Ki hên mâu vâi o ăm ‘nâi hlo tơngah a dêi tơná ƀă hbrâ rơnáu vâ mot tung rôh tơ’noăng. Khu hnê mơhno hneăng tơ’noăng rêm râ pơkâ thế mâu tíu tơ’noăng pro tơ’lêi hlâu má môi vâ mâu vâi o ai hiâm mơno tơniăn tung plâ po tơ’noăng mơgêi râ má pái phôh thong hơnăm kố, kong pơlê Dak Lak ai lối 21 rơpâu ngế hok tro chêh inâi tơ’noăng a 33 to tíu tơ’noăng ƀă lối 870 lâm tơ’noăng a tâi tâng mâu tơring, pơlê krâm, pơlê kong kơdrâm.

Lối 3 rơpâu ngế kăn ƀô̆, thái cô ngăn tơ’noăng, ngế ki séa ngăn ƀă tŏng kum a mâu tíu tơ’noăng. Vâ hok tro ai hiâm mơno tơniăn, tơngah a dêi tơná tung plâ po tơ’noăng, pôa Phạm Đăng Khoa, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak, kăn phŏ Khu hnê mơhno hneăng tơ’noăng mơgêi râ má pái phôh thong râ kong pơlê pơkâ thế Khu hnê mơhno hneăng tơ’noăng rêm râ pro tơ’lêi hlâu vâ tŏng kum ăm vâi o.

-Lâm Đồng ai vâ chê 15.500 ngế hok tro kĭ tơ’noăng, tung mê, ai lối 2.500 hok tro mơngế hdroâng kuăn ngo. Vâ tơniăn hneăng tơ’noăng tơniăn, kơtăng, tro pơkâ ƀă tơ’lêi hlâu tung tơdroăng prôk lăm, kâ pơtê, Lâm Đồng hiăng xing xoăng 675 kơbong tơ’noăng a 39 tíu tơ’noăng a lâp mâu tơring, pơlê kong kơdrâm tung kong pơlê.

Tiô pôa Phạm S, Kăn phŏ hnê ngăn Vi ƀan kong pơlê Lâm Đồng, rơtế ƀă tơniăn mâu pơkâ tơmeăm khoăng, mơngế pêi cheăng pêi hnoăng cheăng kum tơ’noăng, kong pơlê ối tơtrŏng tung tơdroăng rak tơniăn troăng klông, krúa lĕm tơmeăm kâ, tíu kâ, tíu ối pơtê ăm hok tro hơhngế hngêi. Nôkố tŭm tơdroăng hbrâ châ ngăn hiăng kêi đeăng tâi tâng, hbrâ vâ tơkŭm po hneăng tơ’noăng tơniăn lĕm, kơtăng, tơdrăng, ôh tá tơdjâk pa kong ƀă tro pơkâ.