꫄ꪋ ꪜꪱ: ꪩꪺꪉ ꪢꪱ ꪼꪄ ꪘꪉꪰ ꪀꪫꪲꪉ ꪐꪱꪥ

           ꪹꪣ ꪜꪮꪉ ꪖꪮꪉ ꪭꪮꪒ ꪕꪱ ꪹꪭ ꪜꪱꪀ ꪮꪺꪙ ꪹꪀꪱ, ꫃ꪬꪙ ꪩꪺꪙ ꪕꪷ ꫛ ꪄꪱꪥ ꪜꪱ ꪀꪴꪉ. ꫄ꪋ ꪄꪱꪥ ꪜꪱ ꪘꪉꪰ ꪜꪱ ꪮꪺꪙ ꪁꪷ ꪣꪸ ꪄꪴ ꪨꪱꪀ ꪤꪉꪸ, ꪶꪔꪀ ꫄ꪋ ꪵꪔ ꪡꪱ ꪠꪲ ꪭꪴꪉ ꪵꪔ 3 ꫃ꪋ ꪭꪯꪒ 5꫃ꪋ ꪨꪷ ꪥꪉꪰ, ꫄ꪡꪙ ꪨꪱꪥ ꪨꪷ ꪄꪱꪥ ꪜꪱ ꪙꪮꪥ. ꪝꪉꪳ ꪔꪱꪉ ꪜꪱ ꪙꪲ ꪨꪷ ꪼꪫ ꫃ꪥꪒ ꪜꪱ ꫃ꪁꪣ ꪹꪚꪱ ꪁꪷ ꪔꪱꪀ ꪶꪄ ꪵꪀꪉ ꫃ꪥꪒ ꪹꪋꪉ ꪀꪲꪙ ꪻꪬ ꪎꪒꪰ ꪎꪉꪲ, ꪁꪱ ꪄꪱꪥ ꪖꪴꪀ ꪀꪲ ꪝꪽ ꪢꪽ ꪢꪮꪥ ꫄ꪀꪙ ꪶꪖꪥ. ꫃ꪕꪉ ꪁꪣꪾ ꪨꪷ 3 ꫃ꪋ ꪊꪉꪰ ꪶꪔꪀ ꫃ꪋ ꪣꪸ ꪜꪱ ꪀꪴꪉ ꪻꪐ ꪄꪱꪥ ꪹꪏꪉ ꪜꪱ ꪊꪣꪾ ꪀꪷ, ꪜꪱ ꪼꪙ ,ꪜꪱ ꪩꪉꪰ. ꪨꪱꪥ ꪶꪔ ꪜꪱ ꪘꪀꪰ ꪵꪔ 7 ꪭꪮꪒ 10 ꫄ꪀꪙ ꫛ ꪏꪳ  ꪕꪷ ꪵꪭꪉ ꪹꪩꪀ ꪋꪮꪙ.

          ꪘꪉꪰ ꫄ꪋ ꪜꪱ ꪜꪱꪀ ꪮꪺꪙ ꪫꪱ ꪔꪙꪳ ꪹꪋꪱ ꪣꪲ ꪕꪷ ꪵꪎ ꪼꪢ ꪶꪄꪙ ꪋꪙꪸ ꪜꪱ, ꫃ꪕꪉ ꪁꪣꪾ ꪣꪱ ꪭꪳ ꪩꪺꪙ ꪕꪰ ꪵꪎ ꪶꪕ ꪎꪚꪸ ꪭꪱꪉ ꪭꪲ ꪼꪫ ꪖꪱ ꪏꪳ ꪜꪱ, ꪀꪴꪉ ꪶꪄꪙ ꪋꪙꪸ ꪼꪜ ꪄꪱꪥ ꪘꪉꪰ ꪨꪱꪥ ꪚꪮꪙ ꪮꪙꪳ. ꪕꪮꪥ ꪝꪉꪳ ꫛ ꪁꪱ ꪢꪮꪥ ꪣꪳ ꪣꪸ ꪵꪔ 5 ꪭꪯꪒ 6 ꫄ꪔꪙ ꪜꪱ ꪼꪒ ꪋꪙꪸ ꪼꪜ ꪁꪒꪳ ꪣꪱ ꪖꪴ ꫄ꪐꪚ ꪵꪔꪒ ꪕꪉꪸ ꪣꪱ ꪻꪬ ꫛ ꫄ꪤꪙ ꪘꪉꪰ ꪘꪲ. ꪠꪺ ꪣꪸ ꪯꪱꪥ ꪁꪫꪱꪉ ꪪꪽ ꪹꪎꪉ ꪤꪴ ꪚꪱꪙ ꪋꪮꪀ ꪄꪺꪙ ,ꪎꪱ ꪹꪣꪉ ꪥꪱꪉ ꪵꪔ ꪕꪮꪚ ꪬꪮꪣ ꪜꪱ ꪀꪴꪉ ꪘꪉꪰ ꪘꪲ ꪵꪔ ꪨꪱꪥ ꪜꪲ ꪢꪱ ꪻꪬ ꪭꪴ ꪬꪺ ꪣꪺ ꪭꪳ ꪢꪮꪥ ꪹꪚꪙ ꪁꪒꪳ ꪼꪒ ꪖꪴ ꫄ꪑꪚ ꪵꪔ 4 ꪭꪮꪒ 5 ꪋꪫꪸ ꪢꪽ; ꪬꪮꪒ ꪣꪺ ꪶꪔ ꪀꪴꪉ ꪡꪮꪙ ꪹꪏꪉ ꪼꪅ ꪙꪲ ꪁꪷ ꪼꪒ ꪶꪁꪚ ꪕꪷ. ꪶꪔ ꪜꪱ ꪶꪔ ꪀꪴꪉ ꪒꪱꪉ ꪨꪷ ꪖꪴ ꫄ꪑꪚ ꪊꪉꪲ ꪻꪬ ꫄ꪡꪙ ꪨꪱꪥ ꫛ ꫃ꪤꪙ ꪘꪉꪰ ꪀꪺꪉ ꪚꪱꪙ. ꪄꪴ ꪒꪱꪉ ꪣꪺꪙ ꪶꪋꪣ ꪭꪳ ꫛ ꪁꪱ ꪢꪱ ꪏꪳ ꪀꪚꪾ ꪚꪮꪙ, ꪁꪱ ꪁꪮꪙ ꪄꪱꪥ ꪁꪷ ꪵꪔꪒ ꪕꪉꪸ ꪹꪚꪱ ꪹꪋꪱ ꪎꪉꪰ ꪭꪮꪒ ꪚꪮꪙ ꪄꪱꪥ.

          ꪹꪚꪱ ꪋꪳ ꪭꪀꪸ ꪨꪷ ꪚꪮꪙ ꪏꪳ ꪚꪮꪙ ꪄꪱꪥ ꪜꪱ ꪀꪴꪉ ꪩꪱ, ꪩꪺꪉ ꪜꪱꪀ ꪙꪺ ꪬꪺ ꪣꪺꪙ ꪄꪮꪉ ꫛ ꪏꪳ ꫛ ꪄꪱꪥ- ꫄ꪋ ꪜꪱ ꪜꪱꪀ ꪮꪺꪙ ꪁꪷ ꪁꪒꪳ ꫃ꪜꪙ ꪄꪴ ꪅꪽ ꪩꪺꪉ ꪋꪽ ꪄꪮꪉ ꫛ ꫄ꪥꪙ ꪶꪠꪉ ꪭꪲꪣ ꪙꪣꪾ ꪀꪫꪉꪲ ꪐꪱꪥ.

                                                                                                                         ꪶꪬꪉ ꪫꪒꪸ-ꪬꪫꪙꪸ ꪥꪲꪀ