Hmâ lăm a hngêi pơkeăng kân Kơpong Tây Nguyên pôa Mai Thanh Nhàn, a cheăm Hòa Thắng, pơlê kong kơdrâm Ƀuôn Ma Thuột, kong pơlê Dak Lak, tối, pôa hâk ro khât ‘na tơdroăng ki pơhlêh tung mâu rôh chêh bro mơ-éa vâ khăm pơlât:

“Nôkố chêh inâi khăm pơlât gá tơ’lêi hlâu khât ƀă hiăng rĕng tâ hên hdrối nah hên. Nah cho xo kơxô̆ mê nếo rak theh ƀaoh hiêm, klêi kơ’nâi châ ƀok thái pơkeăng khăm klêi mê nếo chu a tíu ki vâ nâp liăn ƀă xo theh ƀaoh hiêm mê gá mơhrê hên chôu. Nôkố xúa tiô túa ki kố gá tơ’lêi hlâu ƀă rĕng”.

Bro tơ’lêi hlâu má môi ăm ngế ki châi tamo, hnoăng cheăng hơ’lêh kơxô̆ hiăng châ Hngêi pơkeăng Kân Kơpong Tây Nguyên tơbleăng tung hên tơdroăng, môi tiah: chêh inâi khăm pơlât ƀaoh hiêm khăm pơlât ƀă căn cươc kuăn pơlê krâ chip, hbru hoă đơn điê̆n tưh, nâp liăn ôh tá kal nâp liăn mâ, krếo xo hâi khăm tung ứng dụng ƀă hên ki ê.

Tiô pôa Nguyễn Trí Dũng, ngế xiâm pơkuâ kong ngê̆ thong tin, mâu hlá mơ-éa hành chính công, yă nâp liăn khăm pơlât ƀă xúa ứng dụng cong ngê̆ thong tin pơrá tơbleăng tơdrăng:

“Phần mềm pơkuâ ngăn nếo kố gá tơ’lêi hlâu ăm mâu ngế ki châi tamo lăm troh khăm ƀă pơlât xua vâi ôh tá êa râng mâu mơ-éa prôk ƀă. Ing mê, hngêi pơkeăng xuân xúa châ hên tơdroăng môi tiah ki tơdrăng, mâu tơdroăng kal dêi ƀaoh hiêm khăm pơlât gá rak tơniăn”.

Nôkố rêm hâi, Hngêi pơkeăng kân Kơpong Tây Nguyên tơdah vâ chê 1.500 ngế ki châi tamo troh khăm rơtế ƀă lối 1.600 ngế ki châi tamo koi pơlât tung hngêi pơkeăng. Ƀok thái pơkeăng Trịnh Hồng Nhựt-Kăn phŏ pơkuâ Hngêi pơkeăng ăm ‘nâi, pơhlêh kơxô̆ hiăng pro pơxúa mâu tơdroăng pơhlêh tung mâu tơdroăng cheăng:

“Hngêi pơkeăng kân Kơpong Tây Nguyên hiăng tơbleăng tơdâng tơ’mô hên phần mềm vâ xúa ƀă ứng dụng tung khăm pơlât, xuân môi tiah pro ‘nâng ‘nâi mâu tơdroăng ki chêh bro mơ-éa, bro tơ’lêi hlâu ăm ngế ki châi tamo ƀă bro tơ’lêi hlâu ‘na hâi chôu ăm ƀok thái pơkeăng hên tâ vâ khăm pơlât ăm mâu ngế ki châi tamo”.

Pôa Nguyễn Hữu Vũ Quang, kăn phŏ pơkuâ Khu ngăn pơkeăng ƀă Khăm pơlât kong pơlê Dak Lak ăm ‘nâi, ôh ti krê ƀă hngêi pơkeăng râ kong pơlê, mê hnoăng cheăng pơhlêh kơxô̆ dế tơbleăng xúa tung tâi tâng kơvâ cheăng khăm pơlât a kong pơlê. Tâi tâng mâu tíu pêi cheăng khăm pơlât hiăng xúa phần mềm kum tung hnoăng cheăng pơkuâ ngăn, khăm pơlât, hnoăng cheăng pâk vaccine ƀă hên ki ê. Phần mềm pơkuâ ngăn khăm pơlât hiăng châ tơbleăng troh 185 to tíu khăm pơlât cheăm, bêng, pơlê kân.

Nôkố hiăng a 21 to tíu khăm pơlât châ xúa tơdroăng khăm, tiâ mơnhên ivá khăm pơlât ing hngế. Kơvâ khăm pơlât xuân hiăng tơbleăng phần mềm “Ƀok thái pơkeăng ăm rêm hngêi” vâ hơ’lêh xúa tơdroăng khăm pơlât ăm kuăn pơlê ƀă mơdêk ki rơkê, dâi dêi mâu kế tơmeăm xúa tung khăm pơlât a cheăm, tơring.

Pôa Nguyễn Hữu Vũ Quang, tối, tung la ngiâ ah, kơvâ ngăn pơkeăng ƀă khăm pơlât  Dak Lak pơtối hơ’lêh nếo troăng pêi cheăng, mơdêk ki xêt, ki tơƀrê pơkuâ hlối pơtối mơdêk rĕng tơdroăng hơ’lêh kơxô̆:

“Má môi cho mơjiâng tíu ki ‘măn rak mâu tơdroăng ki kal vâ ing tơdroăng ki chêh tối tơdroăng châi tamo điê̆n tưh dêi kuăn pơlê vâ tối mâu tơdroăng kố troh a mâu tíu xiâm rak vế tơdroăng kal tơnêi têa lơ mâu tíu khăm pơlât; Má péa nếo, cho mơjiâng tơdroăng pơkâ kơxô̆ tung kơvâ khăm pơlât kuăn pơlê xúa định danh điê̆n tưh VNEID tơkŭm mâu tơdroăng khăm pơlât ƀă tíu chêh ‘măn mâu tơdroăng kal tơnêi têa; Má 3, cho tơbleăng tơdrêng tơdroăng ing măng internet ăm kuăn pơlê ƀă khu mơdró, mơ-eăm tâi tâng tơdroăng cheăng tơdjuôm tung tâi tíu ai tŭm hlá mơ-éa tơdroăng kal”.