Xông tơpui a roh leh mê, teăng mâ Khu kăn xiâm pơkuâ hnê ngăn Đảng, Tơnêi têa, pôa Tô Lâm, Kăn xiâm hnê ngăn tơnêi têa pơtroh rơkong rơkâu troh tâi tâng khu rơxông chêh hlá tơbeăng, mơngế chêh hlá tơbeăng, kuăn pơlê ki ngăn pơchuât hlá tơbeăng tung tơnêi têa ƀă kong têa vâi ê mâu tơdroăng ki mơjo pâ, achê ‘na tuăn mơno, rơkong êng tối ki krâu khât, rơkong rơkâu hơniâp ro lĕm tro má môi ƀă koh rơkâu 122 ngế, khu ki chêh hlá tơbeăng hiăng châ tơdah xo Pri Hlá tơbeăng tơnêi têa roh má XVIII, cho Pri ki kân ó khât dêi Khu xiâm hnê ngăn ‘na Hlá tơbeăng ăm mâu ƀai hlá tơbeăng, pơ-ô mâu ngế ki chêh, khu ki chêh ai ƀai ki rơkê ó khât tung hơnăm 2023.

Kăn xiâm hnê ngăn tơnêi têa pơtối pơkâ thế, kal athế tơkuăm mơjiâng khu ki chêh hlá tơbeăng păng ‘nâng cho mâu ngế lêng dêi kơvâ mơhno túa lĕm tro, ‘na tuăn mơno, ai “ihiâm bâ eăng, mơno krúa lĕm, chêh tối trâu rơdâ”, “ai ihiâm mơno krá kâk, ai tuăn ngôa rơkê păng ‘nâng”.

Kăn xiâm hnê ngăn tơnêi têa xuân hiăng pơkâ thế Hlá tơbeăng thăm mơdêk ó rơdêi tung xúa pơhlêh túa pơtâng tơbleăng tiô kơlo kơxô̆ tung măng internet chal nếo, ƀă đi đo pơhlêh ki rơkê tơtro, dâi khât; mâu tơdroăng ki chêh tối tung hlá tơbeăng dêi kăch măng athế păng ’nâng chiâng mâu tơdroăng ki xiâm, ki châ loi khât tung măng internet. Veăng tơ’noăng a Pri Hlá tơbeăng tơnêi têa roh kố, Khu tơrŭm Chi hô̆i Rơ’jíu Việt Nam châ 2 pri A ƀă 1 pri C.