Mơdoh chôu pơtê kơhâi dế, ngăn dêi kơdrum pêt kơchâi drêh  ƀă po pông nếo pơla xiâm mâu ‘noăng  pêt trŏng ‘nhŭng plâi hên vâ tơniăn pơcháu ăm khu lăm rôe krí tung mâu hâi la ngiâ, đảng viên Ya Dũng, kăn thôn (La-bui A) Labouye A,  cheăm Lạc Xuân, tơring Đơn Dương (Lâm Đồng) ăm ‘nâi, hlo tơdroăng pêi cheăng tiô chal ton nah ôh tá tơƀrê, tá châ xo hên, drêng châ drêng ôh mê rơpŏng hngêi hiăng pêi cheăng tiô troăng rơhlâ cheăng ƀă kơmăi kơmok ki dâi lĕm.

Ƀă 4 sào tơnêi pêt kơchâi plâi tŭm túa, rêm rơnó gum ăm rơpŏng tơná châ xo  rơkâ lối 100 rơtuh liăn. Tiô Ya Dũng, sap ing pêi cheăng tiô túa ki mê hiăng kum hnê mơhnhôk ƀă rơkong tơpui dêi môi đảng viên môi tiah a kố châ kuăn pơlê loi:

“Á mơ-eăm hriâm hên tíu, ôh tá xê to a kố mê a hên kong pơlê ki ê. Hriâm ngăn vâi pêt loăng plâi, hdrê loăng plâi ki kố ki tá. Ƀă hnoăng cheăng dêi môi ngế hơnăm ối nếo la châ kuăn pơlê rah xo ngăn cho ngế ki kuăn pơlê nhoăm, cho ngế tung hô̆i đong mê thế mơ-eăm hriâm, tăng hriăn plĕng mâu túa ki nếo vâ pêi cheăng, môi tiah nôkố pin dế pêi cheăng tiô troăng ki nếo. Xua kuăn pơlê vâ rơtế ƀă dêi rơpó pêi cheăng rế xông tơƀrê’’.

Môi tiah, đảng viên K’Hiệu, ối a thôn 2, cheăm Đinh Trang Thượng, tơring Di linh (Lâm Đồng) xuân hiăng châ kuăn pơlê tung pơlê pin khên pơhlêh hdrê pêt  ing tơdroăng cheăng pêi nhên khât. K’Hiệu ăm ‘nâi, a hơnăm 2014, klêi veăng hriâm lâp hnê pơtối pêt kơphế xua kơvâ ngăn ‘na chiâk deăng kong pơlê po, pôa hiăng ko tah dêi kơphế hiăng krâ ôh tá ai plâi hên dêi rơpŏng hngêi ƀă pêt hdrê kơphế ki nếo. Klêi 3 hơnăm pêi cheăng tiô troăng rơhlâ pơhlêh, kơdrum kơphế K’Hiệu hiăng ai plâi hên, tê châ liăn hên. Hlo ki tơƀrê  ê, drêng kố kuăn pơlê tung pơlê nếo xúa pêi pro. Đảng viên K’Hiệu tối tiah kố, vâ kuăn pơlê pêi tiu mê tơná pin thế djâ troăng a hdrối, rơkong tơpui kŏng thế hlối pêi.

“Ƀă hnoăng cheăng đảng viên, cho kăn ƀô̆ dêi thôn, a mơ-eăm pơtối rak hnoăng cheăng dêi tơná a kong pơlê. Á mơhnhôk kuăn pơlê thế loi rak troăng rơhlâ dêi Đảng, luât tơnêi têa, mơhnhôk kuăn cháu thế mơ-eăm hriâm troh tui lui mê nếo hlê, ai tuăn rơkê vâ mơnhông pêi cheăng kâ, xuân môi tiah rak ngăn loăng kơphế xua khoa hok kih thuât tung pêt rak ngăn, vâ loăng plâi rĕng kân ƀă hnê kuăn pơlê tung thôn pêi mâu tơdroăng mơhhôk tơ’noăng pêi cheăng xua kong pơlê mơhnhôk”.

Tiô đảng Viên K’Lèn, Kăn hnê ngăn Chi ƀô̆ K’Long, cheăm Hiệp An, tơring Đức Trọng kong pơlê Lâm Đồng, hdrối nah, tơdroăng rêh ối dêi kuăn pơlê tung pơlê xơpá, pêi lo liăn kơnôm to ing pái sao báu pêi môi rơnó mê kơklêa đi đo. Kơnôm ai Đảng, Tơnêi têa tơmâng ‘no liăn pêi cheăng tŭm tơdroăng. Tơbleăng pêi hên tơdroăng luât pơkâ ‘no liăn cheăng, kơjo yă rôe mâu hdrê ƀă hnê kih thuât pêt rak ngăn, tơ’nôm ƀă hnê mơhnôk khu grup, măt trâ̆n mâu kăn rêm râ pơtối rak vế pêi pro hnoăng cheăng dêi đảng viên prôk hdrối, pơlê tiô kơ’nâi’’, kuăn pơlê tíu kô chôa pơ’lêh nếo, chôa lâng hriâm, xúa kơmăi ki dâi lĕm tung pêi lo pêi lo kế tơmeăm tiô troăng ki pơxúa tê châ liăn hên. Pôa K’Lèn, tối:

“Ki hdrối pin thế hbrâ hriâm vâ rơkê ăm tơná, thế hlê tŭm mâu troăng rơhlâ, luât pơkâ dêi Đảng ƀă Luât tơnêi têa mê nếo hnê tối, mơhnhôk ăm tơrêm ngế kuăn pơlê. Pakĭng mê, drêng pêi tơdroăng klâi pin xuân thế pêi ahdrối, pơtih pin pro hngêi nhĕng hngêi hlâm pêi cheăng pêt tơmeăm xúa kơmăi ki dâi lĕm vâ huăn pơlê hriâm ƀối. Tâng bú hnê tơpui ƀă rơkong mê kuăn pơlê ôh tá pâ tung tuăn, pin thế pêi tă kuăn ‘nĕng pin xuân veăng pêi há, drêng hlo tơƀrê mê kuăn pơlê nếo vâ pêi ƀối”.

Ƀă mâu túa pêi cheăng ăm hlo nhên, ai pơxúa dêi rêm ngế đảng viên tung tơdroăng pơtối rak vế hnoăng cheăng pêi a hdrối, djâ troăng a hdrối hnê tối, mơhnhôk kuăn pơlê, hnê kuăn pơlê mơnhông pêi chiâk vâ mơnhông tơdroăng rêh ối, hên túa pêi cheăng tơƀrê rế ton rế châ po rơdâ lâp lu kơpong kuăn ngo tung kong pơlê Lâm Đồng. Ing mê veăng ‘no hnoăng kal vâ kơxô̆ rơpŏng kuăn pơlê kơtiê hên troăng tung kong pơlê rế chu kơdroh ối 2%, tung mê, rơpŏng kơtiê mơnế kuăn ngo chu ối 5,6%.