Tiô Tíu xiâm Séa ngăn mơdât pơreăng CDC kong pơlê Dak Lak, sap apoăng hơnăm 2024 troh nôkố, lâp tung kong pơlê xo lối 300 ngế tơngê lo mơheăm a 15/15 tơring, pơlê kong krâm, kong kơdrâm. Kơxô̆ mơngế tro tơngê lo mơheăm ki hên a pơlê kong kơdrâm Ƀuôn Ma Thuột, tơring Ea Kar ƀă Krông Pač.

Tiô tối tơdjuôm, Dak Lak dế mot tung rơnó mêi tơ’lêi ai pơreăng tơngê lo mơheăm xông tâ tú lâp lu. Pôa Hoàng hải Phúc, Ngế pơkuâ CDC Dak Lak ăm ‘nâi, vâ séa ngăn krâu kâi mơdât pơreăng tơngê lo mơheăm, kơvâ ngăn pơkeăng hiăng mơdêk tơrŭm ƀă mâu kơ koan chêh hlá tơbeăng hnê tối ‘na hbrâ mơdât pơreăng, mơdêk séa ngăn mơdât pơreăng tung kong pơlê, ngăn tíu ki lâi ai hên ngế tro tơngê lo mơheăm vâ teăm xôh pơkeăng kơdê pơreăng.