Tiô tối hdrối rôh tơdroăng veăng kum hok tro tung mâu hâi tơ’noăng dêi Đoân Droh rơtăm Kŏng sản Hồ Chí Minh kong pơlê Gia Lai pơxiâm sap ing kơxo hâi lơ 26/6, troh tâi hâi tơ’noăng lơ 29/6. Tiô pơkâ, 310 ngế droh rơtăm tơ’noăng kô klâ chiâng 41 đô̆i, pêi hnoăng cheăng a 41 tíu tơ’noăng, a 17 tơring, pơlê kong krâm, kong kơdrâm tung lâp kong pơlê. Mâu đô̆i droh rơtăm kô lăm tơdah hok tro a mâu tíu tơ’noăng, kum hnê tối, mơhno troăng prôk, gum hok tro tung prôk lăm pơla tíu tơ’noăng ƀă troh a tíu ối, tăng, mơhno ăm hngêi ối pơtân tê kơtê, hngêi ối  yă rơpâ; tăng tíu kâ, ôu tơniăn krúa kế kâ.

Tơdrêng amê, a mâu troăng kân troăng xiâm vâ vâ troh a tíu tơ’noăng, droh rơtăm pleăng hnoăng cheăng xuân tơrŭm ƀă mâu khu râ pơkuâ cheăng gak drô troăng, ăm troăng prôk tơniăn tung mâu hâi tơ’noăng.