Pưng bón ma ỉn dàm du lịch ngươn lang chiên lang Điện Biên

Nẳng pưng bón biền mài ngươn lang chiên lang xương: Tựơng đài lang pẹ ngươn lang chiên lang Điện Biên Phủ, pu A1, Bảo tàng Điện Biên Phủ, Khùm đìn Đờ-cát, cau Mương Thành dan nị cọ mi lài côn ma ỉn dàm bấng le, đắn ảnh. Khék ma nẳng nị lỏ pưng cựu chiến binh chôm hặp chiến dịch Điện Biên Phủ; học sình, sình viền tàng nả hẳư pùn pàn lan nóm é xáo hụ ma tang lang pẹ dỏn tiếng họt chu mương tênh phén đìn. Phằư cọ phòng chào nặm tà tốc chơ đảy ma dàm pưng bón biền mài ngươn lang chiên lang cạt kiên cắp pưng lang pẹ xênh xa khòng quần cánh dần hau cón nị 63 pì.

Cựu chiến binh Điện Biên Phủ Phạm Thắng 85 pì, ma té Hà Nội, cón nị lỏ chiến sỹ Trung đoàn 102, Trung đoàn thủ đô, men Đại đoàn 308, lằng 63 pì chắng đảy táo cưn ma dàm nả trận mưa pì xưn hẳư hụ: Cuồng chiến dịch Điện Biên Phủ, lung pọm cắp pưng  chiến sỹ cuồng tiểu đội bék bộc phá khửn mưa pu A1, tiểu đội khòng lung 11 côn hư chuốp tài 9 côn. Mự nị đảy ma dàm nả trận mưa pì xưn hền Điện Biên Phủ piến mắư, lung cọ chứ ờn pưng pi nọng khòng lung lay kinh đút lượt vạy Điện Biên mi đảy mự nị.

Lẹo đối cắp ưởi Nguyễn Lan Hương, ma té Hải Phòng cánh va cọ men tưa cốc khoẹ đảy ma cá Điện Biên chơ đảy pày dàm pưng bón biền mài ngươn lang chiên lang Điện Biên Phủ mưa pì xưn cánh đảy phăng pưng quam tô khòng pưng cựu chiến binh ưởi cánh chu côn cuồng đoàn cọ phòng chào nặm tà tốc cánh hền hung nả ma tà.

Toi biền mài té bảo tàng Điện Biên Phủ, cuồng pưng mự nị, pằn pâng pày mỏi mự mi hạng păn vặt khék ma dàm nẳng pưng bón biền mài ngươn lang chiên lang Điện Biên Phủ. Danh đù cuồng mự 7/5 khék ma ỉn dàm nhăng chí lài khửn.

Pả Vũ Thị Tuyết Nga, Phó giám đốc bản tàng Điện Biên Phủ hẳư hụ: vạy tủm pua hẳư dan nị, nọk 10 thuyết minh viên chính, bảo tàng Điện Biên Phủ nhăng tọp hôm tứm 15 cán bộ, đảy ép học pưng luông hụ xiêng cánh cài kiểm tra pày họt pưng bón biền mài ngươn lang chiên lang vạy chuông hong pưng đoàn khék.

Nọk nặn ók, Bảo tàng Điện Biên Phủ cọ hẳư tứm côn vạy tọn tăm nẳng pưng bón biền mài ngươn lang chiên lang họt tênh căm chơ mết khék ma dàm; phát chỉa chiên páo tống páo ma tang nặm đìn, phủ côn Điện Biên cánh giới thiệu pưng bón xự sắm hẳư khék du lịch. Cuồng dan mi lài khék ma dàm, tênh mết cán bộ, nhần viền chí đảy tọp hôm ma vạy chuông hong lang áo khòng khék./.

Vũ Lợi-Huyền dịch

 ꪝꪉꪳ ꪚꪮꪙ ꪣꪱ ꪮꪙꪲ ꪤꪱꪣ ꪤꪴ ꪩꪀꪲ ꪹꪉꪙ ꪩꪱꪉ ꪋꪙꪸ ꪩꪱꪉ ꪓꪙꪸ ꪚꪙꪸ

ꪘꪉꪰ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪹꪏꪉ: ꪹꪕꪉ ꪒꪱꪥ ꪩꪱꪉ ꪹꪝ ꪒꪙꪸ ꪚꪙꪸ ꪠꪴ, ꪝꪴ A1, ꪚꪱꪫ ꪔꪱꪉ ꪩꪱꪉ ꪵꪝ ꪓꪙꪸ ꪚꪙꪸ ꪠꪴ, ꪄꪴꪣ ꪒꪙꪲ ꫄ꪒ ꪁꪱꪒ ,ꪹꪁꪱ ꪹꪣꪉ ꪵꪖꪉ ꪥꪱꪙ ꪙꪲ ꪁꪷ ꪣꪲ ꪨꪱꪥ ꫛ ꪣꪱ ꪮꪙꪲ ꪤꪱꪣ ꫄ꪚꪉ ꪵꪩ ,ꪒꪽ ꪵꪮꪉ. ꪵꪄꪀ ꪣꪱ ꪘꪉꪰ ꪘꪲ ꪨꪷ ꪝꪉꪳ ꪁꪫꪲ ꪊꪙꪸ ꪚꪉꪲ ꪶꪋꪣ ꪭꪚꪾ ꪊꪙꪸ ꪥꪀꪲ ꪓꪙꪸ ꪚꪙꪸ ꪠꪴ; ꪭꪮꪀ ꪎꪉꪲ ꪎꪉꪲ ꪪꪙꪸ ꪔꪱꪉ ꪘꪱ ꪻꪬ ꪜꪴꪙ ꪜꪱꪙ ꪩꪱꪙ ꪘꪮꪣ ꪵꪮ ꪎꪱꪫ ꪭꪴ ꪣꪱ ꪕꪱꪉ ꪩꪱꪉ ꪵꪝ ꪤꪮꪙ ꪔꪉꪸ ꪭꪮꪒ ꪋꪴ ꪹꪣꪉ ꫃ꪕꪉ ꪵꪠꪙ ꪒꪙꪲ. ꪻꪠ ꪁꪷ ꪠꪮꪉ ꪊꪱꪫ ꪙꪣꪾ ꪔꪱ ꪶꪔꪀ ꫄ꪋ ꪼꪒ ꪣꪱ ꪤꪱꪣ ꪝꪭꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪁꪱꪒ ꪁꪙꪸ ꪀꪚꪾ ꪝꪭꪳ ꪩꪱꪉ ꪵꪝ ꫃ꪏꪉ ꪏꪱ ꪄꪮꪉ ꪀꪺꪙ ꪵꪀꪉ ꫄ꪥꪙ ꪹꪭꪱ ꪀꪮꪙ ꪙꪲ 63 ꪜꪲ.

ꪁꪫꪲ ꪊꪙꪸ ꪚꪉꪲ ꪓꪙꪸ ꪚꪙꪸ ꪠꪴ ꪠꪱꪣ ꪖꪉꪰ 85 ꪜꪲ ꪣꪱ ꪵꪔ ꪭꪱ ꪶꪙꪥ, ꪀꪮꪙ ꪙꪲ ꪨꪷ ꪊꪙꪸ ꪎꪲ ꪊꪴꪉ ꪒꪫꪱꪙ 102 ꪨꪉꪰ 63 ꪜꪲ ꪊꪉꪰ ꪼꪒ ꪔꪱꪫ ꪁꪳꪙ ꪣꪱ ꪤꪱꪣ ꪘꪱ ꫄ꪋꪙ ꪹꪣ ꪜꪲ ꪏꪙꪳ ꪻꪬ ꪭꪴ: ꪀꪺꪉ ꪊꪙꪸ ꪥꪀꪲ ꪓꪙꪸ ꪚꪙꪸ ꪠꪴ, ꪩꪴꪉ ꪝꪮꪣ ꪀꪚꪾ ꪊꪙꪸ ꪎꪲ ꪀꪺꪉ ꪔꪫꪸ ꪶꪒꪥ ꪵꪚꪀ ꪶꪛꪀ ꪠꪱ ꪄꪙꪳ ꪹꪣ ꪝꪴ A1, ꪔꪫꪸ ꪶꪓꪥ ꪄꪮꪉ ꪩꪴꪉ ꪣꪲ 11 ꫛ ꪭꪳ ꪊꪺꪚ ꪔꪱꪥ 9 ꫛ. ꪣꪴ ꪙꪲ ꪼꪒ ꪣꪱ ꪤꪱꪣ ꪘꪱ ꫄ꪋꪙ ꪹꪢ ꪜꪲ ꪏꪙꪳ ꫃ꪬꪙ ꪓꪙꪸ ꪚꪙꪸ ꪠꪴ ꪜꪙꪸ ꪖꪱꪥ ꪨꪱꪥ ꪥꪮꪉ ,ꪩꪴꪉ ꪁꪷ ꪊꪳ ꫄ꪮꪙ ꪝꪲ ꪙꪮꪉ ꪄꪮꪉ ꪩꪴꪉ ꪼꪩ ꪁꪉꪲ ꪒꪴꪀ ꪹꪩꪒ ꪼꪫ ꪓꪙꪸ ꪚꪙꪸ ꪣꪲ ꪼꪒ ꪣꪳ ꪙꪲ.

ꪵꪩꪫ ꪶꪒꪥ ꪀꪚꪾ ꪹꪮꪥ ꪈꪫꪙꪸ ꪩꪱꪙ ꪹꪭꪉ ꪣꪱ ꪵꪔ ꪬꪱꪥ ꪠꪮꪉ ꪵꪀꪉ ꪫꪱ ꪁꪷ ꪵꪣꪙ ꪵꪕ ꪶꪀꪀ ꪵꪅꪫ ꪼꪒ ꪢꪱ ꪁꪱ ꪓꪙꪸ ꪚꪙꪸ ꫄ꪋ ꪼꪒ ꪼꪜ ꪤꪱꪣ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪓꪙꪸ ꪚꪙꪸ ꪵꪀꪉ ꪼꪒ ꪡꪉꪰ ꪁꪫꪱꪣ ꪶꪕ ꪄꪮꪉ ꪝꪉꪳ ꪁꪫꪲ ꪊꪙꪸ ꪚꪉꪲ ꪹꪮꪥ ꪵꪀꪉ ꪋꪴ ꫛ ꪀꪺꪉ ꪒꪫꪱꪙ ꪁꪷ ꪠꪮꪉ ꪊꪱꪫ ꪙꪣꪾ ꪔꪱ ꪶꪔꪀ ꪵꪀꪉ ꫃ꪬꪙ ꪭꪴꪉ ꪘꪱ ꪣꪱ ꪔꪱ.

ꪕꪮꪥ ꪚꪙꪸ ꪢꪱꪥ ꪵꪔ ꪚꪱꪪ ꪔꪱꪉ ꪓꪙꪸ ꪚꪙꪸ ꪠꪴ ꪀꪺꪉ ꪝꪉꪳ ꪣꪴ ꪙꪲ ꪜꪽ ꫄ꪝꪉ ꪼꪜ ꪢꪮꪥ ꪣꪳ ꪣꪲ ꪭꪱꪉ ꪝꪽ ꪫꪒꪰ ꪵꪄꪀ ꪢꪱ ꪤꪱꪣ ꪘꪉꪰ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪓꪙꪸ ꪚꪙꪸ ꪠꪴ.

ꪜꪱ ꪫꪴ ꪖꪲ ꪔꪫꪒꪸ ꪉꪱ ꪠꪷ ꪤꪱꪣ ꪶꪒꪀ ꪚꪱꪫ ꪔꪱꪉ ꪓꪙꪸ ꪚꪙꪸ ꪠꪴ ꪼꪬ ꪭꪴ: ꪼꪫ ꪔꪴꪣ ꪝꪺ ꪻꪬ ꪥꪱꪙ ꪙꪲ ꪙꪮꪀ 10 ꪖꪫꪒꪸ ꪣꪉꪲ ꪊꪉꪲ ,ꪚꪱꪫ ꪔꪱꪉ ꪓꪙꪸ ꪚꪙꪸ ꪠꪴ ꪑꪉꪰ ꪕꪮꪚ ꪶꪭꪣ ꪔꪣꪳ 15 ꪀꪱꪙ ꪶꪛ ꪼꪒ ꪵꪮꪚ ꪭꪮꪒ ꪝꪉꪳ ꪩꪺꪉ ꪭꪴ ꪏꪉꪸ ꪼꪜ ꪭꪮꪒ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꪼꪫ ꪋꪺꪉ ꪭꪮꪉ ꪝꪉꪳ ꪒꪫꪱꪙ ꪵꪄꪀ.

ꪙꪮꪀ ꪙꪽ ꪮꪮꪀ, ꪚꪱꪫ ꪔꪱꪉ ꪓꪙꪸ ꪚꪙꪸ ꪠꪴ ꪁꪷ ꪻꪬ ꪔꪣꪳ ꫛ ꪼꪪ ꪕꪮꪙꪤ ꪕꪣꪾ ꪘꪉꪰ ꪝꪉꪳ ꪚꪮꪙ ꪚꪙꪸ ꪢꪱꪥ ꪹꪉꪙ ꪩꪱꪉ ꪋꪙꪸ ꪩꪱꪉ ꫄ꪋ ꫃ꪕꪉ ꪁꪣꪾ ꫃ꪢꪒ ꪵꪄꪀ ꪣꪱ ꪤꪱꪣ; ꪠꪱꪒ ꪊꪸ ꪋꪙꪸ ꪜꪱꪫ ꪶꪔꪉ ꪜꪱꪫ ꪣꪱ ꪕꪱꪉ ꪙꪣꪾ ꪒꪙꪲ ,ꪠꪴ ꫛ ꪓꪙꪸ ꪚꪙꪸ ꪵꪀꪉ ꫄ꪤꪥ ꪖꪫꪸ ꪝꪉꪳ ꪚꪮꪙ ꪏꪳ ꪎꪣꪾ ꪻꪬ ꪵꪄꪀ ꪤꪴ ꪩꪲꪀ. ꪀꪺꪉ ꪥꪱꪙ ꪣꪲ ꪨꪱꪥ ꪵꪄꪀ ꪣꪱ ꪤꪱꪣ ꫃ꪕꪉ ꫃ꪢꪒ ꪀꪱꪙ ꪶꪛ ,꫄ꪐꪙ ꪪꪙꪸ ꪋꪲ ꪼꪒ ꪕꪮꪚ ꪶꪭꪣ ꪣꪱ ꪼꪫ ꪋꪺꪉ ꪭꪮꪉ ꪩꪱꪉ ꪮꪱꪫ ꪄꪮꪉ ꪵꪄꪀ.

ꪬꪫꪙꪸ ꪥꪀꪲ