Rơpŏng nâ Lê Thị Thắm, a bêng Chiềng Cơi, pơlê kong kơdrâm Sơn La nôkố dế pêt vâ chê 2 ha mâu kơchâi tŭm túa. Tâng môi tiah hdrối nah nâ Thắm pá puât tơbrêi tơbrêh djâ kơchâi lăm kơchôu tê, yă tê ôh tá tơniăn, mê ing rôh ki nâ veăng tơrŭm tung khu pêi cheăng tơrŭm Pêt tơmeăm ngiât 26-3 a pơlê kong kơdrâm Sơn La, tâi tâng mâu kơchâi ki nâ pêi lo mê pơrá châ khu pêi cheăng tơrŭm tê tâi ƀă yă tê tơniăn. Pơxúa ing tơnêi kơdrum thông, hơpok lĕm vâ pêt mâu kơchâi krúa, rêm hơnăm rơpŏng nâ xuân ối châ xo vâ chê 200 rơtuh liăn tơkâ:

“Ing rôh ki tơrŭm tung khu pêi cheăng tơrŭm mê kơchâi ki á pêt hên tâ mê á ai tíu tê tơniăn, ôh tá kal lăm tê a kơchơ môi tiah hdrối nah xếo, yă tê péa pâ tơkêa ing apoăng gá tơnăn mê á tê, kơchâi á pêt tro tiô pơkâ dêi khu pêi cheăng tơrŭm”.

Klêi kơ’nâi 8 hơnăm tê ăm kơchơ tê mơdró tơmeăm pêi lo ing chiâk deăng krúa, khu pêi cheăng tơrŭm Pêt tơmeăm ngât 26/3 cho tíu ki châ tơngah khât tung pêt ƀă tê tơmeăm pêi lo ing chiâk deăng tơniăn a Sơn La. Ôh ti to tŏng kum pêt, tê tơmeăm krúa ăm 12 ngế tơrŭm ƀă rơpŏng kuăn pơlê tơrŭm, kố cho tíu ki hnê ‘na khoa hok kih thuât, kum kuăn pơlê hơ’lêh túa tơmiât, túa pêi tung pêi tơmeăm. Ngoh Trần Mạnh Hùng, a pơlê Nong Nái, cheăm Chềng Mung, tơring Mai Sơn ăm ‘nâi:

“Hdrối nah á pêt priât mê pêi châ liăn bu 5 rơtuh liăn môi khế, nôkố pêt kơchâi môi tiah kố pêt a tơnêi vâ chê 2 ha kố mê á pêi châ liăn dâng 7 rơtuh liăn môi khế. Ing khế 6 hơnăm nah á tơrŭm ƀă khu pêi cheăng tơrŭm hlo tơƀrê mơnhông mơdêk tâ. Khu pêi cheăng tơrŭm tŏng kum á hdrê pêt, phon rơvât ƀă kih thuât rak ngăn”.

Ƀă kơpong pêt lối 13 ha, rêm khế khu pêi cheăng tơrŭm 26/3 tê ăm kơchơ mơdró 30 – 40 tâ̆n kơchâi plâi pôm tŭm túa. Vâ tê tâ mâu tơmeăm pêi lo ing chiâk deăng, khu pêi cheăng tơrŭm hiăng ƀă dế rak tơbleăng 4 kơbong tê tơmeăm ngiât a kơchơ 7/11, kơchơ 308 ƀă kơchơ Rặng Tếch, pơlê kong kơdrâm Sơn La. Rak vế tơkêa ton hơnăm ƀă mâu tíu pế pơchên hmê kơchâi môi tiah hngêi pơkeăng, hngêi trung hriâm; tơdrêng amê hlối po rơdâ tíu tê tơmeăm pêi lo ing chiâk deăng krúa troh mâu siêu thĭ, kơchơ kân kơpong peăng Kơnhŏng. Mâu kế tơmeăm kơchâi plâi tơniăn dêi khu pêi cheăng tơrŭm pơrá a yă tê kơnâ tâ kơchơ mơdró dâng 20 – 30%, kơnôm mê tơdroăng pêt tơmeăm xuân hên tâ. Nâ Hoàng Thị Thắm, kăn phŏ khu pêi cheăng tơrŭm Pêi chiâk deăng ngiât 26-3 Sơn La tối:

“Tê tơmeăm ƀă khu pêi cheăng tơrŭm mê ngin ai hên tíu tê, má môi cho mâu tíu tê tung măng môi facebook, zalo ƀă mâu tíu tê mơdró điê̆n tưh. Ngin châ tê mâu kế tơmeăm ing mâu tíu ki mê xuân pro pơxúa tơƀrê khât, tơmối vâi roê tơmeăm ƀă ngin lăm chiân ăm, mâu tơdroăng hlo tơ’lêi hlâu khât. Tíu tê ki má 2 mê ngin tê offline a mâu tíu tê mơdró cho tơbleăng tê tơdrêng”.

Ƀă túa pêi ki rơkê kố, tơdroăng ki tơrŭm pêt ôh ti xê kum khu pêi cheăng tơrŭm po rơdâ túa pêt, hên mâu tơmeăm pêi lo ing chiâk deăng, ing mâu kế tơmeăm ki ối drêh troh kế tơmeăm hiăng uâ pơliê mê ối kum kuăn pơlê tê kế tơmeăm ƀă yă tơniăn. Môi tơdroăng cheăng kâ nếo châ mơjiâng, pro pơxúa ăm tâi tâng rêm pâ ki tơrŭm, ing mê, mơdêk cheăng kâ pêt tơmeăm ing chiâk deăng. Ngoh Nguyễn Đình Đại, pơlê Thống Nhất, cheăm Chiềng Mung, tơring Mai Sơn, kong pơlê Sơn La tối:

“Nôkố á ai plâi rơgá, trŏng pôm rơpê dế tơrŭm ƀă khu pêi cheăng tơrŭm. Drêng pin hiăng tơrŭm mê tíu tê mâu kế tơmeăm pêi lo ing chiâk deăng dêi pin gá kô tơ’lêi hlâu tâ, gá kô tơniăn tâ, rơdêi tâ”.

A mâu kơpong thôn pơlê dêi kong pơlê Sơn La, tơdroăng tơrŭm pêt tơmeăm châ ngăn cho túa pêi ki tơtro, tơƀrê tung tơdroăng hơ’lêh túa cheăng kâ, mơjiâng tíu tơrŭm pêt, mơdêk ki dâi lĕm dêi kế tơmeăm pêi lo ing chiâk deăng, pêi pro châ tơdroăng ki rơhêng vâ roê dêi kơchơ tê mơdró.