Pơlê kong krâm Ƀuôn Hồ, kong pơlê Dak Lak ai lối 100 rơpâu ngế, ƀă 25 hdroâng kuăn ngo rơtế rêh ối, tung mê ai vâ chê 31% cho mơngế hdroâng kuăn ngo. Pêi pro tơdroăng tŏng kum hdroâng kuăn ngo ƀă troăng hơlâ hdroâng kuăn ngo, tung 5 hơnăm hiăng hluâ, pơlê kong krâm Ƀuôn Hồ hiăng tơkŭm po 20 roh hnê mơhno, tơbleăng cheăng pêi, lăm pêi cheăng ngi kong têa ê ƀă vâ chê 3.000 ngế veăng, tung mê tơdế cho mơngế hdroâng kuăn ngo.

Tơkŭm po 27 lâm hnê cheăng pêi ăm vâ chê 1.000 ngế pêi cheăng thôn pơlê cho mơngế hdroâng kuăn ngo ối tung rơpŏng kơtiê, rơpŏng vâ chê kơtiê kal vâ hriâm cheăng pêi. Mâu hơnăm hiăng hluâ, pơlê kong krâm Ƀuôn Hồ châ xing xoăng vâ chê 20 rơtal liăn vâ pêi pro mâu tơdroăng tơkêa bro mơ’no liăn cheăng, mơjiâng hngêi trăng troăng ăm mâu pơlê, tăng tơnêi ối, hngêi ối, tơnêi pêt mơjiâng tơmeăm, têa ôu hum rôh jiếo ăm mâu pơlê pá puât; tŏng gum hnê cheăng pêi ăm droh rơtăm.

Troăng klông troh a pơlê kong krâm xuân hiăng châ mơjiâng pro krá; tâi tâng kuăn pơlê châ xúa on tơhrik ƀă têa krúa lĕm. Tơdroăng rak vế ƀă mơnhông khôi túa lĕm hdroâng kuăn ngo châ tơmâng mơ’no liăn. Tơdroăng mơjiâng khu cheăng kal kí ƀă hnê mơjiâng, hnê tơ’nôm, mơjiâng khu kăn ƀô̆ cho mơngế hdroâng kuăn ngo châ tơmâng hên. Pôa Y Čing Mlô, Kăn phŏ hnê ngăn Vi ƀan pơlê kong krâm Ƀuôn Hồ tối ăm ‘nâi: pơlê kong krâm pơtối mơhnhôk mâu kơxô̆ liăn ing tơnêi têa troh kong pơlê vâ tơkŭm mơ’no liăn mơnhông cheăng kâ – rêh ối pơlê pơla ăm mâu pơlê cheăm kơpong hdroâng kuăn ngo.

“Tung la ngiâ Vi ƀan pơlê kong krâm tơkŭm po rơdâ pêi pro mâu hnoăng cheăng ki xiâm, mâu troăng hơlâ dêi Đảng, luât dêi Tơnêi têa tơmâng troh tơdroăng tŏng gum hdroâng kuăn ngo ƀă troăng hơlâ hdroâng kuăn ngo tung hneăng nôkố, mơ’no liăn pro hngêi trăng, troăng klông, cheăng kâ – rêh ối pơlê pơla vâ mơdêk kơlo rêh ối dêi kuăn pơlê. Tơkŭm mơnhông cheăng kâ - rêh ối pơlê pơla, hnê mơhno ăm kuăn pơlê xúa ki rơkê khoa hok kih thuât vâ mơdêk pêi lo liăn, tơmeăm dâi lĕm. Thăm tơniăn gâk kring kal kí, tơniăn lâp pơlê pơla’’.

Châ kong pơlê Kon Tum rah xo vâ mơnúa pêi pro, tơring Sa Thầy hiăng tơkŭm po châ tơƀrê Hneăng hôp kăn teăng mâ mâu hdroâng kuăn ngo roh má IV hơnăm 2024. Tơring tơkăng kong Sa Thầy, kong pơlê Kon Tum ai pơ’leăng mâ mơngế lối 54.000 ngế, tung mê, hdroâng kuăn ngo châ lối 57%, tơring ai 11 cheăm, pơlê kân ƀă 64 thôn, pơlê, tung mê, ai 45 thôn hdroâng kuăn ngo. Pêi pro tơdroăng pêi cheăng ƀă Khŏm pêi tung kơthô Hneăng hôp kăn teăng mâ mâu hdroâng kuăn ngo roh má III pơkâ mơ’no, 5 hơnăm hiăng hluâ mâu hdroâng kuăn ngo tung tơring hiăng tơrŭm môi tuăn, mơ-eăm kum mơdêk cheăng kâ – rêh ối pơlê pơla mơnhông.

Troh nôkố, tâi tâng troăng klông ing tíu xiâm tơring troh mâu cheăm ƀă 64 thôn, pơlê hiăng châ pro krá lĕm, tơniăn prôk lăm 2 rơnó mêi ƀă tô; tâi tâng mâu rơpŏng kuăn pơlê tung tơring châ xúa on tơhrik tơnêi têa; tâi tâng mâu cheăm, pơlê kân ai hngêi pơkeăng cheăm châ plâh tiô pơkâ; tơring ai 5 cheăm châ plah thôn pơlê nếo ƀă 1 cheăm châ plah thôn pơlê nếo ki hôm tâ; 7 thôn, pơlê châ mơnhên thôn, pơlê tiô túa nếo a kơpong hdroâng kuăn ngo.

Teăng mâ hdroâng kuăn ngo iâ mơngế hdroâng Rơ Măm troh veăng hneăng hôp, ngoh A Thái, Kăn pơkuâ hnê ngăn Chi ƀô̆, kăn pơkuâ pơlê Le, cheăm Mô Rai, tối ăm ‘nâi:

“Veăng Hneăng hôp kăn teăng mâ mâu hdroâng kuăn ngo tơring Sa Thầy roh má IV hơnăm 2024 á hâk tơngăm ‘nâng. Ƀă hnoăng cheăng cho kăn pơkuâ hnê ngăn chi ƀô̆, thôn trương á đi đo djâ troăng ahdrối tung tơdroăng mơhnhôk kuăn pơlê mơnhông cheăng kâ, pêt mơjiâng tơmeăm vâ pro tơniăn tơdroăng rêh ối. Ki rơhêng vâ tối cho pêi pro Mơgêi 08 dêi Khu kăn pơkuâ hnê ngăn Đảng pro pơhlêh troăng tơmiât, troăng pêi ƀă kuăn pơlê hdroâng kuăn ngo ƀă xăm kơklêa kơdroh kơtiê tah lôi mâu khôi hmâ ki ôh tá tro. Veăng hneăng hôp á hriâm hên túa ki rơkê, troăng pêi dêi mâu pơlê, mâu thôn, mâu cheăm ki ê ‘na mơhnhôk kuăn pơlê xúa tung tơdroăng rêh ối’’.

A hneăng hôp kăn teăng mâ mâu hdroâng kuăn ngo tơring Sa Thầy roh má IV, mâu kăn teăng mâ rơtế vêh mơnhên tơdroăng châ tơƀrê pêi pro tơdroăng cheăng hdroâng kuăn ngo ƀă kơthơ pơtroh thế mơ-eăm pêi pro Hneăng hôp roh má III; têk kŏng môi tuăn tơbleăng ăm pêi pro kơthơ pơtroh thế mơ-eăm pêi pro Hneăng hôp roh má IV ƀă pơkâ pơtối mơjiâng khu rŭm môi tuăn mâu hdroâng kuăn ngo; mơdêk ki dâi lĕm mơngế pêi cheăng mơngế hdroâng kuăn ngo; mơhnhôk, pêi pro tơdroăng cheăng ƀă xúa châ tơƀrê mâu kơxô̆ liăn, tơmeăm ki ai hlâu ƀă ki tơ’lêi hlâu dêi tơring; rak vế ƀă mơnhông ki kơnâ khôi túa lĕm vâi krâ nah mâu hdroâng kuăn ngo... Hneăng hôp rah xo 22 kăn teăng mâ lăm veăng Hneăng hôp mâu kăn teăng mâ mâu hdroâng kuăn ngo kong pơlê Kon Tum roh má IV hơnăm 2024.