Sap ing kơxo má lơ troh kơmăng, mehé kong tô râ ó lơ kơmăng hngíu râ ó, rơkong chuât ing loa mơ’no ing kối Hàm Rồng xuân đi đo chuât. Ngoh Ngô Khổng Tuấn Anh, 1 tung 4 ngế cheăng kih thuât tơdrêng mơ’no hyôh tối ăm ‘nâi: sap ing tíu mơ’no hyôh rơ’jíu, um tơvo châ xĕn ing pơlê kong kơdrâm Plei Ku to a kối Hàm Rồng, kơtăn mơ’no hyôh rơ’jíu um tơvi sap ing 40 – 50 km hiăng châ po rơdâ chiâng 80 – 100km, mơ’no hyôh lâp kong pơlê Gia Lai. Laga pơhlêh amê, tŭm 4 ngế thế pêi cheăng tung tíu hơngế dêi pó.

Tiô ngoh Ngô Khổng Tuấn Anh, mehé achê troăng kân 14 kơdrâm mơngế ƀă kơtăn pơlê kong kơdrâm Plei Ku bu 14 km, laga kối ngo Hàm Rồng cho rơhĭng rơhối, plâ hơnăm bu ai tô, khía, mêi lơ inôa. Ing chêng ngo troh tíu mơ’no hyôh rơ’jíu um tơvi cho rơnâk rơheah, xŏn lối 400 met, to chu ôh tá tơ’lêi hlâu ki klâi:

‘’Tung rơnó mêi, troăng tâk a ngo Hàm Rồng troăng hliâk, drêng hlá loăng hngó péa pâ tơruih a troăng kân, kơto rơxế cho pá puât. Hên roh kơto rơxế hliâk, ching iăng ngiâ hdrối ƀă kơtong, drô troăng mê rơhing rơhối, ôh tá ai ngế prôk lăm. Á xuân mơ-eăm mơdâng rơxế ối tâng ƀă to a tíu mơ’no hyôh ăm tro chôu pơkâ vâ pơcháu tơdroăng cheăng ăm nhŏng o. Pá puât laga á xuân mơ-eăm pêi lĕm tro hnoăng cheăng’’.

Ngoh Trần Thiên Thế xuân cho ngế ki cheăng ‘na kih thuât mơ’no hyôh rơ’jíu, um tơvi hiăng hên hơnăm tơrŭm ƀă tíu hrik mơ’no hyôh rơ’jíu um tơvi Hàm Rồng. Ngoh tối ăm ‘nâi, ngoh rơtế khu pú pêi cheăng hiăng hmâ ƀă tơdroăng rêh ối, pơtê tung toăng hngêi râ má pŭn, kŭn a tíu hrik mơ’no hyôh rơ’jíu um tơvi, ƀă roh kâ hmê tơ’lêi hlâu. Laga tơdroăng ki tô tuăn tơro têa tung rơnó mêi ƀă chếo kong tung rơnó tô, pơtối đi đo gâk ngăn, pêi cheăng, xua Hàm Rồng xŏn môi tiah trăng hrik tơro têa ƀă tâ tá cho kong loăng hngó tơ’lêi chếo.

“Mê cho hơnăm ki lâi xuân ai tơro têa, drêng mê ôh tá têi, ai drêng tro lŭp kân, rơnó khăng khoăng tơ’lêi ai tơdroăng chếo hlá pêi a kong rơtâ tá. Ai tơdroăng ki ôh tá mo mê kô hbrâ pơhlêh dêi pó pêi cheăng. Rơnó mêi khía mơhot mâu tơdroăng ki tơ’nhê ‘na kih thuât hmâ ai, drêng mê môi ngế kô pá vâ rơnêu chiâng tơdroăng cheăng. Ôh tá êa gâk pêi cheăng, laga drêng ai tơdroăng ki tơ’nhiê mê nhŏng o hbrâ lôi dêi tơdroăng cheăng a hngêi vâ tơkŭm lăm a tíu hrik mơ’no hyôh rơ’jíu tŏng kum vâ rơnêu kơmăi tơ’nhê’’.

Pôa Nguyễn Khắc Quang, Kăn phŏ pơkuâ rơ’jíu – um tơvi kong pơlê Gia Lai tối ăm ‘nâi: tâi tâng mâu tơdroăng mơ’no tung um tơvi, rơ’jíu a kong pơlê pơrá kơnôm a Tíu hrik mơ’no hyôh Hàm Rồng vâ troh ƀă mâu ngế ki tơmâng ngăn. Vâ chê 1 hơnăm kố, rơ’jíu – um tơvi kong pơlê Gia Lai ai tơ’nôm hnoăng cheăng nếo cho mơ’no ƀâng rơ’jíu tơnêi têa VOV1 ƀă VOV4, chôu mơ’no 19 chôu rêm hâi. Mơhé ối hơngế kơtăn tíu xiâm, tơdroăng pêi cheăng pá puât ƀă ai hên tơdroăng ki rơ-iô, laga mâu ngế cheăng ‘na kih thuât a tíu hrik mơ’no hyôh pơrá mơ-eăm tơkâ hluâ, pêi kêi đeăng hnoăng cheăng châ pơcháu.

“Rơ’jíu pro tơ’lêi hlâu tơmâng tŭm tơmeăm tá ‘na kế tơmeăm khoăng xuân môi tiah hiâm mơno, ai troăng mơhnhôk ăm nhŏng o tơ’nôm vâ nhŏng o ai kơxô̆ liăn pakĭng liăn mơhá dêi rơ’jíu tối tơdjuôm. Lối 1 hơnăm kố Rơ’jíu Việt Nam djâ kơmăi mơ’no rơ’jíu ƀâng VOV4 mot, tơdrêng amê tơdah hyôh dêi VOV1 nếo, mê tâng vâ tối ƀă ƀă tơdroăng cheăng dêi ngin cho phiu ro, tơxâng ro drêng ai kơmăi nếo, tơdroăng ki dâi lĕm mơ’no hyôh cho lĕm tơtro. Pá kơdâm Kƀang, kơpong đông kăch măng tâng cho lĕm ‘nâng. Ing mê, kuăn pơlê châ tơmâng hên tơdroăng ki tro lĕm, cho phiu ro ‘nâng ăm nhŏng o tơmâng rơ’jíu a kong pơlê Gia Lai tối tơdjuôm ƀă lâp kơpong rơtâ tá’’.

Kơmăng troh, kong prâi hngíu ó dêi kối ngo Hàm Rồng, mâu kăn ƀô̆ pơkuâ kơmăi hrik mơ’no hyôh dêi Rơ’jíu um tơvi Gia Lai xuân pêi cheăng, preăng ai mơngế châ ‘nâi. Vâi tơkâ hluâ tơdroăng pá puât, môi ngế xêh pêi cheăng vâ veăng kum djâ tơdroăng troh ƀă vâi krâ kuăn pơlê tơmâng rơ’jíu, ngăn um tơvi achê hơngế.