Tơbleăng a rôh trâm mâ, pôa Phạm Minh Chính, Ngế pro xiâm hnê ngăn Chin phuh tối phiu ro, rơrêk tung hiâm mơno châ trâm mâu pú hmâ dêi kuăn pơlê Việt Nam, mâu ngế ki pơtối pêi hnoăng cheăng, ôh tá la lâi  pơtê ‘no hnoăng cheăng, pleăng hnoăng tơná ăm tơdroăng tơrŭm   cheăng pơla péa tơnêi têa Việt Nam - Hàn Quốc tung plâ 30 hơnăm hdrối mê hía nah. Teăng mâ Chin phuh, Ngế pro xiâm hnê ngăn tơnêi têa mơnê mâu khu tơrŭm cheăng, mâu ngế, mâu Hàn Quốc xua tơdroăng pâ dêi rơpó, tơdroăng veăng kum ƀă mâu tơdroăng mơ-eăm ‘măn ăm Việt Nam; hlối tối nhên tuăn pâ, tơdroăng nhoăm pâ dêi kuăn pơlê Việt Nam, khu kăn Việt Nam ƀă kong têa, kuăn pơlê Hàn Quốc.

Ngế pro xiâm hnê ngăn tơnêi têa tối Đảng, Tơnêi têa Việt Nam tơmâng khât tơdroăng tơrŭm cheăng ƀă Hàn Quốc. Ing mê, pêi tiô troăng rơhlâ tơniăn krê, pơkuâ dêi, hơniâp, tơrŭm tơrôa, tơrŭm hlối mơnhông, hên troăng, hên tơdroăng pêi cheăng, Việt Nam nhoăm tơrŭm cheăng ƀă Hàn Quốc ƀă púi vâ djâ tơrŭm cheăng péa tơnêi têa pơtối pơ’lêh, tơƀrê ƀă ton ta ah tơxâng ƀă tơdroăng tơrŭm cheăng tung tŭm tơdroăng.