Ki má môi dêi tơdroăng tŏng gum hdroâng kuăn ngo a pơlê kong kơdrâm Ƀuôn Ma Thuột cho tơdroăng rak vế ƀă mơnhông khôi túa lĕm tro mâu hdroâng kuăn ngo ƀă mơnhông ôm hyô. Hên pơlê dế chôa ‘nâng mơjiâng mâu khu ngê̆ nhân, vêh pro mâu tơdroăng pro tơmeăm ƀă kŏng tiô khôi vâi krâ nah, mơjiâng, vêh pro mâu hngêi tiô khôi vâi krâ nah chiâng mâu homestay, kơpong, tíu lăm ngăn vâ tơdah tơmối.

Pôa Trần Đức Nhật, Kăn phŏ hnê ngăn Vi ƀan pơlê kong kơdrâm Ƀuôn Ma Thuột tối ăm ‘nâi, ƀă troăng prôk la ngiâ mơjiâng Ƀuôn Ma Thuột chiâng tíu rêh ối krúa lĕm, kong kế lĕm krip – khôi túa lĕm tro, pơlê kong kơdrâm pơtối mơhnhôk kơxô̆ liăn mơ’no mơnhông cheăng kâ – rêh ối pơlê pơla mâu pơlê krá tơniăn, mơhnhôk kuăn pơlê mơnhông ivá, rŭm môi tuăn kum dêi pó vâ rak vế mâu ki kơnâ tiô khôi lĕm, mơjiâng khôi túa lĕm, mơdêk mơnhông ôm hyô.