ꪚꪮꪀ ꪚꪱꪙ ꪀꪺꪉ ꪩꪱꪉ ꪈꪣꪾ ꪄꪮꪉ ꫛ ꫄ꪤꪙ ꪓꪙꪸ ꪚꪙꪸ

          ꪁꪳ ꪢꪮꪥ ꪹꪋꪱ ꫃ꪈ ꫄ꪐꪙ ꪢꪱꪫ ꪪꪽ ꫃ꪮꪒ ꪤꪴ ꪶꪔ 6, ꪹꪠꪉ ꪵꪖꪉ ꪹꪊꪉ ,ꪵꪗꪉ ꪶꪠ ꪓꪙꪸ ꪚꪙꪸ ꪠꪴ ꪤꪮꪣ ꪥꪱꪙ ꫄ꪋ ꪼꪪ ꪔꪮꪥ ꪓꪱꪙ ,ꪄꪚꪾ ꪄꪉꪲ ꪻꪬ ꪋꪴ ꫛ ꪀꪺꪉ ꪹꪭꪙ ꪵꪀꪉ ꪝꪲ ꪙꪮꪉ ꪚꪱꪙ ꪄꪺꪉ ꪡꪉꪰ ꪝꪉꪳ ꪛꪱꪥ ꪄꪚꪾ ꪣꪱ ꪕꪱꪉ ꪚꪮꪀ ꪚꪱꪙ. ꪹꪝ ꪫꪱ ꪀꪺꪉ ꪩꪱꪉ ꪈꪣꪾ, ꪩꪴꪉ ꫃ꪩꪉ ꪔꪒꪲ ꫄ꪔꪙ , ꪚꪮꪀ ꪎꪮꪙ ꪩꪴꪀ ꪨꪱꪙ ꪹꪊꪱ ꪭꪴ ꪼꪒ ꪮꪲ ꪉꪸ ꪄꪮꪉ ꪔꪱꪉ ꪚꪮꪀ ꪙꪲ ꪶꪒꪥ ꪀꪚꪾ ꪹꪋ ꫛ ꪹꪊꪱ, ꪚꪙꪸ ꪢꪱꪥ ꪝꪉꪳ ꪁꪫꪱꪣ ꪶꪕ ꪣꪱ ꪕꪱꪉ ꪔꪱꪉ ꪚꪮꪀ ꪚꪱꪙ ꪄꪮꪉ ꪶꪠꪉ ꪼꪔ ꪚꪀꪰ.

          ꪹꪝ ꪵꪔ ꪔꪱꪈ ꪚꪮꪀ ꪚꪱꪙ ꪠꪴ ꪼꪕ ꪁꪷ ꪣꪲ ꪨꪱꪥ ꪭꪒꪲ ꪅꪮꪉ ꪔꪮꪉ ꪋꪽ, ꪜꪱꪉ ꪶꪭꪥ ,ꪛꪱꪥ ꪄꪚꪾ, ꪛꪱꪥ ꪵꪏ ,ꪁꪣꪾ ꪀꪙꪲ ꪢꪱ ꪼꪄ ꪕꪣꪾ ꪭꪮꪒ ꪣꪳ ꪙꪲ. ꪵꪔ ꪙꪽ ꪹꪉꪙ ꪩꪱꪉ ꪪꪽ ꪬꪫꪱ ꪁꪷ ꪣꪲ ꪨꪱꪥ ꪔꪱꪉ ꪨꪱꪥ ꪥꪮꪉ ꪀꪱꪥ ꪝꪉꪳ ꪛꪱꪥ ꪄꪚꪾ ꪛꪱꪥ ꪵꪏ ꪵꪀꪉ ꪨꪱꪥ ꪁꪫꪱꪣ ꪶꪕ ꪵꪔ ꪔꪱꪉ ꪚꪮꪀ ꪚꪱꪙ.

          ꪹꪣ ꪜꪮꪉ ꪖꪮꪉ ꪓꪙꪸ ꪚꪙꪸ ꪠꪴ ꪥꪱꪙ ꪙꪲ, ꪼꪜ ꪭꪮꪒ ꪚꪮꪙ ꪻꪒ ꪝꪲ ꪙꪮꪉ ꪁꪷ ꪣꪲ ꪹꪏꪉ ꪼꪒ ꪡꪉꪰ ꪝꪉꪳ ꪁꪫꪱꪣ ꪶꪕ ꪹꪏꪉ ꪙꪽ, ꪼꪫ ꪭꪴ ꪼꪒ ꪶꪀꪀ ꪀꪷ ꪉꪷ ꪹꪉꪙ ꪵꪀꪉ ꪫꪱ ꫃ꪜꪙ ꪹꪏꪉ ꪏꪳ ꪠꪴ ꪼꪕ ꪓꪙꪸ ꪚꪙꪸ ꪊꪉꪰ ꪭꪀꪸ ꪒꪴ ꪒꪲ ꪭꪮꪒ ꪔꪱꪉ ꪚꪮꪀ ꪙꪲ ꫄ꪔꪀ ꪙꪽ. ꪵꪀꪉ ꪫꪱ ꫄ꪋ ꪚꪮꪀ ꪚꪱꪙ ꪼꪒ ꪹꪮꪱ ꪹꪄꪱ ꪜꪱꪉ ꪶꪭꪥ ꪭꪱꪉ ꪜꪲ ꪹꪚꪱ ꪋꪳ ꪭꪀꪸ ꪝꪲ ꪙꪮꪉ ꪠꪴ ꪼꪕ ꪣꪺꪙ ꪬꪮꪣ ꪩꪱ, ꪭꪳ ꫃ꪕꪉ ꫃ꪢꪒ ꪋꪴ ꪹꪋ ꫛ ꪻꪠ ꪁꪷ ꪭꪴꪉ ꪘꪱ ꪣꪱ ꪔꪱ.

          ꪚꪮꪀ ꪚꪱꪙ ꫄ꪩꪉ ꪨꪷ ꪔꪱꪉ ꪚꪮꪀ ꪣꪲ ꪀꪺꪉ ꪝꪉꪳ ꪛꪱꪥ ꪄꪚꪾ, ꪛꪱꪥ ꪵꪏ ,ꪣꪲ ꪀꪺꪉ ꪪꪽ ꪬꪫꪱ ꪄꪮꪉ ꪝꪲ ꪙꪮꪉ ꪠꪴ ꪼꪕ ,ꪵꪩꪫ ꪀꪺꪉ ꪊꪙꪸ ꪥꪲꪀ ꪓꪙꪸ ꪚꪙꪸ ꪠꪴ, ꪔꪱꪉ ꪚꪮꪀ ꪙꪲ ꪁꪷ ꪁꪒꪳ ꫃ꪜꪙ ꪚꪮꪙ ꫄ꪝꪉ ꪜꪴꪀ ꪋꪺꪙ ꪝꪉꪳ ꪊꪙꪸ ꪎꪲ ꪀꪣꪾ ꪀꪫꪸꪒ ꪼꪜ ꪋꪳ ꪵꪙꪙ ꪋꪴꪣ ꪮꪙꪸ ꪻꪬ ꪶꪠꪉ ꪒꪙꪲ ꪚꪮꪀ ꪚꪱꪙ. ꪹꪝ ꪹꪏꪉ ꪙꪽ, ꪢꪮꪥ ꪣꪺ ꪚꪮꪀ ꪚꪱꪙ ꪼꪄ ꪝꪉꪳ ꪀꪫꪲ ꪊꪙꪸ ꪚꪲꪉ ꪓꪙꪸ ꪚꪙꪸ ꪠꪴ ꪁꪷ ꪣꪺꪙ ꪬꪮꪣ ,ꪈꪣꪾ ꪹꪩꪱ ꪝꪉꪳ ꪜꪲ ꪹꪚꪙ ꪶꪏꪙ ꫄ꪎꪀ ꫄ꪊꪒ ꪹꪣꪉ.

          ꪀꪺꪉ ꪝꪉꪳ ꪣꪳ ꪙꪲ, ꪘꪉꪰ ꪝꪉꪳ ꫃ꪎꪣ ꪕꪱꪉ ꪄꪮꪉ ꪵꪗꪉ ꪶꪠ ꪓꪙꪸ ꪚꪙꪸ ꪠꪴ ꪹꪏꪉ: ꪕꪱꪉ ꪪꪷ ꪉꪫꪙꪸ ꪤꪱꪚ ,ꪈꪫꪙꪸ ꪬꪫꪲ ꪖꪷ, ꪭꪫꪱꪉ ꪪꪽ ꪖꪱꪤ ꪹꪚꪱ ꪁꪷ ꪘꪉꪰ ꪊꪳ ꪙꪱꪫ ꪝꪴ ꪝꪉꪳ ꪭꪫꪙꪸ ꪀꪺꪉ ꪔꪉꪲ ꪚꪮꪀ ꪚꪱꪙ ꫃ꪜꪉ ꪹꪙꪉ ꪼꪄ ꪤꪮꪙ ꪶꪋꪣ ꪔꪮꪙ ꪵꪄꪀ ꪢꪱ ꪶꪋꪣ ꪣꪺꪙ ꪜꪱꪉ ꪶꪭꪥ ꪚꪮꪀ ꪚꪱꪙ ꪓꪙꪸ ꪚꪙꪸ ꪜꪲ 2017 ꪼꪄ ꪜꪱꪉ ꫃ꪕꪉ ꪁꪙꪳ ꪣꪳ 12 ꪁꪣꪾ ꪹꪚꪙ 3.

          ꪭꪮꪒ ꪼꪅ ,ꪙꪮꪀ ꪔꪉꪲ ꪓꪙꪸ ꪚꪙꪸ ꪚꪮꪀ ꪚꪱꪙ ꪁꪷ ꪣꪲ ꪘꪉꪰ ꪨꪱꪥ ꪔꪉꪲ ꪵꪗꪉ ꪶꪠ ꪀꪺꪉ ꪀꪱ ꪹꪣꪉ ,ꪼꪄ ꪹꪙꪉ ꪘꪉꪰ ꪭꪱ ꪶꪙꪥ ,ꪘꪉꪰ ꪵꪙꪙ ꪵꪭꪫ ꪒꪱꪥ ꪹꪔꪉ ꪪꪷ ꪉꪫꪙꪸ ꪤꪱꪚ ꪘꪉꪰ ꪔꪉꪲ ꪀꪫꪱꪉ ꪚꪉꪲ. ꪹꪝ ꪹꪏꪉ ꪙꪽ ꫛ ꫄ꪤꪙ ꪓꪙꪸ ꪚꪙꪸ ꫄ꪩꪉ ꪭꪴꪉ ꪘꪱ ꪣꪱ ꪔꪱ ꪹꪝ ꪣꪲ ꪔꪱꪉ ꪚꪮꪀ ꪚꪱꪙ ꪅꪽ ꪋꪽ ꪙꪲ, ꪁꪷ ꪹꪏꪉ ꪝꪉꪳ ꪹꪉꪙ ꪩꪱꪉ ꪄꪮꪉ ꪋꪴ ꪹꪋ ꫄ꪤꪙ ꪹꪣꪉ ꪘꪉꪰ ꪙꪲ.

ꪹꪩꪉ ꪬꪫꪙꪸ ꪥꪀꪲ

          Bók bàn cuồng lang ngắm khòng côn dần Điện Biên

Cứ mỏi chạu, nghệ nhần Mào Văn Ết, dú tổ 6, phường Thanh Trường, thành phố Điện Biên Phủ lỏ dòm dan chơ vạy tói đan, khắp hẳư chu côn cuồng hươn cánh pi nọng bản khuống phăng pưng bai khắp ma tang bók bàn. Pưa va cuồng lang ngắm, lung lâng tít tờn lụk làn chảu  hụ đảy ma tang ý nghịa khòng tàng bók nị đối cắp chựa côn chảu, biền mài pưng quam tô tay mưa lài ma tang tàng bók bàn khòng phổng xùng Tày Bắc.

          Pưa té tàng bók nặn, phủ Tay cọ mi đảy lài hịt khong tòng chặn, pàng hội, bai khắp, bai xe, căm kìn mả khày tặm họt mự nị. Té nặn, ngươn làng vằn hoá cọ mi lài tàng lài dong cài pưng bai khắp, 36 bai xe cánh lài quam tô lang, té tàng bók bàn:

          Mưa póng thòng Điện Biên Phủ dan nị, pày họt bón đằư pi nọng cọ mi xương phăng đảy pưng quam tô xương nặn, vạy hụ đảy cốc cò ngo ngươn cánh va pền xương xư phủ Tay Điện Biên chắng hịa đù đì họt tàng bók nị tấc nặn. Cánh va chơ bók bàn chứng chảnh đảy àu khảu pàng hội hạng pì báu chư hịa pi nọng phủ tay muôn hòm lạ, hư tênh mết chu chựa côn phằư cọ pọm hung nả ma tà.

          Bók bàn lâng lỏ tàng bók mi cuồng pưmng bai khắp, bai xe, mi cuồng văn hoá khòng pi nọng phủ Tay, lẹo cuồng chiến dịch Điện Biên Phủ, tàng bók nị cọ pền bón pâng púc chuân pưng chiến sỹ, cằm quyết pảy chự nen chum yền hẳư phổng đìn bók bàn. Pưa xương nặn, mỏi mua bók bàn khày, pưng cựu chiến binh Điện Biên Phủ cọ muôn hòm, ngắm lau pưng khù cận hà cuồng puồng kìn đơi dú khòng chảu.

          Cuồng pưng mự nị, nẳng chu xểm tang khòng thành phố Điện Biên Phủ xương: Võ Nguyên Giáp, Nguyễn Hữu Thọ, Hoàng Văn Thái báu cọ nẳng chu nao pu pưng huyện cuồng tỉnh , bók bàn pếnh nương khày dỏn xương chôm tỏn khék ma chôm muôn pàng hội bók bàn Điện Biên pì 2017, khày pàng tênh cưn mự 12/3.

          Họt khạy, nọk tỉnh Điện Biên, bók bàn cọ mi nẳng lài tỉnh thành phố cuồng cá mương, khày nưng nẳng Hà Nội, nẳng nen heo Đại tướng Võ Nguyên Giáp nẳng tỉnh Quảng Bình. Pưa xương nặn côn dần Điện Biên lâng hung nả ma tà pưa mi tang bók bàn khặn chăn nị, cọ xương pưng ngươn lang vằn hoá khòng chu chựa dần mương nẳng nị./.