Ngoh A Rất Vu, a tôh kơphô̆ A Dinh, pơlê kân Prao, tơring Đông Giang pêt lối 4ha loăng nhĕn, kơnôm ing xúa kih thuât tung pêt, rak ngăn mê kơpong kong loăng nhĕn dêi ngoh hiăng xông kân lĕm. Rơnó kếo loăng hơnăm kố, ngoh A Rất Vu châ xo vâ chê 100 rơtuh liăn. A Rất Vu ăm ‘nâi, kơnôm pêt kong, rơpŏng hiăng hluăn ing kơtiê, tơniăn tung rêh ối. Tiô ngoh Vu: pêt loăng nhĕn kal bu iâ tê kơxô̆ liăn ‘no hrê gá bu tơbrêi tung pơla apoăng rak ngăn tê. Ngoh A Rất Vu ăm ‘nâi, nôkố rơpŏng pơxiâm pêt kong xo loăng kân:

“Hdrối nah, rơpŏng á chối báu a chiâk bu bê kâ rêm hâi, klêi kơ’nâi pêt loăng nhĕn tơdroăng rêh ối hiăng hơ’lêh tâ. Ing rôh ki Tơnêi têa ai troăng hơlâ pơkâ pêt kong xo loăng kân kuăn pơlê pêi pro kơhnâ khât. Ngin tơmiât hơ’lêh pêt kong xo loăng vâ mơnhông cheăng kâ tơniăn tâ. Khu kăn pơkuâ cheăm tơring xuân tơmâng ngăn tŏng kum vâi krâ nhŏng o mâu hdrê loăng pêt ki kân”.

Xuân môi tiah ngoh A Rất Vu, nâ A Lăng Thị Trang, hdroâng Cơ-tu a cheăm Ka Dăng, tơring Đông Giang pêt lối 6 ha loăng nhĕn. Nâ A Lăng Thị Trang ăm ‘nâi, kơnôm ing pêt kong, rơpŏng nâ hăng mơ-eăm chiâng rơpŏng chía niân. Laga, rơhêng vâ pêi lo châ tơƀrê ‘na liăn ngân ton xŏn, nâ hiăng hơ’lêh pêt kong loăng kân lối 2 ha tơnêi:

“Hơ’lêh pêt loăng kân vâ mơnhông cheăng kâ tơniăn tâ. Laga tung túa pơkâ pêt ton tâ tâng pơchông ƀă pêt loăng nhĕn la pơ’lêh cheăng kâ tơniăn tâ loăng nhĕn. Pêt loăng keo liăn ngân tơniăn tâ tâng pơchông ƀă pêt báu, alâi, troăng tơmiât tung la ngâ vâ pêt loăng pro kong a ƀăng tơnêi ki kân tâ vâ pin pêt. Tơdroăng rêh ối rơpŏng á nôkố hiăng chía niân tâ tâng pơchông ƀă nah”.

Tung pơla hdrối nah, Vi ƀan hnê ngăn tơring Đông Giang, kong pơlê Quảng Nam tơtrŏng po rơdâ ƀăng tơnêi pêt kong, châ xúa troăng ‘no liăn mơdêk ki dâi lĕm dêi kong ƀă hơ’lêh ing pêt kong kŭn chiâng pêt loăng kân. Rêm hơnăm, kong pơlê kố xing xoăng liăn ngân ing 1,5 troh 2 rơtal liăn kum kuăn pơlê mơdêk pêi chiâk, pêt kong tơƀrê, ki hên cho tơkŭm pêt kong loăng kân. Tơring Đông Giang hiăng kum kuăn pơlê pêt lối 500 ha kong loăng kân ƀă hên hdrê loăng pêt ki lĕm.

Tơring Đông Giang mơ-eăm troh 2025 mơdêk tâi tâng ƀăng tơnêi pêt kong loăng kân tâk troh 4.500 ha. Pôa Đỗ Hữu Tùng, Kăn phŏ hnê ngăn tơring Đông Giang ăm ‘nâi:

“Kố cho troăng hơlâ pơkâ tơtro dêi tơring xuân môi tiah dêi kong pơlê vâ mơhnhôk kuăn pơlê hdró păn pêt kong pro chiâng kong prâi kong rế hía rế mơnhông. Tung lâp tơring hiăng mơhnhôk kuăn pơlê pêt môi hơnăm iâ hlái cho 300 ha pêt kong loăng kân ƀă mâu túa hdrê loăng môi tiah loăng trĭng, loăng kía prăng, loăng karê tá loăng nhĕn pro tiah lâi châ rak vế ‘na kong kế kong prâi kong tơnăn ƀă ing mê hbrâ mơdât tơnêi tơhnah tơhnâp, kong mê khía mơhot. Ing mê, kuăn pơlê chiâng vâ rak vế ƀă pơkuâ ngăn kong tro tâ, mơnhông mơdêk cheăng kâ, xut tah hrâ mơnguâ kơtiê xơpá. Xo ah hmôi tơƀrê ing pêt kong loăng kân hên tâ ƀă pro pơxúa ăm kuăn pơlê pêi lo liăn tơniăn ton xŏn. Kô pêt hên tâ tung lâp lu tơring”.

A mâu tơring kong ngo kong pơlê Quảng Nam ai lối hrĭng rơpŏng kuăn pơlê Cơ-tu veăng pêt loăng nhĕn ƀă châ xo liăn tơniăn. Quảng Nam hiăng pơkâ hên troăng hơlâ mơhnhôk kuăn pơlê pêt kong hơ’lêh pêt ing pêt kong loăng kŭn chiâng pêt kong loăng kân kum kuăn pơlê rế mơnhông cheăng kâ, rế veăng kum rak vế kong prâi tơnêi tơníu. Châ ‘nâi, kong pơlê Quảng Nam ai lối 769 rơpâu ha kong ƀă tơnêi pơkâ pêt kong. Rêm hơnăm, loăng kong pêt tê ăm mâu ngế ki roê xúa tung tơnêi ƀă tê ngi kong têa ê dêi kong pơlê dâng 1,45 rơtuh met khô̆i, kum tăng cheăng pêi, kum kuăn pơlê peăng kong ngo hluăn ing kơtiê krá ton.