Pơchuât a hneăng hôp Kuô̆k hô̆i tơbleăng 6 khế apoăng hơnăm kố, mơdêk GDP dêi Việt Nam chía mơnhông, tiô riân châ 5,8%. Mâu kăn tối tiah kố, 6 khế mơ’nui hơnăm maluâ xơpá, la tơngah tơdroăng pơkâ pêi châ mơdêk GDP plâ hơnăm 2024 châ 6,5%, kơnôm ing mâu tơdroăng pơkâ ki kal tŏng kum mơdêk rĕng ‘no liăn pêi cheăng tơdjuôm, kơvâ tê mơdró ƀă tê tơmeăm ngi kong têa ê pơtối ‘mâi mơnhông tơƀrê, malối cho mâu troăng hơlâ tŏng kum mâu tơdroăng pá puât ăm tơdroăng cheăng kâ pơtối châ Chin phuh hnê mơhno pêi pro kơtăng khât.

Vâ pêi châ tơdroăng mơdêk cheăng kâ 6,5% hơnăm 2024, ai mâu rơkong dêi mâu kăn Kuô̆k hô̆i tối tiah kố, kal pơtối kơjo kum tơdroăng ki kal ‘na liăn ngân dêi troăng hơlâ tŏng gum ‘na liăn ngân mơdêk tung tâ lâp plâi tơnêi; mơdêk ‘no liăn cheăng tơdjuôm rak tơniăn tro pơkâ ƀă tơkŭm, malối cho mâu tơdroăng tơkêa bro hngêi trăng, troăng klông ki kal. Pôa Trần Hoàng Ngân, ngế kăn Kuô̆k hô̆i Pơlê kong kân Hồ Chí Minh tối tiah kố:

“Pin ai ivá khŏm mơ-eăm ‘na tơdroăng kal kí, loi tung hơnăm kố pin kô ai ivá kâi pêi châ tơƀrê ki rơdêi mơdêk 6,5%. Pin pơtối tơbleăng mâu troăng hơlâ pêi ing apoăng hơnăm cho 12 hnoăng cheăng, tung mê ai 3 Troăng hơlâ mơnhông tơƀrê tung la ngiâ. Má môi cho ki tơƀrê ‘na troăng hơlâ pơkâ tiô troăng cho pin kô mơdêk rơdêi tơdroăng ki klâ râ xoăng hnoăng ăm mâu kong pơlê vâ mơdêk hiâm mơno pêi pro hbrâ rơnáu, kơhnâ rơkê dêi mâu kong pơlê. Má péa cho tơƀrê ‘na hngêi trăng, troăng klông, pin hiăng pêi pro mâu troăng hơlâ liăn ngân tŏng gum ăm ‘mâi mơnhông ƀă mơdêk cheăng kâ, thăm mơdêk ‘no liăn cheăng tơdjuôm ăm hngêi trăng troăng klông, malối cho mâu hngêi trăng, troăng prôk”.

Chin phuh pơkâ mơ’no mâu hnoăng cheăng, troăng hơlâ pêi ki kal, tung mê, hnoăng cheăng ki apoăng cho tơkŭm pêi pro klêi troăng hơlâ tŏng kum, luât, troăng hơlâ tŏng gum tơdrêng mâu tơdroăng ki pá puât, tơvâ tơvân ăm khu mơdró kâ, tŏng kum liăn ăm tơdroăng ki mơnhông cheăng kâ rêh ối pơlê pơla. Pôa Nguyễn Chu Hồi, ngế kăn Kuô̆k hô̆i Pơlê kong kân Hải Phòng tối tiah kố, tơdroăng pơkâ mơdêk GDP cho ing kong pơlê pêi lo:

“Má môi xuân cho athế rak tơniăn cheăng kâ kân. Má péa cho ing tơdroăng ki ai khât dêi péa hneăng apoăng, maluâ pin xơpá la hnê mơhno kơhnâ gá kal khât; tung pơla nôkố mê gá rế kal tâ nếo, tơdroăng ki môi tuăn ing Tơnêi têa chu troh a kong pơlê veăng tơdjuôm ivá ƀă rơtế prôk, athế châ pêi pro hơ’lêh ƀă mâu tơdroăng pêi ki nhên ƀă mâu tơdroăng pêi ai pơxúa a mâu kong pơlê, drêng mê pin nếo ai môi tơdroăng tơƀrê tơdjuôm ăm lâp tơnêi têa tiô túa ki tro ‘ló má môi”.

Xuân tung măng tĭng hdrối, Kuô̆k hô̆i hiiăng tơmâng ƀă tơpui tơno ‘na Hlá mơ-éa pơtroh ăm Chin phuh ‘na hơ’lêh liăn khế ing 1 rơtuh 800 rơpâu liăn tung môi khế tâk 2 rơtuh 340 rơpâu liăn tung môi khế ing hâi lơ 1/7/2024; rơnêu liăn khế kâ hiăng pơtê cheăng, kum ƀaoh hiêm xah hô̆i, kum kơjo ăm ngế ki ai hnoăng ƀă gum ing pơlê pơla. Mâu kăn hiăng môi tuăn ƀă Chin phuh ‘na pêi pro rơnêu liăn khế ing 1 rơtuh 800 rơpâu liăn môi khế tâk 2 rơtuh 340 rơpâu liăn môi khế, ƀă tối tiah kố, kố cho kơlo to ki tro tung pơla rơnêu liăn khế, gum pro hơ’lêh, mơdêk tơdroăng rêh ối ăm ngế ki châ kâ liăn, bro ivá mơdêk rơkê tung pêi cheăng ƀă tơƀrê tung tơdroăng cheăng. Trần Văn Lâm, kăn Kuô̆k hô̆i Bắc Giang tối tiah kố:

“Kơlo liăn khế tiô tối hdrối tâi tâng liăn khế ăm tơdroăng ki pêi pro hơ’lêh liăn khế tiô túa pơkâ chêh bro cho lối 900 rơpâu rơtal liăn. Xúa liăn ki mê vâ to liăn khế tiô liăn khế xuân to tiô liăn khế ki ton mê tâi tâng rêm ngế  ‘na ki xiâm pơrá to tâi, kô bro tơdroăng ki phiu ro”.

Ai mâu kăn ki ‘na pâ thế Chin phuh tơmâng ngăn troh mâu troăng hơlâ rak vế tơniăn liăn ngân pêi pro tơniăn, ton xŏn ƀă tơƀrê ‘na troăng hơlâ kum; thăm mơdêk pêi pro mâu troăng hơlâ hbrâ mơdât, pơkuâ ngăn ki kơnâ ‘na yă ƀă mâu troăng hơlâ kơdroh pro mơhrê klêi kơ’nâi to liăn khế. Pôa Lê Minh Nam, kăn Kuô̆k hô̆i ing Hậu Giang pơkâ thế:

"Pin xuân kal ai mâu troăng hơlâ rak vế tơniăn pêi pro kơdroh mâu tơdroăng ki tơdjâk ôh tá tro, malối kơdroh iâ má môi tơdroăng ki to liăn khế la yă tê mâu kế tơmeăm hlối to há, tơ’lêi pro kơdroh ki pơxúa dêi tơdroăng to liăn khế. Tung tơdroăng mê pâ thế Chin phuh séa ngăn mơnhên tối mâu tơdroăng ki tơdjâk troh môi tiah rôh to liăn khế hdrối gá ai tơdjâk troh mâu tơdroăng ôh tá tro, tơdjâk troh pro ôh tá chiâng kơnía ƀă bro mơhrê kế tơmeăm to kơnâ kal châ tơmâng ngăn tơ’nôm. Drêng to liăn khế xuân pro to tơ’nôm mâu tơdroăng ki roê xúa tơdjuôm, tơdjâk troh mâu tơdroăng ki pro kế tơmeăm to kơnâ xuân kal athế séa ngăn mâu tơdroăng tơdjâk troh yă tê mâu kế tơmeăm tung la ngiâ”.