Bản chưng vẻ hún ảnh khòng côn Dạo nẳng phổng đèn mương Quảng Ninh

          Dú lắc thành phố Móng Cái 30 cày số, thôn Pò Hèn, xã Hải Sơn, lỏ bón kìn dú khòng pi nọng chựa côn Dạo Thanh Y nẳng him me nặm đèn mương Việt-Trung. Bản xính Đặng, chôm tỏn khék té hún ảnh nhinh xào Dạo khặn chăn cuồng tháo xỉn xửa ngươn lang. Khù đáng pồng chằư ặn lỏ hún ảnh đảy vẻ nẳng phà hươn khòng làng hươn nhắư dú pák tang khảu mưa cuòng bản.

          Pày té hươn nị họt hươn nắư, khék cọ hền lài khù lá khan. Hền hún ảnh tồ mà non phình đét kem xuần bók, pưng cáy kếp kìn khảu li tó nả hươn, po hay me na pày liệng quai ma hươn, lếch nọi dók cằn càng xuần bók cai. Pưng hún ảnh lài màu hung hựa nẳng phà hươn lỏ pưng hún ảnh đảy đoàn thành niền thành phố Móng Cái pọm cắp chính quyên xã  vẻ ók.

          Le pưng làn nọi dók cằn nẳng hún ảnh vẻ, cọ báu mi lài côn hụ họt mưa khoẹ vịa niếu chưa côn dần cọ pọ lài dạk cha, pi nọng cọ báu hụ đảy vịa vẻ hún ảnh chí cựt đảy khù lợi đì sằng. Cọ pày kẻ nà tô thí mết ắn bườn pi nọng chắng hẳư vẻ, hạng 10 đoàn viền, thành niền cọ pọm cằm sảng xồm, sờn xìa lau, pọm cắp luông chôm choi vẻ hún ảnh té pưng bạn sình viền Mỹ Thuật, 20 hún vẻ cọ đảy vẻ mộm lẹo nẳng phà hươn khòng 13 chua hươn cuồng bản. Tênh mết số ngơn dòm xắư vẻ hún ảnh lỏ 150 triệu mằn, số ngơn đảy lài côn cóp hôm choi dừa.

          Mú sính Đặng, thôn Pò hèn đảy lựa chọn dệt sanh cuồng vịa tẳng tánh bản na mắư. Hươn chăn xưa, pi nọng cọ pồng chằư đù đì họt vịa tọn tăm bón nặm kìn đìn dú. Ưởi Nguyễn Thị Thuỳ Dương, Bí thư thôn Pò Hèn tô: té chơ mi hún ảnh vẻ, khék du lịch ma ỉn dàm nẳng nị lài xưa, luông ngắm luông dệt khòng pi nọng nẳng nị cọ piến thái lài dong.

          Pò Hèn, Hải Sơn chăm va lỏ phổng xùng nhăng pọ lài dạk cha, hák va mi luông hanh ma tang du lịch cắp pưng bón nặm đìn khặn chăn, bón biền mài ngươn lang cách mạng, ngươn lang vằn hoá khặn chăn khòng po me pi nọng nẳng nị. ăn nị cọ men bón cái diên tuyến du lịch pày kìn dú dệt dượn toi pi nọng bản khuống  nẳng phổng đèn mương đàng đảy thành phố Móng Cái tánh ók.

          Cuồng dan lằng lun pày nả, nẳng Trà Cổ, đòn bể Vĩnh Thực chí mi pưng hún ảnh vẻ bản tánh túc pắt pà củng, tạ pền bón du lịch khặn chăn. Pưng hún ảnh vẻ khặn chăn  chí nhương niếu chưa đảy khék du lịch ma ỉn dàm nẳng phổng đèn mương, phổng đòn bể Móng Cái, tỉnh Quảng Ninh. Cắp luông pùn mả khày du lịch cuồng dan hầng hy, cánh dệt piến thái puồng kìn đơi dú khòng pi nọng nẳng phổng đèn mương nị./.

                                                                  VOVĐB-Huyền dịch

ꪚꪱꪙ ꪵꪪ ꪬꪙꪴ ꪵꪮꪉ ꪄꪮꪉ ꫛ ꪥꪱꪫ ꪘꪉꪰ ꪶꪠꪉ ꪵꪒꪙ ꪹꪣꪉ ꪀꪫꪱꪉ ꪘꪉꪲ

          ꪤꪴ ꪨꪀꪰ ꪵꪗꪉ ꪶꪠ ꪢꪮꪉ ꪀꪱꪥ 30 ꪼꪀ ꪶꪎ ,ꪶꪖꪙ ꪜꪷ ꪵꪬꪙ ,ꪎꪱ ꪬꪱꪥ ꫄ꪎꪙ ꪨꪷ ꪚꪮꪙ ꪀꪙꪲ ꪤꪴ ꪄꪮꪉ ꪥꪱꪫ ꪵꪖꪉ ꪮ ꪘꪉꪽ ꪭꪣꪲ ꪵꪣ ꪙꪣꪾ ꪵꪒꪙ ꪹꪣꪉ ꪫꪒ-ꪸ ꪊꪉꪴ. ꪚꪱꪙ ꪎꪉꪲ ꪒꪉꪰ ꪶꪋꪣ ꪔꪮꪙ ꪵꪄꪀ ꪵꪔ ꪬꪙꪴ ꪵꪮꪉ ꪑꪉꪲ ꪎꪱꪪ ꪥꪱꪫ ꪅꪽ ꪋꪽ ꪙꪉꪴ ꪖꪱꪫ ꪎꪙꪲ ꪹꪎ ꪹꪉꪙ ꪩꪱꪉ. ꪄꪴ ꪒꪱꪉ ꪶꪜꪉ ꪼꪊ  ꪯꪽ ꪨꪷ ꪬꪘꪴ ꪵꪮꪈ ꪼꪒ ꪵꪪ ꪘꪉꪰ ꪠꪱ ꪹꪭꪙ ꪄꪮꪉ ꪨꪱꪉ ꪹꪭꪙ ꪼꪐ ꪤꪴ ꪜꪱꪀ ꪕꪱꪉ ꪹꪄꪱ ꪹꪢ ꪀꪺꪉ ꪚꪱꪙ.

          ꪼꪜ ꪵꪔ ꪹꪭꪙ ꪙꪲ ꪭꪮꪒ ꪹꪭꪙ ꪻꪙ ꪵꪄꪀ ꪁꪷ ꫃ꪬꪙ ꪨꪱꪥ ꪄꪴ ꪨꪱ ꪅꪱꪙ. ꫃ꪬꪙ ꪬꪙꪴ ꪵꪮꪉ ꪌꪔ ꪢꪱ ꪙꪮꪘ ꪠꪉꪲ ꪵꪒꪒ ꪵꪁꪣ ꪎꪺꪙ ꪚꪮꪀ ,ꪝꪉꪳ ꪼꪀ ꫃ꪀꪚ ꪹꪄꪱ ꪩꪲ ꪔꪀ ꪘꪱ ꪹꪭꪙ ,ꪝꪷ ꪼꪭ ꪵꪣ ꪙꪱ ꪼꪜ ꪩꪉꪸ ꪁꪫꪱꪥ ꪣꪱ ꪹꪭꪙ ,ꪨꪱꪙ ꪙꪮꪥ ꪤꪮꪀ ꪀꪽ ꪘꪉꪰ ꪀꪱꪉ ꪎꪺꪙ ꪚꪮꪀ ꪁꪱꪥ. ꪝꪉꪳ ꪬꪙꪴ ꪵꪮꪉ ꪨꪱꪥ ꪹꪢꪱ ꪭꪉꪴ ꪹꪭꪀ ꪘꪉꪽ ꪠꪱ ꪹꪭꪙ ꪨꪷ ꪝꪉꪴ ꪬꪙꪴ ꪵꪮꪉ ꪼꪒ ꪒꪪꪱꪙ ꪵꪖꪈ ꪘꪙꪸ ꪵꪗꪉ ꪶꪠ ꪢꪮꪉ ꪀꪱꪥ ꪝꪮꪣ ꪀꪚꪾ ꪊꪉꪲ ꪁꪫꪙꪸ ꪎꪱ ꪵꪪ ꪮꪮꪀ.

          ꪵꪩ ꪝꪉꪴ ꪨꪱꪙ ꪙꪯꪥ ꪤꪮꪀ ꪀꪽ ꪘꪉꪰ ꪬꪙꪴ ꪵꪮꪉ ꪵꪪ ꪀꪷ ꪹꪚꪱ ꪣꪲ ꪨꪱꪥ ꫛ ꪭꪴ ꪭꪮꪒ ꪥꪱꪙ ꪹꪣ ꪵꪅꪫ ꪫꪀꪸ ꪘꪫꪸ ꪹꪋ ꫛ ꫄ꪤꪙ ꪁꪷ ꪝꪷ ꪨꪱꪥ ꪥꪱꪀ ꪋꪱ, ꪹꪝ ꪝꪲ ꪙꪮꪉ ꪹꪚꪱ ꪭꪴ ꪵꪊꪉ ꪼꪒ ꪫꪀꪸ ꪵꪪ ꪬꪙꪴ ꪵꪮꪉ ꪋꪲ ꪁꪒꪳ ꪼꪒ ꪄꪴ ꫄ꪨꪥ ꪒꪲ ꪎꪉꪰ. ꪁꪷ ꪼꪜ ꪵꪀ ꪘꪱ ꪶꪕ ꪖꪲ ꫃ꪢꪒ ꪮꪽ ꪹꪚꪙ ꪝꪲ ꪙꪮꪉ ꪊꪉꪰ ꪻꪬ ꪵꪪ ,ꪭꪱꪉ 10 ꪒꪫꪱꪙ ꪪꪙꪸ ꪵꪖꪉ ꪘꪙꪸ  ꪁꪷ ꪝꪮꪣ ꪀꪽ ꪎꪱꪉ ꪶꪎꪣ ,ꪝꪮꪣ ꪀꪚꪾ ꪩꪺꪉ ꪶꪋꪣ ꪋꪮꪥ ꪵꪪ ꪬꪙꪴ ꪵꪮꪉ ꪵꪔ ꪝꪉꪴ ꪛꪱꪙ ꪎꪉꪲ ꪪꪙꪸ ꪢꪲ ꪖꪺꪒ, 20 ꪬꪙꪴ ꪵꪪ ꪁꪷ ꪼꪒ ꪵꪪ ꪶꪣꪣ ꪵꪩꪫ ꪘꪉꪰ ꪠꪱ ꪹꪭꪙ ꪄꪮꪉ 13 ꪋꪺ ꪹꪭꪙ ꪀꪺꪉ ꪚꪱꪙ. ꫃ꪕꪉ ꫃ꪢꪒ ꪶꪎ ꪹꪉꪙ ꪤꪮꪣ ꪻꪎ ꪵꪪ ꪬꪙꪴ ꪵꪮꪉ ꪨꪷ 150 ꪋꪫꪸ ꪢꪽ.

          ꪢꪴ ꪎꪉꪲ ꪒꪉꪰ, ꪶꪖꪙ ꪜꪷ ꪵꪬꪙ ꪼꪒ ꪹꪩꪀ ꪋꪮꪙ ꫃ꪤꪒ ꪵꪏꪉ ꪀꪺꪉ ꪫꪀꪸ ꪔꪉꪰ ꪵꪔꪉ ꪚꪱꪙ ꪙꪱ ꪻꪢ. ꪹꪭꪙ ꪋꪽ ꪹꪏ ꪝꪲ ꪙꪮꪉ ꪁꪷ ꪶꪜꪉ ꪻꪊ ꪒꪴ ꪒꪲ ꪭꪮꪒ ꪫꪀꪸ ꪔꪮꪙ ꪕꪣꪾ ꪚꪮꪙ ꪙꪣꪾ ꪀꪙꪲ ꪒꪙꪲ ꪤꪴ. ꪹꪮꪥ ꪈꪫꪙꪸ ꪖꪫꪲꪥ ꪥꪉ ꪚꪲ ꪖꪳ ꪶꪖꪙ ꪜꪷ ꪵꪬꪙ ꪶꪕ: ꪵꪔ ꫄ꪋ ꪣꪲ ꪬꪙꪴ ꪵꪮꪉ ꪵꪪ ,ꪵꪅꪀ ꪥꪴ ꪩꪀꪲ ꪣꪱ ꪮꪙꪲ ꪤꪱꪣ ꪘꪉꪰ ꪙꪲ ꪨꪱꪥ ꪹꪏ.

          ꪜꪷ ꪵꪬꪙ ,ꪬꪱꪥ ꫄ꪎꪙ ꪋꪣꪾ ꪫꪱ ꪨꪷ ꪶꪠꪉ  ꪎꪉꪴ ꪑꪉꪰ ꪝꪷ ꪨꪱꪥ ꪥꪱꪀ ꪋꪱ, ꪭꪱꪀ ꪫꪱ ꪣꪲ ꪩꪺꪉ ꪹꪭꪉ ꪣꪱ ꪕꪱꪉ ꪤꪴ ꪩꪲꪀ ꪀꪚꪾ ꪝꪉꪳ ꪚꪮꪙ ꪙꪣꪾ ꪒꪙꪲ ꪅꪽ ꪋꪽ, ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪵꪀꪀ ꪣꪱꪉ. ꪹꪉꪙ ꪩꪱ ꪪꪽ ꪬꪫꪱ ꪅꪽ ꪋꪽ ꪄꪮꪉ ꪜꪲ ꪙꪮꪉ ꪘꪉꪰ ꪙꪲ. ꪝꪉꪳ ꪄꪴ ꪙꪲ ꪁꪷ ꪵꪣꪙ ꪚꪮꪙ ꪀꪱꪥ ꪥꪙꪸ ꪔꪫꪙꪸ ꪤꪴ ꪩꪀꪲ ꪼꪜ ꪀꪙꪲ ꪤꪴ ꫃ꪥꪒ ꪹꪓꪙ ꪕꪮꪥ ꪝꪲ ꪙꪮꪉ ꪚꪱꪙ ꪄꪺꪉ ꪘꪉꪰ ꪶꪠꪉ ꪵꪒꪙ ꪹꪣꪉ ꪒꪱꪉ ꪼꪒ ꪵꪗꪉ ꪶꪠ ꪢꪮꪉ ꪀꪱꪥ ꪵꪔꪉ ꪮꪮꪀ.

          ꪀꪺꪉ ꪥꪱꪙ ꪨꪉꪰ ꪩꪙꪴ ꪼꪜ ꪘꪱ ꪘꪉꪰ ꪊꪱ ꪶꪀ ,ꪒꪮꪙ ꫃ꪚ ꪪꪉꪲ ꪖꪀꪳ ꪋꪲ ꪣꪲ ꪝꪉꪳ ꪬꪙꪴ ꪵꪮꪉ ꪵꪪ ꪚꪱꪙ ꪵꪔꪉ ꪔꪀꪴ ꪜꪒꪰ ꪜꪱ ꪀꪉꪴ , ꪕꪱ ꫃ꪜꪙ ꪚꪮꪙ ꪤꪴ ꪩꪀꪲ ꪅꪽ ꪋꪽ. ꪝꪉꪳ ꪬꪙꪴ ꪵꪮꪉ ꪵꪪ ꪅꪽ ꪋꪽ ꪋꪲ ꪹꪑꪉ ꪘꪫꪸ ꪹꪋ ꪼꪒ ꪵꪄꪀ ꪥꪴ ꪩꪀꪲ ꪣꪱ ꪮꪙꪲ ꪤꪱꪣ ꪘꪉꪰ ꪶꪠꪉ ꪵꪒꪙ ,ꪶꪠꪉ ꪒꪮꪙ ꫃ꪚ ꪢꪮꪉ ꪀꪱꪤ ,ꪀꪫꪱꪉ ꪘꪉꪲ. ꪀꪚꪾ ꪩꪺꪉ ꪜꪴꪙ ꪢꪱ ꪼꪄ ꪤꪴ ꪩꪀꪲ ꪀꪺꪉ ꪥꪱꪙ ꫄ꪬꪉ ꪭꪲ, ꪵꪀꪉ ꫃ꪤꪒ ꪜꪙꪲ ꪖꪱꪥ ꪜꪺꪉ ꪀꪙꪲ ꫄ꪓꪥ ꪤꪴ ꪄꪮꪉ ꪝꪲ ꪙꪮꪉ ꪘꪉꪰ ꪶꪠꪉ ꪵꪒꪙ ꪹꪣꪉ ꪙꪲ.

                                                                                      ꪹꪩꪉ ꪬꪫꪙꪸ ꪥꪀꪲ