Hịt khong cưới đòng khòng chựa côn Mảng Lai Chầu

          Côn Mảng lâng lựa mự cưới đòng cuồng gian mák mua kiếu nhăm lẹo. Mự cưới lỏ mự đì vên chăn mự xăn vên chép, té dáo bườn 10 ầm lịch pì cón họt bườn 3 ầm lịch pì lằng. Họt mự cưới hươn trai àu chương khòng pày tang hươn nhinh hôm mi: 20 mằn ngơn hạo, 2 tạ mù, cáy té 9 họt 11 tồ, lảu hày nưng, khảu xàn 2 yển cánh lài chau phải. Cận hà xưa nhất cuồng số pưng tàng chương khòng àu pày tang hươn nhinh lỏ 2 chúc nhứa tồ ho, báu cọ nhứa nù pá dảng, cắp dáo 30 tồ ho, tồ nù táo khửn. Mỏi hó đảy àu mày đành cánh mày đằm phúk khẳm khép cằn. Cuồng nặn mày đành tàng nả hẳư côn trai, cánh mày đằm tàng nả hẳư côn nhinh. Cón chơ kìn khảu kìn lảu, mú côn tang hươn trai hôm mi po xứ me lam, khười mắư cánh tàng nả hươn trai mưa năng cổm hùa lạy tó nả pảu pú, ải êm khòng pặư mắư vạy dọn ờn cồng hanh liệng xùng chùng nhắư, lằng nặn tó nả luông chứng mài khòng po me pi nọng ma chôm hặp pang cưới, tang hươn trai xứp tàm cổm hùa lạy chu côn vạy dọn ờn, lẹo xò tỏn pặư ma hươn phùa.

          Lằng chơ tổ chức pàng cưới nẳng hươn nhinh lẹo, cón chơ àu lụk pặư ók khói hươn, tàng nả tang hươn nhinh chi xáo chu luông ta mỏ mỉ xắư nả tà, thók nặm cánh ta pông xắư po xứ me lam cánh mú côn tỏn pặư. Côn Mảng lâng ngắm àu lụk pặư ók khói hươn lỏ đảy mài xìa, vạy pùa phạ báu le hền cẳn tang. Pưa xương nặn ta đảy nhương lài mỏ mỉ xắư nả tà, ta đảy lài pông xắư côn pày tỏn pặư nhương đì. Cuồng tênh căm mự cưới thứ 3. Me da cánh pưng me à, me nạ chi pọm cắp 3 côn trai cánh 2 côn nhinh pày tỏn đoàn xống pặư nẳng liệp tang vạy xứp tàm tổ chức pang cưới nẳng hươn chảu. Chương bốn khòng lụk nhinh côn Mảng àu pày hươn phùa hôm mi: khẳng cà bèm nưng vạy xắư xuổng xửa, phải pháy mày pe, pọm cắp mịt cuốc, mỏ hék ték pốk lỏ pưng tàng chương khòng ải êm lụk pặư khá hẳư pày hươn phùa. Nọk nặn ók, ải êm lụk pặư nhăng hẳư đồi cáy nưng dệt chựa, mòng cong lụk tảu tánh hươn là dảo úm ình, mi lụk nhinh lụk trai nẳng cằn. Pưng tàng chương khòng nị chi đảy tang hươn phùa choi àu pày tang hươn phùa.

          Mú côn xống pặư chơ pày họt hươn phùa chi pằn pền 2 mú, pày khửn lày dòm hẳư nhinh trai riềng. Nẳng tìn lày chi mi tay hươn khười mắư cáo mơi 2 chén lảu vạy dọn ờn chu cônm ma chôm hặp pang cưới. Chơ khảu cuồng hươn, pặư mắư chi đảy po pú me da chùng khèn khảu cuồng hỏng non, họt chơ kìn, lụk pặư cọ pọm ók ma dệt khảu lanh cành ngai toi tay hươn. Lưn xưa lák vẹt xắư pang cưới khòng chựa côn ứn, họt pựa kìn đồi phùa mia hẳư mắư đảy hák dệt khảu kìn riềng, pưa pi nọng ngắm, va chắp hội nọi nưng căm kìn khòng khék hư lằng nị chi liệng lụk dạk, dệt kìn báu mả khửn. Lằng chơ kìn cưới lẹo chu côn pọm khắp tóp cằn, cắp phắư mon 2 dảo 3 tang chi dón hà cằn ằn đằư báu hê chọp hê châng, cánh khắp pưng bai khắp bók lụk xòn làn, chôm mâng hẳư 2 đồi phùa mia nóm.

          Hịt cưới đòng khòng côn Mảng cón nị đảy dệt cuồng 4 mự 4 cưn nẳng hươn trai cánh hươn nhinh. Hák va khay nị chấp năm nết kìn liêm  dú vằn hoá mắư, phảy dòm cuồng vịa cưới đòng, po me pi nọng tổ chức 2 mự 2 cưn. Pì bườn cài pày, nen vằn hoá khặn chăn cuồng pang cưới đòng khòng côn Mảng nẳng xã Nặm Ban, huyện Nặm Nhun, tỉnh Lai Chầu nhăng đảy hiềm chự té chua nị họt chua nắư./.

                                      Chẻo Thu-Tòng Anh dịch

                    ꪭꪒꪲ ꪅꪮꪉ ꪹꪀꪥ ꪒꪮꪉ ꪄꪮꪉ ꫛ ꪢꪱꪉ ꪹꪨꪱ ꪹꪊꪱ

          ꫛ ꪢꪱꪉ ꫄ꪩꪉ ꪹꪩꪀ ꪣꪳ ꪹꪀꪥ ꪒꪮꪉ ꪀꪺꪉ ꪥꪱꪙ ꪢꪱꪀ ꪣꪺ ꪀꪫꪸ ꪑꪣꪾ ꪵꪩꪫ. ꪣꪳ ꪹꪀꪥ ꪨꪷ ꪣꪳ ꪒꪲ ꫃ꪫꪙ ꪋꪽ ꪵꪔ ꪤꪱꪫ ꪹꪚꪙ 10 ꫄ꪮꪣ ꪩꪀꪲ ꪜꪲ ꪀꪮꪙ ꪭꪮꪒ ꪹꪚꪙ 3 ꫄ꪮꪣ ꪩꪀꪲ ꪜꪲ ꪨꪉꪰ. ꪭꪮꪒ ꪣꪳ ꪹꪀꪥ ꪹꪭꪙ ꪋꪱꪥ ꪹꪮꪱ ꪹꪋꪉ ꪄꪮꪉ ꪼꪜ ꪕꪱꪉ ꪹꪭꪙ ꪑꪉꪲ ꪶꪭꪣ ꪣꪲ: 20 ꪢꪽ ꫄ꪉꪙ ꪭꪱꪫ 2 ꪕꪱ ꪢꪴ 9-11 ꪶꪔ ꪼꪀ ꪹꪨꪱ ꪼꪬ ꫜ ꪹꪄꪱ ꪎꪱꪙ 2 ꪮꪙꪸ ꪵꪀꪉ ꪨꪱꪥ ꪹꪋꪱ ꪠꪱꪥ. ꪹꪋꪉ ꫄ꪁꪙ ꪬꪱ ꫄ꪐꪒ ꪨꪷ 2 ꪊꪀꪴ ꪹꪐ ꪶꪔ ꪭꪷ ꪹꪚꪱ ꪁꪷ ꪹꪐ ꪘꪴ ꪜꪱ ꪤꪱꪉ ꪀꪚꪾ ꪤꪱꪫ 30 ꪶꪔ ꪘꪴ ꪶꪔ ꪭꪷ ꪔꪱꪫ ꪄꪙꪳ. ꪢꪮꪥ ꪬꪷ ꪼꪒ ꪹꪮꪱ ꪼꪢ ꪵꪒꪉ ꪵꪀꪉ ꪼꪢ ꪒꪣꪾ ꪠꪀꪴ ꪄꪱꪣ ꪵꪄꪚ ꪀꪽ. ꪼꪢ ꪵꪒꪉ ꪔꪱꪉ ꪢꪱ ꪻꪬ ꫛ ꪋꪱꪥ ꪼꪢ ꪒꪣꪾ ꪔꪱꪉ ꪢꪱ ꪻꪬ ꫛ ꪑꪉꪲ. ꪀꪮꪙ ꫄ꪋ ꪀꪙꪲ ꪹꪨꪱ ꪀꪙꪲ ꪹꪄꪱ ꪢꪴ ꫛ ꪕꪱꪉ ꪹꪭꪙ ꪋꪱꪥ ꪶꪭꪣ ꪣꪲ ꪝꪷ ꪎꪳ ꪵꪣ ꪩꪱꪣ ꪹꪄꪥ ꪻꪢ ꪵꪀꪉ ꪔꪱꪉ ꪢꪱ ꪹꪭꪙ ꪋꪱꪥ ꪹꪣ ꪙꪉꪰ ꪶꪀꪣ ꪬꪺ ꪼꪩ ꪔꪷ ꪢꪱ ꪹꪜꪱ ꪜꪴ ꪮꪱꪥ ꫃ꪯꪣ ꪄꪮꪉ ꪻꪝ ꪻꪢ ꪼꪫ ꪥꪮꪙ ꫄ꪮꪙ ꪶꪀꪉ ꪵꪭꪉ ꪩꪉꪸ ꪎꪉꪴ ꪊꪉꪴ ꪻꪐ ꪨꪉꪰ ꪙꪽ ꪔꪷ ꪢꪱ ꪩꪺꪉ ꪊꪉꪳ ꪢꪱꪥ ꪄꪮꪉ ꪝꪲ ꪙꪮꪉ ꪣꪱ ꪶꪋꪣ ꪭꪚꪾ ꪜꪱꪉ ꪹꪀꪥ ꪕꪱꪉ ꪹꪭꪙ ꪋꪱꪥ ꪎꪚꪳ ꪔꪱꪣ ꪶꪀꪣ ꪬꪺ ꪼꪩ ꪋꪴ ꫛ ꪼꪫ ꪥꪮꪙ ꫄ꪮꪙ ꪵꪩꪫ ꪎꪷ ꪔꪮꪙ ꪻꪝ ꪼꪜ ꪹꪭꪙ ꪠꪺ.

          ꪩꪉꪰ ꫄ꪋ ꪶꪔ ꪊꪀꪳ ꪜꪱꪉ ꪹꪀꪥ ꪘꪉꪰ ꪹꪭꪙ ꪑꪉꪲ ꪵꪩꪫ ꪀꪮꪙ ꫄ꪋ ꪹꪮꪱ ꪩꪀꪴ ꪻꪝ ꪮꪮꪀ ꪄꪮꪥ ꪹꪭꪙ ꪔꪱꪉ ꪕꪱꪉ ꪹꪭꪙ ꪑꪉꪲ ꪋꪲ ꪎꪱꪫ ꪋꪴ ꪩꪺꪉ ꪕꪱ ꪢꪷ ꪢꪲ ꪻꪎ ꪢꪱ ꪔꪱ ꪖꪮꪀ ꪙꪣꪾ ꪵꪀꪉ ꪕꪱ ꪶꪝꪉ ꪻꪎ ꪝꪷ ꪎꪳ ꪵꪣ ꪩꪱꪣ ꪵꪀꪉ ꪢꪴ ꫛ ꪔꪮꪙ ꪻꪝ. ꫛ ꪢꪱꪉ ꫄ꪩꪉ ꪈꪣꪾ ꪹꪮꪱ ꪩꪀꪴ ꪻꪝ ꪮꪮꪀ ꪄꪮꪥ ꪹꪭꪙ ꪨꪷ ꪼꪒ ꪢꪱꪥ ꪎꪸ ꪼꪫ ꪜꪺ ꪡꪱ ꪹꪚꪱ ꪵꪩ ꫃ꪬꪙ ꪀꪽ ꪕꪱꪉ. ꪹꪝ ꪹꪏꪉ ꪙꪽ ꪕꪱ ꪼꪒ ꪹꪑꪉ ꪨꪱꪥ ꪢꪷ ꪢꪲ ꪻꪎ ꪢꪱ ꪔꪱ ꪕꪱ ꪼꪒ ꪨꪱꪥ ꪶꪝꪉ ꪻꪎ ꫛ ꪼꪜ ꪔꪮꪙ ꪻꪝ ꪹꪑꪉ ꪒꪲ. ꪀꪺꪉ ꫃ꪕꪉ ꪁꪣꪾ ꪣꪳ ꪹꪀꪥ ꪖꪳ 3 ꪹꪣ ꪤꪱ ꪵꪀꪉ ꪝꪉꪳ ꪵꪣ ꪮꪱ ꪵꪣ ꪙꪱ ꪋꪲ ꪝꪮꪣ ꪀꪚꪾ 3 ꫛ ꪋꪱꪥ ꪵꪀꪉ 2 ꫛ ꪑꪉꪲ ꪼꪜ ꪔꪮꪙ ꪒꪫꪱꪙ ꪶꪎꪉ ꪻꪝ ꪘꪉꪰ ꪩꪚꪸ ꪕꪱꪉ ꪼꪫ ꪎꪚꪳ ꪔꪱꪣ ꪶꪔ ꪊꪀꪳ ꪜꪱꪉ ꪹꪀꪥ ꪘꪉꪰ ꪹꪭꪙ ꪹꪊꪱ. ꪹꪋꪉ ꪄꪱ ꪩꪀꪴ ꪑꪉꪲ ꪼꪜ ꪹꪭꪙ ꪠꪺ ꪶꪭꪣ ꪣꪲ: ꪄꪉꪰ ꪀꪱ ꪵꪚꪣ ꫜ ꪼꪫ ꪻꪎ ꪎꪺꪉ ꪹꪎ ꪠꪱꪥ ꪼꪠ ꪼꪢ ꪵꪝ ꪝꪮꪣ ꪀꪚꪾ ꪀꪺꪀ ꪣꪒꪲ ꪢꪷ ꪵꪬꪀ ꪵꪔꪀ ꪶꪜꪀ. ꪙꪮꪀ ꪙꪽ ꪮꪮꪀ ꪮꪱꪥ ꫃ꪯꪣ ꪩꪀꪴ ꪻꪝ ꪑꪉꪰ ꪻꪬ ꪶꪒꪥ ꪼꪀ ꫜ ꫃ꪥꪒ ꪹꪋ.

          ꪢꪴ ꫛ ꪶꪎꪉ ꪻꪝ ꫄ꪋ ꪼꪜ ꪭꪮꪒ ꪹꪭꪙ ꪠꪺ ꪋꪲ ꪜꪽ ꫃ꪜꪙ 2 ꪢꪴ ꪄꪙꪳ ꪼꪨ ꪤꪮꪣ ꪻꪬ ꫛ ꪑꪉꪲ ꪵꪀꪉ ꫛ ꪋꪱꪥ ꪤꪉꪸ. ꪢꪉꪰ ꪔꪙꪲ ꪼꪨ ꪋꪲ ꪣꪲ ꪼꪕ ꪹꪭꪙ ꪹꪄꪥ ꪻꪢ ꪀꪱꪫ ꫄ꪣꪥ 2 ꪵꪊꪙ ꪹꪨꪱ ꪼꪫ ꪥꪮꪙ ꫄ꪮꪙ ꪋꪴ ꫛ ꪣꪱ ꪶꪋꪣ ꪭꪚꪾ ꪜꪱꪉ ꪹꪀꪥ . ꫄ꪋ ꪹꪄꪱ ꪀꪺꪉ ꪹꪭꪙ ꪻꪝ ꪻꪢ ꪋꪲ ꪼꪒ ꪝꪷ ꪜꪴ ꪹꪣ ꪤꪱ ꪊꪉꪴ ꪵꪄꪙ ꪹꪄꪱ ꪀꪺꪉ ꪬꪮꪉ ꪙꪮꪙ ꪭꪮꪒ ꫄ꪋ ꪀꪙꪲ ꪩꪀꪴ ꪻꪝ ꪁꪷ ꪝꪮꪣ ꪮꪮꪀ ꪣꪱ ꫃ꪥꪒ ꪹꪄꪱ ꪵꪩꪉ ꪵꪀꪉ ꪉꪱꪥ ꪕꪮꪥ ꪼꪕ ꪹꪭꪙ. ꪬꪱꪀ ꪫꪱ ꪭꪮꪒ ꫄ꪋ ꪀꪙꪲ ꪶꪒꪥ ꪠꪺ ꪣꪸ ꪻꪬ ꪻꪢ ꪼꪒ ꫃ꪥꪒ ꪹꪄꪱ ꪀꪙꪲ ꪤꪉꪸ, ꪹꪝ ꪝꪲ ꪙꪮꪉ ꪈꪣꪾ ꪫꪱ ꪊꪚꪾ ꪶꪭꪥ ꪙꪮꪥ ꫜ ꪁꪣꪾ ꪀꪙꪲ ꪄꪮꪉ ꪵꪄꪀ ꪭꪳ ꪨꪉꪰ ꪙꪲ ꪋꪲ ꪩꪉꪸ ꪩꪀꪴ ꪤꪱꪀ ꫃ꪥꪒ ꪀꪙꪲ ꪹꪚꪱ ꪢꪱ ꪄꪙꪳ. ꪨꪉꪰ ꫄ꪋ ꪀꪙꪲ ꪹꪀꪥ ꪵꪩꪫ ꪋꪴ ꫛ ꪝꪮꪣ ꪄꪚꪾ ꪔꪮꪚ ꪀꪽ ꪄꪚꪾ ꪚꪮꪀ ꪩꪀꪴ ꪎꪮꪙ ꪨꪱꪙ ꪶꪋꪣ ꫄ꪣꪉ ꪻꪬ ꪶꪒꪥ ꪠꪺ ꪣꪸ ꪻꪬ ꪻꪢ ꪮꪣꪴ ꪮꪉꪲ.

          ꪭꪒꪲ ꪹꪀꪥ ꪒꪮꪉ ꪄꪮꪉ ꫛ ꪢꪱꪉ ꪀꪮꪙ ꪙꪲ ꪼꪒ ꪶꪔ ꪊꪀꪳ ꪀꪺꪉ 4 ꪣꪳ 4 ꪁꪙꪳ ꪘꪉꪰ ꪹꪭꪙ ꪋꪱꪥ ꪵꪀꪉ ꪹꪭꪙ ꪑꪉꪲ ꪬꪱꪀ ꪫꪱ ꪼꪅ ꪙꪲ ꫄ꪊꪚ ꪙꪣꪾ ꫃ꪢꪒ ꪀꪙꪲ ꪩꪣꪸ ꪤꪴ ꪪꪽ ꪬꪫꪱ ꪻꪢ ꪼꪠ ꪤꪮꪣ ꪀꪺꪉ ꪫꪀꪸ ꪹꪀꪥ ꪒꪮꪉ ꪝꪷ ꪵꪣ ꪝꪲ ꪙꪮꪉ ꪶꪔ ꪊꪀꪳ 2 ꪣꪳ 2 ꪁꪙꪳ. ꪼꪅ ꪙꪲ ꪵꪙꪙ ꪪꪽ ꪬꪫꪱ ꪅꪽ ꪋꪽ ꪄꪮꪉ ꫛ ꪢꪱꪉ ꪀꪺꪉ ꪜꪱꪉ ꪹꪀꪥ ꪒꪮꪉ ꪘꪉꪰ ꪎꪱ ꪙꪣꪾ ꪚꪱꪙ ꪭꪫꪙꪸ ꪙꪣꪾ ꪑꪙꪴ ꪔꪉꪲ ꪹꪨꪱ ꪹꪊꪱ ꪑꪉꪰ ꪼꪒ ꪬꪣꪸ ꪋꪳ ꪵꪔ ꪋꪺ ꪙꪲ ꪭꪮꪒ ꪋꪺ ꪻꪙ.

                                                                               ꪵꪊꪫ ꪖꪴ-ꪕꪮꪉ ꪵꪯꪉ ꪥꪀꪲ