A roh hôp tơpui tơno, jâ Linh Nga Niê Kdăm, Ngế hriăn plĕng khôi túa lĕm tro tối nhên, vâi kơdrâi cho ngế ki xiâm ki kal tung tơdroăng rak, pơcháu pơtâng mâu ki kơnâ dêi mâu hdroâng kuăn ngo. Ki rơhêng vâ tối, vâi kơdrâi tuăn ngôa rơkê Dak Lak, ƀă hnoăng dêi tơná, hiăng pêi lĕm tro hnoăng ƀă tơnêi têa, ƀă rơpŏng ƀă pơlê pơla.

A kong pơlê Dak Lak tung pơla kố nah hiăng ai hên troăng tơmiât pêi rơkê, tơmeăm hriăn plĕng khoa hok, tơdroăng pêi rak ƀă mơnhông mâu ki kơnâ khôi túa lĕm hdroâng kuăn ngo, mâu hdroâng kuăn ngo xua vâi kơdrâi pêi pro cho châ tơƀrê ƀă pơtâng tơdroăng ki hâk vâ troh lâp lu.

A hôp tơpui tơno, teăng mâ mâu kơ koan pơkuâ tơnêi têa xuân tối tơbleăng ‘na tơdroăng pơkuâ, hriăn plĕng vâ rak ‘măn, rak vế ƀă mơnhông khôi túa lĕm hdroâng kuăn ngo; tơdroăng pơtâng tối, mơhnhôk vâi kơdrâi, ki rơhêng vâ tối cho vâi kơdrâi hdroâng kuăn ngo veăng rak ƀă mơnhông khôi túa lĕm.