Klêi hên rôh mơđah tơbleăng a pơlê kong kơdrâm Ƀuôn Ma Thuột ƀă mâu tơring tung kong pơlê Dak Lak, nếo a chê kố, ca kịch, pin tối rơngê rơngối pro pơro ki ton xŏn “Khát vọng Dam Săn” hiăng mơđah hơdruê a ngiâ dêi hên hĭn mâu kuăn pơlê ƀă mâu ngế ki hâk vâ tơmâng, ngăn ‘na hơdruê ngê̆ thuât Pơlê kong kân Hồ Chí Minh. Ƀai hơdruê xua nhak sih Nguyễn Cường chêh bro tiô kơ Tơdroăng rơngê rơngối Dam Săn dêi hdroâng Rơđế, chêh tối ‘na um méa ngế ngoh khên tơnôu Dam Săn ƀă tơdroăng ki rơhêng vâ mơjiâng pơlê cheăm ƀă rak vế hdroâng kuăn ngo ó rơdêi. Ngế rơtăm inâi cho Dam Săn hiăng châ ngế Droh xeăng Mâ hâi vâ, djâ tơvế tơdroăng bâ eăng ăm pơlê cheăm, bro chiâng tơdroăng hâk vâ ƀă rêh ối a ngo ngối kong Tây Nguyên krip tơdrŏm. Jâ Lưu Thị Hoa, a Pơlê kong kân Hồ Chí Minh tối:

“Rôh apoăng á ngăn hơdruê pro pơro rơngê rơngối Khát vọng Dam Săn, á hlo ro khât. Ing nah á ngăn hên cải lương, hơdruê pro pơro la tá hâi hlo môi rôh ki hơdruê pro pơro ki lâi ro môi tiah kố. Ngế ngoh khên tơnôu hdroâng kuăn ngo Dam Săn ai hiâm mơno lĕm, ai ivá rêh ối khên tơnôu, krip tơdrŏm ƀă hiăng pro tơdjâk tung lâp lu tơnêi têa vâ rêm ngế kuăn pơlê tiô ƀối”.

Ƀai hơdruê pro pơro xua mâu diễn viên Khu hơdruê xuăng hdroâng kuăn ngo Dak Lak mơđah. Tung mê, ngế ki bro rơtăm Dam Săn cho Nghệ sĩ ưu tú Y Joel Knul ƀă bro H’Nhí (kơdrâi ngế rơtăm Dam Săn) xua kơdrâi ngoh cho ca sih H’Lueng Niê bro.

Nghệ sĩ ưu tú Y Joel Knul tối, ing tơxĭn nah ngoh hiăng châ hmâng jâ pôa rơngê rơngối, hơ’muăn tối ƀă hâk vâ khât kơ ngế ngoh Dam Săn xua hiâm mơno khên tơnôu, hlâ rêh xua pơlê cheăm. Xua mê, drêng châ veăng tung rôh pro pơro, ngoh hâk phiu ƀă hâk tơngăm. Rêm rôh mơđah, maluâ cho rôh pơtâp, ngoh pơrá hơdruê mơđah tâi hiâm mơno. Mâu tơdroăng túa lĕm tro dêi pâ pôa nah hiăng mot tung hiâm mơno.

“Á bro ngế rơtăm Dam Săn, ai hên tíu á hlo ƀriê tung hiâm mơno khât, xua môi tiah á mot tung tơdroăng rêh ối dêi ngế ki mê, mâu tơdroăng klâi ki ngế ki mê trâm. Hlo mâu tơdroăng ki pleăng, hlâ rêh, malối cho tíu ki têk kŏng xuân ƀriê tung hiâm mơno, tíu ki H’Nhí hmuâ ƀă kâ kŏng Dam Săn gá ƀriê khât, á lo têa mâ. Um méa chiâng vâ tối gá tơ’lêi la drêng pin mơđah gá pá. Ki xiâm dêi hơdruê pro pơro dêi nhak sih Nguyễn Cường vêh xo ing tíu “Rơngê rơngối Dam Săn”ai hên tơdroăng ki phoih ƀriê, hơniâp ro”.

Tiô Nghệ sĩ ưu tú Y Joel Knul, apoăng ngế ki pro rơtăm Dam Săn châ pơcháu ăm môi ngế ki ê. La tung pơla trâm mâ ƀă mơnúa bro ngăn, nhak sih Nguyễn Cường hiăng xo ngoh bro ngế ki mơđah kố. Cho ca sih hlối cho ngế ki tôu, rêi mâu prôa, tôu hơkâ, drêng mơnúa ngăn túa ki mơđah kố, ngoh mơ-eăm hriâm tâp hên. Xua mê, drêng ƀai hơdruê pro pơro “Khát vọng Dam Săn” châ mơđah ƀă châ kuăn pơlê hâk kơdeăn, mê cho môi tơdroăng ki mơnhông tung tơdroăng cheăng dêi ngoh.

Tung vâ chê 25 hơnăm pêi cheăng ƀă tung plâ 15 hơnăm pêi cheăng tung Khu ki hơdruê xuăng hdroâng kuăn ngo Dak Lak, Nghệ sĩ ưu tú Y Joel Knul hiăng pêi ƀlêi chiâng hên mâu tơdroăng, châ kâ hên pri a mâu rôh tơ’noăng, rôh mơđah tơbleăng tung tơnêi têa ƀă a kong têa ê. Môi tiah pri Hlái hơnăm2019 ƀă Pri Mêa hơnăm 2022 a Rôh mơđah hơdruê ASEAN, Pri Hâu a rôh hơdruê xuăng lâp tơnêi têa hơnăm 2021, ƀă hên ki ê. Nâ H’Su (in) Yn Ƀyă, a pơlê kong kơdrâm Ƀuôn Ma Thuột, kong pơlê Dak Lak hlo:

“Nghệ sĩ ưu tú Y Joel Knul hiăng djâ mâu ƀai hơdruê, mâu idrâp hơdruê dêi hdroâng kuăn ngo Rơđế, mâu idrâp hơdruê dêi ngoh gá ro tơviah krê, châ hên ngế ‘nâi troh. Rơhêng vâ ngoh hơdruê hên mâu ƀai hơdruê, pro pơro mâu ƀai hơdruê ki ro, rế tơviah tâ ăm kuăn pơle ki tơmâng”.

Jâ Nguyễn Thụy Phương Hiếu, kăn phŏ pơkuâ Khu ngăn túa lĕm tro, Tơ’noăng ivá ƀă Ôm hyô Dak Lak ăm ‘nâi, nghệ sĩ ưu tú Y Joel Knul châ pôk inâi nghệ sĩ ưu tú ing hơnăm 2015, drêng bu nếo châ 40 hơnăm, nôkố cho ngế ki nếo má môi tung 4 ngế ngê̆ sih ưu tú a kong pơlê. Ôh ti xê ai to rơkong hơdruê ro, têi dêi kuăn ngo Tây Nguyên, Nghệ sĩ ưu tú Y Joel Knul ối kơhnâ, hâk vâ khât ƀă hnoăng cheăng, đi đo mơ-eăm hriâm. Nôkố, Nghệ sĩ ưu tú Y Joel Knul hiăng ai tŭm mâu tơdroăng, xua mê, Khu ngăn túa lĕm tro dế chêh pro klêi hồ sơ pâ thế Tơnêi têa diâp ăm inâi Nghệ sĩ Nhân dân.

“Nghệ sĩ ưu tú Y Joel Knul xuân mơ-eăm tung hơdruê, tung tâi tâng mâu tơdroăng cheăng hơdruê xuăng dêi Khu ki hơdruê xuăng hdroâng kuăn ngo kong pơlê, rơtế ƀă Khu ki hơdruê xuăng mơjiâng môi khu pú hên tơrŭm ƀă rế hía rế mơnhông. Khu ngăn túa lĕm tro, Tơ’noăng ivá ƀă Ôm hyô xuân pro tơ’lêi hlâu vâ Nghệ sĩ ưu tú Y Joel Knul châ veăng hriâm tâp vâ rơkê má môi, ‘mot tơ’nôm tơdroăng châ mơnhên Nghệ sĩ Nhân dân tung la ngiâ”.

Ƀă mâu ivá mơ-eăm ƀă hâk vâ tung tơdroăng cheăng, Nghệ sĩ ưu tú Y Joel Knul hiăng ƀă châ tơƀrê hên mâu tơdroăng ki ƀlêi chiâng tung hnoăng cheăng hơdruê xuăng, châ xo hên tơdroăng ki hâk vâ dêi kuăn pơlê. Rơtế ƀă hơdruê, nôkố ngoh dế tơmiât tung tơdroăng hơdruê xuăng Tây Nguyên ƀă tơdroăng xuăng, ƀă tơngah châ krếo thế ƀă pro nếo mâu ƀai hơdruê xuăng ‘na Tây Nguyên, pro chiâng môi tơdroăng hơdruê xuăng nếo mơđah tơbleăng ăm kuăn pơlê ngăn.