ ꫄ꪔꪙ ꪢꪱꪀ. ꪼꪅ ꪙꪲ ꪮꪙꪸ ꪹꪊꪱ ꪣꪲ 3 ꪎꪱ ꪜꪀꪴ ꪢꪱꪀ ꪣꪺꪉ ꪨꪷ ꪏꪚꪾ ꪫꪱꪒ ꪋꪉꪸ ꪝꪽ ꪵꪀꪉ ꪪꪉꪸ ꪨꪱꪙ ꪁꪷ ꪼꪒ ꫄ꪀꪚ ꪊꪸ ꪚꪱꪫ ꪶꪭ ꪊꪲ ꫄ꪤꪙ ꪒꪸ ꪨꪲ ꪜꪲ 2012 ꪵꪀꪉ ꪣꪲ ꪹꪋ ꪢꪱꪀ ꪣꪺꪉ ꪒꪱꪥ ꪩꪫꪱꪙ ꪁꪷ ꪼꪒ ꪄꪱꪥ ꪼꪜ ꪹꪣꪉ ꪮꪀꪴ ꪹꪝ ꪹꪏꪉ ꪙꪽ ꪁꪱ ꪢꪱꪀ ꪣꪺꪉ ꪼꪒ ꪵꪝꪉ. ꪘꪉꪰ ꪥꪱꪙ ꪙꪲ ꪁꪱ ꪢꪱꪀ ꪣꪺꪉ ꪵꪔ 15 ꪝꪽ ꪭꪮꪒ 25 ꪝꪽ ꪢꪽ ꪢꪮꪥ ꫄ꪀꪙ.

            ꪘꪉꪰ ꪶꪠꪉ ꪒꪙꪲ ꪮꪙꪸ ꪹꪊꪱ ꪢꪱꪀ ꪣꪺꪉ ꪼꪒ ꪜꪀꪴ ꪨꪱꪥ ꫄ꪐꪒ ꪢꪱꪀ ꪀꪙꪲ ꪵꪋꪚ ꪮꪮꪙ ꪵꪀꪉ ꪚꪱꪙ ꪮꪱꪥ ꪬꪮꪣ. ꪎꪮꪉ ꪣꪱ ꪝꪲ ꪙꪮꪉ ꪘꪉꪰ ꪘꪲ ꪁꪷ ꪋꪱꪉ ꪜꪀꪴ ꪵꪀꪉ ꪺꪣꪾ ꪒꪴ ꪒꪲ ꪹꪏꪉ ꪙꪽ ꪹꪑꪉ ꫃ꪥꪒ ꪻꪬ ꪢꪱꪀ ꪣꪺꪉ ꪮꪙꪸ ꪹꪊꪱ ꪀꪙꪲ ꪵꪋꪚ ꪮꪱꪥ ꪬꪮꪣ ꪮꪮꪀ ꪔꪉꪸ. ꪻꪠ ꪣꪲ ꪥꪱꪙ ꪣꪱ ꪀꪱꪥ ꪮꪙꪸ ꪹꪊꪱ ꪀꪺꪉ ꪣꪺ ꪵꪭ ꪙꪲ ꪝꪮꪣ ꪏꪳ ꪢꪱꪀ ꪣꪺꪉ ꪼꪜ ꪹꪭꪙ ꪼꪫ ꪄꪱꪫ ꪝꪲ ꪙꪮꪉ.

                                                                      ꪭꪫꪱꪉ ꪩꪮꪉ -ꪕꪮꪉ ꪵꪯꪉ ꪥꪀꪲ

                        Muôn hòm mự hội pít mák muông Yền Chầu

          Chôm hặp mự hội mi 15 đội thì ma té pưng xã thị trấn nẳng huyện, khánh thì thể thào cánh pưng bai ỉn muôn xương tó tếch lạ bài, khí chọ chẹ pít mák muông. Pộn dỏn nhất lỏ ngon thì pít mák muông nẳng xã Chiêng Păn mi 6 đội chôm hặp. Mự hội đảy tổ chức nẳng trùng tầm thị trấn Yền Chầu nhăng mi pưng hỏng pải khài chương hang khòng huyện xương pưng chương hang dệt té mák cuổi, mák muông; phải khít nho lai cánh căm kìn chẹp khòng pi nọng chựa nọi côn. Tênh mết chu vịa dệt pọm muôn hòm phọn nương, niếu chưa đảy lài khék cánh dần mương địa phường ma bấng le.

            Pưa nặm đìn nẳng nỉ chọp xồm cắp cò muông, xương nặn cò muông cọ cạt kiên cắp côn dần Yền Chầu té chạu té lài ma lẹo, lỏ tàng cò kình tế cốc chính khòng côn dần nẳng nỉ. Khay nị tênh cá huyện mi cài 700 héc ta púk cò muông, cuồng nặn 200 héc ta lỏ chựa mák muông kiểu địa phường, tênh mết sản lượng hạng pì cựt đảy 2 păn tấn mák. Khay nị Yền Chầu mi 3 xã púk mák muông kiểu lỏ Sặp Vạt, Chiêng Păn, Viêng Lán cọ đảy cấp chỉa chứng nhẳn pì 2012 cánh mi chựa mák muông Đài Loan cọ đảy khài pày mương Úc, pưa xương nặn ca mák muông nhương mự nhương panh. Gian nị ca mák muông khài đảy té 15 păn họt 25 păn mằn mỏi cần.

             Nẳng phổng đìn Yền Chầu, mák muông kiểu nuối môn đảy púk lài nhất pưa mák muông kìn ón, bàn, ài hòm. Xòng ma phủ Tay nẳng nỉ hụ chang púk bồng, lăm đù thù pít cánh hiềm chự, xương nặn cọ hôm phân dệt hẳư chất lượng mák muông kiểu Yền Chầu nhương tứm kìn chẹp ài hòm mi tiếng. Phằư ma cài nẳng nỉ cuồng mua he nị pọm xự mák muông pày hươn kháo pi kháo nọng./.

                                                         Hoàng Long-Tòng Anh dịch