ꪭꪒꪲ ꫃ꪎꪙ ꪜꪱꪉ ꪮꪱ ꪄꪮꪉ ꪹꪋ ꫛ ꪩꪱ ꪭꪱ

꫄ꪋ ꪘꪷ ꪶꪄꪣ ꪔꪉꪷ ꪶꪀꪀ ꪊꪷ ꪬꪮꪙ ꪮꪮꪀ ꪄꪮꪥ ꪒꪙꪲ, ꪚꪮꪀ ꪚꪱꪘ ꪼꪔ ꪉꪱ ꪎꪮꪙ ꪩꪮꪙ ꪨꪷ ꪥꪱꪙ ꪝꪲ ꪙꪮꪉ ꪹꪋ ꫛ ꪩꪱ ꪭꪱ ꪘꪉꪷ ꪚꪱꪙ ꪼꪕ ꪎꪱ ꪜꪲ ꪔꪮꪉ ꪭꪫꪙꪸ ꪹꪣꪉ ꪩꪱ ꪔꪉꪲ ꫄ꪎꪙ ꪨꪱ ꫃ꪤꪒ ꪼꪄ ꪜꪱꪉ ꪶꪭꪥ ꪝꪱꪉ ꪮꪱ ꪼꪫ ꪎꪷ ꪡꪱ ꪋꪱꪉ ꪵꪒꪒ ꪋꪱꪉ ꪶꪠꪙ , ꪻꪬ ꪢꪱꪀ ꪼꪣ ꫃ꪜꪙ ꪨꪱꪥ ꪹꪄꪱ ꪠꪱꪥ 6ꪜꪙ ꫃ꪮ , ꪋꪴ ꫛ ꪻꪠ ꪁꪾ ꪬꪱꪫ ꪅꪽ ꪢꪽ ꪥꪙꪳ, ꪎꪮꪉ ꪣꪱ ꪣꪲ ꪁꪫꪱꪣ ꪤꪮꪙ ꫄ꪮꪙ ꪡꪱ ꪒꪙꪲ ꪵꪖꪉ ꫄ꪖꪙ ꪁꪣꪴ ꪀꪺꪣ ꪼꪜ ꪋꪳ ꪚꪱꪙ ꪄꪺꪉ. ꪮꪮꪀ ꪘꪱ ꪼꪄ ꪜꪱꪉ ꪨꪷ ꪮꪱꪙ ꪢꪷ ꪮꪮꪀ ꪔꪉꪸ ꪘꪉꪷ ꪀꪺꪉ ꪶꪠꪉ. ꪕꪮꪥ ꪝꪸ ꪙꪮꪉ ꪮꪱꪙ ꪢꪷ ꪨꪷ ꫛ ꪭꪴ ꪋꪱꪉ ꪣꪱ ꪕꪱꪉ ꪶꪣꪒ ꪢꪷ 6ꪎꪙ ꪠꪮꪙ, ꪹꪤꪱ ꪤꪱ ꪻꪬ ꫛ ꫄ꪊꪚ ꪼꪒ ꪼꪎ ꪘꪱꪫ ꪬꪱꪫ ꪵꪭꪉ ꪄꪮꪥ ꫄ꪄ ꪄꪮꪥ ꪄꪱꪙ, ꪻꪠ ꪼꪒ ꪮꪱꪥ ꪶꪣꪈ ꫃ꪎꪙ ꪡꪮꪙ ꪻꪬ ꪬꪮꪣ ꪒꪲ ꪨꪷ ꫃ꪜꪙ ꪩꪀꪴ ꪩꪉꪸ ꪩꪀꪴ ꪙꪱ ꪨꪷ ꪣꪱ ꪬꪮꪣ ꪹꪭꪱ. ꪙꪮꪀ ꪙꪽ ꪮꪮꪀ ꪑꪉ ꪣꪲ ꪊꪉꪲ ꪁꪫꪙꪸ ꪓꪸ ꪹꪠꪉ , ꪮꪱꪥ ꪙꪮꪉ ꪚꪱꪙ ꪄꪺꪉ ꪤꪴ ꪚꪱꪙ ꪼꪔ ꪙꪱ ꪹꪘ ꪵꪀꪉ ꪤꪴ ꪻꪎ ꪊꪣꪾ ꪣꪱ ꪶꪭꪣ ꪹꪭꪱ.

ꪅꪽ ꪄꪱꪉ ꪻꪬ ꪫꪀꪸ ꫃ꪥꪒ ꪭꪒꪲ ꪝꪱꪉ ꪮꪱ, ꪹꪊꪱ ꪶꪣꪒ ꪄꪱ 2 ꪶꪔ ꪢꪴ, ꪶꪔ ꫛ ꪼꪫ ꫃ꪥꪒ ꪝꪱꪉ ꪮꪱ, ꪶꪔ ꫜ ꪼꪫ ꫄ꪏ ꪒꪣꪾ ꫄ꪏ ꪜꪱꪉ ꪄꪮꪉ ꪹꪭꪙ ꪹꪊꪱ. ꪝꪉꪳ ꪩꪀꪴ ꪩꪉꪸ ꪩꪴꪀ ꪙꪱ ꪄꪮꪉ ꪮꪱꪥ ꪶꪣꪒ ꪢꪮꪥ ꫜ ꪜꪺ ꪼꪜ ꪶꪔ ꪼꪀ ꪹꪚꪱ ꪁꪷ ꪶꪔ ꫃ꪜꪒ ꫜ, ꪬꪷ ꪹꪄꪱ ꪮꪮꪙ , ꪊꪱꪥ ꪹꪨꪱ, ꪢꪱꪀ ꪘꪺꪥ ꪣꪲ ꪘꪉꪷ ꪎꪺꪙ ꪼꪫ ꪥꪒꪷ ꫄ꪏ ꪵꪀꪉ ꪊꪳ ꫄ꪮꪙ ꪶꪀꪉ ꪄꪙꪴ ꪄꪮꪉ ꪮꪱꪥ ꪢꪷ. ꪝꪱꪉ ꪮꪱ ꫄ꪩꪉ ꪼꪒ ꫃ꪤꪒ ꪘꪉꪾ ꪹꪭꪙ ꪮꪱꪥ ꪶꪣꪒ , ꪘꪉꪷ ꪘꪲ ꪝꪲ ꪙꪮꪉ ꪔꪉꪷ ꪀꪷ ꪔꪱꪫ ꪀꪷ ꪀꪺꪥ ꪀꪷ ꪮꪱꪥ ꪵꪀꪉ ꪵꪔꪫ ꪝꪉꪳ ꪔꪱꪉ ꪶꪔ ꪎꪱꪙ ꪵꪔ ꪼꪣ ꪹꪏꪉ ꪶꪔ ꪶꪙꪁ ꪊꪀꪷ ꪊꪽ ꪶꪔ ꪣꪱ, ꪚꪮꪀ ꪣꪱ ꪚꪮꪀ ꪀꪱꪥ ꪵꪀꪉ ꪚꪮꪀ ꪚꪱꪙ...ꪅꪽ ꪅꪱꪉ ꪵꪩꪫ ꪮꪱꪥ ꪶꪣꪒ ꪔꪉ ꪶꪀꪀ ꪶꪩꪉ ꪕꪱꪣ ꪀꪱꪫ ꫄ꪣꪥ ꪹꪜꪱ ꪜꪴ, ꪹꪊꪱ ꪙꪣꪾ ꪹꪊꪱ ꪒꪙꪲ, ꪡꪱ ꪵꪖꪙ ꪵꪖꪙ ꫄ꪗꪙ ꪣꪱ ꪀꪙꪲ ꪣꪺꪙ ꪘꪉꪷ ꪝꪾ ꪵꪣ ꫄ꪤꪙ ꪚꪱꪙ , ꪢꪮꪉ ꪁꪮꪉ ꪁꪣꪳ ꪀꪺꪣ ꪻꪬ ꪢꪮꪉ ꪁꪮꪉ ꪁꪣꪳ ꪀꪺꪣ ꪻꪬ ꪋꪴ ꫛ ꪣꪲ ꪜꪺꪉ ꪀꪙꪲ ꪩꪺꪉ ꪤꪴ ꪋꪣꪴ ꪮꪙꪸ, ꫃ꪥꪒ ꪹꪥꪙ ꪼꪒ ꪢꪱꪀ ꪼꪒ ꪣꪺ.

꫄ꪋ ꪮꪱꪥ ꪶꪣꪒ ꪕꪱꪣ ꪵꪩꪫ, ꪝꪉꪳ ꪩꪴꪀ ꪩꪉꪸ ꪩꪀꪴ ꪙꪱ ꪄꪮꪉ ꪮꪱꪥ ꪶꪣꪒ ꪹꪮꪱ ꪹꪋꪉ ꪄꪮꪉ ꪹꪊꪱ ꪜꪺ ꪣꪱ ꪻꪎ ꪝꪱꪙ ꫄ꪏ ꪻꪎ ꪝꪱꪙ ꪼꪫ ꪮꪱꪥ ꪶꪣꪒ ꪕꪱꪣ ꪵꪀꪉ ꪎꪷ ꪡꪱ ꪵꪖꪙ ꪣꪱ ꪀꪙꪲ ꪵꪩꪫ ꪁꪣꪳ ꪀꪺꪣ ꪻꪬ ꪩꪀꪴ ꪨꪱꪙ ꪬꪱꪫ ꪅꪽ, ꫃ꪤꪒ ꪹꪥꪙ ꪼꪒ ꪹꪏꪉ ꪩꪱꪉ ꪮꪱꪫ , ꪵꪔꪉ ꪩꪉꪸ ꪎꪒꪷ ꪎꪉꪲ ꪢꪱ ꪵꪝ ꪨꪱꪥ ꪩꪱꪙ... ꫃ꪥꪒ ꪵꪩꪫ ꫛ ꪵꪔꪉ ꪻꪋ ꪶꪣꪒ ꪜꪽ ꪻꪬ ꪢꪮꪥ ꫛ ꪄꪱ ꪼꪀ ꫜ ꪵꪀꪉ ꪬꪷ ꪹꪄꪱ ꫛ ꪹꪣ ꪹꪭꪙ.

ꪕꪱꪣ ꪵꪩꪫ, ꪮꪱꪥ ꪶꪣꪒ ꪝꪮꪣ ꪚꪱꪙ ꪄꪺꪉ ꪀꪙꪲ ꪹꪨꪱ ꪀꪙꪲ ꪹꪄꪱ ꪮꪙꪸ ꪣꪺꪙ ꪄꪚꪾ ꪵꪏ ꪮꪣ ꪏꪉꪷ ꪚꪮꪀ ꪀꪚꪾ ꪝꪉꪳ ꪛꪱꪥ ꪄꪚꪾ ꪛꪱꪥ ꪵꪏ ꪹꪏꪉ ꪕꪉꪷ ꪚꪉꪷꪶ ꪕꪉꪽ ꪛꪴ, ꪵꪏ ꪄꪽ, ꪨꪷ ꪝꪉꪳ ꪛꪱꪥ ꪵꪏ ꪔꪉꪷ ꪶꪀꪀ ꪵꪔ ꪫꪀꪸ ꫃ꪤꪒ ꪹꪥꪙ ꪼꪭ ꪙꪱ, ꪵꪀꪫꪙ ꫄ꪅꪥ ꫃ꪤꪒ ꪝꪲ ꫃ꪤꪒ ꪙꪮꪉ ꪣꪸ ꫛ ꪑꪉꪷ ꪹꪮꪱ ꪀꪽ ꫃ꪜꪙ ꪠꪺ ꫃ꪜꪙ ꪣꪸ ꪵꪕꪉ ꪹꪭꪙ ꪨꪱ ꪤꪱꪫꪌ

ꪊꪣꪴ ꪢꪴ ꪝꪲ ꪙꪮꪉ ꪹꪋ ꫛ ꪩꪱ ꪭꪱ ꪘꪉꪷ ꫄ꪎꪙ ꪨꪱ ꫄ꪩꪉ ꪋꪳ ꪬꪣꪸ ꪵꪀꪉ ꫃ꪜꪉ ꪼꪄ ꪝꪉꪳ ꪭꪒꪲ ꪅꪮꪉ ꪔꪮꪉ ꪋꪽ ꪀꪺꪉ ꪙꪽ ꪣꪲ ꪭꪒꪲ ꫃ꪎꪙ ꪜꪱꪉ ꪮꪱ, ꪭꪒꪲ ꪙꪲ ꪼꪒ ꪋꪙꪸ ꪀꪱꪥ ꪵꪔ ꪋꪺ ꪹꪜꪱ ꫄ꪓꪥ ꪜꪴ ꪢꪱ ꪭꪮꪒ ꪋꪺ ꪩꪀꪴ ꫄ꪓꪥ ꪨꪱꪙ ꪵꪀꪉ ꪒꪴ ꪯꪽ ꪨꪷ ꪵꪊꪀ ꪑꪣꪲ ꪄꪮꪉ ꪹꪊꪱ. ꪜꪱꪉ ꪮꪱ ꪨꪷ ꪤꪱꪘ ꪼꪫ ꪝꪲ ꪙꪮꪉ ꪀꪺꪉ ꪚꪱꪙ ꪁꪷ ꪹꪏꪉ ꪝꪉꪳ ꪚꪱꪙ ꪤꪴ ꪻꪎ ꪊꪣꪾ ꪣꪱ ꪶꪭꪣ ꪹꪭꪱ, ꪮꪙꪲ ꪣꪺꪙ ꪕꪙꪸ ꪶꪕ ꪵꪮꪚ ꪭꪮꪀ ꪘꪉꪷ ꪀꪽ ꪩꪺꪉ ꫃ꪥꪒ ꪀꪙꪲ, ꪔꪣꪴ ꪝꪺ ꪬꪮꪉ ꪝꪲ ꪩꪺꪉ ꪙꪮꪉ ꪁꪱꪒ ꪎꪱꪙ ꪀꪽ ꪔꪉꪷ ꪵꪔꪉ ꪚꪱꪘ ꪹꪣꪉ ꪭꪉꪷ ꪣꪲ ꪒꪲ ꪢꪱ.

                                                ꪹꪩꪉ ꪵꪭꪉ ꪵꪔꪣ - ꪥꪀꪲ

Hịt sên pang a khong chựa côn La Ha

Chơ nó khồm tẳng cốc chók hòn ók khói đin, bók bàn táy nga sòn lon lỏ dan pi nọng chựa côn La Ha nẳng bản Tạy xã Pi Toong huyện Mương La, tỉnh Sơn La khày pang hội “ Pang a” vạy xo phạ chang đét chang phôn, hảu mak mạy pên lài khảu phải pên ế, chủ côn phaư cọ hảo khặn mẳn dưn, xong ma mi quam dọn ơn phạ đin, thánh thân cụm cuôm pảy chự bản khuống. Ók nả khày pang lỏ ải mo ók tiêng cuông phổng. Toi pi nọng ải mo lỏ côn hụ chang ma tang một mo, hụ dượng mo xên phon, dàu dà hảu côn chếp đảy sảy nào hảo hanh, khói khớ khói khàn, phaư đảy ải một xên phon hảu pên lụk liệng liệng na lỏ ma hôm hạu. Nọk nặn ók nhăng pưng chính quyên, ải nọng bản khuống dú bản tảư na nừa cánh dú sảư chăm ma chôm muôn.

Khặn khang hảu vịa dệt hịt pang a, chảu mo khả 2 tô mù, tô nưng vạy dệt hịt, tô nưng vạy sư pảu pú mưa lang khong chảu hươn. Pưng lụk liệng, lụk na khong ải mo mỏi côn pua pày tô cáy báu cọ tô pết nưng, hó khảu ón, chai lảu, mák nuối chảu mi nẳng xuân vạy pày dắt sơ cánh chứ ờn công khun khong ải mo. Pang a lâng đảy dệt nẳng hươn ải mo, nẳng nỉ pi nọng tẳng co tào, cò cuổi, co ỏi cánh teo pưng tàng tô àu mạy sàn xương tô nọc, chắc chắn, tô mạ, bók mạ, bók cài, bók ban...Khặn khang lẹo ải mo tẳng cốc lông tam cáo mơi pảu pú, chảu nặm chảu đin, phạ then ma kin muôn nẳng po me dân bản, mong cong cụm cuôm hảu chu côn mi puông kin luông dú chum yên, đảy mák đảy mua.

Chơ ải mo tam lẹo, pưng lụk liệng khong ải một au chương khong chảu pua ma dắt sư sáư pan vạy ải một tam cánh xo phạ then ma kin lẹo cụm cuôm hảu lụk lan hảo khặn, dệt dượn đảy xương lang áo, tảnh liệng sắt sính mả pe lai lan...dệt lẹo côn tánh chạư một păn hảu mỏi côn kha cáy nưng cánh hó khảu nưng mưa hươn.

Tam lẹo, ải một pọm cắp pi nọng baảnkhuống kin lảu, kin khảu, ín muôn khắp xe ỏm sặng bók cắp pưng bai khắp, bai xe xương tăng bẳng, tăng bu, xe khăn, lỏ pưng bai xe tẳng cốc té vịa dệt dượn hay na khong pi nọng. Té pang a nị, lai đôi báo xao bản tảu na nừa ma hên căn, quén khơi dệt pi dệt nọng mi côn nhăng àu căn pên phua pên mia tánh hươn la dảo.

Chủm mú pi nọng chựa côn La Ha nẳng Sơn La lâng chự hiêm cánh pếnh khày pưng hịt khong tong chặn cuông nặn mi hịt xên pang a, hịt nị đảy chiên cái té chua pảu đơi pú ma họt chua lụk đơi lan cánh đu ặn lỏ trách nhiệm khong chảu. Pang a lỏ dan vạy pi nọng cuông bản cọ xương pưng bản dú sảư chăm ma hôm hạu, ỉn muôn, tiện tô, ép học luông dệt kin, tủm pua hỏng pi luông nọng cạt san căn tẳng tánh bản mương hăng mi đi mả./.

                                                Lường Hạnh - TTTB