Kơxo lơ 25/6 (tiô chôu kong têa Sinuâ) a Đại Liên, kong têa Sinuâ, pôa Phạm Minh Chính, Ngế pro xiâm hnê ngăn tơnêi têa hiăng ai ƀai xông tơpui a Roh pơxiâm po tâi tâng Hneăng hôp kân tiah hmâ rêm hơnăm mâu mâu khu ki djâ troăng ahdrối roh má 15 dêi Hneăng hôp tơpui tơno Cheăng kâ lâp plâi tơnêi a Đại Liên (WEF Đại Liên) rơtế ƀăpôa Lý Cường, Ngế pro xiâm hnê ngăn kong têa Sinuâ, pôa Andrzej Duda, Kăn xiâm pơkuâ kong têa Ba Lan, pôaKlaus Schwab, Kăn hnê ngăn Hôp tơpui tơno Cheăng kâ lâp plâi tơnêi.

Rơtế xông tơpui a Roh pơxiâm po, pôa Phạm Minh Chính, Ngế pro xiâm hnê ngăn Chin phuh kheăn kơdeăn hnoăng djâ troăng ahdrối dêi tơdroăng cheăng kâ Sinuâ ƀă tơtêk cheăng kâ lâp plâi tơnêi. Cho kong têa ki achê, ‘’ngo achê ngo’’, ‘’têa kroăng achê têa kroăng’’, rơtế mơjiâng ‘’Pơlê pơla kum dêi pó tung la ngiâ Việt Nam – Sinuâ ai kơnâ troăng pêi cheăng ton xŏn’’, Việt Nam phiu ro ahdrối tơdroăng mơnhông dêi Sinuâ.

Việt Nam loi tơngah Sinuâ pơtối mơnhông hnoăng mơdêk mâu tơdroăng mơ-eăm tơtêk nếo; mơdêk ó rơdêi chuh ngiah hên troăng, thăm tơrŭm môi tuăn, tơrŭm lâp plâi tơnêi, rak tơdroăng hơniâp lĕm, tơniăn, tơrŭm cheăng, mơnhông kro mơdrŏng a kơpong ƀă lâp plâi tơnêi. Môi tơdroăng cheăng kâ Sinuâ mơ-eăm xêh, rơdêi, mot tơrŭm trâu rơdâ kô djâ mâu tơdjâk ki lĕm ăm lâp plâi tơnêi.