Tiô tơdroăng pêi cheăng kơxo kố, Kuô̆k hô̆i têk kŏng môi tuăn tơbleăng ăm pêi pro 2 tơdroăng tơkêa bro luât, mê cho: Luât Ƀaoh hiêm pơlê pơla (‘mâi rơnêu); Luât pơkuâ, xúa pháu hnêa, tơmeăm pơtôu ƀă tơmeăm tŏng kum (‘mâi rơnêu); Luât ‘mâi rơnêu, tơ’nôm mâu troăng dêi Luât tơnêi tơníu, Luât hngêi ối, Luât tê mơdró tơnêi, Luât Mâu khu ăm mung liăn.

Kuô̆k hô̆i xuân têk kŏng môi tuăn tơbleăng Pơkâ ‘na tơdroăng châ tơƀrê séa ngăn tơdroăng pêi cheăng “tơdroăng pêi pro Pơkâ dêi Kuô̆k hô̆i ‘na troăng hơlâ liăn ngân, liăn tŏng kum tơdroăng rak tơniăn, mơnhông cheăng kâ – rêh ối pơlê pơla ƀă mâu pơkâ dêi Kuô̆k hô̆i ‘na mâu tơdroăng tơkêa bro ki kal tơnêi têa troh hơnăm 2023”; Pơkâ ‘na kơ-êng ƀă tiâ rơkong kơ-êng.

Pakĭng mê cho Pơkâ Hneăng hôp má 7, Kuô̆k hô̆i hneăng má XV (tung mê ai tơdroăng xiâm ‘na pơhlêh troăng hơlâ mơ’no liăn cheăng Tơdroăng pơkâ xiâm tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo hneăng hơnăm 2021 – 2030; kơdroh xo hnoăng mơhá tơmeăm to kơnâ; pêi pro pơhlêh liăn khế; troăng pơkâ hâi khế chêl chĕn ƀă kơxô̆ liăn mung vêh xing xoăng liăn ngân ƀă mâu tơdroăng xiâm tơdjâk troh tơdroăng xúa kơxô̆ liăn mơdêk xo hnoăng liăn ngân tơnêi têa hơnăm 2023. Pôa Trần Thanh Mẫn, Kăn xiâm hnê ngăn Kuô̆k hô̆i xông tơpui mơgêi Hneăng hôp má 7.