ꪒꪙꪸ ꪚꪙꪸ - ꪣꪺ ꪚꪮꪀ ꪚꪱꪙ ꪼꪄ ꪤꪮꪙ
ꪭꪉꪴ ꪹꪭ ꪅꪽ ꪋꪽ! ꪯꪽ ꪘꪲ ꪨꪷ ꪁꪫꪱꪣ ꪐꪽ ꪵꪥꪉ ꪊꪉꪴ ꪄꪮꪉ ꪨꪱꪥ ꪵꪄꪀ ꪤꪴ ꪩꪀꪲ ꪼꪒ ꪄꪙꪳ ꪣꪱ ꪤꪱꪣ ꪒꪙꪸ ꪚꪙꪸ ꪀꪺꪉ ꪣꪺ ꪙꪲ. ꪩꪚꪸ ꪼꪜ ꪕꪮꪥ ꪝꪉꪳ ꪹꪎꪸꪣ ꪊꪉꪲ ꪀꪺꪉ ꪵꪗꪉ ꪶꪠ , ꪝꪉꪳ ꪹꪋꪉ ꪵꪮꪚ , ꪹꪀꪷ ꪀꪫꪱꪙ… ꪄꪮꪉ ꪵꪗꪉ ꪶꪠ ꪒꪙꪸ ꪚꪙꪸ ꪠꪴ ꪵꪀꪉ ꪨꪱꪥ ꪭꪫꪙꪸ, ꪖꪲ ꪎꪱ ꪁꪷ ꪹꪬꪸꪙ ꪕꪷ ꪚꪮꪀ ꪚꪱꪙ ꪒꪱꪉ ꪹꪜꪸꪉ ꪹꪙꪉ ꪼꪄ ꪤꪮꪙ.
ꪹꪮꪥ Lo Thị Nhung, ꪤꪴ ꪚꪱꪙ ꪘꪮꪉ ꪐꪱꪤ , ꪎꪱ ꪵꪖꪉ ꪹꪎꪉ , ꪭꪫꪙꪸ ꪒꪙꪸ ꪚꪙꪸ ꪻꪬ ꪭꪴ, ꪀꪺꪉ ꪁꪫꪱꪣ ꪶꪕ ꪄꪮꪉ ꪠꪴ ꪼꪕ , ꪚꪱꪙ ꪨꪷ ꪋꪳ ꪄꪮꪉ ꪑꪲꪉ ꪎꪱꪫ ꪼꪕ ꫜ ꪅꪽ ꪋꪽ. ꪙꪱꪉ ꪁꪷ ꪣꪀꪰ ꪵꪣꪙ ꪵꪀꪫꪙ ꪁꪫꪱꪣ ꪀꪚꪰ ꪋꪱꪥ ꪚꪱꪫ ꪀꪺꪉ ꪚꪱꪙ , ꪬꪱꪀ ꪫꪱ ꪮꪱꪥ ꪹꪯꪸꪣ ꪭꪳ ꪎꪱ ꪨꪱꪥ ꪭꪉꪰ ꪣꪲ ꪹꪏꪉ ꪙꪽ ꪁꪷ ꪄꪱ ꪙꪱꪉ ꪻꪬ ꪹꪭꪙ ꪡꪸ, ꪹꪭꪙ ꪕꪱꪫ. ꪙꪱꪉ ꪹꪚꪱ ꪶꪎꪣ ꪻꪊ ꪹꪏꪉ ꪙꪽ ꪁꪷ ꪵꪕꪫ ꪝꪱꪥ ꪎꪸ ꪹꪭꪙ ꪼꪫ ꪼꪜ ꪎꪱꪫ ꫛ ꪹꪊꪱ ꪣꪀꪰ. ꪼꪜ ꪨꪱꪥ ꪙꪱꪉ ꪮꪫꪸ ꪵꪭꪉ ꪥꪙꪸ ꪶꪩꪣ ꪶꪩꪉ. ꪚꪮꪙ ꪙꪱꪉ ꪔꪱꪥ ꪨꪉꪰ ꪙꪽ ꪶꪜꪉ ꪄꪙꪳ ꪀꪷ ꪼꪣ ꫜ ꪣꪲ ꪚꪮꪀ ꪒꪮꪙ ꪵꪀꪈ ꪨꪉꪰ ꪥꪱꪙ ꫜ ꪔꪱꪈ ꪀꪷ ꪙꪲ ꪁꪷ ꪶꪜꪉ ꪼꪜ ꪕꪺ ꪶꪠꪉ. ꪭꪱꪉ ꪜꪲ ꪁꪳ ꪭꪮꪒ ꪣꪺ ꪎꪺꪙ ꪨꪷ ꪔꪱꪉ ꪚꪮꪀ ꪙꪲ ꪁꪷ ꪹꪜꪸꪉ ꪹꪙꪉ ꪼꪄ ꪤꪮꪙ , ꪹꪏꪉ ꪙꪽ ꪔꪱꪉ ꪚꪮꪀ ꪙꪲ ꪼꪒ ꪝꪲ ꪙꪮꪉ ꪵꪄꪀ ꪨꪷ ꪚꪮꪀ ꪚꪱꪙ.
ꪀꪚꪰ ꪩꪺꪉ ꪜꪙꪴ ꪹꪜꪸꪉ ꪼꪄ ꪄꪴ ꪅꪽ ꪩꪺꪉ ꪋꪽ ꪄꪮꪉ ꪚꪮꪀ ꪚꪱꪙ , ꪐꪽ ꪵꪁꪉ ꪮꪲ ꪉꪸ ꪣꪱ ꪕꪱꪉ ꪹꪉꪙ ꪩꪱꪉ ꪪꪽ ꪬꪫꪱ ꪄꪮꪉ ꪚꪮꪀ ꪚꪱꪙ ꪀꪺꪉ ꪜꪺꪉ ꪀꪲꪙ ꪹꪓꪷꪥ ꪤꪴ ꪄꪮꪉ ꪋꪴ ꪹꪋ ꫛ ꪔꪉꪲ ꪒꪙꪸ ꪚꪙꪸ, ꪵꪔ ꪜꪲ 2014 ꪔꪉꪲ ꪒꪙꪸ ꪚꪙꪸ ꪁꪷ ꪣꪲ ꪩꪺꪉ ꪜꪙꪴ ꪶꪔ ꪊꪀꪳ ꪜꪱꪉ ꪶꪭꪥ ꪚꪮꪀ ꪚꪱꪙ ꪀꪺꪉ ꪹꪚꪙ 3 ꪭꪱꪉ ꪜꪲ, ꪵꪔ ꪙꪽ ꪼꪫ ꪻꪬ ꪔꪉꪲ ꪒꪙꪸ ꪚꪙꪸ ꪹꪜꪸꪉ ꪼꪄ ꪄꪴ ꪅꪽ ꪩꪺꪉ ꪋꪽ ꪣꪱ ꪕꪱꪉ ꪹꪉꪙ ꪩꪱꪉ ꪪꪽ ꪬꪫꪱ ꪄꪮꪉ 19 ꪹꪋ ꫛ ꪀꪺꪉ ꪔꪉꪲ ꪭꪮꪒ ꪵꪄꪀ ꪤꪴ ꪩꪀꪲ ꪀꪺꪉ ꪹꪣꪈ ꪵꪀꪉ ꪹꪣꪉ ꪙꪮꪀ.
ꪵꪔ ꪨꪱꪥ ꪜꪲ ꪀꪱꪥ ꪣꪱ, ꪔꪉꪲ ꪒꪙꪸ ꪚꪙꪸ, ꪀꪷ ꪶꪔ ꪊꪀꪳ ꪜꪴꪀ ꪀꪷ ꪚꪱꪙ, ꪀꪚꪰ ꪤꪱꪫ 5 ꪝꪽ ꪀꪷ ꪩꪚꪸ ꪼꪜ ꪕꪮꪥ ꪹꪎꪸꪣ ꪕꪱꪉ ꪵꪔ ꪵꪗꪉ ꪶꪠ ꪒꪙꪲ ꪚꪙꪸ ꪠꪴ ꪣꪱ ꪭꪮꪒ ꪝꪴ ꪡꪱ ꪒꪲꪙ ꪵꪀꪉ ꪘꪉꪰ ꪋꪴ ꪭꪫꪙꪸ, ꪋꪴ ꪹꪋꪉ ꪵꪮꪚ , ꪶꪠꪉ ꪹꪤꪷꪙ ꪤꪴ. ꪭꪱꪉ ꪜꪲ ꪔꪉꪲ ꪋꪲ ꪎꪚꪳ ꪔꪱꪣ ꪤꪮꪣ ꪹꪉꪷꪙ ꪶꪀꪀ ꪼꪫ ꪜꪴꪀ ꪀꪷ ꪚꪱꪙ , ꪹꪥꪸꪒ ꪹꪜꪸꪙ ꪋꪳ ꪎꪉꪸ ꪦꪉꪸ ꪄꪮꪉ ꪔꪉꪲ ꪤꪴ ꪕꪱꪉ ꪒꪲꪙ ꪝꪴ ꪹꪚꪉ ꪚꪀꪰ ꪙꪲ.
Viết bình luận